Eñehaʼãkena ndekatupyryve relee hag̃ua

JEPE umi animalkuéra ivale heta mbaʼépe, ndaikatúi ojapo pe nde rejapóva hína koʼág̃a. Haʼekuéra ndaikatúi olee. Péro oĩ estúdio ohechaukáva seis persóna apytégui peteĩva ndoleekuaái, ndorekói rupi oportunida ohóvo eskuélape. Ha heta hénte oleekuaáramo jepe ndojepokuaái olee. Jaleéramo ikatu jahupyty heta mbaʼe, ikatu jaikuaa mbaʼépa oiko ótro tetãme, jalee ñande rapicha rembiasakue ha hetave mbaʼe ñanepytyvõva ñambohovái hag̃ua ñane provléma.

Umi ojepokuaáva olee meme inóta porãve eskuélape, ndahasyive otopa hag̃ua itravahorã ha ogana porãve. Kuñanguéra ojepokuaáramo olee ikatúta oñangareko porãve ifamíliare, oikuaáta mbaʼeichagua tembiʼúpa iñalimentove, mbaʼérepa iñimportánte ipotĩ ha mbaʼépa ojapo vaʼerã hesãive hag̃ua hogaygua. Umi sy olee meméva katuete ohekomboʼe porãvéta imembykuérape.

Releekuaáramo “ikatúta reikuaa Ñandejárape”, ha péva hína pe iñimportantevéva ikatúva rejapo (Prov. 2:5). Jalee porãramo ikatúta jajapo heta mbaʼe Jehová servísiope, por ehémplo rreunionhápe ojelee jepi la Biblia ha hetave puvlikasión. Ñaipytyvõ porãve hag̃ua ñande rapichápe predikasiónpe tekotevẽ avei jalee porã. Avei jajeprepara hag̃ua rreunionrã térã predikasionrã tekotevẽ jalee umi informasión. Upéicharõ, jaservi porãsevéramo Jehovápe jajepokuaa vaʼerã jalee meme.

Heta oñepyrũva ostudia la Biblia ijeskuelaʼi, upéicha rupi tekotevẽ jepi oñemboʼe chupekuéra oleekuaa hag̃ua. Ótrope katu oñepytyvõ vaʼerã olee syryryve hag̃ua. Oĩ kongregasión ohecháva ideprovechotaha ojapóramo kúrso ojeleekuaa hag̃ua, péva hína umi ndoleekuaaietévape g̃uarã. Upearã ojeporu jepi pe folléto Eñehaʼã elee ha ehaikuaa. Hetaitereípema ou porã koʼãichagua kúrso. Ha iñimportánte rupi ojelee porãve, oĩ kongregasión ojapóva avei kúrso de lektúra, upéva ojejapo oñepytyvõ porãve hag̃ua umi ohóvape Eskuéla Jaiporukuaa Hag̃ua la Bíbliape. Ndojejapóiramo jepe koʼãichagua kúrso ñane kongregasiónpe, enterove ikatúta jalee porãve káda día japraktikáramo jalee en vos álta, ndajafaltáiramo ko eskuélape ha ñañehaʼãramo ñakomenta ha jajapo umi párte otoka jave ñandéve.

Heta hénte koʼág̃arupi ndojepokuaavéi olee, oikógui ohecha téle térã ohuga videohuégo. Umi mbaʼe hoʼupa ñane tiémpo ha ñanembyai. Upévare heta persóna ou ndoleeporãvéi, noñemongetakuaái hapichándi térã ndaikatúi ohechakuaa mbaʼépa iporã ha ivai.

Pe “tembiguái jeroviaha ha iñarandúva” omeʼẽ ñandéve hetaiterei puvlikasión ñanepytyvõva ñantende hag̃ua la Biblia ha omombaretéva ñande jerovia (Mat. 24:45; 1 Cor. 2:12, 13). Avei omyesakã ñandéve mbaʼéichapa oñekumpli ñane tiémpope umi profesía, mbaʼépa ikatu ñaaprende Ñandejára rembiapokuégui ha omeʼẽ ñandéve pyʼaguapy. Ha iñimportantevéva katu ohechauka ñandéve mbaʼépa jajapo vaʼerã jaservi ha ñaime porã hag̃ua Ñandejárandi. Jaleéramo koʼã informasión porãite koʼẽ koʼẽre ñañemoag̃uivéta Jehováre.

Péro upéva ndeʼiséi oimeraẽ mbaʼe jaleéva ideprovechotaha ñandéve. Tekoteṽe jaiporavo porã mbaʼépa jaleéta. Umi mbaʼe jaleéva ikatu ñambojoja tembiʼúre, ¿mbaʼépa oikóta jaʼúramo tembiʼu naiñaliméntoiva térã oñembyaíva? Ikatu ñanderasy ha amo ipahápe ñamano. Upéicha avei oikóta jaleéramo umi mbaʼe ikatúva omongyʼa ñapensáva ha ñane korasõ. Umi mbaʼe jaleéva oĩ porã vaʼerã la Biblia heʼívandi. Redesidi mboyve mbaʼépa releéta ikatu rehecha koʼã téxto heʼíva: Eclesiastés 12:12, 13; Efesios 4:22-24; 5:3, 4; Filipenses 4:8; Colosenses 2:8; 1 Juan 2:15-17 ha 2 Juan 10.

Aníkena oiko ñanderehe umi fariséore oiko vaʼekue, haʼekuéra olee Ñandejára Ñeʼẽ péro nontendéi umi mbaʼe iñimportantevéva. Upévare ombaʼeporandúrõ guare hikuái Jesúspe, haʼe heʼi chupekuéra: “¿Ha peẽ piko ndapeleéi mbaʼépa ojapo vaʼekue David?”, ha “¿ndapeleéiva piko arakaʼeve Ñandejára Ñeʼẽme heʼiha?” (Mat. 12:3, 5; 19:4; 21:16, 42; 22:31). Umi fariséo olee Ñandejára Ñeʼẽ oimoʼãgui péicha ohupytytaha jeikove opaveʼỹva, péro Jesús heʼi haguéicha umi ndohayhúiva Ñandejárape ha ndojeroviáiva Jesús sakrifísiore ndaikatumoʼãi ohupyty upéva. Péicha jahechakuaa jaleéramo la Biblia ñañembovale térã ñañembohekojoja guaʼu hag̃uánte, nañantendemoʼãi hendaitépe ha mbaʼevetépe ndaideprovechomoʼãi ñandéve (Juan 5:39-43). Umi fariséo oñemombaʼeguasu ha opensa ijehénte, upévare nontendéi la Biblia ha tuicha ojavy hikuái.

¿Mbaʼépa ñanemomýi vaʼerã jalee hag̃ua la Biblia? Jalee vaʼerã jahayhúgui Jehovápe ñande pyʼaite guive. Pe oporohayhúva ‘ovyʼa pe añeteguáre’, ha upévare oikuaase Ñandejára rembipota (1 Cor. 13:6). Oimérõ ymave ndajajepokuaái vaʼekue jalee, jahayhúramo Jehovápe opa ñane “arandukue reheve”, ñañehaʼãmbaitéta jalee la Biblia jaikuaa hag̃ua chupe ha mbaʼépa ohaʼãrõ ñandehegui (Mat. 22:37). Jahechaháicha jahayhúramo Jehovápe ñañeinteresavéta haʼe heʼívare ha upéva ñanemomýita ñaaprendeve hag̃ua chugui.

Relee jave ani remaña káda palávrarente, síno eñehaʼã emaña mbaʼépa oĩ upe rireve, péva nepytyvõta repilla hag̃ua mbaʼérepa oñeñeʼẽ hína ha relee syryryvéta. Upéicha ndereikomoʼãi repaʼã paʼã ha hesakãvéta ndéve pe releéva.

Péro oimérõ relee peteĩ informasión ijetuʼúva rentende hag̃ua, ikatu rejapo oñemanda haguéicha Josuépe. Jehová heʼi vaʼekue chupe: “Akóinte reñeʼẽ vaʼerã ótrope pe Léi heʼívare, ára ha pyhare relee ha rejepyʼamongeta vaʼerã hese” (Jos. 1:8). Peteĩ persóna ojepyʼamongeta jave sapyʼánte oñeʼẽ mbeguemi, upévare pe palávra evréa ojeporúva ko téxtope heʼise ‘jalee mbeguemi’ ha ojetradusi jepi avei ‘jajepyʼamongeta’ (Sal. 63:6; 77:12; 143:5). Jajepyʼamongeta heʼise ñande ñapensaha trankílo porã pe jaleévare. Upévare jaleéramo la Biblia ha jajepyʼamongetárõ hese opokove ñane korasõre ha og̃uahẽve ñandéve. Heta informasión iñimportánteva oĩ la Bíbliape, por ehémplo ñanepytyvõ jaiko hag̃ua Jehová rapére, pype jatopa heta profesía, konsého, proverbio ha poesía. Avei la Biblia ohechauka Jehová okastigaha umi iñañávape, mbaʼéichapa Ñandejára okumpli ohóvo hembipota, ha avei oĩ pype heta yvypóra rembiasakue. Jalee ha jajepyʼamongetáramo entéro koʼã mbaʼére opytáta ñane akãme ha opokóta ñane korasõre.

Relee jave eñehaʼã ehecha ha eñandu umi mbaʼe oikóva reimeramoguáicha upépe. Upéva ndahasymoʼãi rejapo relee jave por ehémplo David ha Goliat rembiasakue, oĩva 1 Samuel kapítulo 17-pe. Péro iporãta avei eñehaʼã ejapo upéva relee jave Éxodo ha Levítico, oñemombeʼuhápe mbaʼéichapa oñemopuʼã pe tavernákulo, ha oñepyrũ oservi umi saserdóte. Ikatu repensa mbaʼe medídapa oreko rakaʼe pe tavernákulo ha mbaʼe materiálpa ojeporu ojejapo hag̃ua. Epensami mbaʼéichapa oiméne hyakuã asy umi insiénso ojehapy jave, umi semílla ojetostáva hína ha umi animál oñekuaveʼẽva. Avei eñeimahina mbaʼeichaitépa umi oservíva pe témplope omombaʼe ha orrespeta Jehovápe (Luc. 1:8-10). Péicha releéramo katuete ifasilvéta ndéve rentende ha nemanduʼa hag̃ua umi mbaʼére.

Sapyʼánte ikatu relee peteĩ párte, péro repensa hína ótra kosaitére. ¿Mbaʼérepa oiko jepi upéva? Ikatu oime namombyrýi ndehegui oĩ hína ohendúva músika, ohecháva téle térã oĩ ijayvúva ha nde rehendupa umíva. Upévare iporãvéta releéramo peteĩ lugár itrankilohápe. Péro ikatu nde voi rejedistrae repenságui umi mbaʼe rehasa vaʼekuére nde travahohápe térã ótro hendápe. Ndaivaíriramo jepe nemanduʼa umi mbaʼére, relee jave nderejapói vaʼerã upéva. Ikatu reñepyrũ mboyve reñemboʼe raʼe Jehovápe ha reho porã hese, péro mbeguekatúpe ne akã oho jey ótro ladoite. Péicha jave reñehaʼãmbaite vaʼerã reñekonsentra pe releévare ha saʼi saʼípe rejepokuaátama.

Ha relee jave retopáramo peteĩ palávra nerentendéiva, ¿mbaʼépa rejapokuaa? Sapyʼánte umíva oñemyesakã voi upe rireve releévo rehóvo. Ndaupéichairamo ikatu reheka diksionáriope térã remarka pe párte upéi reporandu hag̃ua ótrope. Rejapóramo péicha reikuaáta hetave palávra ha rentendéta upe releéva.

Sapyʼánte jaleéva ideprovécho vaʼerã ótrope, upévare apóstol Pablo heʼi vaʼekue Timotéope: “Resegi vaʼerã reñehaʼãmbaite relee opavave renondépe” (1 Tim. 4:13). Jalee hag̃ua en púvliko ñande raẽ ñantende vaʼerã pe informasión ha mbaʼépa oikuaaukase ñandéve, upéicharõmante jaleévo ikatúta ñamog̃uahẽ porã pe mensáhe ha opokóta ñande rapichakuéra korasõre. Upearã tekotevẽ jajeprepara porã ha japraktika upe jaleétava. Pe Eskuéla Jaiporukuaa Hag̃ua la Biblia tuicha nepytyvõta rejapokuaa hag̃ua upéva.

La Biblia heʼi: “Ikyreʼỹva omohenda porã hembiapo ha katuete osẽ porã, ha umi vai vaínte ombaʼapóva opa mboriahúpe” (Prov. 21:5). Upéva ningo siertoite jaleéta jave, ñamohenda porãramo ñane rembiapo mbaʼeve ndoipeʼamoʼãi pe tiémpo ñamboykéva jalee hag̃ua.

¿Ndépa arakaʼe relee? Oĩ ojepokuaáva olee pyharevete, ótrope katu opyta porãve olee oke mboyve. Hetaiterei mbaʼe ikatútama relee remboykéramo 15 térã 20 minúto jepe relee hag̃ua káda día. La iñimportánteva hína nderehejái ohasa ni un día releeʼỹre.

¿Mbaʼérepa Jehová omanda ojeskrivi peteĩ lívrope umi mbaʼe porãita ojapótava hína? Ikatu hag̃uáicha yvyporakuéra olee, oikuaa ha omombeʼu ifamíliape (Sal. 78:5-7). Jalee meméramo la Biblia jahechauka ñamombaʼe ha jaagradeseha Jehovápe oikuaauka haguére ñandéve koʼã mbaʼe porãita.