¡Jajapókena opa ikatúva ñakumpli porã hag̃ua ñane asignasión!

¿MBAʼÉICHAPA ñande ñañeñandu jarresivi jave peteĩ kárta iporãva peteĩ ñane amigoitégui? Timoteo orresivi vaʼekue peichagua kárta apóstol Páblogui, ko kárta ningo koʼág̃a oĩ la Bíbliape ha haʼe hína pe 2 Timoteo. Katuete oiméne Timoteo pyaʼe oheka raʼe peteĩ lugár itrankílova, olee hag̃ua la heʼíva ko kárta ogueruka vaʼekue chupe iñamígo. Oiméne Timoteo opensa raʼe: “¿Mbaʼéichapa oiméne oĩ Pablo? ¿Orekópa algún konsého chéve g̃uarã? ¿Chepytyvõnepa ikárta apredika, amboʼe ha aipytyvõ porãve hag̃ua ótrope?”. Jahechataháicha ko kárta ivaliosoitéva ombohovái kuri Timotéope koʼã ha hetave pregúnta. Ko artíkulope jahecháta unos kuánto konsého ideprovechoitereíva oĩva ko kártape.

Timoteo oñepyrũrõ guare olee pe kárta, ensegída ohechakuaa Pablo añetehápe ojepyʼapyha hese. Pablo heʼi voi chupe: ‘Che raʼy ahayhuetéva’ (2 Tim. 1:2). Timoteo oiméne orresivi rakaʼe ko kárta áño 65 rupi. Upérõ haʼe orekóne raʼe 30 áño rasamínte, péro haʼéma vaʼekue peteĩ ansiáno ikatupyrýva. Haʼe ningo ombaʼapo vaʼekue Páblondi mas de 10 áño, ha heta mbaʼe oaprende chugui.

Timotéope katuete omokyreʼỹetereíne raʼe oikuaárõ guare Pablo oaguantaha hína heta mbaʼe ijetuʼúva ha osegiha ifiél. Upérõ Pablo oĩ vaʼekue préso Rómape ha saʼíma ofalta ojejuka hag̃ua chupe (2 Tim. 1:15, 16; 4:6-8). Timoteo ohecha mbaʼeichaitépa Pablo ipyʼaguasu, pórke heʼi chupe: “Che aaguanta entéro mbaʼe” (2 Tim. 2:8-13). Timotéope omombarete haguéicha, ñandéve avei ikatu ñanemombarete pe ehémplo porãite Pablo oheja vaʼekue oaguantávo heta mbaʼe ijetuʼúva.

Pablo omokyreʼỹ vaʼekue Timotéope omombaʼe hag̃ua iñasignasión Ñandejára servísiope. Haʼe oipota vaʼekue Timoteo ‘kyreʼỹme oipuru pe rregálo oúva Ñandejáragui’ (2 Tim. 1:6). Pablo oipuru vaʼekue pe palávra griega khárisma heʼi hag̃ua “rregálo”. Upe palávra ojepuru oñeñeʼẽ hag̃ua peteĩ mbaʼe ojerresivívare grátis ha noñemereséiva, álgo noñeganái vaʼekue. Timoteo orresivi vaʼekue ko rregálo ojeporavórõ guare chupe oservi hag̃ua pe kongregasiónpe de fórma espesiál (1 Tim. 4:14).

¿Mbaʼépa Timoteo ojapo vaʼerã kuri upe rregálogui? Griégope pe fráse “kyreʼỹme reipuru pe rregálo” heʼise “eipeju tatáicha pe rregálo oúva Ñandejáragui”. Upéicharõ Timoteo oleérõ guare Pablo oskrivi vaʼekue, oiméne ou raʼe chupe iñakãme mbaʼéichapa peteĩ ógape ojejatapy jepi, ha sapyʼánte pe tata ogue ha opyta pe tatapỹintema. Upéi oñemoĩve jepeʼa pe tatápe ha ojepeju, hendy ha ojepota jey hag̃ua. Péicha avei Timoteo ojapo vaʼerã umi mbaʼe tekotevẽva osegi hag̃ua ikyreʼỹ iservísiope. Peteĩ diksionário heʼi pe palávra griega (anazōpyréō) Pablo oipuru vaʼekue, heʼiseha “oñembojepota jey, oñemyendy jey, ojepeju hendy hag̃ua”, térã upéva heʼise “peteĩ persóna hetiaʼe ha ikyreʼỹha ojapo hag̃ua peteĩ traváho”. Upéicharõ, haʼetévaicha Pablo oakonseháva Timotéope heʼívo: “¡Ejapókena opa ikatúva ekumpli porã hag̃ua ne asignasión!”. Koʼág̃a ñande tekotevẽ avei jajapo upéicha, ñambaʼapo vaʼerã kyreʼỹme ñande servísiope Jehovápe.

Osegívo olee pe kárta omondo vaʼekue chupe iñamígo, Timoteo otopa ótra kósa oipytyvõtava chupe ipredikasiónpe: “Eñongatu porãkena pe tesóro ojeheja vaʼekue nde kárgope, upearã nepytyvõta pe espíritu sánto oĩva ñande pype” (2 Tim. 1:14). ¿Mbaʼépa rakaʼe pe tesóro ojeheja vaʼekue Timoteo kárgope? Pe versíkulo 13-pe Pablo oñeʼẽ vaʼekue ‘umi enseñánsa iporãvare’, ha upéva hína pe añetegua oĩva Ñandejára Ñeʼẽme (2 Tim. 1:13). Timoteo ningo peteĩ kristiáno opredikáva, upéicha rupi haʼe omboʼe vaʼerã pe añetegua umi ermanokuérape kongregasiónpe, ha avei umi héntepe iterritóriope (2 Tim. 4:1-5). Avei Timotéope oñenombra vaʼekue ansiáno oñangareko hag̃ua Ñandejára ovechakuérare (1 Ped. 5:2). Timoteo ikatúta kuri oñongatu porã pe tesóro ojeheja vaʼekue ikárgope, térã pe añetegua haʼe omboʼe vaʼerã, ojeroviávo Jehová espíritu sántore ha Iñeʼẽre (2 Tim. 3:14-17).

Koʼág̃arupi avei ojeheja ñande kárgope pe añetegua ñamboʼéva ótrope predikasiónpe (Mat. 28:19, 20). Ñande jasegi vaʼerã ñamombaʼe ko tesóro porãite, upearã siémpre ñañemboʼe vaʼerã ha jajepokuaa jastudia meme Ñandejára Ñeʼẽ (Rom. 12:11, 12; 1 Tim. 4:13, 15, 16). Ñande ikatu hína avei jareko pe asignasión jaservívo de ansiáno térã de tiémpo kompléto. Peichagua asignasión ivaliosoitéva ñanepytyvõ vaʼerã ñaneumílde hag̃ua ha ñadepende hag̃ua Jehováre. Jajerovia vaʼerã avei haʼe ñanepytyvõtaha ñakumpli porã hag̃ua pe asignasión. Péicha jajapóramo jahechaukáta añetehápe ñamombaʼeha pe tesóro Ñandejára oheja vaʼekue ñande kárgope.

Timoteo oreko vaʼekue avei pe asignasión omboʼe ha ombokatupyrývo ótrope, ojapokuaa hag̃ua umi traváho haʼe ojapóva. Upévare Pablo heʼi Timotéope: “Umi mbaʼe rehendu vaʼekue che jurúgui [...] remboʼe vaʼerã umi kuimbaʼe ifiélvape, péicha haʼekuéra ikatupyrýta avei omboʼe hag̃ua ótrope” (2 Tim. 2:2). Pablo omomanduʼa Timotéope omboʼe vaʼerãha umi ermánope entéro mbaʼe haʼe oaprende vaʼekue. Koʼág̃arupi iñimportánte avei umi ansiáno oĩva kongregasiónpe ojapo upéicha. Peteĩ ansiáno ikatupyrýva noñemohakateʼỹi umi mbaʼe oikuaávare. Upéva rangue haʼe omboʼe ótrope ojapokuaa hag̃ua avei pe traváho. Haʼe ndokyhyjéi umi ótro oikuaave térã ojapo porãvérõ g̃uarã chugui pe asignasión. Upévare pe ansiáno nomboʼéi umi mbaʼe tekotevẽkueténte umi ermánope. Upéva rangue haʼe oipytyvõse chupekuéra iñakãguapy, iñarandu ha ojerovia mbareteve hag̃ua. Péicha umi ‘kuimbaʼe ifiélva’ haʼe ombokatupyrýva oipytyvõ porãvéta kongregasiónpe.

Katuete Timoteo omombaʼetereíne raʼe pe kárta porãite ombou vaʼekue chupe Pablo. Ikatu ñañeimahina Timoteo olee hague heta vése umi konsého ivaliosoitéva, ha ojepyʼamongeta mbaʼéichapa ikatu ojapo umi mbaʼe iñasignasiónpe.

Ñande ningo jasegise avei koʼã konsého. ¿Mbaʼéichapa? Upearã ñañehaʼãmbaite vaʼerã kyreʼỹme jaipuru pe rregálo oñemeʼẽ vaʼekue ñandéve, ñañongatu porã pe tesóro ojeheja vaʼekue ñande kárgope, ha ñamboʼe ótrope entéro mbaʼe jaikuaáva. Ha Pablo heʼi haguéicha Timotéope, ñande avei ikatúta ‘jajapo porã ñane rembiapo Ñandejára servísiope g̃uarã’ (2 Tim. 4:5).