Lívro número 53 2 Tesalonicenses

Ohai: Pablo

Moõpa ojehai: Corinto

Arakaʼépa ojehaipa: áño 51 rupi Jesús ou rire

APÓSTOL Pablo ohai riremínte kuatiañeʼẽ peteĩha umi Tesalonicayguápe ohai ko kuatiañeʼẽ mokõiha. Haʼe omomaitei chupekuéra Timoteo ha Silvano rérape, upévare jaikuaa ndohasapukuihague ha oĩha gueteri Coríntope. Koʼã mbohapy ermáno oviaha meme vaʼekue ovisita hag̃ua umi kongregasión. Ha la Biblia ndeʼíri ojotopa jey hague hikuái oĩ rire oñondive Coríntope (2 Tes. 1:1; Hechos 18:​5, 18). Jaleévo ko kuatiañeʼẽ jahechakuaa Páblope oipyʼapyetereihague peteĩ mbaʼe vai oikovahína pe kongregasiónpe. Upévare pyaʼe oskrivi chupekuéra oipeʼa hag̃ua upe mbaʼe vai.

² Heta mbaʼe ohechauka ikatuha jajerovia ko kuatiañeʼẽre, jajeroviaháicha pe primera kártare. Imanduʼa hese Ireneo (síglo 2-peguare) ha ambue karaikuéra ohaíva lívro. Umíva apytépe oĩ Justino Mártir (síglo 2-peguare). Haʼe oñeʼẽvaʼekue ‘pe tekove aña oñehundivaʼerãre’ oĩva 2 Tesalonicenses 2:​3-pe. Avei ko kuatiañeʼẽ oĩ umi dokuménto ymaguarépe orekóva 1 Tesalonicenses. Jepe ndaipóri koʼág̃a pe papiro Chester Beatty núm. 2-pe (P⁴⁶), katuete oĩnerakaʼe peteĩ párte okañyvaʼekuépe. Ko dokuméntope 1 Tesalonicenses rire ofalta 7 páhina.

³ Maʼerãpa ojehaíraʼe ko kárta? Pablo omombeʼúvare jaikuaa upe kongregasiónpe oĩhague heʼíva Jesús oñepyrũtamaha ogoverna. Ndoikuaaporãiramo jepe oikótapa upéva umi tapicha omboʼe meme, ha upéicha omyangekói vaipa ermanokuérape. Ikatu avei oime ojapóva koʼã mbaʼe nombaʼaposéigui ha oipotántema oñemeʼẽ rei chupe hemikotevẽ (2 Tes. 3:11). Pablo heʼi 1 Tesalonicénsespe Jesús oĩ jeytaha, ha katuete ohendúvo upéva umi oñeʼẽ reíva omohenda chupekuéra ogustaháichantema. Ikatu avei og̃uahẽ chupekuéra peteĩ kárta ojeʼéva Pablo omondohague, heʼíva ‘og̃uahẽmahague Jehová ára’ (2:​1, 2).

⁴ Ikatu voi pe oguerahavaʼekue ikuatiañeʼẽ peteĩha, omombeʼúraʼe Páblope umi mbaʼe oikóva. Upévare haʼe oipytyvõseterei chupekuéra oho porã jey hag̃ua. Upémarõ áño 51-pe, Pablo ha iñirũnguéra omondo ko kárta umi Tesalonicayguápe Corinto guive. Pablo ohechauka chupekuéra ojavyha umi heʼíva Jesucristo oĩmaha ha omokyreʼỹ imbarete jey hag̃ua ijeroviápe.

MBAʼÉICHAPA ÑANEPYTYVÕ

¹⁰ Mbykýramo jepe ko kuatiañeʼẽ omboʼe kristianokuérape heta mbaʼe ha upévare iporã jahechami. Pór ehémplo oñeʼẽ koʼã mbaʼe iñimportántevare: Jehová hína Ñandejára oporosalváva, haʼe ñanemomarangatu espíritu sánto rupi ha jajerovia rupi añeteguáre (2:13). Kristianokuéra ogueropuʼakavaʼerã jehasa asy oike hag̃ua Ñandejára Rréinope (1:​4, 5); haʼekuéra oñembyatýta Jesucristo ndive haʼe oĩ vove (2:1); Jehová okastigáta umi ohenduseʼỹvape marandu porã (1:​5-8); umi ojeporavóvape oñemombaʼeguasúta Jesucristo ndive, Ñandejára ipyʼaporãitéva oipotaháicha (1:12); oñehenói chupekuéra ojekuaaukávo pe marandu porã (2:14); tekotevẽ jajerovia (1:​3, 4, 10, 11; 2:13; 3:2); umi opredikáva ombaʼapovaʼerã hembiʼurãre, oĩramo nombaʼapóiva ikatu iñateʼỹ ha oñentromete ndoúi ha ndohóivape chupe (3:​8-12); jahayhúramo Ñandejárape ikatúta jagueropuʼaka jehasa asy (3:5). Hetaite mbaʼe porã ñanemboʼe ko kárta mbykymi!

¹¹ Ko kuatiañeʼẽme Pablo ohechauka ojepyʼapyha iñermanokuéra jeroviáre, ha oipotaha ojoayhu ha oñakãrapuʼã hikuái. Oñemoñeʼẽ chupekuéra Jehová árare ha heʼi ojecha raẽ vaʼerãha ‘peteĩ tekove aña’. Kóva ‘omoĩta iguapyha Ñandejára rógape, heʼívo ijehe ñandejaraha’. Péro umi Ñandejára ohejáva ‘oike isãmbyhýpe’ ikatu ojerovia Jesucristo ou jeytaha og̃uahẽ vove hiʼára. Haʼe ohundíta tata rendýpe umi iñañávape. Oúta ‘ojererohory hag̃ua umi heseguáva marangatu apytépe, ha ohecharamo hag̃ua chupe opa ojeroviáva hese’ (2:​3, 4; 1:​5, 10).