Eiporavo porãkena ne amigorã

Igústo jareko umi amígo verdadéro, pórke ikatu javyʼa ha jajediverti hendivekuéra. Ha avei jaikuaa oĩtaha ñande ykére ijetuʼu jave. Péro ñañatende porã vaʼerã mávarepa jajeheʼa, ha la Biblia ikatu ñanepytyvõ upearã. Jahechamína mbaʼe mbaʼépa jareko vaʼerã enkuénta jaelehi porã hag̃ua ñane amigorã.

1. ¿Mbaʼéichapa ikatu nepytyvõ térã ndeperhudika umi amígo reelehíva?

Jahasaitereíramo tiémpo peteĩ persónandi, tahaʼe jepe raʼe umi rred sosiál rupive, mbeguekatúpe jajoguaitereíta chupe umi mbaʼe ñapensáva ha jajapóvape. Upévare voi la Biblia heʼi: “Pe oiko meméva umi iñarandúvandi iñarandúta avei, péro pe oiko meméva umi itavývandi [térã umi ndohayhúivandi Jehovápe] osẽ vaíta” (Proverbios 13:20). Reiporavóramo ne amigorã umi oservíva Jehovápe ha ohayhúva chupe, haʼekuéra nepytyvõta reñemoag̃uive hag̃ua hese ha edesidi porã hag̃ua. Péro reiporavóramo ne amigorã umi ndohayhúiva Jehovápe, haʼekuéra ikatu hína nemomombyry chugui. ¡Upévare voi la Bíbliape heʼi jaiporavo porã vaʼerãha ñane amigorã! Jaiporavóramo ñane amigorã umi ohayhúva Jehovápe ou porãta ñandéve voi ha chupekuéra avei. Ha upéicha ikatúta avei jasegi ‘ñañomokyreʼỹ ha ñañomombarete’ (1 Tesalonicenses 5:11).

2. ¿Oimportápa Jehovápe mbaʼeichagua amígopa ereko?

Jehová oelehi porãiterei iñamigorã. Proverbios 3:32 heʼi voi: “Umi ihústova iñamigoite hína”. ¿Mbaʼéichapa oñeñandúne Jehová jaiporavóramo ñane amigorã umi ndohayhúivape chupe? ¡Upéva omoñeñandu vaietereíta Jehovápe! (Elee Santiago 4:4). Péro ñamboyketéramo umi júnta vai ha ñañemoag̃uive hese ha umi ohayhúvare chupe, haʼe katuete ñandeguerohorýta ha oipotáta oiko ñandehegui iñamígo (Salmo 15:1-4).

EJEPYʼAMONGETAMÍNA

3. Emboyke umi júnta vai

¿Máva mávapa hína umi júnta vai? Entéro umi ndohayhúiva Ñandejárape ha ndojapóiva haʼe heʼíva. Ehecha pe VIDÉO, ha upéi erresponde ko porandu:

VIDÉO: Ñamboyke umi júnta vai (6:17)

• Sapyʼánte ikatu jaiporavo vai ñane amigorã ñañemeʼẽʼỹre enkuénta jepe. ¿Mbaʼéicha javépa ikatu oiko upéva?

Elee 1 Corintios 15:33, ha upéi erresponde koʼã porandu:

• ¿Mbaʼeichagua persónapa nde epensa haʼeha júnta vai ndéve g̃uarã? ¿Mbaʼérepa repensa upéicha?

Elee Salmo 119:63, ha upéi erresponde ko porandu:

• ¿Mbaʼépa ereko vaʼerã enkuénta eiporavo hag̃ua ne amigorã?

4. Umi persóna idiferénteva ojuehegui ikatu oñoamigoite

La Biblia omombeʼu ñandéve mokõi kuimbaʼe israelita hérava David ha Jonatán oñoamigoite hague. Hiʼarive haʼekuéra idiferentete vaʼekue ojuehegui, pórke Jonatán ijedave vaʼekue Davídgui ha haʼe vaʼekue pe rréi raʼy. Elee 1 Samuel 18:1, ha upéi erresponde koʼã porandu:

• ¿Mbaʼérepa naiporãmoʼãi jaiporavo ñane amigorã ñande aveguápente? ¿Opyta porãtapa ñamboykéramo peteĩ persónape iplatave térã imboriahuve rupi ñandehegui?

Elee Romanos 1:11, 12, ha upéi erresponde ko porandu:

• ¿Mbaʼéichapa oñomokyreʼỹ umi amígo ohayhúva Jehovápe?

Ehechamína ko vidéo ohechaukáva mbaʼéichapa peteĩ ermáno imitãva otopa peteĩ amígo ovaléva la péna ndahaʼéiramo jepe ijavegua. Ehecha pe VIDÉO, ha upéi erresponde koʼã porandu:

VIDÉO: Ñahaʼarõʼỹve jave jatopakuaa ñane amigorã (5:06)

• Ohechaukaháicha pe vidéo, ¿mbaʼérepa Akil tuakuérape oipyʼapy umi amígo oguereko vaʼekue ikoléhiope?

• ¿Mbaʼérepa ñepyrũrã Akil oñeñandu porã kuri hendivekuéra?

• ¿Mbaʼépa oipytyvõ chupe anivéma hag̃ua oñeñandu haʼeño?

5. Mbaʼéichapa ikatu ñakonsegi umi amígo verdadéro

VIDÉO: ¿Mbaʼéichapa peteĩ amígo teete? (4:14)

Elee Proverbios 18:24 ha 27:17, ha upéi erresponde koʼã porandu:

• ¿Mbaʼéichapa oñopytyvõ umi oñoamigoitéva?

• ¿Ndépa reguereko peichagua amígo? Oiméramo nahániri, ¿mbaʼépa ikatu rejapo ekonsegi hag̃ua peteĩ?

Elee Filipenses 2:4, ha upéi erresponde ko porandu:

• Ereko hag̃ua umi amígo ovaléva la péna, nde voi haʼe vaʼerã peteĩ amígo verdadéro. ¿Mbaʼéichapa ikatu emoĩ nde párte oiko hag̃ua upéva?

RRESÚMEN

Jaelehi porãramo ñane amigorã ñambovyʼáta Jehovápe, ha ou porãta ñandéve voi.

Rrepáso

• ¿Mbaʼérepa iñimportánte Jehovápe g̃uarã mávapepa jaiporavo ñane amigorã?

• ¿Mbaʼeichagua persónapepa ndajaiporavói vaʼerã ñane amigorã?

• ¿Mbaʼépa ejapo vaʼerã ereko hag̃ua umi amígo ovaléva la péna?

EINVESTIGA HAG̃UA

Ehecha mbaʼéichapa umi amígo verdadéro ikatu ñanepytyvõ ijetuʼu jave.

“Ñañehaʼãkena jareko amígo verdadéro ou mboyve pe fin” (Ñemañaha noviembre de 2019)

Ehecha mbaʼe mbaʼépa ikatu ejapo ekonsegi hag̃ua umi amígo ovaléva la péna.

“Mbaʼéichapa ikatu aiporavo porã che amigorã?” (Mitãrusukuéra oñeporandúva jepi, konsého peẽme g̃uarã, volúmen 1, kapítulo 8)

¿Mbaʼépa ereko vaʼerã enkuénta erekótarõ amígo umi rred sosiálpe?

Aníkena eipuru vai umi rred sosiál (4:12)

Pe experiénsia héravape “Aikotevẽvaʼekue peteĩ túvare”, ehecha mbaʼérepa peteĩ karai okambia vaʼekue umi amígo oguerekóva.

“La Biblia okambia chupekuéra” (Ñemañaha Julio-Septiembre de 2012)