Oñeporandúva jepi

Pablo oskrivi vaʼekue: “Pe léi chepytyvõ rupi, che amano pe léipe g̃uarã ikatu hag̃uáicha aikove Ñandejárape g̃uarã” (Gál. 2:19).

Pablo oskrivírõ guare koʼã mbaʼe, omyesakã hína kuri peteĩ mbaʼe iñimportánteva umi kristiáno oikóvape Galáciape, haʼéva peteĩ provínsia rromána. Upe lugárpe ningo oĩ vaʼekue umi kristiáno ohejáva umi mboʼehára japu omoinge iñakãmekuéra umi mbaʼe noĩporãiva. Koʼã mboʼehára japu ningo omboʼe peteĩ persóna ojesalvaséramo okumpli vaʼerãha pe Léi Mosáika, prinsipálmente pe léi oñeʼẽva pe sirkunsisiónre. Péro Pablo oikuaa vaʼekue Ñandejára ndojerureveimaha isiervokuérape oñesirkunsida hag̃ua. Upévare haʼe oipytyvõ chupekuéra ohechakuaa hag̃ua ha ontende porã hag̃ua japuha umi mbaʼe omboʼéva hikuái, ha omombarete umi ermanokuéra jerovia Jesucristo sakrifísiore (Gál. 2:4; 5:2).

La Biblia heʼi porãiterei peteĩ persóna omanóramo, haʼe ndoikuaaveimaha mbaʼevete asy, avei ndoafektavéima chupe umi mbaʼe oikóva ijerére (Ecl. 9:5). Pablo heʼírõ guare: “Che amano pe léipe g̃uarã”, haʼe heʼise hína kuri noĩveimaha pe léi mosáika poguýpe, upévare upe léi ndoafektavéima chupe. Upéva rangue, haʼe oĩ vaʼekue segúro oñepyrũ hague ‘oikove Ñandejárape g̃uarã’ ojerovia rupi Jesús sakrifísiore.

Pablo situasión okambia vaʼekue ‘pe léi oipytyvõ rupi chupe’. ¿Mbaʼéichapa oiko raʼe upéva? Upérõ haʼe omyesakã ramónte kuri peteĩ kuimbaʼe ihustoha “ndahaʼéi okumpli haguére pe léi, síno ojerovia rupi Jesucristo rehe” (Gál. 2:16). Añetehápe ningo pe léi rupive ojehupyty peteĩ mbaʼe iñimportantetereíva. Apóstol Pablo omyesakã vaʼekue umi kristiáno Galaciaguápe: “Pe léi oñemeʼẽ vaʼekue ñandéve ojekuaa hag̃ua umi mbaʼe vai jajapóva og̃uahẽ meve pe familiare, chupe ningo ojejapo vaʼekue pe promésa” (Gál. 3:19). Ha upeichaite hína, pe léi ohechauka porã vaʼekue yvyporakuéra imperfékto ha pekadór ndaikatumoʼãiha okumpli enteroite mbaʼe oĩva pe léipe, upévare oikotevẽmante hikuái peteĩ sakrifísio perfékto opa ára g̃uarã. Upéicharõ pe léi oipytyvõ vaʼekue umi héntepe ohechakuaa hag̃ua Jesús haʼeha “pe familiare”. Ha peteĩ persóna ohechaukáramo ojeroviaha Jesucrístore, Ñandejára ikatu heʼi hese ihustoha (Gál. 3:24). Pablo rehe ikatu vaʼekue ojeʼe ihustoha, pórke haʼe oasepta ha ojerovia vaʼekue Jesúsre. Upévare Pablo ‘omano pe léipe g̃uarã’ ha oñepyrũ ‘oikove Ñandejárape g̃uarã’. Haʼe oĩma Ñandejára poguýpe, upévare pe léi ndaipuʼakavéima hese.

Pablo oskrivírõ guare ikárta umi rrománope heʼi vaʼekue peteĩ mbaʼe ojogua léntova upévape. Haʼe heʼi: “Che ermanokuéra, upéicha avei peẽ pemano pe léipe g̃uarã, péro Cristo osakrifika rupi hete pejeíma pe léi poguýgui. [...] Koʼág̃a ñande ñaiméma lívre pórke pe léi nañandejokovéima” (Rom. 7:4, nóta, 6). Koʼã versíkulo ha avei Gálatas 2:19, ohechauka Pablo noñeʼẽi hague peteĩ persóna omanóvare pe léi okondena rupi chupe ha heʼi rupi hese pekadorha. Upéva rangue haʼe oñeʼẽ pe livertáre, pórke pe léi ndorekovéima chupe ipoguýpe ni umi ótro kristiáno haʼéicha avei ojelivera vaʼekuépe ojerovia rupi Cristo sakrifísiore.