¿Mbaʼépa ojapo vaʼerã umi omendáva osẽ porã hag̃ua?

 1. ¿Mbaʼépa katuete ohasáta umi omendáva? (Ehecha pe taʼanga oĩva iñepyrũme.)

UMI oĩva de nóvio ohasa tiémpo oñondive ha ojoayhuve ohóvo. Upéi odesidi omenda hikuái, ha opromete oĩtaha oñondive tóda la vída. Pe kasamiénto díape, pe nóvia iporãiterei ha pe nóvio katu opukavy omañávo hese. ¡Ovyʼaiterei ningo hikuái! Péro omenda rire, mokõivéva okambia vaʼerã ohóvo ikatu hag̃uáicha siémpre oĩ unído. Jaikuaaháicha, Jehová omoñepyrũ vaʼekue pe matrimónio, ha oipota entéro omendáva ovyʼa ha osẽ porã. Upévare omoĩ la Bíbliape heta konsého ideprovéchotava chupekuéra (Prov. 18:22). Péro entéro yvypóra ningo ñaneimperfékto, ha la Biblia oavisa porã umi omendáva iprovlematanteha voi (1 Cor. 7:28). Upéicharõ, ¿mbaʼépa ojapo vaʼerã umi omendáva ojei hag̃ua heta akãrasýgui? ¿Mbaʼépa ikatu ojapo hikuái imatrimónio osẽ porã hag̃ua?

 2. ¿Mbaʼeichagua mborayhúpa ohechauka vaʼerã umi matrimónio?

² La Biblia heʼi iñimportantetereiha pe mborayhu. Péro umi omendáva tekotevẽ ohechauka ojoayhuha de diferénte fórma. Por ehémplo, ojoayhu vaʼerã oñoamígoicha, irromántiko ha ikariñóso vaʼerã oñondive. Ha oiméramo ifamília hikuái, koʼytevéntema iñimportánte ohechauka ohayhuha hogayguakuérape. Péro ikatu hag̃uáicha umi omendáva osẽ porã, tekotevẽ ojoayhu hikuái ipyʼaite guive la Biblia ojerureháicha kristianokuérape. Apóstol Pablo oñeʼẽ vaʼekue peichagua mborayhúre, heʼívo: “Káda uno pehayhu vaʼerã pene rembirekópe peẽ voi pejehayhuháicha; pe tembireko katu orrespeta vaʼerã iménape ipyʼaite guive” (Efes. 5:33).

 3. ¿Mbaʼeichaite pevépa ojoayhu vaʼerã umi omendáva?

³ Pablo oskrivi vaʼekue: “Menakuéra, pesegíkena pehayhu pene rembirekópe, Cristo ohayhu haguéicha pe kongregasión ha omeʼẽ hekove hesehápe” (Efes. 5:25). Jesús ningo ohayhueterei vaʼekue idisipulokuérape. Upéicha avei koʼág̃arupi umi kristiáno osegi iñehémplo ha ohayhu iñermanokuérape (elee Juan 13:34, 35; 15:12, 13). ¿Mbaʼeichaite pevépa ojoayhu vaʼerã umi kristiáno omendáva? Ojoayhueterei vaʼerã, ha tekotevẽramo oĩ vaʼerã dispuésto omanóvo pe ótro rehehápe. Péro oĩ matrimónio opensáva ndojoayhupaiha, ha ohasa jave peteĩ situasión ijetuʼúva oimoʼã hikuái ndaikatumoʼãiha oaguanta. Upéva oikóramo, oñehaʼã vaʼerã hikuái ohechauka pe mborayhu oñehaʼarõva kristianokuéragui. ¿Mbaʼérepa jaʼe upéva? Pórke peichagua mborayhu “ogueropuʼaka opa mbaʼe, oguerovia opa mbaʼe, ohaʼarõ opa mbaʼe ha oaguanta opa mbaʼe”. Avei peichagua mborayhu “ndopamoʼãi arakaʼeve” (1 Cor. 13:7, 8). Umi omendáva imanduʼa vaʼerã opromete hague ojoayhutaha ha núnka noñotraisionamoʼãiha. Upéva oipytyvõta chupekuéra oñemoag̃ui hag̃ua Jehováre, ha oñehaʼãmbaitéta osolusiona oimehaichagua provléma.

4, 5. a) ¿Mbaʼe rresponsavilidápa oreko menakuéra? b) ¿Mbaʼéichapa umi tembireko ohecha vaʼerã pe rresponsavilida Jehová omeʼẽva chupekuéra? c) ¿Mbaʼépepa okambia kuri peteĩ matrimónio?

⁴ Pablo omombeʼu vaʼekue mbaʼe rresponsavilidápa Jehová omeʼẽ ména ha tembirekópe. Haʼe heʼi: “Tembirekokuéra oñemoĩ vaʼerã iména poguýpe, oñemoĩháicha ñande Ruvicha poguýpe. Pe ména ningo omoakã hembirekópe, Cristo omoakãháicha kongregasión” (Efes. 5:22, 23). Pe ména oservíva Jehovápe ohayhu vaʼerã hembirekópe, Cristo ohayhuháicha pe kongregasión. Pe tembireko nopensái vaʼerã ojeapoʼiha chupe iména omoakã haguére hogapy. Jehová heʼi pe tembireko orekoha avei peteĩ rresponsavilida iñimportantetereíva. Haʼe heʼi: “Naiporãi pe kuimbaʼe oiko haʼeño, upévare ajapóta chupe iñirũrã oipytyvõtava chupe” (Gén. 2:18, TNM). Pe tembireko oapoja vaʼerã iménape ikatu hag̃uáicha haʼe omoakã porã hogapy. Pe ména ohechaukáramo hembirekópe ohayhuha chupe, haʼe oñesentíta segúra hendive. Avei péicha ifasilvéta chupe orrespeta hag̃ua iménape ha oapoja hag̃ua chupe odesidi jave.

⁵ Peteĩ ermána hérava Cathy^[1] heʼi: “Chesoltérarõ guare, nadependéi vaʼekue avavére. Péro upéi amenda, ha añehaʼã arekove enkuénta che ménape. Upéva ndahaʼéi vaʼekue la ifasilpáva. Péro roñehaʼãgui roiko Jehová oipotaháicha, rohechakuaa roĩveha unído”. Iména hérava Fred katu heʼi: “Chéve ningo hasyeterei vaʼekue adesidi hag̃ua. Ha amenda rire katu ijetuʼuvéntema upéva, pórke arekóma vaʼerã enkuénta che rembirekópe. Péro koʼág̃a ifasilvéma chéve, pórke ajerure Jehovápe chepytyvõ hag̃ua, ha ahendu avei mbaʼépa heʼi che rembireko. Añetehápe ahechakuaa roñontendetereimaha koʼág̃a”.

 6. ¿Mbaʼéichapa pe mborayhu “oipytyvõ enterovépe ojogueraha porã hag̃ua”?

⁶ ¿Mbaʼépa ojapo vaʼerã umi matrimónio siémpre ojogueraha porã hag̃ua? La Biblia heʼi: “Pesegíkena peñoaguanta ha peñoperdona pende pyʼaite guive”. Enterovéva ningo ñaneimperfékto, upéicha rupi ména ha tembireko ojavýtante voi ha iprovlémata. Péro koʼã mbaʼe ikatu oipytyvõ chupekuéra oaprende hag̃ua umi mbaʼe ojapo vai vaʼekuégui. Avei oñehaʼã vaʼerã oñoperdona ha ohechauka pe mborayhu oñehaʼarõva kristianokuéragui. Peichagua mborayhu “oipytyvõ enterovépe ojogueraha porã hag̃ua” (Col. 3:13, 14). Umi matrimónio ipyʼaporãva, ipasiénsiava ha ndaipyʼaróiva oñondive, ohechauka ojoayhuha (1 Cor. 13:4, 5). Avei mokõivéva oñehaʼã vaʼerã osolusiona umi provléma pyaʼe porã, “kuarahy oike mboyve” (Efes. 4:26, 27). Tekotevẽ iñumílde hikuái ha notĩri vaʼerã heʼi hag̃ua: “Chediskulpána romoñeñandu vai haguére”. Ñaperdonáramo ñane rembiayhúpe, ikatúta ñasolusiona heta provléma ha ñañemoag̃uivéta ojuehe.

7, 8. a) ¿Mbaʼe konséhopa omeʼẽ la Biblia umi rrelasión sexuál rehe? b) ¿Mbaʼérepa ména ha tembireko ikariñóso vaʼerã oñondive?

⁷ La Biblia omeʼẽ konsého umi omendávape ikatu hag̃uáicha ohecha hikuái hekópe porã umi rrelasión sexuál (elee 1 Corintios 7:3-5). Iñimportanteterei ningo ména ha tembireko oreko enkuénta umi mbaʼe oñandúva ha oikotevẽva hikuái. Pe ména naikariñósoiramo, pe tembireko ndodisfrutamoʼãi oreko jave hikuái rrelasión sexuál. La Biblia omanda menakuérape: “Pentende porã vaʼerã pene rembirekópe” (1 Ped. 3:7). Jepive ningo pe kuimbaʼe iñakãrakuve oreko hag̃ua rrelasión sexuál. Upéicharõ jepe, pe ména ndoikói vaʼerã oexihi hembirekópe oĩ hag̃ua hendive, ni ndoovligái vaʼerã chupe. Mokõivéva oĩ vaʼerã dispuésto oreko hag̃ua rrelasión, ha oñeñandu porã vaʼerã hikuái upearã.

⁸ La Biblia ndeʼíri espesífikamente mbaʼépa oñepermiti ha mbaʼépa noñepermitíri umi omendávape oreko jave rrelasión sexuál. Péro si ohechauka iñimportanteha ikariñóso hikuái (Cant. de Cant. 1:2; 2:6). Jahechaháicha, umi omendáva ojotrata vaʼerã mborayhúpe.

 9. ¿Mbaʼérepa ndovaléi ñaneakãraku ótra persóna ndahaʼéivare ñane ména térã ñane rembireko?

⁹ Oĩ umi ombyaíva imatrimónio pórke ou oñenvisia pe pornografíare, térã iñakãraku ótra persónare. Koʼã mbaʼe ningo ivaieterei ha tekotevẽ ñamboykete. Jahayhúramo Jehovápe ha ñande rapichápe ñande pyʼaite guive, ndajahejamoʼãi mbaʼeve ni avave ombyai ñane matrimónio. Ni mbaʼevéicharõ ndajaikomoʼãi ñanovillea peteĩ ndahaʼéivare ñane ména térã ñane rembireko. Ñanemanduʼa vaʼerã Jehovágui nokañyiha mbaʼeve. Haʼe ohechapaite la jajapóva, ha oikuaa porã mbaʼépa ñapensa. ¡Ajépa hiʼãite koʼẽ koʼẽre ñambopyʼarory chupe! Jajapóramo upéva, ni mbaʼevéicharõ nañatraisionamoʼãi ñane rembiayhúpe (elee Mateo 5:27, 28 ha Hebreos 4:13).

10, 11. a) ¿Mbaʼérepa koʼág̃arupi heta omendáva ojedivorsia? b) ¿Mbaʼépa heʼi la Biblia pe separasiónre? c) ¿Mbaʼépa oipytyvõta umi omendávape ani hag̃ua ojesepara oimeraẽ vyroreírente?

¹⁰ Koʼág̃arupi heta omendáva odesidi ojesepara térã ojedivorsia ndaikatúigui osolusiona iprovléma. Heta paíspe katu la mita rasa voi umi omendávagui ojedivorsia. Añetehápe ningo upéva ndoikoguasúi Testigokuéra apytépe. Péro koʼág̃arupi oĩ avei heta matrimónio kristiáno oúva tuicha oñaprovlema.

¹¹ La Biblia heʼi: “Tembireko ndohejái vaʼerã iménape. Péro ohejáramo chupe topytánte omendaʼỹre, térã toiko porã jey iménandi; ha pe ména ndohejái vaʼerã hembirekópe” (1 Cor. 7:10, 11). Heta matrimónio iprovlémava opensa naipohãveimaha, ha ojeseparámante vaʼerãha hikuái. Péro Jesús ohechauka pe separasión ndahaʼeiha vyrorei. Upévare orrepeti Ñandejára heʼíma vaʼekue voi pe matrimóniore. Upéi heʼi avei: “Avave ndoipeʼái vaʼerã ojuehegui Ñandejára omoĩ vaʼekue oñondive peteĩ júgo guýpe” (Mat. 19:3-6; Gén. 2:24). Jahechaháicha, Jehová oipota umi omendáva siémpre opyta oñondive (1 Cor. 7:39). Entéronte ñanemanduʼa vaʼerã jajechataha Jehovándi umi mbaʼe jajapóvare. Upéva ñanepytyvõta ñasolusiona pyaʼe hag̃ua umi provléma, ivaive mboyve pe situasión.

12. ¿Mbaʼérepa umi omendáva ikatu opensa ojesepara?

¹² ¿Mbaʼérepa heta omendáva ou tuicha iprovléma? Ikatu oime imatrimónio nosẽi haʼekuéra ohaʼarõ haguéicha, ha upévare oñedesepsiona térã ipochy voi. Oĩ iprovlémava idiferénte rupi ikriánsa, térã mokõivéva orreaksionágui de diferénte fórma ohasa jave peteĩ situasión ijetuʼúva. Ótro katu iprovléma ihentekuéra káusare, noĩri de akuérdo oipuru lájare ipláta, térã ohekomboʼe lája ifamíliape. Upéicharõ jepe, la majoría umi matrimónio kristiáno ikatu osolusiona iprovléma, pórke osegi umi konsého oĩva la Bíbliape.

13. ¿Mbaʼéicha javépa kristianokuéra ikatu ojesepara?

¹³ ¿Mbaʼéicha javépa umi omendáva ikatu ojesepara? Por ehémplo, pe ména nomantenéiramo ifamíliape, peteĩva omaltratárõ físikamente iparéhape térã ndohejáiramo chupe oservi Jehovápe. Oĩ jave peichagua provléma igráveva, umi omendáva ojerure vaʼerã ajúda ansianokuérape. Haʼekuéra ningo iñexperiénsia heta, ha ikatu oipytyvõ umi matrimóniope osegi hag̃ua umi konsého oĩva la Bíbliape. Entéro omendáva ojeruréramo Jehovápe espíritu sánto, ikatúta ojapo la Biblia heʼíva, ha oiko oñemandaháicha kristianokuérape (Gál. 5:22, 23).^[2]

14. ¿Mbaʼe konséhopa omeʼẽ la Biblia umi kristiáno iména térã hembireko ndahaʼéivape Testígo?

¹⁴ Oĩ heta kristiáno iména térã hembireko ndahaʼéiva Testígo. Péro ndahaʼéi upe haguére ojeseparátamava hikuái (elee 1 Corintios 7:12-14). La Biblia heʼi: “Pe ména ojeroviaʼỹva imarangatu hembireko rupive, ha pe tembireko ojeroviaʼỹva imarangatu iména rupive”. ¿Mbaʼérepa jaʼekuaa imarangatuha pe persóna ojeroviaʼỹva? Pórke hembiayhu oservi hína Jehovápe. Umi mitã imarangatu avei, ha Ñandejára oñangareko hesekuéra. Pablo heʼi kristianokuérape: “Nde tembireko, ¿mbaʼéicha reikuaa ndaikatumoʼãipa resalva ne ménape? Nde ména, ¿mbaʼéicha reikuaa ndaikatumoʼãipa resalva ne rembirekópe?” (1 Cor. 7:16). Oĩ heta experiénsia ohechaukáva umi ména térã tembireko oservíva Jehovápe, oipytyvõ hague hembiayhúpe oiko hag̃ua avei chugui Testígo.

15, 16. a) ¿Mbaʼépa heʼi la Biblia umi tembireko iména ndahaʼéivape Testígo? b) ¿Ikatúpa peteĩ testígo de Jehová omenda jey iména térã hembireko ojeroviaʼỹva ohejáramo chupe?

¹⁵ Apóstol Pedro heʼi umi tembirekópe orrespeta vaʼerãha hikuái iménape. Haʼe heʼi: “Peñemoĩ vaʼerã pene ména poguýpe, upéicha oĩramo naiñeʼẽrendúiva Ñandejára Ñeʼẽme, ikatúta ojerovia Ñandejárare ojeʼeʼỹre chupe mbaʼeve, hembireko hekoporã rupi. Upéva oikóta haʼekuéra ohechágui mbaʼéichapa penderekopotĩ ha perrespeta chupekuéra pende pyʼaite guive”. Pe tembireko oiko rangue oñeʼẽ tódo el tiémpo la Bíbliare iménape, iporãve iñakãguapy, ha ndaipochypareíri vaʼerã. Koʼã mbaʼe ningo “ovaleterei Ñandejára renondépe”, ha ikatu voi oipytyvõ iménape oiko hag̃ua chugui Testígo (1 Ped. 3:1-4).

¹⁶ Péro, ¿mbaʼépa oikóta pe ména ndahaʼéiva Testígo odesidírõ ojesepara hembirekógui? La Biblia heʼi: “Pe ojeroviaʼỹva odesidíramo oho, toho; oikóramo upéva pe ermáno térã ermána ndorekói ovligasión opytávo hendive, Ñandejára omeʼẽ peẽme pyʼaguapy” (1 Cor. 7:15). Jahechaháicha, pe kristiáno ndoovligái vaʼerã iména térã hembireko ojeroviaʼỹvape opyta hag̃ua hendive. Ha ikatu voi oĩve pyʼaguapy ogapýpe haʼe oho rire. Péro la Biblia heʼiháicha, upe kásope pe Testígo ndaikatúi omenda jey ótrore. Ohasa rire pe tiémpo, ikatu hína pe persóna ndahaʼéiva Testígo odesidi ou jey orrekupera hag̃ua imatrimónio. Ha ikatu voi amo gotyove oiko chugui testígo de Jehová.

17. ¿Mbaʼépa iñimportanteve vaʼerã umi kristiáno omendávape g̃uarã?

¹⁷ Jaiko rupi “umi ára pahápe”, pe situasión ijetuʼu ha hasy jagueropuʼaka hag̃ua (2 Tim. 3:1-5). Péro ikatu hag̃uáicha jajeprotehe, ñañemoag̃uive vaʼerã Ñandejárare. Apóstol Pablo heʼi vaʼekue: “Saʼipaitéma pe tiémpo hembýva. Koʼág̃a guive umi omendáva toiko omendaʼỹrõguáicha, [...] ha umi oiporúva ko múndo, ani oiporupaite ko múndo” (1 Cor. 7:29-31). Añetehápe ningo Pablo ndeʼíri umi omendáva odeskuida vaʼerãha imatrimónio. Péro jaiko rupi umi ára pahápe, koʼýte iñimportanteve umi kristiáno omendáva omotenonde Jehovápe (Mat. 6:33).

18. ¿Mbaʼéichapa umi omendáva ikatu ovyʼa ha osẽ porã?

¹⁸ Koʼã tiémpo ijetuʼuetévape, heta matrimónio osẽ vai. ¿Mbaʼéichapa umi omendáva ikatu ovyʼa ha osẽ porã? Tekotevẽ oñemoag̃ui Jehováre ha ipuévlore, ojapo vaʼerã la Biblia heʼíva, ha oheja vaʼerã pe espíritu sánto ogia chupekuéra. Ojapóramo hikuái upéicha, ohechaukáta orrespetaha “Ñandejára omoĩ vaʼekue oñondive peteĩ júgo guýpe” (Mar. 10:9).