Siémpre ñaime vaʼerã preparádo Jehová árape g̃uarã

 1. ¿Mbaʼépa jajapo vaʼerã jajesalvaséramo “Jehová ára” ou vove?

¿MBAʼÉPA heʼise la Bíbliape oñeñeʼẽ jave ‘Jehová árare’? Upéva hína pe tiémpo Ñandejára ohunditahápe iñenemigokuérape ha osalvatahápe ipuévlope. Yma Jehová ojapóma vaʼekue voi upéva (Is. 13:1, 6; Ezeq. 13:5; Sof. 1:8). “Jehová ára” oñepyrũta umi governánte ohundi vove Babilonia Guasu ha opáta Armagedónpe. Jajesalva hag̃ua jajeprepara vaʼerã koʼág̃ama voi upe árape g̃uarã. Jesús heʼi vaʼekue tekotevẽha ‘siémpre ñaime preparádo’ pe ‘jehasa asy guasúpe’ g̃uarã. Upéicharõ ndahaʼéi una vénte jajapo vaʼerã upéva, síno kontinuadoite (Luc. 12:40; Mat. 24:21).

 2. ¿Mbaʼérepa iporãta ñahesaʼỹijo 1 Tesalonicenses?

² Oskrivírõ guare 1 Tesalonicenses, apóstol Pablo oipuru vaʼekue unos kuánto ehémplo omboʼe hag̃ua umi kristiánope mbaʼéichapa ojeprepara vaʼerã ‘Jehová árape’ g̃uarã. Upérõ haʼe oikuaa kuri ofaltaha gueteri og̃uahẽ hag̃ua “Jehová ára” (2 Tes. 2:1-3). Upéicharõ jepe, haʼe heʼi vaʼekue umi kristiánope iñimportanteha ojeprepara ku “Jehová ára” outarõguáicha al día sigiénte. Ñande avei ikatu jasegi upe konsého. Upévare ñaanalisamína mbaʼépa apóstol Pablo heʼi vaʼekue koʼã mbaʼére: 1) Mbaʼéichapa og̃uahẽta “Jehová ára”, 2) mávapepa oñehundíta ha 3) mbaʼépa ikatu jajapo jajeprepara hag̃ua upe árape g̃uarã.

 3. ¿Mbaʼérepa jaʼekuaa “Jehová ára” outaha peteĩ mondaháicha pyharekue? (Ehecha pe taʼanga).

³ “Peteĩ mondaháicha pyharekue” (1 Tes. 5:2). Péva hína pe primer ehémplo Pablo oipuru vaʼekue heʼi hag̃ua mbaʼéichapa oúta “Jehová ára”. Umi mondaha ningo ipyaʼe ha omonda jepi pyharekue, avave ohaʼarõʼỹre. Upéicha avei “Jehová ára” oúta derrepentete ha oñehaʼarõʼỹve jave. Ikatu voi ñande kristiánope jepe ñanesorprende jahechávo mbaʼéichapa pyaʼeterei oiko entéro mbaʼe ha og̃uahẽma katu upe ára. Péro ñande nañañehundimoʼãi umi hénte añáicha.

 4. ¿Mbaʼérepa jaʼekuaa “Jehová ára” ojoguataha peteĩ kuña hasývape imemby hag̃ua?

⁴ “Peteĩ kuña hasyháicha derrepentete imemby hag̃ua” (1 Tes. 5:3). Peteĩ kuña hyeguasúva ndoikuaái arakaʼetépa imembýta, péro si oikuaa katuete og̃uahẽtaha upe día. Pe kuña hyeguasúva ou derrepentete hasyete ha ndaipóri ojoko vaʼerã pe párto. Péicha avei ñande ndajaikuaái arakaʼetépa oñepyrũta “Jehová ára”, péro si jaikuaa og̃uahẽtaha upe día. Ñandejára día ohusga hag̃ua umi hénte iñañávape og̃uahẽta derrepentete ha ndorekomoʼãi hikuái moõpa ohóta okañy.

 5. ¿Mbaʼe ehémplopa Pablo oipuru vaʼekue oñeʼẽ hag̃ua pe jehasa asy guasúre?

⁵ Pyaʼeterei koʼẽmbaháicha. Pe tercer ehémplope Pablo oñeʼẽ jey peteĩ mondaha oikóvare omonda pyharekue, péro koʼág̃a heʼi pyaʼeterei koʼẽmbaha chugui (1 Tes. 5:4). ¿Mbaʼérepa? Peteĩ mondaha ikatu oñekonsentraiterei la ojapóvare hína, upévare noñemeʼẽi enkuénta koʼẽmbamaha chugui ha la hénte ikatumaha ohecha chupe. Upeichaite avei oikóta og̃uahẽ vove pe jehasa asy guasu. Koʼág̃a ningo hetaiterei hénte ojogua pe mondaha oĩvape pytũmbýpe pórke tovaʼatãme osegi ojapo hikuái umi mbaʼe ndogustáiva Jehovápe. Péro og̃uahẽ vove upe ára entéro ohechakuaáta umi mbaʼe vai haʼekuéra ojapóva. Ñande ndajajoguái umichagua héntepe ha jajepreparáma upe árape g̃uarã. ¿Mbaʼéichapa? Ndajajapóivo umi mbaʼe ndogustáiva Jehovápe ha ñañehaʼãvo ‘ñanembaʼeporã opa mbaʼépe, ñandehústo ha jaikóvo tape porãre’ (Efes. 5:8-12). Upe rire apóstol Pablo oñeʼẽ mokõi ehémplore heʼi hag̃ua mávapepa oñehundíta ‘Jehová árape’.

 6. ¿Mbaʼérepa jaʼekuaa heta hénte oĩha okeramoguáicha? (1 Tesalonicenses 5:6, 7).

⁶ “Umi okéva” (elee 1 Tesalonicenses 5:6, 7). Pablo heʼi vaʼekue umi hénte oñehundítava ojoguaha umi okévape hína. ¿Mbaʼérepa? Umi okéva noñandúi la oikóva ijerére ha ndopillái mboy tiémpomapa ohasa. Haʼekuéra ndohechakuaái avei oikópa álgo iñimportánteva ha ndaikatúi orreaksiona. Upéicha avei heta hénte oikóva ko tiémpope haʼete ku okéva hína (Rom. 11:8). Pórke haʼekuéra nopenái umi señál ohechaukávare ñaimemaha “umi ára pahápe” ha koʼẽrõitéma oñepyrũtaha pe jehasa asy guasu. Oiko jave peteĩ mbaʼe tuichaitereíva haʼetévaicha la algúno opayʼimíva ha oñeinteresáva Ñandejárare, péro sapyʼaitérõ g̃uarã ojedeha hikuái ha opyta jey okeramoguáicha. Oĩ avei umi ogueroviáva outaha pe fin péro opensáva hetaitereíti ofaltaha upearã (2 Ped. 3:3, 4). Péro ñande jaikuaa amás día iñimportanteveha japyta japayhápe.

 7. ¿Mbaʼérepa jaʼekuaa umi persóna oñehundítava ojoguaha umi okaʼúvape?

⁷ “Umi okaʼúva”. Apóstol Pablo heʼi vaʼekue umi oñehundítava ojoguaha umi okaʼúvape. ¿Mbaʼérepa? Umi okaʼúva ndaikatúi odesidi porã ni orreaksiona pyaʼe oikóramo álgo. Péicha avei umi hénte iñañáva nopenái Ñandejára heʼívare ha odesidi ojapo umi mbaʼe ohundítava chupekuéra. Péro apóstol Pablo heʼi umi kristiánope ani hag̃ua oiko umi okaʼúvaicha, síno osegi hag̃ua opensa hendaitépe (1 Tes. 5:6). Peteĩ expérto heʼi pe persóna opensáva hendaitépe “oĩha trankílo, ikatuha okalkula la ojapótava ha upévare odesidi porãha”. ¿Mbaʼérepa tekotevẽ ñaime trankílo ha ñapensa porã la jajapótavare? Pórke nañañatendéirõ ikatu ñañentremete polítikare ha umi provléma oikóvare ko múndope. Ha amáske hiʼag̃ui ohóvo Ñandejára ára, la hénte ojopyvéta ñanendive jajapo hag̃ua koʼã mbaʼe. Péro natekotevẽi jajepyʼapy la jaʼétavare chupekuéra, pórke Ñandejára espíritu ñanepytyvõta ñaime hag̃ua trankílo, ñapensa hag̃ua hendaitépe ha péicha jadesidi porã hag̃ua (Luc. 12:11, 12).

 8. Heʼiháicha 1 Tesalonicenses 5:8, ¿mbaʼéichapa ikatu ñaime japayhápe ha jasegi ñapensa hendaitépe? (Ehecha pe taʼanga).

⁸ ‘Ñamoʼã ñande pytiʼa ha ñamoĩ peteĩ kásko’. Apóstol Pablo heʼi vaʼekue umi kristiáno ojoguaha peteĩ soldádo orekóvape iñarmadúra kompletoite ha oñatende porãva (elee 1 Tesalonicenses 5:8). Oiko jave gérra ningo peteĩ soldádo siémpre oĩ preparádo oñorairõ hag̃ua. Upéicha avei ñande ñaime vaʼerã siémpre preparádo ‘Jehová árape’ g̃uarã. ¿Mbaʼéichapa? Jerovia ha mborayhúpe ñamoʼã vaʼerã ñande pytiʼa peteĩ soldádo armadúraicha, ha ñamoĩ vaʼerã ñane akãre peteĩ káskoicha pe esperánsa. Koʼã kualida porã tuichaiterei ñanepytyvõta.

 9. ¿Mbaʼéichapa ñandeprotehe ñande jerovia?

⁹ Peteĩ soldádo omoʼã vaʼerã ipytiʼa oprotehe hag̃ua ikorasõ. Ñande avei jajerovia ha japorohayhúramo japrotehéta umi mbaʼe oĩva ñande pyʼapýpe. Koʼã kualida ñanepytyvõta jaservi hag̃ua Jehovápe ha jasegi hag̃ua Jesús gía. Jajeroviáramo, ndajadudamoʼãi Jehová omyengovia porãtaha ñandéve ñañehaʼãramo ñande pyʼaite guive jaadora chupe (Heb. 11:6). Avei jajeroviáramo ñaneñeʼẽrendúta ñande Líder Jesúspe ijetuʼúramo jepe sapyʼánte. Ñamombaretéramo ñande jerovia ñambohovái porãta umi provlemakuéra. Upearã ikatu jahecha mbaʼéichapa umi ermanokuéra osegi ifiél Ñandejárape ojepersegi térã orekóramo jepe provléma ekonómiko. Ha ani hag̃ua ñandeplatarayhu, ikatu jahecha mbaʼéichapa ermanokuéra oiko sensillove omotenonde hag̃ua Jehovápe ha ñañehaʼã ñande avei jajapo péicha.b

10. ¿Mbaʼéichapa ñanepytyvõ jahayhúramo Ñandejárape ha ñande rapichakuérape?

¹⁰ Tekotevẽterei avei japorohayhu jasegi hag̃ua japayhápe ha ñapensa hag̃ua hendaitépe (Mat. 22:37-39). Por ehémplo jahayhu rupi Jehovápe jasegi japredika umi héntepe, ikatúramo jepe ñanemoprovléma upéva (2 Tim. 1:7, 8). Avei jahayhu rupi umi ndoservírivape Jehovápe japredika meme chupekuéra, tahaʼe teléfono térã kárta rupive. Ha ndajaperdéi la esperánsa koʼã hénte ikatuha okambia ha oñepyrũ ojapo la iporãva (Ezeq. 18:27, 28).

11. ¿Mbaʼéichapa ñanepytyvõ jahayhúramo ñane ermanokuérape? (1 Tesalonicenses 5:11).

¹¹ Ñande jahayhu ñane ermanokuérape ha upévare ‘ñañomokyreʼỹ ha ñañomombarete’ (elee 1 Tesalonicenses 5:11). Umi soldádo oĩva gerrahápe ningo oñomokyreʼỹ ha oñomombarete, péro pe gérra aja, sapyʼánte peteĩ soldádo ikatu ojavy ha olastima iñirũme, péro ndahaʼéi a propósito. Péicha avei sapyʼánte kongregasiónpe ikatu ñamoñeñandu vai peteĩ ermánope japillaʼỹetére, péro núnka ndajajapomoʼãi upéva jajaposégui voi térã ñañevenga hag̃ua (1 Tes. 5:13, 15). Jahechaukáta avei japorohayhuha jarrespetáramo umi ermáno ñandegiávape kongregasiónpe (1 Tes. 5:12). Pablo oskrivírõ guare 1 Tesalonicenses ndojapói gueteri ni un áño oñepyrũ hague upe kongregasión. Upévare ikatu oime umi ansiáno upepegua saʼi iñexperiénsia ha ikatu ojavy raʼe, péro ojerrespeta vaʼerã kuri chupekuéra. Oñemoag̃uívo ohóvo pe jehasa asy guasu koʼytevéntema ñaikotevẽta ñandegia umi ansiáno ñane kongregasionpegua, pórke ndajaikuaái upe tiémpope ikatútapa ñañekomunika sukursál ndive térã pe sentrál mundiál ndive. Upévare koʼág̃ama ñañehaʼã vaʼerã jahayhu ha jarrespeta ansianokuérape. Tahaʼe haʼéva la oikóva, jasegi vaʼerã ñapensa hendaitépe ha ani jaiko ñamaña idefektokuérarente. Upéva rangue ñanemanduʼa vaʼerã Jehová ojevaleha Jesucristo rehe ogia hag̃ua koʼã ermánope.

12. ¿Mbaʼéichapa pe esperánsa oprotehe umi mbaʼe ñapensáva?

¹² Pe kásko oproteheháicha peteĩ soldádo akã, péicha avei pe esperánsa oprotehe umi mbaʼe ñapensáva. Pe esperánsa ñanepytyvõ jahechakuaa hag̃ua umi mbaʼe oofreséva ko múndo vyroreieteha (Filip. 3:8). Pe esperánsa avei ñanepytyvõ ñaĩ hag̃ua trankílo ha ñapensa porã hag̃ua. Jahechamína la oikóva Wallace ha Laurinda rehe. Haʼekuéra oservi Áfricape, ha 3 semánapente peteĩvagui omano isy ha pe ótrogui omano itúa. Pe pandémia COVID-19 káusare haʼekuéra ndaikatúi vaʼekue oho ipaíspe oĩ hag̃ua ihentekuérandi. Pe ermáno heʼi: “Che areko la esperánsa oikove jeytaha hikuái ha upéva chekonsola. Nachemanduʼavéima la osufri vaʼekuére hikuái omano mboyve, síno apensa umi mbaʼe porã ohasátavare oikove jey vove hikuái pe múndo pyahúpe. Ko esperánsa chepytyvõ aime hag̃ua trankílo ha agueropuʼakave hag̃ua la oiko vaʼekue”.

13. ¿Mbaʼépa jajapo vaʼerã Jehová omeʼẽ hag̃ua ñandéve ijespíritu sánto?

¹³ “Aníkena pejoko pe Ñandejára espíritu ojapóva penderehe” (1 Tes. 5:19). Apóstol Pablo heʼi pe espíritu sánto ojoguaha peteĩ tata hendývape ñande pype. Upe espíritu ñanemokyreʼỹ jajapose hag̃ua iporãva ha ñanemombarete ñambaʼapo jejopy hag̃ua Jehovápe g̃uarã (Rom. 12:11). ¿Mbaʼépa ikatu jajapo Jehová omeʼẽ hag̃ua ñandéve ijespíritu sánto? Jajerure vaʼerã chupe, jastudia Iñeʼẽ ha ñaime pe iñorganisasión haʼe odirihívape ijespíritu rupive. Jajapóramo koʼã mbaʼe jarekóta “umi mbaʼe porã oúva Ñandejára espíritugui” (Gál. 5:22, 23).

14. ¿Mbaʼépa jareko vaʼerã enkuénta Jehová osegi hag̃ua omeʼẽ ñandéve ijespíritu sánto? (Ehecha pe taʼanga).

¹⁴ Ñande ndajajaposéi mbaʼeve ikatúva ‘ojoko Ñandejára espíritu’. Haʼe omeʼẽ espíritu sánto sólamente umi osegívape ipensamiénto ha ikondúkta potĩ. Ndajahejái vaʼerã umi mbaʼe vai oñembohapo ñane korasõme ha ipuʼaka ñanderehe pórke péicha japerdéta Ñandejára espíritu (1 Tes. 4:7, 8). ¿Mbaʼe ótra kósapa tekotevẽ jajapo jasegi hag̃ua jarresivi pe espíritu sánto? Apóstol Pablo heʼi vaʼekue: “Aníkena pedespresia umi profesía” (1 Tes. 5:20). Pe palávra “profesía” ojepurúva koʼápe oñeʼẽ hína umi mensáhe Ñandejára omeʼẽvare ijespíritu rupive. Umíva apytépe oĩ pe oñeʼẽva ‘Jehová árare’ ha mbaʼeichaitépa hiʼag̃uimbaitéma. Ñande nañapensái hetaiterei gueteri ofaltaha upearã térã ndajahechamoʼãiha pe Armagedón. Upéva rangue siémpre jareko ñane akãme og̃uahẽmbaitemaha upe ára, upévare káda día ‘ñane kondúkta potĩ’ ha ‘jaadora Ñandejárape ñande pyʼaite guive’ (2 Ped. 3:11, 12).

15. ¿Mbaʼépa jajapo vaʼerã ani hag̃ua avave ñanembotavy? (1 Tesalonicenses 5:21).

¹⁵ Koʼẽrõitéma Jehová enemigokuéra heʼíta: “¡Jaikóma pyʼaguapýpe ha segúro porã!” (1 Tes. 5:3). Upe tiémpope oñemosarambíta opárupi umi mensáhe oúva umi demóniogui ombotavýtava hetaiterei héntepe (Apoc. 16:13, 14). ¿Mbaʼépa jajapo vaʼerã ani hag̃ua ñandéve avei ñanembotavy? Upearã jasegi vaʼerã pe konsého Pablo omeʼẽ vaʼekue: “Pehechákena siértopa hína entéro mbaʼe” (elee 1 Tesalonicenses 5:21). Pe palávra griega ápe ojetradusíva “pehechákena siértopa”, ojepuru jepi oñeñeʼẽ hag̃ua pe traváho ojejapóvare ojehecha hag̃ua pe óro térã pe pláta ndahaʼéipa hína fálso. Ñande avei tekotevẽ jajasegura siértopa hína umi mbaʼe ñahendu ha jaleéva. Umi Tesalonicagua ojapo vaʼerã kuri upéva, péro koʼýte koʼág̃a hiʼag̃uívo pe jehasa asy guasu iñimportánte ñande jajapo upéva. Ndovaléi jaiko jaroviapa la ojeʼéva, upéva rangue jaipuru vaʼerã ñane akã ha ñakompara la jaleéva ha ñahendúva umi mbaʼe la Biblia ha Jehová organisasión heʼívare ñandéve. Péicha nañanembotavymoʼãi umi japu heʼíva umi demoniokuéra (Prov. 14:15; 1 Tim. 4:1).

16. ¿Mbaʼe esperánsapa jareko ha mbaʼépa jajapo vaʼerã koʼág̃a?

¹⁶ Ñande ñaĩ segúro Ñandejára puévlo ohasataha pe jehasa asy guasu, péro ndajaikuaái mbaʼépa ñaneraʼarõ káda únope amo gotyove (Sant. 4:14). Ikatu jahasa kon vída pe jehasa asy guasu térã ñamano upe mboyve, péro tahaʼe haʼeháicha jaikuaa Jehová omeʼẽtaha ñandéve pe vída etérna jasegíramo ñandefiél chupe. Umi unhído oĩta yvágape Jesucristo ndive, ha umi ótro ovecha katu oikóta ko yvy ape ári peteĩ paraísope. Upéva oiko mboyve, tekotevẽ ñapensa meme pe esperánsa jarekóvare, ha siémpre ñaime preparádo ‘Jehová árape’ g̃uarã.