Aníkena jaheja Satanás ñandereity iñuhãme

1, 2. Máva mávapa ovyʼa ohechávo umi ojevautisáva?

OIMÉRAMO aréma jaservi Jehovápe katuete ñahendúma heta diskúrso ojejapóva umi ojevautisátavape g̃uarã. Ha koʼág̃a peve javyʼa gueteri jahechávo umi ojevautisátava oñemboʼy ha heʼi opavave rovake oñemeʼẽma hague Jehovápe. Jahechávo upéva enterove jajepopete ha oĩ voi hesay pororopáva vyʼágui. Javyʼaite ningo jahechávo hetave ñande rapicha oñemoĩha Jehová ykére!

² Péro umi ánhel pyʼỹive ohecha ko mbaʼe. Ñapensamína mbaʼeichaitépa ‘ovyʼa’ hikuái ohechávo káda semána hetaveha umi oñemoĩva Jehová ykére (Lucas 15:7, 10). Katuete umi ánhel ovyʼa ohechávo hetave tapicha oserviha Jehovápe ko yvy ape ári (Ageo 2:7).

 3. Mbaʼérepa Satanás oiko peteĩ “león pochýicha”, ha mbaʼépa ojapose?

³ Péro oĩ ánhel ndovyʼáiva ohechávo heta tapicha ohejaha ko múndo kyʼa ha ojevautisa. Umíva hína demónio ha orrenega hendy upévare. Ha upéichatante voíko, Satanás ningo heʼivaʼekue yvyporakuéra ndoserviriha Jehovápe ohayhúgui chupe. Heʼi avei ojejopy vaíramo chupekuéra ohejataha Ñandejárape (Job 2:4, 5). Upévare oĩ jave peteĩ omeʼẽva hekove Jehovápe ohechauka Satanás ijapuha ha haʼetévaicha voi ohovapetéva chupe. Péicha káda semána oĩ hetaiterei ohovapetéva Satanáspe ha upévare haʼe oiko ku “león pochýicha ohekáva mávapepa omokõta”, térã oipeʼáta Jehová rapégui (1 Pedro 5:8, JMP). Upearã oñehaʼã ñanemoĩ vai Jehovándi jahejaite hag̃ua chupe (Salmo 7:1, 2; 2 Timoteo 3:12).

4, 5. a) Mbaʼe mbaʼépa Jehová ndohejái Satanáspe ojapo? b) Mbaʼépa opromete la Biblia oikotaha ñañemoĩramo Satanás rehe?

⁴ Ipochýramo jepe ko león ndajakyhyjeivaʼerã chugui. Mbaʼérepa? Oĩ mokõi mbaʼe Jehová ndohejáiva Satanás ojapo. Primero, Satanás arakaʼeve nohundimoʼãi Jehová siervokuérape. Haʼe oikuaa porã upéva Jehová voi heʼígui oĩtaha peteĩ “aty guasu” ojeroviáva hese ha oikovétava ou rire pe ‘jehasa asy guasu’. Ha Jehová heʼíva oiko katuete (Apocalipsis [Revelación] 7:9, 14, BNP).

⁵ Segundo, Satanás ndaikatumoʼãi ipuʼaka peteĩ oĩvare Jehová ykére. Péva ohechauka proféta Azarías heʼivaʼekue rréi Asápe: “Ñandejára oĩta penendive peimérõ hendive” (2 Crónicas 15:2; 1 Corintios 10:13). La Biblia omombeʼu oĩ hague heta Ñandejára siérvo ndoʼáiva Satanás poguýpe (Hebreos 11:4-40). Ñañemoag̃uíramo Jehováre haʼekuéra ojapo haguéicha, ñañemoĩta Satanás rehe ha ñandepuʼakáta hese. Péicha opromete la Biblia: ‘Peñemoĩ hatã Satanás rehe ha haʼe ojeíta pende ypýgui’ (Santiago 4:7, ÑÑB).

 6. Mbaʼépa ojapo Satanás ohundi hag̃ua kristianokuérape?

⁶ Jahecha haguéicha Satanás arakaʼeve ndaipuʼakamoʼãi Ñandejára siervokuérare. Péro ikatu ipuʼaka umi noñangarekóivare ijehe. Mbaʼéichapa? Ikatu omomombyry chupekuéra Jehovágui ha upéi ohundi. Upearã opersegi mbarete chupekuéra, oñorairõ hendivekuéra ha oñehaʼã omoñuhã. Jahechamína mbaʼéichapa ojapo koʼã mbohapy mbaʼe.

 7. Mbaʼérepa koʼág̃a Satanás oñemoĩ mbareteve Jehová siervokuérare?

⁷ Opersegi mbarete chupekuéra. Apóstol Juan heʼi “ko múndo oĩmbaha aña poguýpe” (1 Juan 5:19, BNP). Upévare ñañatende porã vaʼerã. Satanás ningo orekopáma ipoguýpe umi hénte iñañávape, ha upévare oñehaʼã mbarete ohundi Ñandejára siervokuérape. Péro haʼekuéra katuete ojehekýi chugui (Miqueas 4:1; Juan 15:19; Apocalipsis [Revelación 12:12, 17). Satanás oikuaa og̃uahẽtamaha chupe hiʼóra. Upévare koʼýte orrenega ha oñehaʼã mbarete ohundi kristianokuérape. Koʼág̃a rupi haʼe ombaʼapo hatãvéntema ha ojapo ñanderehe umi mbaʼe ivaipa jepéva ñanerundi hag̃ua. Upévare tekotevẽ ñañatende porã jaikóvo (1 Crónicas 12:32).

 8. Mbaʼépa heʼiséraʼe Pablo heʼívo ‘ñañorairõha’ umi ánhel añándi?

⁸ Oñorairõ ñanendive. Pablo ohai kristianokuérape: ‘Ñañorairõ umi mbaʼepochy yvagapegua ndive’ (Efesios 6:12, ÑÑB). Mbaʼépa heʼiséraʼe Pablo heʼívo “ñañorairõ”? Griégo ñeʼẽme upéva heʼise mokõi oñombyepotíva ha oñehaʼãva ipuʼaka ojuehe. Péicha Pablo ohechauka káda uno ñañorairõha umi demóniondi. Jajapo upéva jaikóramo jepe umi lugár ndojegueroviaihápe oĩha ánhel iñañáva. Aníkena ñanderesarái ñañemeʼẽvo Jehovápe haʼete ku ñañerremangáva ha ñañepyrũ ñañorairõ. Jajevautisa guive ñañorairõ kangue umi ánhel añándi. Ndareíri apóstol Pablo tres vése omokyreʼỹ umi kristiáno Efesoyguápe ojepytaso mbarete hag̃ua Jehová ykére (Efesios 6:11, 13, 14).

 9. a) Mbaʼérepa Satanás ha idemoniokuéra oiporu opaichagua ñuhã? b) Mbaʼérepa Satanás omoingese mbaʼe vai ñane akãme, ha mbaʼéichapa ikatu ñañemoĩ hese? (Ehecha rrekuádro Cháke, Satanás ñanembotavyse!.) c) Mbaʼe ñuhãpa jahecháta koʼág̃a?

⁹ Ñanemoñuhãse. Pablo omokyreʼỹ kristianokuérape ojepytaso mbarete hag̃ua ani Satanás ‘ombotavy’ chupekuéra ha oity iñuhãme (Efesios 6:11). Satanás ha idemoniokuéra ndoiporúi peteĩ ñuhãnte síno opaichagua ñuhã. Haʼekuéra oikuaa péicha osẽ porãtaha. Oĩ kristiáno ojehekýiva peteĩ ñuhãgui péro hoʼáva ótrope. Upévare Satanás ha umi demónio omangea ñanderehe ohecha hag̃ua jajapóva. Oikuaase hikuái moõpa ñanekangy ha oiporu upéva ñandereity hag̃ua. Haʼetépe la Biblia ñanepytyvõ jajehekýi hag̃ua chuguikuéra (2 Corintios 2:11). Ko lívrope jahechámakuri oiporuha pláta rayhu, júnta vai ha tekokyʼa. Koʼág̃a jahechamíta ambue ñuhã: espiritísmo.

10. a) Mbaʼépa oike espiritísmope? b) Mbaʼépa opensa Jehová umi ojapóvare espiritísmo, ha mbaʼépa ñapensa ñande?

¹⁰ Espiritísmope ningo oike umi oadivináva, ojapóva paje, máhia ha oñeʼẽva omanovaʼekuéndi. Umi ojapóva koʼã mbaʼe ojeheʼa demoniokuérare ha oñemoĩ ipoguypekuéra. Jaikuaaháicha, Jehovápe ‘ombojeguaru’ koʼã mbaʼe (Deuteronomio 18:10-12; Apocalipsis [Revelación] 21:8). Ñande Ru yvagapegua ningo heʼi ñandéve ‘jajeguaru hag̃ua mbaʼe vaígui’, upévare mbaʼeveichavérõ ndajajeheʼaséi demoniokuérare (Romanos 12:9, ÑÑB). Ñapensa haguénte hese ñanembopyʼajeréma.

11. Mbaʼérepa jajeheʼáramo demoniokuérare ikatu jaʼe Satanás oganaha Jehovápe? Emoĩ peteĩ ehémplo.

¹¹ Umi ojeheʼáva demoniokuérare ojapo peteĩ mbaʼe ivaietereíva: otraisiona Jehovápe. Upévare Satanás oiko hatã ñandereity hag̃ua ko mbaʼe vaípe. Ha oity jave peteĩme haʼete ku oganáva Jehovápe. Mbaʼérepa jaʼe upéva? Jahechami peteĩ ehémplo. Ñamoĩ chupe peteĩ soldádo ohejaha ijehérsito ha ova ikontrário ládo. Katuete huvicha pyahu oñembotuicháta upévare ha oñehaʼãta oapoʼi ikontráriope. Ikatu voi ohechauka pe soldádo ohóva hendivekuéra haʼeramoguáicha peteĩ prémio. Upéicha avei peteĩ kristiáno ojeheʼáramo demoniokuérare ováta ikontrário ládo ha oñemoĩta Satanás poguýpe. Ha mbaʼeichaitépa ovyʼáta Satanás ikatúramo ohechauka upéva Jehovápe. Ñambovyʼasénepa Satanáspe? Nahániri, ñande nañatraisionaséi Jehovápe.

12. Mbaʼépa ojapo Satanás ñakambia hag̃ua ñapensáva espiritísmore?

¹² Pe espiritísmo ñanembojeguarúrõ hasy jajeheʼa hag̃ua demoniokuérare. Satanás oikuaa ko mbaʼe ha upévare oipota ñakambia ñapensa lája. Haʼe ñanembotavyse ñapensa hag̃ua “iporãha pe ivaíva, ha ivaiha upe iporãva” (Isaías 5:20). Satanás oipota ñandepyʼamokõi ha upearã oñeʼẽ vai Jehová heʼívare. Haʼe oitýma hetápe ko ñuhãme.

13. Emombeʼu mbaʼéichapa Satanás oñehaʼã omoĩ vai Ñandejárape.

¹³ Jahechamína mbaʼéichapa Satanás oñehaʼã omoĩ vai Jehovápe. Yma hardín de Edénpe haʼe oporandu Évape: “Añete piko [Ñandejára] heʼi peẽme ani hag̃ua peʼu mbaʼeveichagua yva koʼapegua?”. Heta tiémpo upe rire oho umi ánhel ijatyhápe yvágape ha oporandu: “Job piko okyhyje rei mbaʼe [Ñandejáragui]?”. Ha heta síglo upe rire, Jesucristo oñepyrũvo opredika ko yvy ape ári odesafia chupe péicha: “Ndéramo añete [Ñandejára] raʼy, ere koʼã itápe toiko chugui pán”. Ivaive hag̃ua ningo, péicha Satanás oñembohory Jehová heʼivaʼekuére Jesúspe seis semána rupi upe mboyve: “Kóva haʼe che raʼy ahayhuetéva, che aiporavovaʼekue” (Génesis 3:1; Job 1:9, ÑÑB; Mateo 3:17; 4:3).

14. a) Mbaʼépa ojapo Satanás jajeheʼa hag̃ua espiritísmo rehe? b) Mbaʼépa jahecháta koʼág̃a?

¹⁴ Koʼág̃a rupi Satanás ojapo jey upéicha. Oipota ñandepyʼamokõi ha ñapensa pe espiritísmo ndaivairiha katuete. Ha ñambyasyetéko péro oĩ kristiáno ipyʼamokõiva ha haʼetévaicha oñeporandúva: “Añete piko” ivaiete opaichagua espiritísmo? (2 Corintios 11:3). Mbaʼéichapa ikatu ñaipytyvõ koʼã ermánope okambia hag̃ua opensa lája? Ha mbaʼéichapa ikatu ñande jajehekýi ko ñuhãgui? Jaikuaa hag̃ua jahechamíta mokõi mbaʼe Satanás oiporúva ñandereity hag̃ua espiritísmope: umi vyʼarã ha umi tratamiénto hasývape g̃uarã.

15. a) Mbaʼépa ojeʼe espiritísmo rehe heta lugárpe? b) Mbaʼéichapa oĩ kristiáno opensáva ko múndo opensaháicha?

¹⁵ Koʼág̃a rupi heta lugárpe ojeʼe ndaipeligrosoiha espiritísmo, paje, ha ambue mbaʼe demoniokuéra rehegua. Heta hetave umi pelíkula, lívro, prográma ha videohuégo ohechaukáva demoniokuéra ojapóva iporãramoguáicha. Haʼete voi ningo ndojapomoʼãiva ñanderehe mbaʼeve ivaíva. Oĩ pelíkula ha lívro oñeʼẽva máhiare ogustáva hetaiterei tapichápe. Péicha umi demónio ogueroviauka umi héntepe pe espiritísmo ndaipeligrosoiha. Oĩpa kristiáno opensáva avei péicha? Oĩ. Pór ehémplo, peteĩ ermáno ohechavaʼekue peteĩ pelíkula ohechaukáva espiritísmo heʼi: “Heẽ, chéko ahechánte péro ndajeheʼái demoniokuérare”. Mbaʼérepa ipeligróso ñapensa péicha?

16. Mbaʼérepa ivai umi vyʼarã ohechaukáva demoniokuéra ojapóva?

¹⁶ Añetehápe ningo jahecháramo espiritísmo ndeʼiséi jajapoha upéva. Péro ndeʼiséi avei ndaikatuiha ñanembyai. Mbaʼérepa? La Biblia ningo ndeʼíri Satanás ha idemoniokuéra ikatuha oikuaa ñapensáva.a Péro haʼekuéra oikuaase mbaʼépa ñapensa ha moõpa ikangy ñande jerovia. Upearã omangea ñanderehe, ohechapaite jajapóva ha mbaʼépa jaheka ñande vyʼarã. Upévare, oĩramo ogustáva chupe pelíkula térã lívro oñeʼẽva demoniokuérare, paje apoha térã endemoniádo rehe, ohechaukahína umi demóniope moõpa ikangy. Haʼekuéra oaprovecháta upéva ombyepoti heta hag̃ua ha upéi oipete chupe yvýre. Oĩ oñepyrũvaʼekue ohecha mimi koʼãichagua vyʼarã ha upéi katu ojeheʼáma demoniokuérare (Gálatas 6:7).

17. Mbaʼéichapa Satanás ikatu omoñuhã peteĩ kristiáno hasývape?

¹⁷ Satanás ndoiporúi umi vyʼarãnte. Haʼe oikuaa avei enterove jakueraseha ñanderasy jave. Pór ehémplo peteĩ kristiáno hasýva ikatu oñeñandu vaieterei ohechávo ndokueraiha ojapóramo jepe opa mbaʼe doktór heʼíva chupe (Marcos 5:25, 26). Mbaʼéichapa ikatu oiporu upéva Satanás ha idemoniokuéra? Haʼekuéra oikuaa Ñandejára Ñeʼẽ heʼiha ndovaleiha jajerure “umi iñañávape” ñanepytyvõ hag̃ua (Isaías 31:2, ÑÑB). Upévare ikatu oñehaʼã ombopyʼatarova pe hasývape ani hag̃ua opena la Biblia heʼívare. Upéicha pe hasýva ikatu ojedesespera ha ojapose tratamiénto ojeporuhápe espiritísmo. Hoʼáramo upe ñuhãme oñemomombyrýta Jehovágui. Mbaʼérepa jaʼe upéva?

18. Mbaʼeichagua tratamiéntopa ñamboykete kristianokuéra, ha mbaʼérepa?

¹⁸ Umi Israelgua oiporúrõ guare máhia Jehová heʼi chupekuéra: “Pende po pehupívo ñemboʼépe, amboty che resa, ha peñemboʼevéramo jepe, nahendúi” (Isaías 1:13, 15). Ñande ndajaipotái oiko upéva ñanderehe. Mbaʼevéicharõ nañambopochyséi Jehovápe. Ñande jaipota haʼe ojapysaka ñane ñemboʼére, ha koʼýte ñanderasy jave (Salmo 41:3). Upéicharõ mbaʼépa jajapóta japilláramo ojeporuha espiritísmo peteĩ tratamiéntope? Pyaʼeterei ningo ñamboykéta (Mateo 6:13).b Péicha Jehová ndaipochymoʼãi ñanendive (ehecha rrekuádro “Oimépa ajeheʼa espiritísmore?”).

19. a) Mbaʼéichapa Satanás ombotavy avei heta héntepe? b) Mbaʼeichagua kásopa nañamombeʼuivaʼerã?

¹⁹ Jahecháma haguéicha heta tetãme umi hénte heʼi Satanás ha idemoniokuéra ndaipeligrosoiha, péro ambue hendápe katu ndaupéichai. Umi rupi Satanás ombotavy umi héntepe oguerovia hag̃ua haʼe ipoderosoitereiha. Haʼekuéra oke ha opáy, okaru ha ombaʼapo kyhyjepópe umi demoniokuéragui. Upéicha avei, omombeʼuseterei hikuái umi káso demoniokuérare. Upévare tekotevẽ ñañeporandu: “Iporãpa Ñandejára siervokuéra ohendu térã oiko omombeʼu umi káso demoniokuérare?”. Nahániri, ha jahechamíta mokõi mbaʼe ohechaukáva naiporãiha.

20. Mbaʼéichapa ñamopropagándata Satanáspe?

²⁰ Primero, jaikóramo ñamombeʼu demoniokuéra ojapóva ñambaʼapo Satanáspe g̃uarã. Mbaʼérepa? La Biblia ningo heʼi Satanás ikatuha ojapo heta mbaʼeguasu, péro heʼi avei ojapoha “milágro japu” ha ‘oiporuha opaichagua mbaʼe vai oporombotavy hag̃ua’ (2 Tesalonicenses 2:9, 10, BNP). Satanás hína japu ruvicha ha ikatu ombotavy umi oikuaasévape demoniokuéra ojapóva. Haʼe ogueroviauka umi héntepe ohecha térã ohendu hague peteĩ mbaʼe oikoʼỹvaʼekue. Umíva omombeʼu añeteramoguáicha upe oikóva ha upéi ndofaltaivaʼerã ombopy ha omoakãva upe káso. Mbaʼépa oikóta peteĩ kristiáno oikóramo omombeʼu koʼãichagua káso? Oipytyvõta ‘japu ruvichápe’, ha omopropagándata chupe (Juan 8:44, ÑÑB; 2 Timoteo 2:16).

21. Mbaʼe rehépa ñañemongetavaʼerã?

²¹ Ha segundo, añetéramo jepe umi demónio ojapo ñanderehe oimeraẽ mbaʼe naiporãi jaiko ñamombeʼu ermanokuérape. Mbaʼérepa? Ñande ningo jajesarekose Cristo rehe ndahaʼéi Satanásre. Haʼe ningo ‘omoñepyrũ ha omongakuaa ñande jerovia’ (Hebreos 12:2). Jesús oĩrõ guare ko yvy ape ári ndoikói omombeʼu hemimboʼekuérape káso demoniokuérare, hiʼarive haʼe oikuaáneraʼe heta mbaʼe Satanásgui. Upéva rangue Jesús oikuaauka meme Ñandejára goviérno ojapótava. Upévare iporãta ñande avei jajapóramo Jesús ha ijapostolkuéra ojapo haguéicha ha ñañemongeta “umi mbaʼeguasueta [...] Ñandejára ojapovaʼekue rehe” (Hechos 2:11, BNP; Lucas 8:1; Romanos 1:11, 12).

22. Mbaʼe jajapóramopa ‘ojevyʼáta yvágape?

²² Jahecha haguéicha Satanás ñanemoĩ vaise Jehovándi, ha upearã oiporu opaichagua ñuhã, ijapytépe espiritísmo. Péro ñande jajeguarúramo ivaívagui ha jahayhu iporãva, haʼe ndaikatumoʼãi ipuʼaka ñanderehe ha ndajajeheʼamoʼãi demoniokuérare (Efesios 4:27). Mbaʼeichaitépa ‘ojevyʼáta’ yvágape ñañemoĩ mbaretéramo Satanás rehe og̃uahẽ meve pe ára oñehundi hag̃ua chupe (Efesios 6:11).