‘Cristo mborayhu ñandeovliga’

1, 2. a) ¿Mbaʼéichapa ñañeñandu ñapensa jave umi mbaʼe Jesús heʼi ha ojapo vaʼekuére? b) ¿Mbaʼépa jahecháta ko artíkulope?

OMANO jave peteĩ jahayhúva, ñañeñandu vaieterei. Ñapensa jave umi mbaʼe ohasa vaʼekuére omano mboyve, ikatu hasyeterei ñandéve, koʼýte oimérire hetaiterei anga osufri omano mboyve. Péro kon el tiémpo ikatúma javyʼa jey ñanemanduʼa jave umi mbaʼe ojapo vaʼekuére, por ehémplo ñanemanduʼávo álgo ñanemboʼe vaʼekue, álgo heʼi ha ojapóva ñanemokyreʼỹ hag̃ua térã ñanembopuka hag̃ua.

² Péicha avei ñañembyasy jepi jalee jave umi mbaʼe Jesús ohasa vaʼekue omanórõ guare. Ha og̃uahẽvo ohóvo pe Konmemorasión, ñamboyke jepi tiémpo jajepyʼamongeta hag̃ua Jesús sakrifísio porãitére (1 Cor. 11:24, 25). Péro javyʼaiterei ñapensa jave umi mbaʼe Jesús heʼi ha ojapo vaʼekuére oĩrõ guare ko yvy ape ári. Avei ñanemombarete umi mbaʼe ojapóva koʼág̃a ha umi mbaʼe ojapótava amo gotyove. Jajepyʼamongetárõ entéro koʼã mbaʼe rehe ha mbaʼeichaitépa Jesús ñanderayhu, jaagradeséta chupe ha Jehovápe. Ko artíkulope jahecháta mbaʼéichapa ikatu jajapo upéva.

 3. ¿Mbaʼérepa ñamombaʼete Jesús sakrifísio?

³ Jajepyʼamongetáramo umi mbaʼe Jesús ojapo vaʼekuére ha mbaʼéichapa ontrega hekove ñanderehehápe, katuete jaagradesetereíta chupe. Haʼe opredika aja ko yvy ape ári, omboʼe umi héntepe heta mbaʼe porã ojapótava Ñandejára Rréino. Umi vendisión ningo iñimportanteterei ñandéve g̃uarã. ¡Ajépa ñamombaʼete Jesús sakrifísio! Péicha rupínte ikatu oiko ñandehegui Jehová ha Jesús amígo. Jajeroviáramo Jesús sakrifísiore ikatúta jaikove opa árare, avei ikatúta jahecha jey umi persóna jahayhúva omano vaʼekuépe (Juan 5:28, 29; Rom. 6:23). Ñande ningo ndajajapói mbaʼevete asy ñamerese hag̃ua koʼã mbaʼe porã, ha hiʼarive arakaʼeve ndaikatumoʼãi japaga Jehová ha Jesúspe entéro umi mbaʼe ojapo vaʼekuére ñanderehehápe (Rom. 5:8, 20, 21). ¿Mbaʼéichapa ikatu jahechauka jaagradesetereiha chupekuéra? Jahechamína.

 4. ¿Mbaʼépa ojapo María Magdalena ohechauka hag̃ua oagradeseha Jesúspe? (Ehecha pe taʼanga).

⁴ Ñapensamína peteĩ judía ehémplore, hérava María Magdalena. Haʼe ningo osufrieterei vaʼekue pórke 7 demónio oatormenta chupe. Péro Jesús olivera ko kuñáme umi demoniokuéragui. Katuete María Magdalena oagradesetereíne raʼe Jesúspe omonguera haguére chupe. ¿Mbaʼéichapa ohechauka ijagradesidaha? Haʼe oipuru itiémpo, imbaretekue ha imbaʼerepy oñangareko hag̃ua Jesúsre ha omoirũ hag̃ua chupe (Luc. 8:1-3). María omombaʼeterei la Jesús ojapóva hesehápe, péro oiméne ndoikuaáiti raʼe mbaʼeichaitépa ivalióso pe rregálo Jesús omeʼẽtava upe rire: haʼe ontregáta hekove ikatu hag̃uáicha “umi ohechaukáva ojeroviaha hese” oikove pára siémpre (Juan 3:16). María siémpre oapoja Jesúspe, péicha ohechauka oagradeseha chupe. Por ehémplo, Jesúspe ojeklavárõ guare pe yvyráre, María oĩ ijykére oapoja hag̃ua chupe ha avei umi ótro oĩvape upépe (Juan 19:25). Ha Jesús oĩrõ guare pe sepultúrape, haʼe ha mokõi kuña oraha aséite perfumádo omoĩ hag̃ua Jesús retekuére (Mar. 16:1, 2). Jehová tuicha ovendesi la María ojapo vaʼekue, haʼe ningo ohecha Jesúspe oñemoingove jey rire ha oñeʼẽ hendive. Ko oportunida ndorekói kuri heta disípulo (Juan 20:11-18).

 5. ¿Mbaʼéichapa ikatu jahechauka jaagradeseha Jehová ha Jesúspe?

⁵ ¿Mbaʼéichapa ikatu jahechauka jaagradeseha entéro umi mbaʼe Jehová ha Jesús ojapo vaʼekue ñanderehehápe? Jaipurúvo ñane tiémpo, ñane mbaretekue ha ñane mbaʼerepy jaapoja hag̃ua umi traváho ojejapóva Jehová organisasiónpe. Por ehémplo, ikatu jajeofrese ñambaʼapo hag̃ua konstruksiónpe térã jajapo hag̃ua mantenimiénto umi lugár ojepurúvape oñemombaʼeguasu hag̃ua Jehovápe.

 6. ¿Mbaʼérepa jaʼekuaa Jesús sakrifísio haʼeha peteĩ rregálo káda únope g̃uarã?

⁶ Ñapensa jave mbaʼeichaitépa Jehová ha Jesús ñanderayhu, ñande avei jahayhueterei chupekuéra (1 Juan 4:10, 19). Ha koʼýte jahayhuvéntema chupekuéra ñantendévo Jesús omano hague káda únore. Apóstol Pablo oagradeseterei vaʼekue ko rregálo, upévare oñeʼẽvo Jesús rehe oskrivi vaʼekue umi Galaciaguápe: “Haʼe ningo cherayhu ha omeʼẽ kuri hekove cherehehápe” (Gál. 2:20). Jesús sakrifísio rupive Jehová ndelehi nde haʼe hag̃ua iñamígo (Juan 6:44). Epensamíntena, Jehová ningo ohecha álgo iporãitereíva nderehe ha opaga pe présio ijyvatevéva oreko hag̃ua ne amista. ¿Akáso piko upéva nanemomýi rehayhuve hag̃ua Jehová ha Jesúspe? Iporãiterei ningo káda uno ñañeporandu: “¿Mbaʼépa aime dispuésto ajapo ahayhúgui chupekuéra?”.

 7. Jahechaháicha pe taʼangápe, ¿mbaʼéichapa enterovéva ikatu jahechauka jahayhuha Jehovápe ha Jesúspe? (2 Corintios 5:14, 15; 6:1, 2).

⁷ Ñande ningo jahayhu Ñandejárape ha Crístope, ha upéva ñanemomýi avei jahayhu hag̃ua ñande rapichakuérape (elee 2 Corintios 5:14, 15; 6:1, 2). ¿Mbaʼéichapa ikatu jahechauka jahayhuha ñande rapichakuérape? Por ehémplo japredikávo kyreʼỹme enterovépe, tahaʼe haʼéva ipire kolór, ikostúmbre, pe puésto orekóva, oimépa imboriahu térã ipláta heta. Péicha ñaipytyvõ hína Jehovápe, “haʼe ningo oipota opaichagua persóna ojesalva ha oikuaa porã pe añetegua” (1 Tim. 2:4).

 8. ¿Mbaʼéichapa ikatu jahechauka jahayhuha ñane ermanokuérape?

⁸ Jahayhúramo ñane ermanokuérape jahechaukáta avei jahayhuha Ñandejárape ha Crístope (1 Juan 4:21). Ñande ningo jajepyʼapy ñane ermáno ha ermanakuérare, káda únore voi, ha ñaipytyvõ chupekuéra ohasa asy jave. Omanóramo chuguikuéra peteĩ ohayhúva katu, ñakonsola chupekuéra. Avei javisita ñane ermanokuérape hasykatu jave, ha ñañehaʼãmbaite ñamokyreʼỹ umi oñedeprimívape (2 Cor. 1:3-7; 1 Tes. 5:11, 14). Ñañemboʼe avei ñane ermanokuérare, pórke jaikuaa porã “peteĩ kuimbaʼe ihústova oñemboʼéramo ipyʼaite guive, upe ñemboʼe oreko podér ha imbareteterei” (Sant. 5:16).

 9. ¿Mbaʼéichapa ikatu avei jahechauka jahayhuha ñane ermanokuérape?

⁹ Ñañehaʼãmbaitéramo jajogueraha porã ñane ermanokuérandi, jahechaukáta avei jahayhuha chupekuéra. Jajapo vaʼerã ikatúva guive ñaporoperdona hag̃ua Jehová ojapoháicha. Ñapensamíntena, Jehová ningo opermiti Itaʼýra omano ñande pekadokuérare, ¿naiporãmoʼãipa upéicharõ pyaʼe voi ñaperdonáma ñane ermanokuérape ofalláramo ñanendive? Ajépa ndajajoguaseiete pe esklávo iñañaitévape Jesús oñeʼẽ hague peteĩ ehémplope. Upe esklávope ningo ipatrón operdona kuri peteĩ kuénta tuichaitereíva, péro haʼe noperdonaséi ótro esklávope peteĩ kuénta michĩva (Mat. 18:23-35). Upévare, oiméramo nde rejoavyʼimi peteĩ ermánondi, ¿ikatúpa rejapo álgo reiko porã jey hag̃ua hendive Konmemorasión mboyve? (Mat. 5:23, 24). Ejapóramo upéva, ehechauka porãta ehayhuetereiha Jehovápe ha Jesúspe.

10, 11. ¿Mbaʼéichapa ansianokuéra ikatu ohechauka ohayhuha Jehovápe ha Jesúspe? (1 Pedro 5:1, 2).

¹⁰ ¿Mbaʼéichapa ansianokuéra ikatu ohechauka ohayhuha Jehovápe ha Jesúspe? Oñangarekóvo mborayhúpe Jesús ovechakuérare (elee 1 Pedro 5:1, 2). Jesús ohechauka porãiterei vaʼekue apóstol Pédrope iñimportanteha upéva. Ñanemanduʼa Pedro onega hague Jesúspe 3 vése, upévare haʼe ohechaukasetereíne raʼe ohayhuha Jesúspe. Orresusita rire, Jesús oporandu Pédrope: “Simón, Juan raʼy, ¿cherayhu piko?”. Katuete Pedro ojapose kuri oimeraẽ mbaʼe ohechauka hag̃ua ohayhuha chupe. Upémarõ Jesús orresponde Pédrope: “Eñangareko che ovecha mimíre peteĩ pastór ojapoháicha” (Juan 21:15-17). Upe guive Pedro oñangareko porãiterei Jesús ovechakuérare ha péicha ohechauka ohayhuha chupe.

¹¹ Ansianokuéra ohechauka vaʼerã iñimportanteha chupekuéra g̃uarã la Jesús heʼi vaʼekue Pédrope. ¿Mbaʼéichapa ikatu ojapo upéva Konmemorasión tiémpope? Umi ansiáno ohechauka ohayhuha Jehovápe ha Jesúspe omboyke memévo tiémpo omokyreʼỹ hag̃ua ermanokuérape ha oipytyvõ hag̃ua avei chupekuéra hetave hendáicha. Avei oñehaʼãmbaitévo oipytyvõ umi inaktívope oñemoag̃ui jey hag̃ua Jehováre (Ezeq. 34:11, 12). Umi ansiáno oñeinteresa avei umi estudiántere ha umi oho ramóvare Konmemorasionhápe, upévare ohecháma chupekuéra haʼeramoguáicha ñane ermáno ha ñane ermána, ha oipota oñeñandu porã hikuái.

12. ¿Mbaʼérepa ñanembopyʼaguasu umi mbaʼe Jesús heʼi vaʼekue pe pyhare omano mboyve? (Juan 16:32, 33).

¹² Jesús omano mboyve heʼi vaʼekue idisipulokuérape: “Ko múndope heta pehasa asýta hína, upéicharõ jepe ¡pendepyʼaguasúkena!, che aganáma ko múndope” (elee Juan 16:32, 33). ¿Mbaʼépa oipytyvõ Jesúspe iñeʼẽrendu hag̃ua omano meve ha ipyʼaguasu hag̃ua iñenemigokuéra oamenasáramo jepe chupe? Haʼe ojerovia Jehováre. Jesús oikuaa vaʼekue idisipulokuéra ohasataha avei peichagua situasiónre, upévare ojerure Itúape oñangareko hag̃ua hesekuéra (Juan 17:11). ¿Mbaʼérepa upéva ñanepytyvõ ñandepyʼaguasu hag̃ua? Pórke Jehová ipoderosove entéro ñane enemigokuéragui (1 Juan 4:4). Jehová ohechapaite la oikóva. Aníkena jaduda, jajeroviáramo Jehováre ñandepyʼaguasúta ha nañandejokomoʼãi umi mbaʼe ñanemongyhyjéva.

13. ¿Mbaʼéichapa José de Arimatea ohechauka ipyʼaguasu hague?

¹³ Ñapensamína José de Arimatéare, haʼe ningo ipuésto yvate vaʼekue umi judiokuéra apytépe ha ojerrespeta chupe. Oĩ vaʼekue pe Sanedrínpe, pe trivunál iñimportantevéva orekóva umi judío. Péro José de Arimatea ndaipyʼaguasuiete vaʼekue Jesús oĩ tiémpope. Juan heʼi hese: “José ningo Jesús disípulo vaʼekue, péro nomombeʼúi avavépe pórke okyhyje umi judíogui” (Juan 19:38). José oñeinteresáramo jepe Jesús omboʼévare ndoikuaaukái upéva avavépe. Oiméne okyhyje umi hénte ndorrespetavéiramo g̃uarã chupe. Tahaʼe haʼeháicha, la Biblia heʼi mbaʼépa oiko Jesús omano rire: “José Arimateagua oñembopyʼaguasu ha oho ojerure Pilátope Jesús retekue” (Mar. 15:42, 43). Upe guive José ndokyhyjevéima ohechauka hag̃ua ojeroviaha Jesúsre.

14. ¿Mbaʼépa jajapo vaʼerã ñandepyʼapýrõ la ótro heʼítava ñanderehe?

¹⁴ ¿Ndepyʼapýpa la ótro heʼítava nderehe? Reime jave eskuéla, koléhio térã nde travahohápe, ¿etĩpa emombeʼu hag̃ua nde haʼeha testígo de Jehová? ¿Neʼĩrapa rejevautisa térã oiko ndehegui puvlikadór no vautisádo? ¿Embotapykuépa upe desisión rekyhyjégui? Aníkena nemongyhyje la ojeʼétava nderehe, ani repermiti upéva ndejoko ejapo hag̃ua la iporãva. Ejerure jey jey Jehovápe tanepytyvõ ha tanembopyʼaguasu ejapo hag̃ua ivolunta. Ehechávo mbaʼéichapa Jehová orresponde ne ñemboʼe, nembaretevéta ha ndepyʼaguasuvéta (Is. 41:10, 13).

15. Jesús orresusita rire, ¿mbaʼépa ojapo umi disípulo ovyʼaitereígui? (Lucas 24:52, 53).

¹⁵ Jesús omanórõ guare, idisipulokuéra opyta yvýre. Reimérire upépe, ¿mbaʼéichapa nde reñeñandu vaʼerãmoʼã? Umi disípulo operde peteĩ amígo ohayhuetereíva, péro ndahaʼéi upévante, operde avei hikuái la esperánsa (Luc. 24:17-21). Péro upe rire Jesús ojaparese chupekuéra, ha oñemotiémpo oexplika hag̃ua idisipulokuérape haʼe okumpliha hína umi profesía oĩva la Bíbliape. Avei onkarga chupekuéra peteĩ tembiapo iñimportantetereíva (Luc. 24:26, 27, 45-48). Upéi, 40 día rire, Jesús ojupi yvágape, upérõ g̃uarã idisipulokuéra noñembyasyvéima, síno ovyʼaiterei. Ovyʼa hikuái oikuaávo Jesús oikove jeymaha ha oipytyvõtaha chupekuéra okumpli hag̃ua pe asignasión pyahu. Ovyʼaitereígui hikuái, omombaʼeguasu Jehovápe kaneʼõʼỹre (elee Lucas 24:52, 53; Hech. 5:42).

16. ¿Mbaʼéichapa ñande ikatu jasegi Jesús disipulokuéra ehémplo?

¹⁶ ¿Mbaʼéichapa ñande ikatu jasegi Jesús disipulokuéra ehémplo? Vyʼápe jaservi vaʼerã Jehovápe káda día, ndahaʼéi pe Konmemorasión tiémpopente. Upearã ñamotenonde vaʼerã Ñandejára Rréino. Por ehémplo, oĩ okambiáva pe óra ombaʼapoha ikatu hag̃uáicha itiempove opredika hag̃ua, oho hag̃ua rreunionhápe ha ojapo hag̃ua pe estúdio de família káda semána. Algúno katu odesidi omboyke umi komodida hetápe g̃uarã iñimportantetereíva. Péicha ikatu oipytyvõ porãve kongregasiónpe térã oho opredika ótro hendápe oĩháme saʼi Testígo. Sapyʼánte tekotevẽ jajesakrifika jasegi hag̃ua jaservi Jehovápe, péro haʼe opromete tuichaiterei ñanevendesitaha ñamotenondéramo Irréino (Prov. 10:22; Mat. 6:32, 33).

17. ¿Mbaʼépa jajapo vaʼerã pe Konmemorasión tiémpope? (Ehecha pe taʼanga).

¹⁷ Jaipotaitereíma ningo og̃uahẽ pe martes 4 de abril jagueromanduʼa hag̃ua Jesús omano hague ára. Péro natekotevẽi katuete ñahaʼarõ upe diaiténte jajepyʼamongeta hag̃ua umi mbaʼe Jesús ojapo vaʼekuére, isakrifísiore ha mbaʼeichaitépa haʼe ha Jehová ñanderayhu. Jaaprovechákena jajepyʼamongeta hag̃ua koʼã mbaʼére pe Konmemorasión tiémpope. Por ehémplo ikatu ñañemotiémpo jastudia porã hag̃ua umi mbaʼe Jesús ohasa vaʼekue. Umi rreláto jatopáta Ñandejára Ñeʼẽ La Biblia Traducción del Nuevo Múndope, pe párte hérava Informasión B12, “Pe semána Jesús omano mboyve”. Ehekákena umi rreláto nepytyvõtava ikatu hag̃uáicha ndeagradesidove, reporohayhuve, ndepyʼaguasuve ha revyʼave. Ha epensa mbaʼéichapa ikatu ehechauka ndeagradesidoha nde pyʼaite guive. Aníkena ni michĩmi reduda Jesús omombaʼetereitaha entéro mbaʼe rejapóva nemanduʼa hag̃ua hese pe Konmemorasión tiémpope (Apoc. 2:19).