Mitãrusukuéra, peñemoĩ mbaretéke Satanás kóntrape

1, 2. a) ¿Mbaʼérepa jaʼekuaa mitãrusukuéra oganaha ohóvo Satanás ha umi demóniope? (Ehecha pe taʼanga oĩva iñepyrũme). b) ¿Mbaʼépa jahecháta ko artíkulope?

APÓSTOL Pablo okompara kristianokuérape umi soldádore. Ñande ningo ñaime peteĩ gérrape, ha añetehápe oexisti hína la ñane enemigokuéra. Péro nañañorairõi yvyporakuéra kóntrape, síno Satanás ha umi demónio kóntrape. Ojapóma hetaiterei tiémpo haʼekuéra oñorairõ hague oikóvo, ha ikatupyryeterei hikuái. Upévare haʼete voi ndajarekóiva posivilida ñagana hag̃ua, ha koʼýte mitãrusukuéra. ¿Péro ikatúpa mitãrusu ha mitãkuña ogana koʼã enemígo ipoderosoitévape? Si ikatu, ha ogana voi hína. ¿Mbaʼérepa jaʼe upéva? Pórke Jehová omombarete chupekuéra upearã. Ojapoháicha umi soldádo oñentrena porãva, mitãrusukuéra omoĩ “pe armadúra kompletoite oúva Ñandejáragui” oĩ hag̃ua preparádo ko gerrarã (elee Efesios 6:10-12).

² Pablo omoĩrõ guare ko ehémplo oiméne opensa raʼe pe armadúra oipurúvare umi soldádo romano (Hech. 28:16). Ko artíkulope ñamyesakãta ko ehémplo porãite. Avei jahecháta mbaʼe ijetuʼúvapa ohasa unos kuánto mitãrusu ha mitãkuña omonde hag̃ua káda párte orekóva pe armadúra espirituál, ha mbaʼérepa ideprovécho chupekuéra ojapo upéva.

3, 4. ¿Mbaʼépepa ojojogua pe añetegua oĩva la Bíbliape ha pe sinturón oipuru vaʼekue umi soldádo romano?

³ (Elee Efesios 6:14). Pe sinturón de metál ymave oipurúva umi soldádo militár romano, oprotehe vaʼekue ikuʼa ha oipytyvõ avei ojesuheta porã hag̃ua ipéchore ichaléko de metál. Oĩ avei sinturón orekóva peteĩ gáncho joguaha oñemoĩ hag̃ua peteĩ espáda ha peteĩ kyse. Pe sinturón ojejopy porãva pe soldádo kuʼáre, oipytyvõ chupe oñandu hag̃ua oĩha protehído oĩ jave pe ñorairõháme.

⁴ Pe sinturóncha avei, pe añetegua ñaaprendéva Ñandejára Ñeʼẽgui ñandeprotehe umi enseñánsa japúgui (Juan 8:31, 32; 1 Juan 4:1). Amáske jahayhu Ñandejára Ñeʼẽ, ifasilvéta ñandéve jajapo hag̃ua Ñandejára omandáva, térã ñamonde hag̃ua pe “pytiʼa moʼãha” (Sal. 111:7, 8; 1 Juan 5:3). Avei, amáske ñantende porãve pe añetegua, ñañedefende porãvéta ñane enemigokuéragui (1 Ped. 3:15).

 5. ¿Mbaʼérepa siémpre jaʼe vaʼerã la verda?

⁵ Pe añetegua oĩva la Bíbliape jareko vaʼerã ñandejehe haʼeramoguáicha peteĩ sínto. Péicha ifasilvéta jajapo hag̃ua la oĩva pype, ha siémpre jaʼéta la verda. ¿Mbaʼérepa naiporãi ñandejapu? Pórke pe japu haʼe hína peteĩ árma Satanás oipuru meméva ha oikoitéva chupe. Ñandejapúramo jajeperhudika ñande voi ha avei umi ñanderoviávape (Juan 8:44). Ñaneimperféktoramo jepe, ñañehaʼãmbaite ani hag̃ua núnka ñandejapu (Efes. 4:25). Péro upéva ikatu ijetuʼu hína. Abigail, orekóva 18 áño heʼi: “Sapyʼánte haʼete nokonveníriva jaʼe la verda, koʼýte ikatútarõ jajei peteĩ situasión ijetuʼúvagui ñandejapúrõ”. ¿Mbaʼérepa siémpre ñañehaʼã vaʼerã jaʼe la verda? Haʼe heʼi: “Chesinséra jave, apyta chekonsiénsia potĩ Jehová renondépe, ha che tuakuéra ha che amigokuéra oikuaa ikatuha okonfia cherehe”. Victoria, orekóva 23 áño heʼi: “Ikatu oĩ nemongyhyjeséva ere haguére la verda ha redefende rupi pe añetegua. Péro siémpre iporãve jey la rehupytýva, por ehémplo rejeroviave ndejehe, reñandu reĩ porãveha Jehovándi ha umi nderayhúva katu nderrespetave”. ¿Rehechakuaápa mbaʼérepa siémpre iñimportánte ere la verda? Péicha rejapóramo erekóta ndejehe “pe añetegua haʼeramoguáicha peteĩ sínto”.

6, 7. ¿Mbaʼéicha rupípa pe hustísia ikatu ñakompara peteĩ chaléko de metál rehe?

⁶ Pe chaléko de metál oipurúva umi soldádo romano ikatu kuri ojejapo chápa de metálgui. Upearã ojeprepara unos kuánto chápa ipukúva ha ojekoloka ipekuévo. Umíva oñemoldea opyta hag̃uáicha hustoite ipéchore. Umi chápa de metál ojesuheta ojoykére tíra de kuérope ha ojejoko gáncho ha evíllape. Umi chápa de metál oñemoĩ avei omoʼãmba hag̃uáicha pe soldádo atiʼy ha ojejokua avei kuérope. Pe soldádo oreko jave ijehe la ichaléko de metál ndaikatúi kuri okuʼe normálmente. Péro upéva oprotehe ikorasõ ha ótro órgano iñimportánteva, ani hag̃ua umi espáda térã umi flécha oikutu chupe. Upévare okontrola meme vaʼerã ohecha hag̃ua oĩmbápa ilugárpe umi chápa.

⁷ Jehová mandatokuéra oprotehe ñane korasõ térã umi mbaʼe ñapensáva ha ñañandúva. Imandamientokuéra ihústova ikatu ñakompara pe chaléko de metál rehe (Prov. 4:23). Peteĩ soldádo arakaʼeve nokambiáiva la ichaléko de metál ótro chaléko ojejapóvare metál ikangyvévagui. Péicha avei, ñande núnka nañakambiái vaʼerã la Jehová heʼíva umi mbaʼe ñande ñapensávare. ¿Mbaʼérepa? Pórke ñandejehegui rei ndaikatumoʼãi japrotehe ñane korasõ (Prov. 3:5, 6). Upévare pyʼỹinte ñakontrola vaʼerã ñande “chaléko de metál” jahecha hag̃ua oprotehépa hína ñane korasõ.

 8. ¿Mbaʼérepa jajapo vaʼerã Jehová omandáva?

⁸ ¿Sapyʼántepa repensa Jehová omandáva oipeʼaha ndehegui liverta, térã nopermitiriha ndéve rejapo la rejaposéva? Daniel, orekóva 21 áño heʼi: “Umi profesór ha che kompañerokuéra oñembohory cherehe ajapo haguére la Biblia heʼíva. Peteĩ tiémpore ndajeroviavéi chejehe ha añedeprimi”. ¿Mbaʼéichapa Daniel oñeñandu koʼág̃a? Haʼe heʼi: “Ahechakuaa heta mbaʼe porã jahupytyha jajapóramo Jehová heʼíva. Unos kuánto che kompañerokue oñepyrũ kuri ojedroga ha oĩ avei oheja reíva ikoléhio. Ambyasy péicha opa haguére hikuái. Jehová ningo añetehápe ñandeprotehe”. Madison, orekóva 15 áño heʼi: “Che kompañerokuéra heʼi jave iporã térã ikalidaha peteĩ mbaʼe noĩporãiva, ijetuʼu jepi chéve ajapo hag̃ua la Jehovápe ogustáva”. ¿Mbaʼépa ojapo Madison? Haʼe heʼi: “Chemanduʼa arekoha pe priviléhio aguerahávo Jehová réra, ha Satanás omoĩha chéve umi tentasión chereitységuinte. Agueropuʼaka rire umi tentasión, añeñandu porãiterei”.

9-11. a) ¿Mbaʼeichagua “sandáliapa” omoĩ kristianokuéra? b) ¿Mbaʼéichapa ikatu ñanekyreʼỹve japredika hag̃ua?

⁹ (Elee Efesios 6:15). Umi soldádo romano ndohói vaʼekue py nandi gerrahápe. Haʼekuéra oipurúmi sandália ojejapóva 3 kápa de kuérogui, péicha irresistenteve vaʼekue. Péro umi sandália ikómodo avei, upévare umi soldádo oguata porã vaʼekue heseve.

¹⁰ Umi sandália oipurúva umi soldádo romano ideprovécho chupekuéra pe gerrahápe. Pe armadúra espirituál apytépe oĩ avei pe sandália japredika hag̃ua. Péro upéva nañanepytyvõi ñañorairõ hag̃ua, síno jaikuaauka hag̃ua pe mensáhe “oñeʼẽva pyʼaguapýre” (Is. 52:7; Rom. 10:15). Upéicharõ jepe, sapyʼánte tekotevẽ ñandepyʼaguasu japredika hag̃ua. Bo, orekóva 20 áño heʼi: “Che akyhyje vaʼekue apredika hag̃ua che kompañerokuérape, haʼetévaicha chéve la atĩva ajapo hag̃ua upéva. Apensávo upe tiémpore, ndaikuaái mbaʼérepa añeñandu vaʼekue péicha. Koʼág̃a avyʼa ikatu haguére apredika umi che aveguápe”.

¹¹ Heta kristiáno imitãva ikyreʼỹve opredika hag̃ua ojeprepara porã jave. ¿Mbaʼéichapa ikatu nde avei rejeprepara? Julia, orekóva 16 áño heʼi: “Siémpre amoĩ umi puvlikasión bíblica che mochílape, avei ajapysaka porã che kompañerokuéra omombeʼu jave la opensáva ha ogueroviáva. Péicha ahechakuaa mbaʼéichapa ikatu aipytyvõ chupekuéra. Ajeprepara porã jave, ikatu añemongeta hendivekuéra umi mbaʼe ideprovéchovare káda únope isituasiónpe g̃uarã”. Makenzie, orekóva 23 áño heʼi: “Neamávlerõ ha reporohendukuaáramo ikatúta reikuaa mbaʼe mbaʼépa umi nde avegua ombohovái hína. Upévare añehaʼã ahechapaite umi mbaʼe onohẽva guive Jehová organisasión mitãrusukuérape g̃uarã. Péicha ikatu ahechauka umi che aveguápe la Biblia ñanemboʼéva, térã umi informasión osẽva jw.org-pe oipytyvõtava chupekuéra”. Jajeprepara porãramo japredika hag̃ua, haʼete hína ñamoĩva peteĩ “sandália” oike porãva ñanderehe.

12, 13. ¿Mbaʼéicha javépa Satanás opoi ñanderehe “umi flécha hendýva”?

¹² (Elee Efesios 6:16). Umi soldádo romano oreko vaʼekue peteĩ eskúdo guasu. Upéva omoʼã chupekuéra ijatiʼy guive irrodílla peve, ha oprotehe chupekuéra umi espáda, lánsa ha fléchagui.

¹³ ¿Mbaʼéicha javépa Satanás opoi ñanderehe “umi flécha hendýva”? Haʼe ikatu ojapo upéva heʼívo heta japu Jehováre. Satanás oipota ñapensa Jehová nañanderayhuiha ha noñeinteresaiha ñanderehe. Ida, orekóva 19 áño heʼi: “Pyʼỹinte añandu Jehová oĩha mombyry chehegui ha ndachepotaiha iñamigarã”. ¿Mbaʼépa ojapo Ida oñeñandu jave péicha? Haʼe heʼi: “Umi rreunión omombareteterei che jerovia. Anteve aguapýnte vaʼekue Salónpe ha nakomentái pórke apensa avave nohendusemoʼãiha la haʼéva. Koʼág̃a katu ajeprepara rreunionrã ha añehaʼã akomenta 2 térã 3 vése. Añetehápe ijetuʼu chéve upéva, péro péicha añeñandu porãve. Avei umi ermáno ha ermána chemokyreʼỹeterei. Umi rreunión chepytyvõiterei añandu hag̃ua Jehová cherayhuha”.

14. ¿Mbaʼépa ñaaprende Ida rembiasakuégui?

¹⁴ Pe eskúdo oipurúva umi soldádo ningo oreko vaʼekue siémpre el mísmo tamáño. Péro Ida rembiasakue ohechauka ñande jerovia ndahaʼeiha upéicha. Por ehémplo, ñande fe ikatu tuicha térã michĩ, ỹrõ imbarete térã ikangy. Upéva odependéma ñanderehe (Mat. 14:31; 2 Tes. 1:3). Ikatu hag̃uáicha ñande jerovia ñandeprotehe peteĩ eskúdoicha, iñimportánte ñamombarete ha ñambotuicha ñande fe.

15, 16. ¿Mbaʼéicha rupípa ñane esperánsa ñambojojakuaa peteĩ káskore?

¹⁵ (Elee Efesios 6:17). Umi soldádo romano oipuru vaʼekue peteĩ kásko ikatu hag̃uáicha oprotehe iñakã, hova ha ijajúra. Sapyʼánte umi kásko oreko vaʼekue peteĩ párte ojejagarra hag̃ua, péicha umi soldádo ikatu avei oraha ipópe.

¹⁶ Pe kásko ningo oprotehe umi soldádo akã, péicha avei pe esperánsa de “salvasión” ñandeprotehe ñapensa hag̃ua hekoitépe (1 Tes. 5:8; Prov. 3:21). Pe esperánsa jarekóva ñanepytyvõ jajesareko hag̃ua Ñandejára promesakuérare, ha avei ñanepytyvõ ani hag̃ua ñanemokangy ñane provlemakuéra (Sal. 27:1, 14; Hech. 24:15). Péro jaipotáramo pe esperánsa ñandeprotehe, jajerovia vaʼerã hese. Jaʼe porãsérõ g̃uarã, ñamoĩ vaʼerã ñane akãre “peteĩ káskoicha”, jaraha rangue ñande pópente.

17, 18. a) ¿Mbaʼépa ojapo Satanás oipeʼaka hag̃ua ñandéve ñane akãgui pe kásko? b) ¿Mbaʼéichapa ikatu jahechauka ndajahejaiha Satanás ñanembotavy?

¹⁷ ¿Mbaʼépa ojapo Satanás oipeʼaka hag̃ua ñandéve ñane akãgui pe kásko? Epensamína mbaʼéichapa haʼe omoñuhãse kuri Jesúspe. Satanás oikuaa kuri Jesús ogovernataha ko yvy, péro upe mboyve osufri ha omano raẽ vaʼerãha. Upéi ohaʼarõ jey vaʼerã Jehová heʼi peve chupe mbaʼe tiémpopepa oikóta chugui Rréi. Upémarõ Satanás oofrese chupe ogovernáma hag̃ua yvyporakuérape ohaʼarõʼỹre mbaʼeve. Haʼe opromete Jesúspe ogovernatamaha ko múndo oadoráramo chupe unavemi jepe (Luc. 4:5-7). Satanás oikuaa avei Jehová oprometeha ñandéve heta mbaʼe iporãitereíva pe múndo pyahúpe g̃uarã. Péro upearã tekotevẽ ñahaʼarõ gueteri, ha upe aja ikatu jahasa heta mbaʼe ijetuʼúva. Upévare Satanás oofrese ñandéve koʼág̃ama voi jaiko porã hag̃ua. Haʼe oipota ñamotenonde umi mbaʼe ñandegustáva ha ñambotapykue Ñandejára Rréino (Mat. 6:31-33).

¹⁸ Heta mitãrusu ha mitãkuña ndohejái Satanás ombotavy chupekuéra. Por ehémplo, Kiana orekóva 20 áño heʼi: “Che aikuaa Ñandejára Rréino añoite ikatuha osolusiona tahaʼe haʼéva provléma”. ¿Mbaʼéichapa pe esperánsa oipytyvõ Kiánape opensa ha oiko hag̃ua hekoitépe? Omomanduʼa chupe ko múndo aña ndohopukuveimaha. Upévare, haʼe ndoipurúi itiémpo ha ihuventu ijestúdio porã hag̃ua, síno oñemeʼẽmbaite hag̃ua Jehová servísiope.

19, 20. ¿Mbaʼéichapa ikatu ñandekatupyryve jaipuru hag̃ua Ñandejára Ñeʼẽ?

¹⁹ Umi soldádo romano oipuru vaʼekue espáda ipukúva 50 sentímetrorupi. Haʼekuéra oipurukuaa vaʼekue la ijespáda pórke opraktika káda día.

²⁰ Apóstol Pablo heʼi Ñandejára Ñeʼẽ ojoguaha peteĩ espádape. Jehová voi ningo omeʼẽ ñandéve upéva. Péicha rupi tekotevẽ ñandekatupyryve jahávo jaexplika hag̃ua ótrope umi mbaʼe jaroviáva, ha avei jakorrehi hag̃ua ñapensa lája (2 Cor. 10:4, 5; 2 Tim. 2:15). ¿Mbaʼéichapa ikatu ñandekatupyryve? Sebastian, orekóva 21 áño heʼi: “Alee jave che Biblia askrivi jepi iguyetépe peteĩ versíkulo de káda kapítulo. Péicha ajapo hína peteĩ lísta umi versíkulo chegustavévagui. Koʼã mbaʼe chepytyvõ apensa hag̃ua Jehová opensaháicha”. Daniel katu heʼi: “Ajapo jave la che lektúra bíblica aiporavo umi versíkulo ikatúva oipytyvõ umi persóna atopávare predikasiónpe. Apilla umi hénte orreaksiona porãveha ohechakuaa jave ñanderehe ñandegustaitereiha la Biblia ha ñañehaʼãmbaiteha hesehapekuéra”.

21. ¿Mbaʼérepa ndajakyhyjéi vaʼerã Satanás ha umi demóniogui?

²¹ Ojapoháicha umi mitãrusu ñañeʼẽ hague ko artíkulope, ñande avei ndajakyhyjéi vaʼerã Satanás ha umi demóniogui. Haʼekuéra ningo añetehápe imbareteterei, péro ndaipoderosovéi Jehovágui. Hiʼarive, ndoikomoʼãi hikuái opa árare. Satanás ha umi demónio opytáta préso ha ndaikatuvéitama operhudika avavépe Cristo ogoverna aja Mil Áñore. Upéi oñehundietéta chupekuéra (Apoc. 20:1-3, 7-10). Ñande jaikuaa ñane enemígope, jaikuaa avei mbaʼéichapa ñanemoñuhãse ha mbaʼépa oheka hikuái. Upévare, jasegíkena ñañemoĩ ikontrapekuéra ha ani ñanderesarái Jehová ñanepytyvõha.