Kapítulo 16

“Toĩ mborayhu tuicháva pende apytépe”

 1. Mbaʼépa ohecharamo jepi umi ohoramóva testigos de Jehová atyhápe?

UMI ohoramóva testigos de Jehová atyhápe ohecharamoiterei jepi mbaʼeichaitépa ojoayhu hikuái. Ohecha mbaʼéichapa ojeguerohory chupekuéra ha ojotrata hikuái mborayhúpe. Ko mbaʼe ojehecha avei umi aty tuichavehápe. Peteĩ diário heʼi koʼã mbaʼére: ‘Ndaipóri hoʼúva dróga térã okaʼúva. Avave ndosapukáiri ha noñomyañambái. Ndaipóri oporomaldesíva ha omombeʼúva káso tieʼỹ térã ijuru guasúva. Ndaipóri opitáva, omondáva térã omombóva láta kapiʼipépe. Koʼã mbaʼe nameméi ojehecha’. Koʼã mbaʼe oiko oĩgui ijapytepekuéra pe mborayhu ‘naitieʼỹiva ha ndahaʼenteséiva’ (1 Corintios 13:4-8).

 2. a) Mbaʼépa jahechauka porãve imbaretevévo ñande jerovia? b) Mbaʼéichapa japorohayhuvaʼerã Jesucristo ojapohaguéicha?

² Ojoayhu rupi ohechauka porã kristiáno añeteha hikuái (Juan 13:35). Ñamombaretevévo ñande jerovia, jahechauka porãve avei ñane mborayhu. Pe apóstol Pablo oñemboʼevaʼekue iñermanokuéra mborayhu “okakuaave hag̃ua ohóvo” (Filipenses 1:9). Pe apóstol Juan katu ohechaukavaʼekue jahayhúramo ñande rapichápe ñamotenondetaha chupekuéra. Haʼe heʼivaʼekue: “Jaikuaa mbaʼépa pe mborayhu Jesucristo omeʼẽhaguére hekove ñanderayhupápe, ha ñande avei ñameʼẽvaʼerã ñande rekove ñande rapicháre” (1 Juan 3:16; Juan 15:12, 13). Ñameʼẽnepa ñande rekove ñane ermanokuéra rehehápe? Natekotevẽiramo jepe jajapo upéva, ñañehaʼãpañaína ñaipytyvõ chupekuéra, ijetuʼúramo jepe ñandéve?

 3. a) Mbaʼéichapa ikatu jahechauka porãve japorohayhuha? b) Mbaʼérepa koʼág̃a tekotevẽtereive oĩ ñande apytépe mborayhu tuicháva?

³ Ñañehaʼã aja jajapo opa ikatúva ñande rapichakuéra rehehápe, jahechaukavaʼerã avei jahayhu añeteha ñane ermanokuérape. Ñandejára Ñeʼẽ heʼi ñandéve: “Pejoayhu oñopehẽnguéicha” (Romanos 12:10). Katuete oĩ ñande rapicha jahayhúva upéicha. Péro, ikatúpa jahayhu hetavépe? Jaikuaágui ko múndo aña og̃uahẽtamaha huʼãme, iñimportantevéntema koʼág̃a jaiko porã ñane ermanokuéra ndive. Ñandejára Ñeʼẽ heʼi: “Og̃uahẽmahína ára opa mbaʼe opa hag̃ua. [...] Opa mbaʼe mboyve toĩ mborayhu tuicháva pende apytépe. Pe mborayhúko heta tembiapo vaikue oheja rei hína” (1 Pedro 4:7, 8).

Oĩ jave provléma

 4. a) Mbaʼérepa oĩ jepi provléma ermanokuéra apytépe? b) Mbaʼe iporãvapa jahupytýta jajapóramo Ñandejára Ñeʼẽ heʼíva, ndajajaposéiramo jepe sapyʼánte?

⁴ Katuete ñaneimperfékto aja, jajavýta jepi ñande rapichakuéra ndive, ha ñane ermanokuéra avei ojavýta ñanendive (1 Juan 1:8). Mbaʼépa jajapóta upéicha jave? Ñandejára Ñeʼẽ ohechauka ñandéve mbaʼépa jajapovaʼerã, ndajajaposéiramo jepe upéva (Romanos 7:21-23). Upéicharõ jepe, ñañehaʼãramo jajapo Ñandejára Ñeʼẽ heʼíva, jahechaukáta ñaime porãseha Jehová renondépe ha jahayhuvéta ñande rapichápe.

 5. Ojejapóramo ñanderehe ivaíva, mbaʼérepa naiporãi jajapo jey avei upéicha?

⁵ Ojejapóramo ñanderehe ivaíva, sapyʼánte jaheka jajapo jey upéicha. Péro upéva ombotuichave rei pe joavy oĩva. Ha oiméramo tekotevẽ ojekastiga ñande rapichápe upe mbaʼére, jahejavaʼerã upéva Ñandejárape (Proverbios 24:29; Romanos 12:17-21). Oĩ katu omboykéva hapichápe ha noñeʼẽvéima chupe. Ñande katu ndajaikoivaʼerã ñane ermanokuéra ndive upéicha, jahayhuvaʼerã chupekuéra ikatu hag̃ua Ñandejára ñandeguerohory (1 Juan 4:20). Upévare, Pablo ohaivaʼekue: “Pejogueropuʼaka ha peheja rei ojupe oimérõ máva ipochýva ambuére. Ñandejára oheja rei haguéicha peẽme, peheja rei avei peẽ” (Colosenses 3:13). Ikatúnepa nde rejapo koʼápe heʼíva?

 6. a) Mboy vésepa ñaperdonavaʼerã ñane ermánope? b) Mbaʼépa ñanepytyvõ ñaperdona hag̃ua umi mbaʼe vai ojejapóva ñanderehe?

⁶ Mbaʼépa jajapovaʼerã oĩramo pyʼỹi ojapóva ñanderehe ivaíva, péro ndahaʼéiva oñemosẽ hag̃uáicha kongregasióngui? Pe apóstol Pedro heʼírõ guare umi mbaʼe ndaivaietéiva oñeperdonavaʼerãha siete vése, Jesús ombohovái chupe: “Nahániri, 7 naiporãi. Iporãta 77 ramo”. Upe rire ohechauka ñande jajavy hetaveha Ñandejára renondépe pe ikatúvagui ñande rapicha ojavy ñanendive (Mateo 18:21-35). Opa ára jajavy heta hendáicha Jehová renondépe, sapyʼánte jahechakuaaʼỹre. Ikatu, ñapensa, jaʼe térã jajapo peteĩ mbaʼe ñande jaipotávante, térã ndajajapói pe jajapovaʼerã (Romanos 3:23). Upéicharamo jepe, haʼe ñandeporiahuvereko (Salmo 103:10-14; 130:3, 4). Upévare, haʼe ohaʼarõ ñande avei jaiporiahuvereko ñande rapichápe (Mateo 6:14, 15; Efesios 4:1-3). Upéicha jajapóramo, jahechaukáta pe mborayhu ndaipyʼaróiva hapicha ndive (1 Corintios 13:4, 5; 1 Pedro 3:8, 9).

 7. Mbaʼépa jajapovaʼerã oĩramo peteĩ ermáno ipyʼaróva ñanendive?

⁷ Sapyʼánte ikatu jahechakuaa peteĩ ermáno ipyʼaroha ñanendive, jepe ñande nahániri. Upéva oikóramo, ikatu jajapo mokõi mbaʼe: jahechauka ñane mborayhu ‘jaheja reívo’ pe ojejapovaʼekue ñanderehe, heʼiháicha 1 Pedro 4:8, térã jaha ñañeʼẽ hendive jaiko porã jey hag̃ua (Mateo 5:23, 24).

 8. Oĩramo peteĩ ermáno ojapóva peteĩ mbaʼe naiporãiva ñandéve g̃uarã, mbaʼépa ikatu jajapo?

⁸ Ikatu avei peteĩ ermáno ojapo peteĩ mbaʼe naiporãiva ndéve g̃uarã, ha avei nde rapichakuérape naiporãiva. Iporãnepa reñeʼẽramo hendive upévare? Iporãta. Reñeʼẽ porãramo hendive ikatu nerendu ha peiko porã jey. Péro upéva rejapo mboyve, iporã reñeporandumi: Ohechaukápa Ñandejára Ñeʼẽ ivaiha pe ojapovaʼekue, térãpa chénte ahecha upéicha? Ñañeñangarekovaʼerã ani hag̃ua jahecha ñande rapichápe ñande ñaimoʼãháichante (Santiago 4:11, 12). Jehová oguerohory opaichagua tapichápe ha ipasiénsia hesekuéra oiko aja chuguikuéra kristiáno ikatupyrýva.

 9. a) Mávapa oñatende umi pekádo vai ojejapóva kongregasiónpe? b) Mbaʼéicha javépa pe ermáno ipochýva oñeʼẽ raẽ vaʼerã pe mbaʼe vai apohare ndive, ha maʼerãpa?

⁹ Peteĩ ermáno hoʼáramo pekádo vaípe, umíva apytépe oreko rrelasión seysuál ndahaʼéiva iména térã hembireko ndive, noñehaʼarõivaʼerã oñeñatende hag̃ua. Mávapa ojapovaʼerã upéva? Ansianokuéra (Santiago 5:14, 15). Péro, oĩramo provléma plátare térã oñeñeʼẽ vai haguére peteĩ ermánore, pe ipochýva oñeʼẽ raẽ vaʼerã pe mbaʼe vai apohare ndive (Mateo 18:15). Ha noñemyatyrõiramo pe provléma, ojejapovaʼerã Mateo 18:16, 17 heʼiháicha. Jahayhúgui ñane ermáno ojavyvaʼekuépe ha ‘jaiko porãségui hendive’ ñañeʼẽta chupe japoko hag̃uáicha ikorasõre (Proverbios 16:23).

10. Oĩ jave peteĩ provléma, mbaʼépa ñanepytyvõta jahecha hag̃ua hendápe porã upéva?

¹⁰ Oĩ jave peteĩ provléma, tahaʼe michĩva térã tuicháva, ñañehaʼãvaʼerã jahecha Jehová ohechaháicha. Haʼe nomoporãi mbaʼeveichagua tembiapo vai, ha oñekotevẽ vove omopotĩ iñorganisasión umi ndohejaséivagui hembiapo vai. Upéicharõ jepe, ñanemanduʼavaʼerã enterove jajavyha ha ñaikotevẽha Ñandejára ipasiénsia ñanderehe ha ñandeporiahuvereko. Upéicha Jehová omoĩ ñandéve peteĩ ehémplo ohechaukáva mbaʼépa jajapovaʼerã oĩ jave ojavýva ñanendive. Ha, jaiporiahuverekóramo ñande rapichápe, jahechauka japorohayhuha Ñandejáraicha (Efesios 5:1, 2).

Ñañehaʼãvaʼerã jajoayhuve

11. Mbaʼérepa Pablo omokyreʼỹvaʼekue umi Corintoyguápe ojoayhuve hag̃ua?

¹¹ Heta tiémpo Pablo oñehaʼãvaʼekue omombarete pe kongregasión oĩva Coríntope, opytáva Gréciape. Haʼe oñehaʼãvaʼekue oipytyvõ umi ermanokuérape, ha ohayhu chupekuéra. Péro umíva apytépe oĩvaʼekue ndohayhúiva chupe ha oñeʼẽ vaíva hese. Upévare, Pablo omokyreʼỹ chupekuéra ojoayhuve hag̃ua (2 Corintios 6:11-13; 12:15). Enterove jajepyʼamongetavaʼerã jahecha hag̃ua mbaʼeichaitépa jahechaukañaína jahayhuha ñande rapichakuérape ha mbaʼéichapa ikatu ‘ñambotuichave’ upéva (1 Juan 3:14).

12. Mbaʼéichapa ikatu jahayhuve enterove ermanokuérape?

¹² Oĩpa kongregasiónpe umi ermáno ndoʼaporãiva ñandéve? Upéicharõ, ñañehaʼãvaʼerã ñamboyke umi mbaʼe naiporãiva ñandéve ha ikatúta jajogueraha porãve. Katuete ñande avei jaipota haʼekuéra ojapo upéicha ñanendive. Avei, ñamañáramo umi mbaʼe porã orekóvare, katuete jahayhuvéta chupekuéra (Lucas 6:32, 33, 36).

13. Mbaʼéichapa ikatu jahechaukave jahayhuha ñane ermanokuérape?

¹³ Jahechakuaavaʼerã ndaikatuiha ñaipytyvõ enterovépe jajaposeháicha. Sapyʼánte ndaikatúi jasaluda rreunionhápe enterove ermanokuérape, térã ñainvita chupekuéra okaru hag̃ua ñanendive. Péro, ikatúpa ñañehaʼã jaikuaave umi ermanokuéra oĩva kongregasiónpe, ñañemongetávo sapyʼami jepe hendivekuéra? Ñapensámapa ñainvitávo peteĩ ermáno ndajaikuaaporãivape opredika hag̃ua ñanendive?

14. Ñaime jave ermanokuéra ndajaikuaáiva apytépe, mbaʼéichapa ikatu jahechauka chupekuéra pe mborayhu tuichaitéva?

¹⁴ Umi ñande aty guasuhápe ikatu jahechauka porãve jahayhuha ñane ermanokuérape. Hetaiterei ñaime jepi umichahápe. Ha ndaikatúiramo jepe jajokuaapa, ikatu jahechauka ñamotenondeha chupekuéra umi mbaʼe jajapóvape. Avei jahechauka jahayhuha chupekuéra jahávo ñañeʼẽ umi ñande ypýpe oĩva ndive ikatu jave. Og̃uahẽta peteĩ ára opavave ko Yvy ape ári jaikotaha oñoermánoicha ha ñamombaʼeguasúta oñondivepa Ñandejára añeteguápe, pe ñande Ru yvagapegua. Ajépa javyʼaitéta ikatu vove jajokuaapa! Pe mborayhu tuichaitéva ñanemomýita jajapo hag̃ua upéva. Mbaʼérepa nañañepyrũi koʼág̃ama voi?

Ñanemanduʼa hag̃ua

• Oĩ jave provléma ermanokuéra apytépe, mbaʼéichapa oñemyatyrõvaʼerã, ha mbaʼérepa?

• Oiko aja ñandehegui kristiáno ikatupyrýva, mbaʼéichapa ikatu jahechaukave jahayhuha avei ñane ermanokuérape?

• Mbaʼépa ikatu jajapo ani hag̃ua jahayhu umi jaikuaávape añónte?

[Nóta oĩva taʼanga ndive páhina 148]

Jahechauka jahayhuha ñane ermanokuérape opa hendápe, umíva apytépe ñañembyaty jave