“Eadora Ñandejárape”

1, 2. a) ¿Mbaʼépa jadesidi vaʼerã enterove? b) ¿Mbaʼépa heʼi vaʼekue peteĩ ánhel iñumíldeva ojeadorasérõ guare chupe?

KÁDA uno ñambohovái vaʼerã ko porandu iñimportantetéva: “¿Mávapepa che aadoráta?”. Oĩta heta heʼíva ijetuʼuha oñembohovái upe porandu pórke oĩ hetaiterei rrelihión. Péro añetehápe ndahasyiete hína jaikuaa ha jaiporavo hag̃ua upéva: Jaadora Ñandejára Jehovápe térã Satanáspe.

² Satanás ningo oipotaiterei ojeadora chupe. Upéva ojekuaa porãiterei oñehaʼãrõ guare omoñuhã Jesúspe. Jahecháma haguéicha ko lívro kapítulo 1-pe, Satanás oofrese peteĩ mbaʼe oñeimoʼãʼỹva Jesúspe: Autorida ogoverna hag̃ua kompletoite umi goviérno oĩva ko yvy ape ári. ¿Ha mbaʼépa Satanás oipota vaʼekue? Haʼe oipota kuri Jesús ‘oñesũ henondépe ha una ves jepe oadora chupe’ (Mat. 4:9). Péro pe ánhel ohechauka vaʼekue pe visión apóstol Juánpe ndoipotaiete vaʼekue ojeadora chupe (elee Apocalipsis 22:8, 9). Apóstol Juan oadorasérõ guare pe ánhelpe, upe Ñandejára raʼy iñumildetéva heʼi chupe: “¡No! ¡Aníke ejapo upéva!”. Pe ánhel heʼi rangue chupe ‘cheadora katu’, heʼi chupe: “Eadora Ñandejárape”.

 3. a) ¿Mbaʼépa ojehupytyse ko lívro rupive? b) ¿Mbaʼépa jahecháta ko kapítulope?

³ ¿Mbaʼépa ojehupytyse hína ko lívro rupive? Ñamombarete pe ñane desisión jajapo hag̃ua pe ánhel heʼi vaʼekue: Jaadora Jehovápe añoiténte (Deut. 10:20; Mat. 4:10). Ko kapítulope jahecha jeýta mbykymi umi profesía ha visión oñemeʼẽ vaʼekue Ezequiélpe, ha mbaʼépa ñanemboʼe umíva pe adorasión verdadéragui. Upéi, la Biblia rupive jahecháta michĩmi mbaʼépa oikóta amo gotyove, ág̃a enterove persóna oĩva ko yvy ape ári ombohovái vove pe pruéva finál. Upéva hína peteĩ pruéva ohechaukátava mávapa osegíta oikove ohecha hag̃ua ág̃a ojeadora jey vove Jehovápe añoiténte pára siémpre.

 4. ¿Mbaʼépa hína umi mbohapy mbaʼe oñemyesakã porãva lívro de Ezequiélpe?

⁴ Ko lívro de Ezequiélpe jahecha kuri mbaʼépa jajapo vaʼerã ñameʼẽ hag̃ua Jehovápe pe adorasión haʼe oguerohorýva. Umíva hína: 1) Jaadora vaʼerã Jehovápe añoiténte, 2) jasegi vaʼerã en unida jaadorávo Jehovápe haʼe oipotaháicha, ha 3) jahechauka vaʼerã jahayhuha ñande rapichakuérape. Jahecháta mbaʼéichapa umi profesía ha visión oñeanalisáva ko lívrope omyesakã porã koʼã mbohapy mbaʼe.

5-9. ¿Mbaʼéichapa ñanemboʼe ko lívro jaadora vaʼerãha Jehovápe añoiténte?

⁵ Kapítulo 3:a Ezequiel ohecha peteĩ visión ijojahaʼỹva. Haʼe ohecha Jehová tróno oĩva umi keruvín ári, ha ohecha avei peteĩ árko íris Jehová jerére. Upe visión ñanemboʼe peteĩ mbaʼe iñimportantetereíva: Ñandejára Todopoderóso añoite omerese ojeadora chupe (Ezeq. 1:4, 15-28).

⁶ Kapítulo 5: Ezequiel oñeñandu vaieterei ohechávo peteĩ visiónpe mbaʼeichaitépa oñemongyʼa Jehová témplo. Pe visión ohechauka mbaʼeve nokañyiha Jehovágui. Ótro ndohecháiramo jepe, Jehová si ohecha ipuévlo naiñeʼẽrendúi jave chupe, por ehémplo oadora jave umi dios fálso. Jehovápe ningo omokorasõ rasy umi mbaʼe vai ojapóva hikuái, ha katuete okastigáta chupekuéra (Ezeq. 8:1-18).

⁷ Kapítulo 7: Umi nasión oĩva Israel jerére ‘odespresia’ vaʼekue Ñandejára puévlope (Ezeq. 25:6). Upévare Jehová okondena umi nasiónpe. Upéva ohechauka Ñandejára okovrataha umi nasión omaltratávape ipuévlope. Péro ñaaprende avei peteĩ mbaʼe Israel otrata lájagui umi nasiónpe: Siémpre ñandefiél vaʼerã Jehovápe, ha upéva ñamotenonde vaʼerã opa mbaʼe ári. Núnka ndajajapói vaʼerã peteĩ mbaʼe ndogustáiva Jehovápe japyta porãséguinte ñane parientekuérandi ndoservíriva Jehovápe. Avei ndajaikói vaʼerã jajerovia umi rrikésare ni ndajaikéi vaʼerã polítikape jaapojávo umi yvypóra goviérno, pórke péicha ñameʼẽta hína chupekuéra peteĩ mbaʼe Jehová añoite omereséva.

⁸ Kapítulo 13 ha 14: Pe visión ohechaukáva pe témplo oĩva peteĩ montáña ijyvatetereíva ári, ñanemboʼe jaiko vaʼerãha asegún umi mandamiénto ihústova Jehová omeʼẽva. Péicha jahechaukáta haʼe tuichaveha entéro umi ótro diósgui (Ezeq. 40:1–48:35).

⁹ Kapítulo 15: Israel ha Judápe oñekompara mokõi prostitútare. Upéva ñanemomanduʼa mbaʼeichaitépa ombojeguaru Jehovápe pe prostitusión espirituál, térã pe adorasión fálsa (Ezequiel, kap. 16 ha 23).

10-14. ¿Mbaʼéichapa ojehechauka porã jasegi vaʼerãha en unida jaadorávo Jehovápe haʼe oipotaháicha?

¹⁰ Kapítulo 8: Umi profesía oprometéva Jehová omoĩtaha “peteĩ pastór” oñangareko hag̃ua ipuévlore ohechauka peteĩ mbaʼe iñimportánteva: Enterove tekotevẽ jaservi Jehovápe en unida ha pyʼaguapýpe Jesús poguýpe (Ezeq. 34:23, 24; 37:24-28).

¹¹ Kapítulo 9: Ezequiel profesía omombeʼúva Ñandejára puévlo osẽtaha pe oĩhágui prisionéro Babilóniape ha oho jeytaha hetãme, oreko peteĩ mensáhe umi oĩ porãsévape g̃uarã Jehová renondépe. Umi omeʼẽva Jehovápe pe adorasión ipotĩva ohejaite vaʼerã pe rrelihión fálsa ha ndohejái vaʼerã upéva omongyʼa chupekuéra. Oĩramo jepe ñande apytépe oúva diferénte kultúra ha rrelihióngui, iplátava ha imboriahúva, lomímonte jasegi vaʼerã ñaime en unida, pórke péicha jahechauka ñande haʼeha Ñandejára puévlo (Ezeq. 11:17, 18; 12:24; Juan 17:20-23).

¹² Kapítulo 10: Pe visión oñeʼẽva umi kanguekue iséko veráva rehe, ohechauka porã Jehová siervokuéra oĩha en unida. ¡Ajépa tuichaite mbaʼe ñamoirũ haguére umi omeʼẽvape Jehovápe adorasión ipotĩva, ha ñambaʼapo oñondive ojapoháicha peteĩ ehérsito tuicháva! (Ezeq. 37:1-14).

¹³ Kapítulo 12: Pe profesía oñeʼẽva umi mokõi yvyra rehe upe rire oikóva chugui peteĩnte ohechauka iñimportanteha pe unida. ¡Mbaʼeichaitépa omombarete ñande jerovia jahechávo umi unhído ha umi ótro ovechakuéra okumpliha ko profesía! Ha jaikóramo jepe peteĩ múndo ojedividipa ha ndaijaʼéivape ojuehe rrelihión ha polítika káusare, ñande jasegi ñaime en unida jajoayhu ha ñaneñeʼẽrendu rupi (Ezeq. 37:15-23).

¹⁴ Kapítulo 16: Pe visión oñeʼẽva pe kuimbaʼe orekóvare pe tínta ryru ha umi kuimbaʼe orekóva hiʼárma oporohundi hag̃ua, omeʼẽ peteĩ avíso isériova: Sólamente oñemarkáta ojesalva hag̃ua umi oadorámava Jehovápe haʼe oipotaháicha oñepyrũ vove pe jehasa asy guasu (Mat. 24:21; Ezeq. 9:1-11).

15-18. ¿Mbaʼérepa jasegi vaʼerã jahechauka jahayhuha ñande rapichakuérape, ha mbaʼéichapa ikatu jajapo upéva?

¹⁵ Kapítulo 4: Pe visión oñeʼẽva umi 4 keruvín rehe ñanemboʼe kuri heta kualida iporãva Jehová orekóva, ha umíva apytépe pe iñimportantevéva hína pe mborayhu. Ñañeʼẽ ha jajapóramo opa mbaʼe mborayhúpe, jahechauka hína Jehová haʼeha Ñandejára (Ezeq. 1:5-14; 1 Juan 4:8).

¹⁶ Kapítulo 6 ha 11: Ohayhúgui umi héntepe, Ñandejára onombra vaʼekue umi guárdia, umíva apytépe Ezequiel. Ñandejára ningo mborayhu, upéicha rupi ndoipotái avave omano ág̃a haʼe ohundi vove Satanás goviérno ko yvy ári (2 Ped. 3:9). Ñande ningo jareko pe priviléhio jahechaukávo Ñandejára mborayhu. Jajapo upéva ñakumpli jave ñane rresponsavilida ha jaapoja pe traváho ojapóva pe guárdia ñane tiempopegua (Ezeq. 33:1-9).

¹⁷ Kapítulo 17 ha 18: Jehová oikuaa oĩtaha heta ndoipotamoʼãiva haʼe oiporiahuvereko chupekuéra ha oñehaʼãtaha hikuái ohundi isiervokuéra ifiélvape. Jehová ningo oporohayhúgui odefendéta ipuévlope ág̃a Gog de Magog oataka vove umi isiervokuéra ifiélvape. Ñande jahayhu rupi ñande rapichakuérape jaavisa entéro ikatúvape Jehová ohunditaha umi ombohasa asývape ipuévlope (Ezeq. 38:1–39:20; 2 Tes. 1:6, 7).

¹⁸ Kapítulo 19, 20 ha 21: Pe visión oñeʼẽva pe rrío oporomoingovéva rehe ha mbaʼéichapa ojerreparti pe yvy ohechauka porãiterei mbaʼeichaitépa Jehová ohayhu la héntepe. Jehová ningo oporohayhúgui ombou Itaʼýrape omeʼẽ hag̃ua hekove ñanderehehápe, ha koʼã visión ohechauka umi vendisión ojehupytýva upe rreskáte rupive, por ehémplo ikatuha oñeperdona ñandéve ñande pekadokuéra, jahupyty perfeksión ha jaiko pára siémpre Jehová famíliaramo. Ñande avei ikatu jahechauka jahayhuha umi héntepe, ñamombeʼúramo chupekuéra umi mbaʼe porã Jehová oprepara vaʼekue umi ojeroviávape g̃uarã Itaʼýra rehe (Ezeq. 45:1-7; 47:1–48:35; Apoc. 21:1-4; 22:17).

19. ¿Mbaʼépa ojapóta Jesús pe Goviérno de Mil áño aja? (Ehecha pe rrekuádro “Pe pruéva finál”).

¹⁹ Pe Goviérno de Mil áño aja, Jesús omoingovéta hetaiterei héntepe ha ndaiporimoʼãvéima osufríva ñane enemígo káusare “pe ñemano” (1 Cor. 15:26; Mar. 5:38-42; Hech. 24:15). Ñande yvyporakuéra ningo heta tiémporema ñañembyasy ha jahasa asy. Péro ág̃a oñemoingove jey vove ohóvo umi omano vaʼekuépe, Jesús oipeʼaitéta umi mbaʼe ñanembohasa asýva, ha omeʼẽta umi oñemoingove jeývape oportunida oreko hag̃ua peteĩ vída iporãvéva. Pe rreskáte omeʼẽ vaʼekue rupive, Jesús omyatyrõta entéro mbaʼe vai jahasáva umi gérra, mbaʼasy ha ñembyahýi káusare. Ha ndahaʼemoʼãi upévante, haʼe ñanepytyvõta ñahundiete hag̃ua upe oguerúva ñandéve hetaite sufrimiénto: Pe pekádo ombohasa vaʼekue ñandéve Adán (Rom. 5:18, 19). Péicha Jesús ‘ohundipaitéta pe Diablo rembiapokue’ (1 Juan 3:8). ¿Ha mbaʼépa oikóta upéi?

20. ¿Mbaʼéichapa Jesús ha umi 144.000 ohechaukáta iñumildetereiha? Emyesakã. (Ehecha pe taʼanga oĩva iñepyrũme).

²⁰ (Elee 1 Corintios 15:24-28). Ág̃a enterove yvypóra perfékto vove ha ko yvýgui oiko rire peteĩ paraíso Jehová oipota haguéicha voi yma, Jesús ha umi 144.000 ogovernátava hendive ohechaukáta iñumildetereiha ontregávo Jehovápe pe goviérno. Haʼekuéra ijeheguiete, kyreʼỹme ha pyʼaguapýpe ohejáta pe autorida oreko vaʼekue mil áño aja. Entéro mbaʼe ojapo vaʼekue upe goviérno opytáta pára siémpre.

21, 22. a) ¿Mbaʼéichatapa ko yvy oñemohuʼãvo umi mil áño? b) ¿Mbaʼérepa Jehová opoíta Satanás ha idemoniokuéragui?

²¹ Upéi Jehová ojapóta peteĩ mbaʼe ijojahaʼỹva ohechaukáva mbaʼeichaitépa ojerovia isiervokuéra oĩvare ko yvy ape ári. Haʼe omandáta ojepoi hag̃ua Satanás ha umi demoniokuéragui pe yvykua pypukúgui, oĩtahápe préso mil áñore (elee Apocalipsis 20:1-3). Pe múndo kompletoite ha umi hénte oikótava upépe idiferénteta upe Satanás ha idemoniokuéra oikuaa vaʼekuégui: Armagedón mboyve ningo Satanás ombotavy jepe vaʼekue la majoría umi héntepe, ha ndaipóri unida pórke umi hénte ndochaʼéi ojuehe ha odeskonfiapa ojuehe (Apoc. 12:9). Péro oñemohuʼãvo umi mil áño, yvyporakuéra kompletoite haʼétama peteĩ famíliante, ojoayhúva ha oadoráva Jehovápe en unida. ¡Ko yvýgui oikóta peteĩ paraíso teete!

²² ¿Mbaʼérepa Jehová opoíta Satanás ha idemoniokuéragui pe lugár ipotĩ ha iporãitévape? Pórke opávo umi mil áño, oĩta heta hénte núnka ndohasáiva gueteri peteĩ pruéva ohechauka hag̃ua ifiéltapa Jehovápe. Oĩ hetaiterei omano vaʼekue oikuaa mboyve Jehovápe ha upéi oñemoingove jeýtava pe paraísope. Jehová ningo omoingove jeýta koʼã héntepe ha omeʼẽta chupekuéra entéro mbaʼe oikotevẽva oikove ha omombarete hag̃ua ijerovia. Ndaiporimoʼãi mbaʼeve ivaíva oapeligrátava ijerovia pórke pe paraísope oĩta umi hénte ohayhúva ha oservíva Jehovápe añoite. Upéicha rupi Satanás ikatu oakusa chupekuéra ojapo haguéicha Job rehe: Haʼekuéra oserviha Jehovápe haʼe oprotehe ha ovendesi rupínte chupekuéra (Job 1:9, 10). Upévare Jehová oskrivi mboyve pára siémpre ñande réra pe lívro de la vídape, omeʼẽta ñandéve peteĩ oportunida jahechauka hag̃ua opa ára g̃uarã ñandefielha chupe ñande Túa ha Governánteramo (Apoc. 20:12, 15).

23. ¿Mbaʼe pruévapa káda uno ñambohováita?

²³ Peteĩ tiémpo mbykymíre, Satanáspe oñemeʼẽta peteĩ oportunida ojoko hag̃ua umi héntepe anivéma hag̃ua oservi Jehovápe. ¿Mbaʼe pruévapa káda uno ombohovái vaʼerã? Katuete oiméne enterove ñambohovái vaʼerã peteĩ situasión ombohovái vaʼekueichagua Adán ha Eva: Jadesidi vaʼerã japytátapa Jehová ládo ha jaasepta umi mbaʼe haʼe ojeruréva, jaapoja pe derécho haʼe orekóva ñanegoverna hag̃ua ha jaadora chupe añoiténte, térãpa japytáta Satanás ládope ha ñapuʼã Ñandejárare.

24. ¿Mbaʼérepa oñehenói Gog ha Magog umi opuʼãtavape Ñandejárare?

²⁴ (Elee Apocalipsis 20:7-10). Iñinteresánte ningo oñehenoiha “Gog ha Magog” umi opuʼãvape Ñandejárare oñemohuʼãvo umi mil áño. Haʼekuéra ojogua pe Gog de Magog oñeñeʼẽvare Ezequiel profesíape (Ezeq. 38:2). ¿Mbaʼépepa ojojogua hikuái? Ezequiel heʼi vaʼekue Gog de Magog oatakataha Ñandejára puévlope pe jehasa asy guasu aja. Ha Gog haʼe hína umi diferénte nasión oñomoirũva opuʼã hag̃ua Jehová goviérnore. Upéicha avei umi opuʼãvape Ñandejárare oñemohuʼãvo Cristo Goviérno de Mil áño oñehenói “umi tetãnguéra” térã nasión. Ha iñinteresánte ojepuru haguére koʼápe pe ñeʼẽ “tetãnguéra” térã nasión. ¿Mbaʼérepa? Pórke pe Goviérno de Mil áño aja ndaiporimoʼãvéima tetã térã nasión odividi hag̃ua umi héntepe. Upéva rangue, enterove ñaiméta Ñandejára Rréino poguýpe, ha oikóta ñandehegui peteĩ tetã térã nasiónte. Oñehenóivo Gog ha Magog umi opuʼãvape Ñandejárare ha heʼívo haʼetaha hikuái “tetãnguéra”, pe profesía ohechauka Satanás osẽtaha ijidéape odividívo unos kuánto oĩvape Ñandejára puévlope. Avavépe ndojeovligamoʼãi oñemoĩ hag̃ua Satanás ládo. Káda uno umi yvypóra perfékto odesidi vaʼerã mbaʼépa ojapóta.

25, 26. ¿Mboy héntepa omoirũta Satanáspe, ha mbaʼépa oikóta chuguikuéra?

²⁵ ¿Mboy héntepa omoirũta Satanáspe? Pe profesía heʼi oĩtaha “pe yvykuʼi marpegua” oĩháicha. Péicha heʼívo ndeʼiséi katuete hetaitereitaha umi hénte opuʼãva Ñandejárare. ¿Mbaʼérepa ikatu jaʼe upéva? Epensamína por ehémplo pe promésa ojejapo vaʼekuére Abrahánpe. Jehová heʼi vaʼekue Abrahán familiare hetataha pe “yvykuʼi oĩva mar rembeʼýpe” hetaháicha (Gén. 22:17, 18). Upéicharõ jepe, umi ifamiliare en totál ohupyty 144.001 persóna, koʼãva hína Jesús ha umi unhído omoirũva chupe (Gál. 3:16, 29). Upe kantida hetáramo jepe, saʼieterei hína ñambojojátaramo mboýpa oĩ en totál entéro yvyporakuéra. Upéicha avei, hetáramo jepe pe kantida omoirũtava Satanáspe, ndahaʼemoʼãi ku hetaiterei rasátava. Umi opuʼãva Ñandejára puévlore ndaikatumoʼãi ohundi Jehová siervokuéra ifiélvape.

²⁶ Pyaʼeterei oñehundíta enterove umi opuʼãvape Ñandejárare. Oñehundíta chupekuéra, ha avei Satanás ha idemoniokuérape, ha ndorekomoʼãvéima hikuái oportunida oikove jeývo. Opa árare la hénte imanduʼáta odesidi vai hague hikuái ha mbaʼépa ohupyty chupekuéra upe haguére (Apoc. 20:10).

27-29. ¿Mbaʼépa ohaʼarõ umi ohasávape pe pruéva finál?

²⁷ Péro umi ohasáva pe pruéva finál rerakuéra oñeanotáta pára siémpre “pe lívro de la vídape” (Apoc. 20:15). Ha upe vove, peteĩ famíliaicha oĩva unído, enterove Jehová raʼykuéra ha rajykuéra omeʼẽta chupe pe adorasión haʼe añoite omereséva.

²⁸ ¡Epensamíntena umi mbaʼe porãite neraʼarõvare amo gotyove! Reikóta vyʼápe, rejapóta umi traváho ndegustáva ha reguerekóta umi amígo añetetéva. Núnka ndohasaʼasymoʼãvéima umi persóna rehayhúva. Ha Ñandejára nderechátama ndéve peteĩ ihústovaramo, upéva ndahaʼemoʼãvéima Cristo rreskáte rupive, síno nde rejeietétama rupi pekádo poguýgui. Enterove persóna Ñandejára amigoitéta ha orekóta hikuái peteĩ amista perfékta. Ha pe iñimportantevéva opa mbaʼégui, yvágape ha yvýpe ojeadoráta Jehovápe haʼe oipotahaichaite. Péicha, ¡núnka mas mbaʼeve ni avave nomongyʼamoʼãvéima pe adorasión verdadéra, ha opa árare ojeadoráta Jehovápe añoiténte!

²⁹ ¿Ndépa reiméta ág̃a upépe rehecha hag̃ua upe día tuichaitéva? Nde ningo ikatúta rehecha resegíramo rejapo umi mbohapy mbaʼe iñimportantetéva ñaaprendéva pe lívro de Ezequiélgui: Jaadora Jehovápe añoiténte, jasegi en unida jaadorávo chupe haʼe oipotaháicha ha jahechauka jahayhuha ñande rapichakuérape. Péro Ezequiel profesiakuéra ñanemboʼeve peteĩ último mbaʼe iñimportantetereíva. ¿Mbaʼépa hína upéva?

30, 31. ¿Mbaʼépa heʼiséta pe fráse “oikuaáta hikuái che haʼeha Jehová” Ñandejára enemigokuérape g̃uarã, péro mbaʼépa heʼiséta Ñandejára puévlope g̃uarã?

³⁰ Pe lívro de Ezequiel pukukuére heta vése jatopa ko fráse: “Oikuaáta hikuái che haʼeha Jehová” (Ezeq. 6:10; 39:28). Ñandejára enemigokuérape g̃uarã upéva heʼiséta gérra ha ñemano. Haʼekuéra forsadoite orrekonoséta Jehová oexistiha, péro ndahaʼéi upévante, haʼekuéra hasyveháicha oikuaáta mbaʼépa heʼise Jehová réra tuichaitéva: “Haʼe ojapo upe oipotáva oiko”. Jehová, “umi ehérsito yvagapegua” ruvichágui oikóta “peteĩ gerréro oñorairõkuaaitereíva” ha oñorairõta ikontrapekuéra (1 Sam. 17:45; Éx. 15:3). Tárde jepétama umi héntegui ohechakuaa hag̃ua ko mbaʼe iñimportantetereíva Jehovágui: Mbaʼeve ndaikatúi ojoko chupe okumpli hag̃ua ivolunta.

³¹ Ñandejára puévlope g̃uarã pe fráse “oikuaáta hikuái che haʼeha Jehová”, heʼiséta vída ha pyʼaguapy. Jehová ojapóta ñandehegui upe haʼe oipota vaʼekue voi iñepyrũme: Itaʼýra ha itajýra ohechauka porãva umi kualida haʼe orekóva (Gén. 1:26). Koʼág̃ama voi Jehovágui oiko peteĩ Túa oporohayhuetereíva ha peteĩ Pastór oporoprotehéva. Ha koʼẽrõitéma oikóta chugui peteĩ Rréi oganáva peteĩ gérra. Upe día og̃uahẽ mboyve, jajerresolvékena ñande pyʼaite guive ñaneñeʼẽrendutaha Ezequiel mensáhepe. Káda díakena jahechauka jaʼe ha jajapóvare jaikuaaha Jehovápe ha mbaʼeichaguápa haʼe. Upéi, ág̃a pe jehasa asy guasu oñepyrũ vove, ñande ndajakyhyjemoʼãi. Upéva rangue, ‘ñañemboʼy ha ñañakãrapuʼãta’, jaikuaágui hiʼag̃uimbaitemaha pe tiémpo Ñandejára ñandesalva hag̃ua (Luc. 21:28). Upe aja, jasegíkena ñaipytyvõ entéro ikatúvape oikuaa ha ohayhu hag̃ua Ñandejárape, upe omereséva chupe añoite ojeadora, haʼe hína upe orekóva pe téra tuichavéva entéro umi ótro téragui: ¡Jehová! (Ezeq. 28:26).