Eñehaʼãmbaitékena emombarete jey ne matrimónio

‘Omendávape ameʼẽ hembiaporã, ndahaʼéi che ameʼẽva, síno Jesucristo omeʼẽvaʼekue.’ (1 COR. 7:10)

IKATÚPA REMYESAKÃ

¿Mbaʼérepa jaʼe Jehová omoĩha peteĩ júgo guýpe umi omendávape?

¿Mbaʼéichapa ansianokuéra ikatu oipytyvõ umi iprovlémavape imatrimóniope?

¿Mbaʼéichapa jahechavaʼerã pe matrimónio?

 1. ¿Mbaʼéichapa kristianokuéra ohecha pe matrimónio, ha mbaʼérepa?

PETEĨ kristiáno omendávo oñekompromete Ñandejára renondépe, ha upéva ndahaʼéi vyrorei, síno peteĩ rresponsavilida tuicháva (Ecl. 5:4-6). Jehová omomenda ypy vaʼekue yvyporakuérape ha “omoĩ oñondive peteĩ júgo guýpe” (Mar. 10:9, NM). Ko júgo tuichaiterei mbaʼe Jehová renondépe ha iñimportanteve oimeraẽ léi yvypóra omoĩvagui umi omendávape g̃uarã. Kristianokuéra omombaʼevaʼerã pe matrimónio Ñandejára omombaʼeháicha, jepe omenda hikuái oikuaa mboyve Jehovápe térã upe riréma.

 2. ¿Mbaʼe mbaʼépa oñembohováita ko artíkulope?

² Umi omendáva ikatu ovyʼaiterei oñondive. Péro, ¿mbaʼépa ojapovaʼerã hikuái oiméramo iprovléma ha ojopoise? ¿Ikatúpa omombarete jey imatrimónio? ¿Mbaʼépa oipytyvõta chupekuéra ani hag̃ua ojueja?

JAVYʼÁTAPA TÉRÃPA ÑAÑEMBYASÝTA

3, 4. ¿Mbaʼépa ikatu oiko nañapensaporãirõ jaiporavo hag̃ua ñane ména térã ñane rembirekorã?

³ Umi kristiáno omendáva osẽ porãramo, ovyʼaiterei ha ohechauka omombaʼeguasuha Jehovápe, péro osẽ vaíramo heta ohasa asy. Umi omendaséva omoñepyrũ porãta imatrimónio osegíramo Ñandejára konsého. Péro umi nopensaporãiva oiporavo hag̃ua iména térã hembirekorã, hasy osẽ porã hag̃ua ha ikatu heta oñembyasy upéi. Pór ehémplo, heta mitãrusu ha mitãkuña oñemoĩ de nóvio, jepe ndoikuaái gueteri mbaʼéichapa oikovaʼerã omenda rire. Oĩ ojejuhúva Internet rupive ha sapyʼaitépe omendáma, péro upe rire ou iprovléma ha ndovyʼái. Ambue katu ojapo mbaʼe vai oĩ aja de nóvio ha upéi omenda, upéicha rupi ndojorrespetái hikuái omenda rire.

⁴ La Biblia heʼi ñamendavaʼerãha peteĩ ‘Ñandejárare ojeroviáva rehe’, péro oĩ kristiáno ndorrespetáiva ko mandáto ha upéicha rupi mokõivéva oreko diferénte rrelihión (1 Cor. 7:39, BNP). Oiméramo nde rejapóraʼe upéva, ejerure Jehovápe taneperdona ha tanepytyvõ. Haʼe nandepeʼamoʼãi umi mbaʼe ikatúvagui rehasa naneñeʼẽrendúi haguére, péro reñearrepentírõ nemombaretéta regueropuʼaka hag̃ua umi mbaʼe ijetuʼúva (Sal. 130:1-4). Eñehaʼãke nde pyʼaite guive rejapo haʼe heʼíva koʼág̃a ha opa árare, ha upéicha ‘nembaretéta Ñandejárape rembovyʼa haguére’ (Neh. 8:10).

OJOPOISÉRAMO IPROVLÉMA HAGUÉRE

 5. ¿Mbaʼépa nopensaivaʼerã peteĩ ombyasýva omenda haguére?

⁵ Umi ombyasýva omenda haguére ikatu opensa: “¿Maʼerã rei piko añehaʼãta asolusiona ore provlemakuéra ko ndaorepohãvéimava? ¡Hiʼãite ningo chéve oguevi jey pe tiémpo ha amenda ambuére!”. Ikatu voi oĩ opoisénteva iména térã hembirekógui ha heʼi: “Mbaʼére piko ndajedivorsiáinte. Péicha chesãso jeýta. Haʼe nachemoakãratĩriramo jepe, ahejantevaʼerãmoʼã chupe avyʼa jey hag̃ua”. Kristianokuéra oiko rangue opensa koʼã mbaʼére, ohechavaʼerã mbaʼépa heʼi Ñandejára ha oñehaʼãmbaite osegi ikonsého, tahaʼe haʼéva isituasión.

 6. Emyesakã Jesús heʼivaʼekue Mateo 19:9-pe.

⁶ La Biblia ohechauka peteĩ kristiáno ojedivorsiáva ndaikatuiha omenda jey oimeháicha rei. Jesús heʼivaʼekue: “Oimeraẽ ojedivorsiáva hembirekógui, ndahaʼéiramo hekovai haguére ha upéi omenda jey ambuére, upéva oporomoakãratĩhína” (Mat. 19:9, NM). Ko téystope pe ñeʼẽ fornikasión heʼise avei ñemoakãratĩ ha ambue pekádo sexual ivaietereíva. Upévare, oĩramo ojedivorsiaséva péro ndahaʼéi iména térã hembireko hekovai haguére, tekotevẽ ojerure Ñandejárape toipytyvõ chupe ha osegi ikonsého.

 7. ¿Mbaʼépa ikatu oñepensa kristianokuérare imatrimónio nosẽporãiramo?

⁷ Peteĩ matrimónio osẽ vaíramo, ojekuaa ména ha tembireko noĩporãiha Jehová ndive. Pablo oporanduvaʼekue ko mbaʼe iñimportantetéva: ‘Peteĩ nomoakãporãiva hogapy, ¿mbaʼéicha piko oñangarekokuaáta Ñandejára kongregasiónre?’ (1 Tim. 3:5). Mokõivéva heʼíramo ijehe kristianoha ha upéicharõ jepe imatrimónio osẽ vai, umi oikuaáva iprovlemaha ikatu opensa haʼekuéra heʼinteha heta mbaʼe porã, péro nomboʼéi mbaʼeve iporãva iñehémplo rupive (Rom. 2:21-24).

 8. Oimérõ ména ha tembireko opensa ojueja térã ojedivorsia, ¿mbaʼépa ohechauka hikuái?

⁸ Mokõi kristiáno omendáva opensáramo ojopoi térã ojedivorsia orrespetaʼỹre la Biblia heʼíva, ohechauka noĩporãiha Ñandejára renondépe. Ikatu peteĩva térã mokõivéva voi ndojapoihína la Biblia ojeruréva. Oiméramo añetehápe ojerovia Jehováre “ipyʼaite guive”, oñehaʼãmbaitéta ani hag̃ua ojueja térã ojedivorsia (elee Proverbios 3:5, 6).

 9. ¿Mbaʼéichapa osẽ heta matrimónio ndojapuráiva ojopoi hag̃ua?

⁹ Heta matrimónio haʼetevaʼekue naipohãvéimava, péro upéi osolusiona iprovlemakuéra. Pyʼỹinte umi kristiáno ndojapuráiva ojopoi hag̃ua, amo ipahápe osẽ porã jey. Péva ikatu oiko peteĩ ogapýpe ména ha tembireko orekóramo diferénte rrelihión. Apóstol Pedro ohai: ‘Peẽ tembireko, peñemoĩvaʼerã pene ména poguýpe, oimérõ ndogueroviái pe marandu pyahu. Upéicharõ natekotevẽmoʼãi peñeʼẽ chupekuéra, ohechágui haʼekuéra penderekopotĩ ha pemombaʼeguasuha Ñandejárape’ (1 Ped. 3:1, 2). Upeichaite, ména térã tembireko hekoporãramo, ikatu hína pe ndoservíriva Jehovápe okambia ha oiko chugui Testígo. Umi omendáva osolusionáramo iprovlemakuéra ha ndojopoíri, omombaʼeguasu Jehovápe ha opavavénte ovyʼaiterei hogapýpe.

10, 11. ¿Mbaʼépa ikatu oiko umi omendávare, ha mbaʼéichapa Jehová oipytyvõ chupekuéra?

¹⁰ Heta kristiáno soltéro ojapose Jehová ojeruréva ha oiporavo iñirũrã peteĩ ermáno térã ermána ojevautisámava. Upéicharõ jepe, ikatu oiko peteĩ mbaʼe oñehaʼarõʼỹva. Pór ehémplo, pe ména térã tembireko ikatu ou oñedeprimi, térã peteĩ tiémpo omenda rire hikuái, peteĩva ndopredikavéi. Lindaa, peteĩ ermána ifamíliava ha ikyreʼỹva, ikatuʼỹre ojapo mbaʼeve, ohecha mbaʼéichapa iména oñemomombyry Jehovágui ha ipahápe oñemosẽ kongregasióngui. ¿Mbaʼépa ojapovaʼerã peteĩ kristiáno opensáramo naipohãveimaha imatrimónio oĩ haguére koʼãichagua provléma?

¹¹ Ikatu reñeporandu: “¿Añehaʼãmbaitevaʼerãpa ani hag̃ua rojopoi, toiko la oikóva?”. Nde añoite redesidivaʼerã upéva. Péro haʼetéramo jepe ku napenepohãvéimava, iporãta reñehaʼã meme. Ñandejára omombaʼeterei umi openáva ikonsiénsia rehe ha ogueropuʼakáva umi situasión ijetuʼúva imatrimóniope (elee 1 Pedro 2:19, 20). Iñeʼẽ ha ijespíritu rupive oipytyvõ umi kristiáno oñehaʼãmbaitévape ipyʼaite guive omombarete jey hag̃ua imatrimónio.

HAʼEKUÉRA OĨ OPOROPYTYVÕ HAG̃UA

12. ¿Mbaʼépa opensáta ñanderehe umi ansiáno jajeruréramo chupekuéra ñanepytyvõ hag̃ua?

¹² Oiméramo neprovléma ne matrimóniope, aníkena rekyhyje rejerure hag̃ua umi ermáno ikatupyrývape tanepytyvõ. Ansianokuéra ningo ovecharerekua hína ha mborayhúpe ohechaukáta ndéve umi konsého oĩva la Bíbliape (Hech. 20:28; Sant. 5:14, 15). Ani peimoʼã haʼekuéra napenderrespetamoʼãveimaha pemombeʼu haguére chupekuéra pene provléma ha pejerure haguére penepytyvõ hag̃ua. Upéva rangue, penderayhuvéta ohechávo peñehaʼãha pende pyʼaite guive pejapo Ñandejára ojeruréva.

13. ¿Mbaʼe konsého iñimportántevapa jajuhu 1 Corintios 7:10-16-pe?

¹³ Peteĩ kristiáno, iména térã hembireko ndahaʼéiva Testígo, ojerure jave ansianokuérape oipytyvõ hag̃ua chupe, koʼã ermáno omeʼẽ umi konsého apóstol Pablo omeʼẽvaichagua. Haʼe ohaivaʼekue: ‘Omendávape ameʼẽ hembiaporã, ndahaʼéi che ameʼẽva, síno Jesucristo omeʼẽvaʼekue: Tembireko ojeiʼỹ hag̃ua iménagui. Ha sapyʼánte tembireko ohejárõ iménape, opytamavaʼerã omendaʼỹre térã oiko porã jey vaʼerã iména ndive. Upéicha avei, ména ndohejaivaʼerã hembirekópe. [...] ¿Mbaʼéicha piko nde, tembireko, reikuaa ikatutaha resalva ne ménape? Térã nde, ména, ¿mbaʼéicha reikuaáta ikatúpa sapyʼánte resalva ne rembirekópe?’ (1 Cor. 7:10-16). ¡Ajépa tuichaite mbaʼe peteĩ ména térã tembireko okambiáramo ha oiko avei chugui Testígo!

14, 15. ¿Mbaʼéicha javépa peteĩ kristiáno ikatu oheja iména térã hembirekópe, ha mbaʼérepa opensa porã ha oñemboʼe raẽ vaʼerã odesidi mboyve?

¹⁴ ¿Mbaʼéicha javépa peteĩ kristiána ikatu odesidi ‘oheja iménape’? Oĩ ermána odesidíva ojapo upéva iména nomanteneséi rupi ifamília, oinupãitereíramo chupe térã ikatúgui omomombyry chupe Jehovágui.

¹⁵ Pe opensáva oheja iména térã hembirekópe, ndohejaivaʼerã ótro odesidi hese. Upéicharõ jepe, pe kristiáno opensa porã ha oñemboʼe raẽ vaʼerã odesidi mboyve. Pór ehémplo, ohejátarõ iména térã hembirekópe openságui omomombyrytaha chupe Jehovágui, ¿ikatúpa okulpa chupénte, térãpa haʼe voi ndostudiaporãvéi la Biblia, ndohomeméi rreunionhápe ha nosẽguasuvéi opredika?

16. ¿Mbaʼépa ñanepytyvõta ani hag̃ua jajapura jajedivorsia hag̃ua?

¹⁶ Akóinte ñaĩ porãséramo Jehovándi ha ñamombaʼérõ pe matrimónio, ndajajapuramoʼãi jadesidi hag̃ua jajedivorsiátapa. Ñande ningo ndajaipotái oñemongyʼa Ñandejára réra, upévare arakaʼeve ndajahejamoʼãi ñane ména térã ñane rembirekópe ñamendaségui ambuére (Jer. 17:9; Mal. 2:13-16).

17. ¿Mbaʼéicha javépa jaʼekuaa Ñandejára ‘ohenoiha oiko hag̃ua pyʼaguapýpe’ peteĩ kristiánope?

¹⁷ Peteĩ kristiáno iména térã hembireko ndahaʼéiva Testígo oñehaʼãmbaitevaʼerã ani hag̃ua mbaʼeve ombyai imatrimónio. Péro ndojekulpaivaʼerã hembiayhu ndoservíriva Jehovápe odesidíramo oheja chupe haʼe oñehaʼãmbaitéramo jepe. Pablo ohai: ‘Pe ojeroviaʼỹva opoiséramo hembirekógui térã iménagui, topoi katu chugui. Upéicharamo ñane ermáno térã ñane ermána ndahaʼevéima avave rembiguái. Ñandejára katu ñanerenói jaiko hag̃ua pyʼaguapýpe’ (1 Cor. 7:15, ÑÑB).b

EJEROVIÁKENA JEHOVÁRE

18. ¿Mbaʼépa ikatu ohupyty peteĩ kristiáno ojopoi térã ojedivorsiáramo jepe?

¹⁸ Neprovlémarõ ne ména térã ne rembirekóndi, ejerurékena Jehovápe tanemombarete ha akóinte ejerovia hese (elee Salmo 27:14). Linda, pe ermána ñañeʼẽma hague, heta oñehaʼã osolusiona hag̃ua iprovléma iména ndive, péro amo ipahápe ojedivorsia. ¿Haʼetépa chupe operde rei hague itiémpo? Haʼe heʼi: “Nahániri. Opavave ohechakuaa amoĩha ehémplo porã añehaʼãmbaitévo roiko porã jey hag̃ua. Chepyʼapypotĩ apytávo, ha iporãveha katu, umi áño ohasavaʼekue oipytyvõ che membykuñáme omombarete hag̃ua ijerovia, ojevautisa ha oiko hag̃ua chugui peteĩ testígo de Jehová iñeʼẽrendúva”.

19. ¿Mbaʼépa ikatu ohupyty umi oñehaʼãmbaitéva ani hag̃ua ojopoi?

¹⁹ Peteĩ ermána hérava Marilyn ovyʼaiterei ojerovia haguére Ñandejárare ha ojapo rupi opa ikatúva ani hag̃ua opoi iménagui. Haʼe omombeʼu: “Apensa jepe kuri iporãveha rojopoi haʼe nachemantenevéi rupi ha ikatúgui chemomombyry Jehovágui. Haʼe ningo ansiáno vaʼekue ha upéi oñepyrũ ojapo negósio naiporãiva. Saʼi saʼípe ndohovéi rreunionhápe, ha roju noroñemongetavéi. Upe riremínte upe táva ore roikohápe umi terrorísta ojapo peteĩ sarambi ha tuicha añemondýi, upéicha rupi aju ndajeheʼavéi avavére. Tiémpo rire ahechakuaa che avei chekulpaha oreprovléma haguére ore rogapýpe. Roñepyrũ roñemongeta jey, rostudia la Biblia oñondive ha roho meme rreunionhápe. Umi ansiáno ipyʼaporãiterei orendive ha heta orepytyvõ. Upéicha rupi ore matrimónio imbarete jey ha tiémpo rire che ména ohupyty jey priviléhio kongregasiónpe. Heta rohasa asy, péro amo ipahápe rosẽ porã jey ha rovyʼaiterei”.

20, 21. ¿Mbaʼépa oñehaʼãvaʼerã ojapo umi omendáva?

²⁰ Oiméramo ñamenda térã ñandesoltéro, jahechauka memékena ñanembareteha ha jajeroviaha Ñandejárare. Umi omendáva oñehaʼãmbaitevaʼerã osolusiona iprovlemakuéra. Imanduʼavaʼerã omenda guive “ndahaʼeveimaha mokõi, síno peteĩntema” (Mat. 19:6, NM). Upéicharõ, opavave ñaneñeʼẽrendu meme vaʼerã Jehovápe, jepe ñane ména térã ñane rembireko ndoservíri chupe. Upéicha ikatuhína ñane rembiayhu ñanemoirũ avei ñamombaʼeguasu hag̃ua Ñandejárape.

²¹ Tahaʼe haʼéva ñane situasión, jahechaukákena ñanearanduha jajapóvo opa mbaʼe hekópe porã, ikatu hag̃uáicha umi ndoservíriva Jehovápe oguerohory jaiko lája. Ñaneprovlémarõ ñane ména térã ñane rembirekóndi, ñañemboʼe meme vaʼerã, jaikuaa porã vaʼerã mbaʼépa ñanemomýi jadesidi hag̃ua, jajepyʼamongeta umi konsého oĩvare la Bíbliape ha jajerure ansianokuérape tañanepytyvõ. Opa mbaʼe ári, jadesidíkena ñaneñeʼẽrendu Jehovápe ha jahechauka ñamombaʼeha pe matrimónio.

[Nóta]

[Komentário oĩva páhina 10-pe]

Pyʼỹinte umi ndojapuráiva ojueja hag̃ua, amo ipahápe osẽ porã jey

[Komentário oĩva páhina 12-pe]

Ejerovia meme Jehováre ha ejerure chupe tanemombarete

[Nóta oĩva taʼanga ndive páhina 9]

Jehová ovendesi umi kristiáno oñehaʼãvape omombarete imatrimónio

[Nóta oĩva taʼanga ndive páhina 11]

Kongregasiónpe jajuhúta ñanekonsola ha ñanepytyvõva jajerovia mbarete hag̃ua