Umi ansiáno oñangarekóva umi kongregasiónre

JESÚS oĩrõ guare ko yvy ape ári ohechauka vaʼekue haʼeha “pe pastór imbaʼeporãva” (Juan 10:11). Haʼe ohechávo umi hénte omoirũsévape chupe, “ombyasyeterei chupekuéra, pórke ohecha mbaʼéichapa oñemaltrata umi héntepe ha isarambipaha hikuái. Umi hénte ojogua umi ovecha ndorekóivape pastór” (Mat. 9:36). Pedro ha umi ótro apóstol ohechakuaa Jesús mborayhúpe otrataha la héntepe, haʼe ndojoguaiete vaʼekue umi líder rrelihióso oĩ vaʼekuépe Israélpe. Koʼã kuimbaʼe ningo noñangarekói ni nomongarúi vaʼekue umi Ñandejára ovechakuérape, upévare isarambipa hikuái (Ezeq. 34:7, 8). Jesús katu omboʼe vaʼekue umi héntepe, ha ohayhu chupekuéra, upévare hekove jepe omeʼẽ hesehapekuéra. Iñehémplo ohechauka idisipulokuérape mbaʼéichapa oipytyvõ vaʼerã la héntepe ojevy hag̃ua Jehová rendápe, haʼe hína pe ‘pastór ha ansiáno oñangarekóva ñanderehe’ (1 Ped. 2:25).

² Peteĩ jey Jesús heʼi vaʼekue Pédrope iñimportanteha omongaru ha oñatende umi ovechakuérare (Juan 21:15-17). Upéva opokoiterei Pédrore ha tiémpo rire, haʼe heʼi umi ansiáno oñangarekóvape umi kongregasiónre: “Ojapoháicha peteĩ pastór, peñangarekóke Ñandejára ovechakuérare oñenkargáva peẽme peservívo ansiánoramo, péro ani pejapo upéva oĩgui pendeovligáva ni ndapeikói vaʼerã peheka tarovaite umi mbaʼe peẽmente okonveníva pendeplatarayhúgui, síno pejapo vaʼerã upéva vyʼápe ha kyreʼỹme Ñandejára renondépe” (1 Ped. 5:1-3). Umi mbaʼe Pedro heʼi vaʼekue oipytyvõ avei umi ansiáno koʼag̃aguápe. Haʼekuéra osegi Jesús ehémplo ha oñemeʼẽmbaite ermanokuéra rehehápe, omoĩ ehémplo porã kongregasiónpe, ha omotenonde pe servísio oñemeʼẽva Jehovápe (Heb. 13:7).

³ Ñande jaagradeseterei jareko haguére kongregasiónpe umi ermáno oñenombra vaʼekue espíritu sánto rupive. Haʼekuéra oñangareko ñanderehe heta hendáicha. Por ehémplo ñanemokyreʼỹ, oñangareko káda únore ha káda semána omoakã umi rreunión ñanepytyvõva jajerovia mbareteve hag̃ua (Rom. 12:8). Haʼekuéra oñatende avei ani hag̃ua mbaʼeve ñandeperhudika, por ehémplo umi hénte iñañáva (Is. 32:2; Tito 1:9-11). Umi ansiáno omotenonde avei pe predikasión ha upéva ñanemokyreʼỹ jajapo hag̃ua avei upéicha (Heb. 13:15-17). Entéro koʼã mbaʼére jaʼekuaa umi ansiáno añetehápe haʼeha peteĩ rregálo Jehová omeʼẽva omombarete hag̃ua pe kongregasión (Efes. 4:8, 11, 12).

⁴ Jehová oipota oñeñangareko porã pe kongregasiónre, upévare omoĩka la Bíbliape mbaʼe rrekisítopa okumpli vaʼerã peteĩ kuimbaʼe oiko hag̃ua chugui ansiáno. Upévare peteĩ ermáno okumplíramo umíva ikatu ojeʼe oñenombraha chupe espíritu sánto rupive (Hech. 20:28). Añetehápe heta mbaʼe okumpli vaʼerã peteĩ kuimbaʼe oiko hag̃ua chugui ansiáno, pórke tuicha pe rresponsavilida ojehejáva ikárgope, péro upéva ndeʼiséi avave ndaikatumoʼãiha okumpli umi rrekisíto. Peteĩ kuimbaʼe ohayhúva Ñandejárape ha ohejaséva Jehová ojevale hese, ikatúta okumpli umi rrekisíto. Enterove ohechakuaa vaʼerã pe ansiáno ohejaha la Biblia ogia chupe opa mbaʼe ojapóvape.

⁵ Apóstol Pablo oskrivi vaʼekue umi rrekisíto tekotevẽva okumpli peteĩ ansiáno. Upéva jatopa pe primera kárta oskrivi vaʼekuépe Timotéope ha avei Títope. Por ehémplo Timotéope heʼi: “Peteĩ kuimbaʼe oñehaʼãmbaitéramo oservi ansiánoramo, ojapose hína peteĩ mbaʼe iporãva. Pe ansiáno ikondúkta porã vaʼerã ani hag̃ua umi hénte oreko mbaʼeve ivaíva heʼi vaʼerã hese, peteĩnte hembireko vaʼerã, ojejokokuaa vaʼerã entéro mbaʼépe, iñakãguapy vaʼerã, oiko vaʼerã hekópe, opororresivi porã vaʼerã, ivale vaʼerã oporomboʼe hag̃ua, ndaikaʼúi vaʼerã, naivioléntoi vaʼerã, noñemohatãi vaʼerã haʼe heʼívapente, ndoikói vaʼerã ojodiskutise, ndovaléi iplatarayhu, omoakã porã vaʼerã hogapy, ha ifamiliakuéra iñeʼẽrendu ha ojeporta porã vaʼerã. (Pórke peteĩ kuimbaʼe ndoikuaáiramo mbaʼéichapa omoakãta hogapy, ¿mbaʼéicha piko oñangarekóta Ñandejára kongregasión rehe?). Pe oservítava ansiánoramo ndahaʼéi vaʼerã peteĩ disípulo pyahu, ani hag̃ua oñemombaʼeguasu ha oñekondena chupe oñekondena haguéicha pe Diáblope. Avei umi hénte noĩriva kongregasiónpe oñeʼẽ porã vaʼerã hese, ani hag̃ua oñeʼẽ vai hese hikuái ha hoʼa pe Diablo ñuhãme” (1 Tim. 3:1-7).

⁶ Ha Títope heʼi: “Che ningo roheja kuri Crétape ikatu hag̃uáicha rekorrehi umi mbaʼe oĩ vaíva ha renombra hag̃ua umi ansiáno káda siudápe, amanda haguéicha ndéve: pe ansiánore ndojeʼéi vaʼerã ikondúkta vaiha, peteĩnte hembireko vaʼerã, ifamiliakuéra ojerovia vaʼerã ha ndojeʼéi vaʼerã hesekuéra oikoha iñakãre ni irreveldeha. Pórke pe ansiáno ningo Ñandejára siérvo ha ndojeʼéi vaʼerã hese ikondúkta vaiha, ndaikaprichósoi vaʼerã, ndaipochyreíri vaʼerã, ndovaléi ikaʼu, naivioléntoi vaʼerã, ndoikói vaʼerã oheka tarovaite umi mbaʼe chupe okonvenívante iplatarayhúgui. Upéva rangue, opororresivi porã vaʼerã, ojapose vaʼerã voi iporãva, iñakãguapy vaʼerã, ihústo vaʼerã, ifiél vaʼerã Ñandejárape ha ojejokokuaa vaʼerã. Oporomboʼe lája ohechauka vaʼerã oñakarama hatãha Ñandejára ñeʼẽ jajeroviávare, ikatu hag̃uáicha oporomokyreʼỹ oporomboʼévo umi enseñánsa iporãva ha okorrehi umi oñeʼẽ vaívape upévare” (Tito 1:5-9).

⁷ Ikatu oĩ opensáva ijetuʼuetereitaha okumpli koʼã rrekisíto ha upévare oñedesanima, péro ndovaléi opensa upéicha. Umi ermáno ohechauka jave umi kualida porã oñehaʼarõva umi ansiánogui, umi ótro oĩva kongregasiónpe osegiséta iñehemplokuéra. Apóstol Pablo heʼi vaʼekue koʼã ermáno haʼeha peteĩ rregálo “oipytyvõ hag̃ua umi ojeporavo vaʼekuépe oho hag̃ua tape porãre, oservi hag̃ua ótrope ha omombarete hag̃ua Cristo rete. Haʼekuéra ñanepytyvõta ikatu hag̃uáicha ñaime unído entéro mbaʼe jagueroviávape ha jaikuaa porã hag̃ua Ñandejára Raʼýpe. Péicha oikóta ñandehegui peteĩ kuimbaʼe okakuaapámava ha ohupytýva Crístope entéro mbaʼépe” (Efes. 4:8, 12, 13).

⁸ Umi ansiáno ndahaʼéi vaʼerã mitãrusuʼi ni ojevautisa ramóva. Koʼã kuimbaʼe iñexperiénsia vaʼerã oservívo Ñandejárape, tekotevẽ oikuaa ha ontende porã umi mbaʼe heʼíva la Bíbliape ha ohayhu pe kongregasiónpe. Haʼekuéra ipyʼaguasu oñeʼẽ ha okorrehi hag̃ua umi hembiapo vaívape, péicha oñangareko ermanokuérare ani hag̃ua avave operhudika chupekuéra (Is. 32:2). Entéro oĩva kongregasiónpe ohechakuaa koʼã kuimbaʼe ijerovia mbareteha ha añetehápe ojepyʼapyha Ñandejára ovechakuérare.

⁹ Umi oserviséva ansiánoramo ohechauka vaʼerã iñaranduha umi mbaʼe odesidívape. Oiméramo omenda okumpli vaʼerã la Biblia heʼíva umi omendávape g̃uarã. Por ehémplo peteĩnte hembireko vaʼerã ha omoakã porã vaʼerã hogapy. Oguerekóramo família haʼéva Testígo, koʼãva iñeʼẽrendu ha ojeporta porã vaʼerã, ndojeʼéi vaʼerã hesekuéra oikoha iñakãre ni irreveldeha. Upéicharõmante umi ermáno oñembojaséta hendápe ojerure hag̃ua konsého, oipytyvõtava chupekuéra oservi porã hag̃ua Jehovápe ha ovyʼa hag̃ua ifamíliandi. Pe ansiáno ikondúkta porã vaʼerã ha ndojeʼéi vaʼerã hese ikondúkta vaiha. Umi hénte noĩriva kongregasiónpe oñeʼẽ porã vaʼerã hese. Avave ndorekói vaʼerã mbaʼeve oakusa hag̃ua chupe ani hag̃ua oñeñeʼẽ vai pe kongregasiónre. Avei ndahaʼéi vaʼerã peteĩ oñesensura ramoitéva ojapo haguére peteĩ mbaʼe ivaietereíva. Upéicha entéro oĩva kongregasiónpe osegíta umi ansiáno ehémplo ha ovyʼáta oikuaágui oĩha oñangarekóva hesekuéra oservi porã hag̃ua Ñandejárape (1 Cor. 11:1; 16:15, 16).

¹⁰ Umi ansiáno ojapóva ningo ojogua pe tembiapo ojapo vaʼekuépe yma umi ansiáno Israélpe. La Biblia heʼi koʼã ‘kuimbaʼe ivale, iñarandu ha ohasa hague heta mbaʼe’ (Deut. 1:13). Umi ansiáno ningo iñimperfékto, péro kongregasiónpe ha pe oikohárupi ojekuaa haʼekuéra heta tiémporema orrespetaha Ñandejárape ha ojapoha iporãva. Ndojapói rupi mbaʼeve ivaíva haʼekuéra ikatu oñeʼẽ kyhyjeʼỹme pe kongregasiónpe (Rom. 3:23).

¹¹ Umi ansianokuéra ojejokokuaa vaʼerã entéro mbaʼépe, ha ndojopyetereíri vaʼerã avavéndi. Haʼekuéra naifanátikoi ha ndohasái la rrája mbaʼevépe. Ohechauka avei hikuái ojejokokuaaha ojediverti jave, okaru térã hoʼu jave vevída. Pe ansiáno ojejokokuaa vaʼerã hoʼútaramo vevída ani hag̃ua avave heʼi hese ohasaha la rrája térã ikaʼuha. Peteĩ persóna hoʼu rasáva ndohechaukái ojejokoha opa mbaʼépe, ha ndaikatumoʼãi oñangareko porã pe kongregasiónre.

¹² Pe oñangarekóva kongregasiónre oiko vaʼerã hekópe, upéva heʼise iñordenádo vaʼerãha. Pe ansiáno oikóramo hekópe ojekuaáta voi ipíntare, hógare ha entéro mbaʼe ojapóvare. Koʼã kuimbaʼe ndohejái hembiapo última órape g̃uarã, síno oplanea porã umi mbaʼe ojejapótava. Umi ansiáno siémpre osegi umi konsého oĩva la Bíbliape.

¹³ Pe ansiáno noñemohatãi vaʼerã haʼe heʼívape. Haʼe ombaʼapokuaa vaʼerã umi ótro ansiánondi ha oapoja vaʼerã chupekuéra. Pe ansiáno nopensái vaʼerã ivaleveha, ni ndoikói vaʼerã ojopyeterei umi ótrondi. Haʼe ningo noñemohatãi heʼívapente, upévare nopensái siémpre orekoha la rrasón. Haʼe ohechakuaa umi ótro ansiáno orekoha kualida ofaltáva chupe, oguereko enkuénta la Biblia heʼíva odesidi hag̃ua peteĩ mbaʼe ha oñehaʼãmbaite osegi Jesús ehémplo (Filip. 2:2-8). Pe ansiáno ndoikói vaʼerã ojodiskutise ótrondi ni naivioléntoi vaʼerã. Upéva rangue haʼe opororrespeta ha opensa umi ótro iñimportanteveha chugui. Pe ansiáno ndaikaprichósoi vaʼerã, ndoikói vaʼerã oinsisti ojeasepta hag̃ua la heʼíva. Pe ansiáno ndaipochyreíri, upéva rangue haʼe oiko pyʼaguapýpe enterovévandi.

¹⁴ Peteĩ ansiáno iñakãguapy vaʼerã, upéva heʼise oĩ jave provléma ndojedesesperái ha ndoikoiha pyaʼe pyaʼénte odesidi térã ohusga peteĩ mbaʼe. Ontende porã umi enseñánsa oĩva la Bíbliape ha ojesegi umívare. Peteĩ ansiáno iñakãguapýva ndahovamokõiri, síno ohendu umi konsého ha suherénsia.

¹⁵ Pablo heʼi vaʼekue Títope peteĩ ansiáno ojapose vaʼerãha voi iporãva, avei ihústo ha ifiél vaʼerãha Ñandejárape. Ko mbaʼe ojekuaa porãta otrata lájare ótrope ha siémpre odefendévo pe iporãva. Peteĩ ansiáno iñeʼẽrendu Jehovápe, ha toiko la oikóva siémpre osegi umi enseñánsa oĩva la Bíbliape. Avei ndoikói omombeʼu ojeʼéva chupe ni omeʼẽ informasión natekotevẽiva ojekuaa. Peteĩ ansiáno opororresivi porã, upéva heʼise oñemeʼẽmbaiteha umi ótro rehehápe ha omeʼẽha umi mbaʼe orekóva oipytyvõ hag̃ua hapichápe (Hech. 20:33-35).

¹⁶ Pe ansiáno ivale vaʼerã oporomboʼe hag̃ua. Pablo oskrivírõ guare Títope heʼi vaʼekue pe ansiáno ‘oporomboʼe lája ohechauka vaʼerãha oñakarama hatãha Ñandejára ñeʼẽ jajeroviávare, ikatu hag̃uáicha oporomokyreʼỹ oporomboʼévo umi enseñánsa iporãva ha okorrehi umi oñeʼẽ vaívape upévare’ (Tito 1:9). Pe ansiáno ivale omorrasona hag̃ua ótrope, ohechauka hag̃ua pruéva ojeguerovia hag̃ua la heʼíva ha orrespondekuaa oĩramo okontradesíva álgo. Avei oipurukuaa la Biblia oporokonvense hag̃ua ha omombarete hag̃ua umi ótro jerovia. Pe ansiáno oporomboʼekuaa, “iporã térã ivai jave la situasión” (2 Tim. 4:2). Ipasiénsia okorrehi hag̃ua pyʼaporãme peteĩ ojavývape ha oipytyvõ hag̃ua peteĩ ndojeroviaguasúivape, ikatu hag̃uáicha oservise Jehovápe ha ojerovia hese. Ivale oporomboʼe hag̃ua, tahaʼe platafórma guive térã káda únope oikotevẽháicha.

¹⁷ Tekotevẽterei umi ansiáno ikyreʼỹ predikasiónpe. Ojekuaa porã vaʼerã osegiha Jesús ehémplo, chupe g̃uarã ningo iñimportanteterei vaʼekue pe predikasión. Haʼe oñehaʼã vaʼekue oipytyvõ idisipulokuérape opredikakuaa hag̃ua (Mar. 1:38; Luc. 8:1). Umi ansiáno oñehaʼãmbaite opredika hag̃ua hembiapo hetáramo jepe, ha upéva oipytyvõ umi ótrope ikyreʼỹ hag̃ua avei predikasiónpe. Umi ansiáno osẽ jave opredika ifamília ha umi ótro ermánondi ñanepytyvõ “káda uno ñañomokyreʼỹ” hag̃ua (Rom. 1:11, 12).

¹⁸ Haʼetévaicha ijetuʼuetereíva entéro mbaʼe ojejeruréva umi ansiánogui, ha añetehápe ndaikatumoʼãi voínte ni peteĩ ansiáno okumpli perféktamente entéro umi rrekisíto oĩva la Bíbliape. Péro ni peteĩ ansiánope ndaikatúi tuichaiterei ofalta peteĩva umi rrekisíto al púnto ke ojehecha haʼemaha peteĩ defékto igráveva. Oĩta ansiáno ivaletereíva peteĩ mbaʼépe ha ótro katu ivalevéta ótra kósape. Péicha pe kuérpo de ansiáno orekóta umi kualida tekotevẽva oñeñangareko porã hag̃ua Ñandejára kongregasiónre.

¹⁹ Umi ansiáno oĩva peteĩ kongregasiónpe orrekomendáta jave peteĩ ermánope oiko hag̃ua chugui ansiáno, oreko vaʼerã enkuénta apóstol Pablo heʼi vaʼekue: “Ajerure peẽme anive hag̃ua pepensa peneimportantetereiha. Iporãramo jepe ñapensa porã ñandejehe ndovaléi jahasa la rrája, penemanduʼáke káda únope Ñandejára oipytyvõha ojerovia hag̃ua” (Rom. 12:3). Káda ansiáno opensa vaʼerã umi ótro ansiáno iñimportanteveha chugui. Avei oanalisa jave hikuái peteĩ ermánopa okumpli umi rrekisíto, imanduʼa vaʼerã la Biblia heʼiha: “Iporã ningo ndehústo, péro ndovaléi rehasa la rrája” (Ecl. 7:16). Umi ansiáno ontende porã vaʼerã umi rrekisíto, péicha ikatúta ohechakuaa peteĩ ermánopa okumpli la ojejeruréva peteĩ ansiánogui, péro nohaʼarõmoʼãi okumpli perféktamente umi rrekisíto. Imanduʼa vaʼerã enterovéva ñaneimperfektoha, ndovaleiha ofavorese avavépe ni hovamokõi. Péicha orrekomendáta jave hikuái peteĩ ermánope ohechaukáta orrespetaha umi léi oĩva la Bíbliape ha ojepyʼapyha pe kongregasiónre. Avei oñemboʼéta ojapo mboyve pe rrekomendasión ha ohejáta ogia chupekuéra pe espíritu sánto. Tuicha rresponsavilida oreko umi ansiáno, upévare osegi vaʼerã ko konsého omeʼẽ vaʼekue Pablo: “Aníkena arakaʼeve rejapura renombra hag̃ua peteĩ kuimbaʼépe” (1 Tim. 5:21, 22).

²⁰ Umi ermáno okumplíva umi rrekisíto oĩva la Bíbliape ohechauka pe espíritu sánto ogiaha chupekuéra, pórke ojekuaa hesekuéra umi mbaʼe porã oúva pe espíritu sántogui. Pablo omombeʼu vaʼekue mbaʼépa hína umi 9 mbaʼe porã oúva Ñandejára espíritugui: “Mborayhu, vyʼa, pyʼaguapy, pasiénsia, pyʼaporã, mbaʼeporã, jerovia, akãguapy ha jejokokuaa” (Gál. 5:22, 23). Umi ansiáno oreko koʼã kualida ha péicha omokyreʼỹ ha okonsola ermanokuérape, avei oipytyvõ hikuái pe kongregasiónpe oservi hag̃ua Jehovápe peteĩ ñeʼẽme. Ojekuaa koʼã kuimbaʼe oñenombra hague espíritu sánto rupive pe oiko lájare ha osẽ porã rupi chupekuéra umi mbaʼe ojapóva kongregasiónpe (Hech. 20:28).

²¹ Iñimportanteterei umi ansiáno ombaʼapo oñondivepa oĩ hag̃ua unida pe kongregasiónpe. Haʼekuéra ikatu idiferentete ojuehegui, upéicharamo jepe oikóta peteĩ ñeʼẽme káda uno ohendúramo rrespetuósamente pe ótro heʼíva, ogusta térã ndogustáiramo jepe chupe upéva. Avave noñemohatãi vaʼerã la heʼívape síno oapoja vaʼerã pe kuérpo de ansiáno odesidíva, noñemoĩrima guive la Biblia heʼívare. Peteĩ ‘persóna orekóva pe arandu oúva yvágagui ipyʼaguapy ha noñemohatãi haʼe heʼívapente’ (Sant. 3:17, 18). Ni peteĩva nopensái vaʼerã iñimportanteveha umi ótrogui ni nomandaséi vaʼerã hesekuéra. Umi ansiáno ombaʼapóvo oñondivepa pe kongregasión rehehápe, Jehovápe voi oipytyvõ hína hikuái (1 Cor., kap. 12; Col. 2:19).

²² Umi oserviséva ansiánoramo ohechauka ijerovia mbareteha (1 Tim. 3:1). Añetehápe umi ansiáno oreko heta rresponsavilida ha ojesakrifika vaʼerã. Upéva heʼise oĩ vaʼerãha oipytyvõ hag̃uáicha umi ermáno oikotevẽvape ha oipytyvõ vaʼerãha chupekuéra oĩ porã hag̃ua Jehová renondépe. Umi oserviséva de ansiáno oñehaʼã vaʼerã ohupyty umi rrekisíto oĩva la Bíbliape.

²³ Peteĩ ansiáno ifiél ha oservímava Jehovápe heta áñore ikatu ou hasy, ijeda térã oreko ótro provléma ha upévare ndaikatuvéi oñatende porã irresponsavilida kongregasiónpe. Upéicharamo jepe pe ermáno haʼe gueteri ansiáno ha enterove orrespeta vaʼerã chupe. Natekotevẽi ningo haʼe orrenunsia oguereko haguére koʼã provléma. Koʼã ansiánope ojerrespeta vaʼerã avei ojerrespetaháicha umi ótro ansiáno oñangarekóvape Jehová ovechakuérare.

²⁴ Péro pe ermáno opensáramo iporãvetaha orrenunsiánte pórke okambia isituasión pe provléma káusare, haʼe ikatu orrenunsia (1 Ped. 5:2). Upéicharamo jepe ermanokuéra osegi vaʼerã orrespeta chupe pórke haʼe ikatu gueteri ojapo iporãva pe kongregasión rehehápe, ndoguerekóiramo jepe umi rresponsavilida oguerekóva peteĩ ansiáno.

²⁵ Umi ansiáno oreko heta rresponsavilida kongregasiónpe. Por ehémplo oĩ pe koordinadór, pe sekretário, pe superintendénte de servísio, pe odirihíva Ñemañaha Ñehesaʼỹijo ha pe superintendénte de la rreunión Mbaʼéichapa Jaiko ha Japredika vaʼerã. Heta ansiáno omoakã peteĩ grúpo de predikasión. Umi ansiáno okumpli koʼã rresponsavilida oĩ peve algún kámbio, por ehémplo peteĩ ansiáno ováramo de kongregasión, ndaikatuvéiramo okumpli porã umi rresponsavilida hasykatúgui, térã ndokalifikavéirõ oservi hag̃ua de ansiáno. Péicha jave ikatu oñeasigna ótro ansiánope ojapo hag̃ua umi tembiapo. Umi kongregasión oĩhápe saʼive ansiáno, ikatu peteĩ ansiáno oreko hetave rresponsavilida kongregasiónpe. Péro upéva okambiáta oĩ vove hetave ermáno oñenombráva ansiáno.

²⁶ Pe koordinadór del kuérpo de ansiáno odirihi pe rreunión orekóva umi ansianokuéra. Haʼe ohechauka iñumildeha ombaʼapóvo umi ótro ansiánondi oñangareko porã hag̃ua Ñandejára ovechakuérare (Rom. 12:10; 1 Ped. 5:2, 3). Haʼe oorganisakuaa vaʼerã umi mbaʼe ojejapóva kongregasiónpe ha oporogia porã vaʼerã (Rom. 12:8).

²⁷ Pe sekretário oreko ikárgope umi dokuménto térã archívo kongregasionpegua. Haʼe omombeʼu umi ótro ansiánope umi mbaʼe iñimportánteva tekotevẽva ojehecha. Tekotevẽramo, ótro ansiáno térã peteĩ siérvo ministeriál ikatupyrýva ikatu oipytyvõ chupe.

²⁸ Pe superintendénte de servísio oñenkarga oorganisa hag̃ua entéro mbaʼe oñekotevẽva ojepredika hag̃ua. Avei ovisita vaʼerã káda grúpo de predikasión. Upearã, una ves al mes oelehi peteĩ fin de semána ovisita hag̃ua peteĩ grúpope. Péro umi kongregasión saʼihápe umi grúpo ikatu ovisita chupekuéra dos vése al áño. Pe visíta aja haʼe omoakã pe aty predikasionrã, opredika ermanokuérandi ha oipytyvõ chupekuéra ojapo hag̃ua rrevisíta ha estúdio bíblico.

²⁹ Umi haʼéva superintendénte de grúpo oreko peteĩ priviléhio iporãitereíva, ha oreko avei heta rresponsavilida, umíva apytépe: 1) oipytyvõ umi ermáno igrupopeguápe oñemoag̃uive hag̃ua Jehováre, 2) oipytyvõ káda únope opredika meme hag̃ua, ovyʼa hag̃ua ojapóvo upéva ha ohupyty hag̃ua heta mbaʼe porã predikasiónpe, ha 3) oipytyvõ umi siérvo ministeriál oĩvape igrúpope oreko hag̃ua umi kualida oñekotevẽva ikatu hag̃uáicha ohupyty hetave rresponsavilida kongregasiónpe. Pe kuérpo de ansiáno ohecha vaʼerã mávapa umi ansiáno ikatútava ojapo porãve koʼã tembiapo oservi hag̃ua de superintendénte de grúpo.

³⁰ Oreko rupi koʼã rresponsavilida, ikatúma guive pe superintendénte de grúpo haʼe vaʼerã peteĩ ansiáno. Péro ikatu avei orresivi ko rresponsavilida peteĩ siérvo ministeriál ikatupyrýva oĩ peve peteĩ ansiáno ikatútava oñenkarga ko traváhore. Ko siérvo ministeriálpe oñehenóita siérvo de grúpo, péicha oñembohéra chupe pórke haʼe ndahaʼéi peteĩ ansiáno, síno ojapo ko tembiapo umi ansiáno poguýpe.

³¹ Pe superintendénte de grúpo omoĩ vaʼerã ehémplo omotenondévo pe predikasión. Ermanokuéra ohechávo mbaʼéichapa haʼe ikyreʼỹ ha opredika meme, haʼekuéra ikyreʼỹta avei predikasiónpe. Umi ermáno ningo ikyreʼỹ ha oñopytyvõ oĩmba jave oñondive, upévare haʼekuéra ovyʼaitereíta pe predikasión ojejapóramo peteĩ óra enterovéva lénto ikatutahápe osẽ (Luc. 10:1-16). Pe superintendénte de grúpo ojasegura vaʼerã toĩ território ojepredika hag̃ua upe díape. Haʼe odirihi jepi pe aty predikasionrã ha oorganisa umi ermanokuérape. Haʼe ndaikatúiramo odirihi la grúpo heʼíta ótro ansiáno térã peteĩ siérvo ministeriálpe ojapo hag̃ua upéva, ha haʼekuéra ndaikatumoʼãiramo heʼíta peteĩ ermáno ikatupyrývape odirihi hag̃ua la grúpo. Péicha umi ermáno oikuaáta mbaʼépa ojapo vaʼerã.

³² Pe superintendénte de grúpo ohecha entéro mbaʼe oñekotevẽva oúta vove pe superintendénte de servísio. Haʼe oavisa ermanokuérape ha omombeʼu chupekuéra mbaʼéichapa ideprovéchota upe visíta. Entéro oikuaáramo umi mbaʼe ojejapótava, ikatúta vyʼápe oapoja ko arréglo.

³³ Umi grúpo de predikasión michĩ jepi, upéicha pe superintendénte de grúpo oikuaa porã umi ermáno igrupopeguápe. Haʼe ningo peteĩ pastór oporohayhúva ha ojepyʼapýva ipyʼaite guive káda únore. Haʼe oipytyvõ ha omokyreʼỹ káda ermánope osẽ hag̃ua predikasiónpe ha oho hag̃ua rreunionhápe. Ojapo ikatúva guive oipytyvõ hag̃ua ermanokuérape siémpre ojerovia hag̃ua Jehováre. Umi hasýva térã oñedeprimíva ovyʼáta ojevisitáramo chupekuéra. Ótro ermánope ideprovechoitereíta oñemokyreʼỹramo ha oñemeʼẽramo chupe konsého ohupyty hag̃ua hetave priviléhio ha péicha oipytyvõ porãve kongregasiónpe. Umi superintendénte de grúpo ojepyʼapy espesiálmente umi ermáno oĩvare igrúpope, péro haʼe ningo peteĩ ansiáno ha pastór ojepyʼapýva pe kongregasión kompletoitére ha oĩ oipytyvõ hag̃uáicha entéro oikotevẽvape (Hech. 20:17, 28).

³⁴ Avei pe superintendénte de grúpo ombyaty umi infórme de predikasión igrupopegua ha omeʼẽ pe sekretáriope. Káda puvlikadór ikatu oipytyvõ pe superintendénte de grúpope omeʼẽramo atiémpo iñinfórme. Ikatu oñemeʼẽ pe superintendénte de grúpope térã oñemoĩ pe káha ojepurúvape oñemoĩ hag̃ua umi infórme oĩva Salón del Réinope.

³⁵ Oĩ heta rresponsavilida pe komite de servísio orekóva ikárgope. Pe komitépe oĩ pe koordinadór del kuérpo de ansiáno, pe sekretário ha pe superintendénte de servísio. Haʼekuéra ohecha ojeaprova hag̃ua oĩramo ojeruréva oipuru hag̃ua pe Salón del Reino peteĩ funerál térã kasamientorã. Pe komite oorganisa máva mávapa oĩta umi grúpo de predikasiónpe. Avei ohecha ojeaprova hag̃ua umi solisitu prekursorádo auxiliár térã rregulárpe g̃uarã térã ótro servísiope g̃uarã. Pe komite de servísio ombaʼapo pe kuérpo de ansiáno poguýpe.

³⁶ Pe sukursál omeʼẽ instruksión oikuaa hag̃ua mbaʼéichapa ojapo vaʼerã itraváho umi oĩva pe komite de servísiope ha avei umi ótro ansiánope, por ehémplo pe omoakãvape Ñemañaha Ñehesaʼỹijo, pe superintendénte de la rreunión Mbaʼéichapa Jaiko ha Japredika vaʼerã, ha umi ótro ansiáno oĩvape pe kongregasiónpe.

³⁷ Káda kongregasiónpe pe kuérpo de ansiáno oñembyaty jepi ohecha hag̃ua mbaʼéichapa oho hese la kongregasión. Káda áño ojejapo 4 rreunión: mokõi ou jave pe superintendénte de sirkuíto ha ótro mokõi ojejapo 3 mése pe visíta rire. Péro umi ansiáno ikatu oñembyaty en kualkiér moménto ohecháramo tekotevẽha.

³⁸ Umi ansiáno ningo iñimperfékto, upéicharamo jepe Jehová oipota ñañemoĩ ipoguypekuéra, pórke péicha haʼe oorganisa ipuévlope. Umi ansiáno orrepresenta Jehovápe ha pe goviérno haʼe orekóvape. La Biblia heʼi avei haʼekuéra ojechataha Ñandejárandi umi mbaʼe ojapóvare. Hebreos 13:17 heʼi: “Peneñeʼẽrendúkena umi pendegiávape ha peñemoĩ ipoguypekuéra. Pórke haʼekuéra siémpre oñangareko penderehe ha Ñandejára ohusgáta chupekuéra la ojapóvare. Péicha pejapóramo, haʼekuéra vyʼápe ojapóta itraváho ha ndoikomoʼãi oñembyasy, péro ndapejapóiramo upéicha, ivaietereíta peẽme g̃uarã”. Jehová oipuru ijespíritu sánto onombra hag̃ua umi ansiánope, ha oipurúta avei upéva oipeʼa hag̃ua peteĩ ansiánogui ko priviléhio, oimérõ ndohechaukavéi umi mbaʼe porã oúva espíritu sántogui ha nokumplivéi umi rrekisíto oñehaʼarõva chugui.

³⁹ ¡Ajépa ñamombaʼete umi ansiáno ombaʼapo jejopývape ha omoĩvape ehémplo porã kongregasiónpe! Apóstol Pablo heʼi vaʼekue umi kristiáno oĩvape Tesalónicape: “Rojerure peẽme ermanokuéra perrespeta hag̃ua umi ombaʼapo jejopývape pende apytépe, umi pendegiávape ñande Ruvicha servísiope ha oñemoñeʼẽvape peẽme. Pehechaukákena pemombaʼe ha pehayhuha chupekuéra pe itraváhore” (1 Tes. 5:12, 13). Haʼekuéra ombaʼapo pe kongregasión rehehápe, ha péicha rupi jaservi porãve Jehovápe ha javyʼave jajapóvo upéva. Pablo heʼi vaʼekue avei Timotéope mbaʼépa umi ermáno opensa vaʼerã ansianokuérare: “Umi ansiáno oporogia porãvape ojerrespetave vaʼerã, koʼýte umi ombaʼapo jejopývape oñeʼẽ hag̃ua Ñandejára Ñeʼẽre ha oporomboʼe hag̃ua” (1 Tim. 5:17).

⁴⁰ Heta ansiánope ojeelehi oĩ hag̃ua pe grúpo de visíta al pasiéntepe. Ótrope ojeelehi oĩ hag̃ua pe komite de enlásepe, térã pe grúpo de ansiáno oñekomunikáva doktorkuérandi. Ko grúpo oho umi ospitálpe ha oñeʼẽ umi doktór ndive omokyreʼỹ hag̃ua chupekuéra oipuru hag̃ua umi tratamiénto oipuruʼỹre tuguy oñatende jave umi Testígore. Oĩ avei ansiáno oipytyvõva oñemopuʼã hag̃ua ha ojejapo hag̃ua mantenimiénto umi Salón del Reino ha Salón de Asambléape, oĩ avei ombaʼapóva umi komite de asambléape. Añetehápe Jehová organisasión oagradese koʼã ermáno ombaʼapo jejopývape omeʼẽvo itiémpo ha imbaretekue opavave rehehápe. Enterovéva ‘jasegi vaʼerã ñamombaʼe koʼãichagua kuimbaʼépe’ (Filip. 2:29).

⁴¹ Pe Kuérpo Governánte ohecha oñenombra hag̃ua umi ansiáno ikatupyrývape oiko hag̃ua chuguikuéra superintendénte de sirkuíto. Pe sukursál oasigna chupekuéra ha heʼi mbaʼe kongregasiónpa oĩta isirkuítope. Umi superintendénte ovisita jepi káda kongregasiónpe 2 vése al áño. Haʼekuéra ovisita avei umi prekursór oservívape mombyry ndaiporihápe heta Testígo. Umi superintendénte oprepara peteĩ prográma ovisita hag̃ua umi kongregasiónpe ha atiémpo oavisáma chupekuéra ohotaha. Péicha enterovépe ideprovéchota haʼe ovisita vove pe kongregasión.

⁴² Pe koordinadór del kuérpo de ansiáno ohecha tojeprepara entéro mbaʼe oñekotevẽva pe superintendénte ovisita hag̃ua pe kongregasión ha omombarete hag̃ua ermanokuéra jerovia (Rom. 1:11, 12). Pe koordinadór oikuaávo mbaʼe mbaʼépa oikotevẽta pe superintendénte ha hembireko, (oiméramo omenda) oñeʼẽta umi ótro ermánondi ha oñepyrũta ohecha hikuái moõpa ikatu opyta ha ótra kósa oikotevẽtava hikuái. Pe koordinadór oavisa enterovévape ha pe superintendéntepe avei umi mbaʼe ojejapótava.

⁴³ Pe superintendénte oñeʼẽ vaʼerã pe koordinadór ndive ohecha hag̃ua hikuái mbaʼe órapa orekóta umi rreunión, umíva apytépe pe aty predikasionrã. Koʼã rreunión ojejapo hag̃ua ojerekóta enkuénta mbaʼépa heʼi pe superintendénte ha umi instruksión omeʼẽva pe sukursál. Tekotevẽ atiempomi enterovéva oikuaáma moõ ha arakaʼépa ojejapóta umi rreunión, por ehémplo pe rreunión umi prekursór ndive ha pe rreunión umi ansiáno ha siérvo ministeriál ndive. Entéro oikuaa vaʼerã avei moõ moõpa oñesẽta ojepredika ha mbaʼe órapa.

⁴⁴ Pe martes kaʼaru pe superintendénte orrevisa umi rrehístro de puvlikadór kongregasionpegua, rrehístro de asisténsia rreunionpegua, rrehístro de território, ha umi dokuménto de kontavilida. Péicha haʼe ohechakuaátama mbaʼépepa tekotevẽ omehora pe kongregasión, ha mbaʼéichapa ikatu oipytyvõ umi ermáno orekóvape ikárgope koʼã rrehístro. Pe koordinadór ojaseguráta pe superintendénte orekóma hag̃ua atiémpo umi rrehistrokuéra.

⁴⁵ Pe visíta aja pe superintendénte omboyke tiémpo oñeʼẽ hag̃ua ermanokuérandi, tahaʼe rreunionhápe, predikasiónpe, okaru jave hendivekuéra térã ótro hendápe. Avei oñembyaty umi ansiáno ha siérvo ministeriál ndive, ha la Biblia rupive omeʼẽ chupekuéra konsého ha suherénsia, avei omokyreʼỹ chupekuéra oñangareko porã hag̃ua Jehová ovechakuérare (Prov. 27:23; Hech. 20:26-32; 1 Tim. 4:11-16). Pe superintendénte oñembyaty avei umi prekursór ndive omokyreʼỹ ha oipytyvõ hag̃ua chupekuéra ombohovái porã hag̃ua umi provléma ikatúva oreko iservísiope.

⁴⁶ Oiméramo oĩ ótra kósa tekotevẽva ojehecha, pe superintendénte ojapóta ijáva guive chupe oporopytyvõ hag̃ua pe visíta aja. Ndaikatúiramo osolusiona hikuái upe semánape la káso, haʼe heʼíta umi ansiáno térã ótro ermáno tekotevẽvape oikuaa, moõpa ikatu oinvestiga mbaʼépa heʼi la Biblia upe témare. Péro oiméramo tekotevẽ pe sukursál oikuaa mbaʼéichapa oñeñatende upe káso, pe superintendénte ha umi ansiáno ojapóta peteĩ infórme omombeʼuhápe umi detálle pe káso rehegua.

⁴⁷ Pe superintendénte oho umi rreunión ojejapóvape pe kongregasión haʼe ovisitávape. Koʼã rreunión ikatu oñekambiaʼimi asegún mbaʼépa heʼi pe sukursál. Pe superintendénte ojapóta diskúrso ikatu hag̃uáicha omokyreʼỹ, omboʼe ha omombarete pe kongregasiónpe. Oñehaʼãmbaitéta oipytyvõ umi ermánope ohayhuve hag̃ua Jehovápe, Jesúspe ha pe organisasiónpe.

⁴⁸ Pe superintendénte ovisita avei pe kongregasiónpe ikatu hag̃uáicha oipytyvõ ermanokuérape opredika hag̃ua kyreʼỹme, ha ohechauka chupekuéra mbaʼéichapa ikatu oporomboʼe porãve. Ikatu avei heta ermáno térã ermána omboykeve itiémpo osẽve hag̃ua opredika upe semánape, ha ikatu voi ojapo pe prekursorádo auxiliár upe méspe. Oimeraẽva ikatu ojerure osẽ hag̃ua pe superintendénte térã hembirekóndi predikasiónpe, ha ojapo hag̃ua rrevisíta térã estúdio. Añetehápe upéva ou porãitereíta umi ermánope. Oñemombaʼeterei ningo umi mbaʼe rejapóva reapojave hag̃ua umi arréglo oĩva upe semánape (Prov. 27:17).

⁴⁹ Káda áño ojejapo mokõi asambléa de sirkuíto térã un diagua. Pe superintendénte de sirkuíto oorganisa koʼã asambléa. Haʼe oelehi peteĩ ermánope oservi hag̃ua de superintendénte de asambléa ha ótrope katu haʼe hag̃ua pe superintendénte auxiliár. Koʼã mokõi ermáno oipytyvõ pe superintendénte de sirkuítope ojejapo hag̃ua pe asambléa, upéicha haʼe ikatúta oñekonsentrave ojesegi porã hag̃ua pe prográma. Pe superintendénte de sirkuíto oelehi avei unos kuánto ermáno ikatupyrývape ombaʼapo hag̃ua umi departaméntope. Ojerure avei oñekontrola hag̃ua pe kontavilida upe sirkuitopegua opa rire pe asambléa. Peteĩva umi asambléape pe sukursál omondo peteĩ rrepresentánte ojapo hag̃ua diskúrso. Sapyʼánte umi sirkuíto ojedividi pórke opyta mombyry ojuehegui umi kongregasión térã pe lokál ndatuichái haguére, péicha jave, káda seksión orekóta la iñasambléa.

⁵⁰ Pe superintendénte de sirkuíto káda mes omondo iñinfórme de predikasión pe sukursálpe. Oiméramo oreko raʼe algún gásto de viáhe, okaru hag̃ua, umi lugár opyta haguépe térã ótro gásto ha pe kongregasión ndaikatúi raʼe opaga, upéicharõ ikatu omondo peteĩ infórme pe sukursálpe omombeʼuhápe umi gásto. Jesús heʼi vaʼekue ndofaltamoʼãiha mbaʼeve umi omotenonde memévape Ñandejára Rréino, ha umi superintendénte ojerovia ko promésare (Luc. 12:31). Iporãitereíta ningo umi ermáno kongregasionpegua siémpre imanduʼáramo orresivi porã vaʼerãha koʼãichagua ansiáno ombaʼapo jejopývape hesehapekuéra (3 Juan 5-8).

⁵¹ Umi sukursál orekóvape umi testígo de Jehová oĩ peteĩ komite de sukursál. Ko grúpope oĩ mbohapy térã hetave ermáno ijerovia mbaretéva ha ohayhúva Jehovápe, peteĩva ijapyteguikuéra haʼe pe koordinadór. Ko komite oorganisa ojejapo porã hag̃ua pe predikasión pe território oĩvape ikárgope, sapyʼánte haʼéva peteĩ térã hetave país.

⁵² Pe komite de sukursál oorganisa entéro mbaʼe ojejapóva umi kongregasión oĩva iterritóriope. Oñenkarga avei ojepredika hag̃ua pe território kompletoitére, ha upearã omoĩ umi kongregasión ha sirkuíto oñatende porã hag̃ua pe territóriore. Oñatende umi mbaʼe ojapóvare umi misionéro, umi prekursór espesiál, rregulár ha auxiliár. Oĩ jave umi asambléa un diagua ha tres diagua, pe komite de sukursál oorganisa ha oasigna umi mbaʼe tekotevẽva ojejapo, ikatu hag̃uáicha ‘entéro mbaʼe ojejapo porã ha ani sarambikuépe’ (1 Cor. 14:40).

⁵³ Sapyʼánte peteĩ komite de sukursál oreko ikárgope ótro país, upéicha jave oñenombra peteĩ komite de país upe lugárpe. Upéva oipytyvõ oñeñatende porãve hag̃ua umi traváho ojejapóvare upe lugárpe. Ko komite kárgope oĩ pe ogár Betel ha umi ótro ofisína, umi kárta, umi infórme ha umi mbaʼe ojejapóva predikasiónpe. Pe komite de país ha pe komite de sukursál ombaʼapo oñondive omotenonde hag̃ua Ñandejára Rréino.

⁵⁴ Pe Kuérpo Governánte onombra umi ermáno ombaʼapótavape koʼã mokõi komitépe.

⁵⁵ Pe Kuérpo Governánte omondo jepi umi ermáno ikatupyrývape ovisita hag̃ua umi sukursál oĩva ko múndo tuichakuére. Umi ermáno ojapóvape koʼã visíta oñehenói rrepresentánte de la sentrál mundiál. Koʼã visíta ojejapo oñemokyreʼỹ hag̃ua pe família Betel, ha oñepytyvõ hag̃ua pe komite de sukursálpe ombohovái hag̃ua umi situasión térã provléma ikatúva oĩ predikasiónpe térã oñemboʼévo umi héntepe. Ojeporavo algúno superintendénte de sirkuítope oñembyaty hag̃ua pe rrepresentánte ndive, ha avei haʼe oñembyaty umi misionéro ndive. Pe ermáno oñemongeta hendivekuéra umi provléma ohasávare ha umi mbaʼe oikotevẽvare, ha omokyreʼỹ chupekuéra osegi hag̃ua opredika ha oipytyvõ umi héntepe oiko hag̃ua chuguikuéra Jesús disípulo, péva hína pe tembiapo iñimportantevéva.

⁵⁶ Pe rrepresentánte de la sentrál mundiál oikuaase umi mbaʼe ojehupytýva predikasiónpe ha mbaʼéichapa oho hese umi kongregasión. Omeʼẽramo chupe la tiémpo ikatu ovisita umi ofisína rremóta de traduksión. Pe rrepresentánte ojapo ikatumíva guive osẽ hag̃ua avei predikasiónpe ovisita jave pe sukursál.

⁵⁷ Koʼã kuimbaʼe ijerovia mbaretéva oñemeʼẽmbaite ñanderehehápe, ha oñangareko ñanderehe mborayhúpe. Upéva ningo ideprovechoiterei ñandéve. Ñaneñeʼẽrendúramo koʼã kuimbaʼe oñenombrávape oñatende hag̃ua pe kongregasiónre, ñaiméta unído Jesús ndive, pe omoakãva pe kongregasión (1 Cor. 16:15-18; Efes. 1:22, 23). Upéicha Ñandejára espíritu sánto iñasãi umi kongregasión oĩvape ko múndo tuichakuére ha Ñandejára Ñeʼẽ ogia entéro mbaʼe ojejapóva (Sal. 119:105).