Ñande ningo majordómo ijeroviapýva

 1. ¿Mbaʼépa opensa heta hénte ohendúvo pe ñeʼẽ esklávo?

OJAPO 2.500 áño rupi peteĩ eskritór griégo ohai hague: “Ndaipóri tapicha ijeheguínte oikoséva esklávoramo”. Ha koʼág̃a peve oĩ heta opensáva péicha. Ñahendúvo pe ñeʼẽ esklávo, ñapensa peteĩ tapicha ojeguereko asývare, ndorekóiva liverta, ha nombaʼapóiva ijupe g̃uarã, síno ótrope g̃uarãnte.

2, 3. a) ¿Mbaʼépa heʼise Cristo rembiguaikuéra oserviha esklávoicha? b) ¿Mbaʼe porandúpa oñembohováita ko artíkulope?

² Jesús heʼivaʼekue hemimboʼekuéra oservitaha tembiguái térã esklávoicha. Péro upéva ndeʼiséi ojereko asytaha ni ojeapoʼitaha koʼã tembiguáipe, síno ojejerovia, oñemombaʼe ha ojerrespetataha chupekuéra. Jahechamína mbaʼépa Jesús heʼivaʼekue omano mboyvemi pe “tembiguái jeroviaha ha iñarandúva” rehe (Mat. 24:45-47, NM).

³ La Bíbliape oñehenói avei ko tembiguáipe “majordómo” (elee Lucas 12:42-44). Ñane tiémpope hetave kristiáno noĩri tembiguái jeroviaha ha iñarandúva apytépe, péro enterovévape oñemeʼẽ peteĩ tembiapo ojapóva avei peteĩ majordómo. ¿Mbaʼépa hína upéva, ha mbaʼéichapa jahechavaʼerã upe tembiapo? Jaikuaa hag̃ua, ñahesaʼỹijo raẽta mbaʼépa ojapovaʼekue yma umi majordómo.

4, 5. ¿Mbaʼe mbaʼépa ojapovaʼekue yma umi majordómo? Eiporu umi ehémplo.

⁴ Pe majordómo haʼevaʼekue peteĩ tembiguái ijeroviapýva, upévare ipatrón onkargámi chupe oñatende hag̃ua hógare, térã inegósiore. Avei oreko ipoguýpe umi mbaʼerepy, pláta, ha ambue tembiguaikuéra. Pór ehémplo, Abrahán orekovaʼekue peteĩ majordómo hérava Eliezer, ha omoĩ ipoguýpe heta mbaʼe. Amalisia chupe voi omondókuri Mesopotámiape oheka hag̃ua itaʼýra Isaac rembirekorã (Gén. 13:2; 15:2; 24:2-4).

⁵ José, Abrahán visniéto, oservivaʼekue avei majordómoramo Potifar rógape (Gén. 39:1, 2). Ha tiémpo rire, haʼe voi orekovaʼekue peteĩ majordómo oñatendéva opa mbaʼére hógape. Peteĩ jey ojerure chupe oprepara hag̃ua peteĩ karu guasu diez iñermánope. Avei José ojevale hese oñomika hag̃ua ikópa de pláta Benjamín vosápe. Jahechaháicha, umi patrón ojeroviavaʼekue imajordómo rehe ha omeʼẽ chupekuéra tuicha rresponsavilida (Gén. 43:19-25; 44:1-12).

 6. ¿Mbaʼe tembiapópa ojapo umi ansiáno oservívo majordómoramo?

⁶ Heta tiémpo rire, apóstol Pablo heʼi umi ansiáno haʼeha “Ñandejára siérvo”, térã oserviha hikuái majordómoramo (Tito 1:7, NM). Oñemoĩ chupekuéra oñangareko hag̃ua “Ñandejára ovechakuérare” ha upévare omoakã umi kongregasión ha omoĩ ehémplo opa mbaʼépe (1 Ped. 5:1, 2, NM). Jaikuaaháicha, umi ansiáno ombaʼapo heta hendáicha Jehová organisasiónpe. Pór ehémplo, heta oĩ oservíva ikongregasiónpe voi. Umi superintendénte viahánte katu oipytyvõ heta kongregasiónpe. Ha umi oĩva Komite de Sukursálpe, oñatende entéro kongregasión oĩvare peteĩ tetãme. Péro opavavénte okumpli porã vaʼerã hembiapo. ¿Mbaʼérepa? Haʼekuéra “ojecháta Ñandejárandi upe ojapóvare” (Heb. 13:17, NM).

 7. ¿Mbaʼérepa jaʼe entéro kristiáno ikatuha oservi majordómoramo?

⁷ ¿Mbaʼépa ikatu jaʼe entéro umi ótro ermánore, oservi porãva avei Ñandejárape péro ndahaʼéiva ansiáno? Apóstol Pablo heʼi opavave kristiánore: “Ñandejára omeʼẽ káda únope peteĩ rregálo, ha oñemeʼẽ haguéicha peẽme, peiporupaitékena upéva peservi hag̃ua ótrope. Peẽ ningo tembiguái katupyry, perekóva pende kárgope Ñandejára mbaʼeporã ijojahaʼỹva, upéva haʼe ohechauka heta hendáicha” (1 Ped. 1:1; 4:10, NM). Jehová imbaʼeporã rupi, ñanembokatupyry enterovévape jaservi hag̃ua ñane ermanokuérape. Upéicharõ ikatu jaʼe entéro kristiáno jaserviha avei majordómoramo, ha Jehová ñanemombaʼe, ojerovia ñanderehe ha oipota jajapo porã pe tembiapo omeʼẽva ñandéve.

 8. ¿Mbaʼépa oñehaʼarõ ñandehegui jaservi rupi majordómoramo?

⁸ Ñapensávo pe rresponsavilida oñemeʼẽvare ñandéve jaservi hag̃ua majordómoramo, ñanemanduʼavaʼerã mbohapy mbaʼére. Primero: ñande Jehová mbaʼéma ha jajecháta hendive opa mbaʼe jajapóvare. Pablo ohaivaʼekue: “Peẽ Ñandejára mbaʼe, haʼe opaga hepy rupi penderehe”. Upéva Jehová ojapo Cristo ruguy rupive, oñeñohẽvaʼekue sakrifísioramo (1 Cor. 6:19, 20, NM). Ñande kristiáno ningo Ñandejára mbaʼéma, ha jajapovaʼerã haʼe ojeruréva, hiʼarive umíva ndaipohýiri (Rom. 14:8; 1 Juan 5:3). Ñandehegui oiko avei Cristo rembiguái. Umi majordómo yma guare orekovaʼekue liverta ojapo hag̃ua heta mbaʼe, péro ndahaʼéi ojapo hag̃ua chupekuéra ogustávante. Ñande avei ñakumplivaʼerã ñane rresponsavilida oñemandaháicha ñandéve. Tahaʼe haʼéva pe tembiapo jarekóva kongregasiónpe, ñande akóinte Ñandejára ha Cristo rembiguái.

 9. ¿Mbaʼéichapa Jesús ñanepytyvõ ñantende hag̃ua mbaʼépa ohaʼarõ peteĩ patrón hembiguáigui?

⁹ Peteĩ ehémplo rupive, Jesús ñanepytyvõ ñantende hag̃ua mbaʼépa ohaʼarõ peteĩ patrón hembiguáigui. Haʼe omombeʼu hemimboʼekuérape peteĩ esklávo ombaʼapo hague un día pytã ha upéi og̃uahẽ ohóvo ipatrón rógape. ¿Heʼípa raʼe chupe ipatrón: “Ejúntema eguapy mesápe”? Nahániri. Upéva rangue heʼi: “Ejapo chéve che senag̃ua, emoĩ ne delantál ha eñangareko cherehe asenamba peve. Upe rire ág̃a nde resenáta”. Upéi Jesús omyesakã mbaʼépa heʼise ko ehémplo: “Peẽ avei upéicha, ág̃a pejapopa vove umi tembiapo oñemeʼẽvaʼekue peẽme, pejevaʼerã: ‘Ore ningo tembiguái ndorovaléiva mbaʼeverã. Pe rojapovaʼekue rojapónte vaʼerã voi kuri’” (Luc. 17:7-10, NM).

10. ¿Mbaʼérepa jaʼekuaa Jehová ñandeguerohoryha ñañehaʼã haguére jaservi chupe?

¹⁰ Añetehápe, Jehová ñandeguerohory ñañehaʼã haguére jaservi porã chupe. La Biblia heʼi ñandéve: “Ñandejára ningo hekojoja hína ha ndahesaraimoʼãi umi mbaʼe pejapovaʼekuégui, mbaʼéichapa pehayhu héra” (Heb. 6:10, NM). Jehová ndojeruremoʼãi ñandehegui peteĩ mbaʼe ikatuʼỹva jajapo. Hiʼarive umi mbaʼe omandáva ndaipohýiri ha katuete ou porã ñandéve. Pe ehémplo rupive, Jesús ñanemboʼe peteĩ esklávo ndoikoiha ijupe g̃uarãnte, ni nomotenondeiha umi mbaʼe chupe ogustávante. Upéicha avei, ñande ñañemeʼẽrõ guare jaservi hag̃ua Ñandejárape, jadesidíma ñamotenondetaha hembipota opa mbaʼe ári ñande rekovépe.

11, 12. Jaservívo majordómoramo, ¿mbaʼépa tekotevẽ jahechauka, ha mbaʼépa ndajajapoivaʼerã?

¹¹ Segundo: enterove majordómo ñakumplivaʼerã Ñandejára ojeruréva. Añetehápe ningo Jehová organisasiónpe oĩ rresponsavilida noñemeʼẽiva entéro ermánope, upéicharõ jepe opavave okumplivaʼerã oñehaʼarõva kristianokuéragui. Pór ehémplo, enterove jaservíva Jehovápe jajoayhuvaʼerã. Jesús heʼivaʼekue umi hénte ohechakuaataha ñande haʼeha kristiáno tee jajoayhúramo (Juan 13:35). Péro ndahaʼéi ermanokuérapente jahayhúva, síno jahayhu avei umi ndoservírivape Jehovápe. Opavave kristiáno ohechaukavaʼerã peichagua mborayhu.

¹² Jehová oipota avei opavave kristiáno hekoporã. Iñeʼẽme jatopa heta mbaʼe haʼe ndoipotáiva jajapo, ha umíva ñamboykevaʼerã. Pablo ohaivaʼekue: “Umi hekovaíva, omombaʼeguasúva ñandejára guaʼúpe, oporomoakãratĩva, kuimbaʼe oikóva kuñáramo, kuimbaʼe oikóva kuimbaʼéndi, omondáva, itaryrýiva, ikaʼúva, otakýva hapicháre, ombotavýva hapichápe, ni peteĩva koʼãva ndoikemoʼãi Ñandejára Rréinope” (1 Cor. 6:9, 10, NM). Heta vése ijetuʼu jaiko hag̃ua Jehová ojerurehaichaite, péro ñañehaʼãramo, jahupytýta hetaiterei mbaʼe iporãva. Pór ehémplo, ikatúta jajogueraha porã ñande rapichakuérandi, ñaneresãivéta, ha javyʼáta jaikuaágui ñaime porãha Ñandejára ndive (elee Isaías 48:17, 18).

13, 14. ¿Mbaʼépa jajapovaʼerã enterove kristiáno, ha mbaʼéichapa jahechavaʼerã upe tembiapo?

¹³ Ñanemanduʼákena ñande jaserviha majordómoramo ha jarekoha peteĩ tembiapo jajapovaʼerã. Jehová oikuaauka ñandéve pe añetegua, ha upéva peteĩ mbaʼe ijojahaʼỹva. Haʼe oipota ñamombeʼu ñande rapichakuérape umi mbaʼe ñaaprendéva (Mat. 28:19, 20). Pablo heʼi: “Entéro kuimbaʼe ohechavaʼerã roserviha Crístope, ha ore haʼeha tembiguái roñangarekóva Ñandejára sekréto marangatúre” (1 Cor. 4:1, NM). Pe apóstol ohechauka pe majordómo tekotevẽha oñangareko porã “Ñandejára sekréto marangatúre”, ha avei omombeʼuvaʼerãha hekoitépe upe mensáhe, Cristo omandaháicha (1 Cor. 9:16).

¹⁴ Ñamboʼéramo ñande rapichakuérape pe añetegua, jahechaukañaína japorohayhuha. Añetehápe, káda kristiáno situasión idiferénte, upévare oĩ ermáno ikatúva oiporuve itiémpo Jehová servísiope ha oĩ avei ojapo saʼivéva. Jehová ontende enterovévape, péro ñanemanduʼavaʼerã iñimportanteha káda uno jajapo opa ikatúva. Péicha jahechaukáta jahayhuha Jehovápe ha ñande rapichakuérape.

15-17. a) ¿Mbaʼérepa pe majordómo ohechaukavaʼerã ikatuha ojejerovia hese? b) ¿Mbaʼe ehémplopa Jesús oiporu ohechauka hag̃ua mbaʼépa ojehu umi majordómo nokumplírivape hembiapo?

¹⁵ Tercero: jahechauka ikatuha ojejerovia ñanderehe ñakumplívo ñane rembiapo. Peteĩ majordómo ikatu ojapo porã heta mbaʼe ha ikatupyryeterei, péro umíva ndovalemoʼãi chupe nokumplipáiramo hembiapo térã naiñeʼẽrendúirõ ipatrónpe. Ojapo porã hag̃ua oñehaʼarõva chugui, tekotevẽ ohechauka ikatuha ojejerovia hese. Ñanemanduʼavaʼerã Pablo heʼivaʼekuére: “Jaikuaaháicha pe patrón oipota umi hembiguái ojapo hekópe hembiapo” (1 Cor. 4:2, NM).

¹⁶ Ñaneñeʼẽrendúramo, Jehová katuete omyengovia porãta ñandéve, péro nañakumplíriramo ñane rembiapo, nañasẽporãmoʼãi. Jesús omboʼevaʼekue upéva oñeʼẽrõ guare umi talénto rehe. Haʼe heʼi pe patrón oguerohory ha omeʼẽ hague jopói umi tembiguái ijeroviapy ha ‘omombaʼapovaʼekuépe’ ipláta. Péro pe nokumplírivape ohenói “tembiguái aña”, “ateʼỹ” ha “ndovaléiva mbaʼeverã”. Upéi katu oipeʼa chugui pe talénto ha omosẽ chupe (elee Mateo 25:14-18, 23, 26, 28-30).

¹⁷ Jesús oiporu ótro ehémplo ohechauka jey hag̃ua mbaʼépa ohupyty umi majordómo nokumplíriva hembiapo: “Oĩ peteĩ kuimbaʼe ipláta hetáva ha oguereko peteĩ tembiguái. Upéi oñemboja pe tembiguáire oiporu vaiha oikóvo umi mbaʼerepy. Upémarõ ohenói chupe ha heʼi: ‘¿Mbaʼe piko la ojeʼéva nderehe? Emoĩmba chéve kuatiáre mbaʼéichapa reiporúraʼe che pláta, koʼág̃a guive nderembaʼapomoʼãvéima chéve g̃uarã’” (Luc. 16:1, 2, NM). Pe majordómo oiporu vaipámarõ ipatrón pláta, oñemosẽ chupe pe ógagui. Upéva ñanemboʼe peteĩ mbaʼe iñimportantetereíva: ñakumpli porã vaʼerã umi tembiapo Jehová omandáva ñandéve.

18. ¿Mbaʼérepa naiporãi ñañembojoja ótrore?

¹⁸ Opavave jaservíva majordómoramo ñañeporanduvaʼerã: “¿Avyʼápa umi mbaʼe ajapóvare Jehová servísiope?”. Ñañembojojáramo ótrore ikatu ñaneprovléma. La Biblia heʼi: “Káda uno tojesareko umi mbaʼe ojapóvare, péicha ikatúta ovyʼa hembiapóre ha ndahaʼéi oñembojoja haguére ótrore” (Gál. 6:4, NM). Jaiko rangue ñañembojoja ambue ermánore, ikuentave jajesareko umi mbaʼe ñande ikatúvare jajapo. Upéva ñanepytyvõta ani hag̃ua ñañembotuicha, térã ñanekangy. Iporã jajepyʼamongeta umi mbaʼe jajapóvare, ha avei jahechakuaavaʼerã heta mbaʼe okambiaha. Pór ehémplo, ikatu jaju ñanderasy, ñandeedave jahávo, térã jareko ambue rresponsavilida ha ndaikatuvéi jajapo ymave guaréicha Jehová servísiope. Péro oiméramo jahechakuaa ikatuha jajapo hetave mbaʼe, ñañehaʼãmbaite vaʼerã ñambaʼapove Ñandejárape g̃uarã.

19. ¿Mbaʼérepa ndovaléi ñañeñandu vai ndajahupytýiramo peteĩ priviléhio?

¹⁹ Avei tekotevẽ jajepyʼamongeta umi rresponsavilida jarekóvare kongregasiónpe térã umi jahupytysévare. Pór ehémplo, ikatu peteĩ ermáno oñehaʼãmbaite oservi hag̃ua ansiánoramo, térã ojapose diskúrso umi aty guasúpe. Iporã ningo umichagua priviléhio, péro ndovaléi ñañeñandu vai noñemeʼẽiramo ñandéve ñahaʼarõ jave. Ikatu ndajaikuaapáinte hína mbaʼérepa ndajahupytýi gueteri umi priviléhio. Ñapensamína oikovaʼekue Moisés rehe. Haʼe ningo oimoʼãkuri ikatumaha oguenohẽ umi isrraelítape Egíptogui, péro upéi ohaʼarõ jey 40 áño upearã. Upe tiémpo ohaʼarõva oprepara chupe omoakã hag̃ua peteĩ puévlo hovaʼatãva ha naiñeʼẽrendúiva (Hech. 7:22-25, 30-34).

20. ¿Mbaʼépa ñanemboʼe Jonatán ehémplo?

²⁰ Ñapensavaʼerã avei oĩha priviléhio ndajahupytymoʼãiva voi. Upéva oiko Jonatán rehe. Haʼe ningo Saúl raʼy ha ogovernavaʼerã Israel itúva rendaguépe, péro Ñandejára oiporavo Davídpe, peteĩ kuimbaʼe imitãitevéva chugui. ¿Mbaʼéichapa oñeñandu Jonatán? Haʼe ndaipochýi, síno oipytyvõ Davídpe, ojeapeligráramo jepe. Heʼi chupe: “Nde ningo Israel retã ruvicharã, ha che aikóta nde rire mokõihápema” (1 Sam. 23:17, ÑÑB). Jonatán oasepta Jehová odesidíva ha ndaiselósoi itúva Saúl iselóso haguéicha. ¿Mbaʼépa ñanemboʼe Jonatán ehémplo? Jaiko rangue ñaenvidia peteĩ ermánope oñemeʼẽ haguére chupe priviléhio, jajesarekovaʼerã umi rresponsavilida jarekóvare ha ñañehaʼã ñakumpli porã. Jaikuaa pe múndo pyahúpe Jehová omeʼẽtaha entéro hembiguáipe opa mbaʼe porã oipotáva.

21. ¿Mbaʼéichapa jahechavaʼerã pe priviléhio oñemeʼẽva ñandéve jaservi hag̃ua majordómoramo?

²¹ Jahecháma haguéicha, jaservi majordómoramo ndeʼiséi ñambaʼapotaha peteĩ patrón ojopyetereíva ndive. Upéva rangue, Jehová ojerovia ñanderehe ha omeʼẽ ñandéve peteĩ tembiapo iporãitereíva arakaʼeve ndojejapomoʼãvéimava: japredikavaʼerã pe marandu porã koʼã ára pahápe. Hiʼarive jareko liverta jajapo hag̃ua ñane rembiapo heta hendáicha. Upéicharõ, jahechaukákena jaserviha majordómo ijeroviapývaicha ha ani ñanderesarái jaserviha Ñandejára Tuichaitévape.