Jehová ohechauka mborayhu ha hustísia kongregasiónpe (Segundo artíkulo umi 4 osẽtavagui)

 1. ¿Mbaʼe mbaʼe rehepa ikatu ñaime segúro?

JEHOVÁ ningo ymaite guive ohayhu isiervokuérape, ha siémpre ojapóta upéva. Haʼe oipotaiterei avei oĩ hustísia (Sal. 33:5). Upévare ñaime segúro koʼã mokõi mbaʼére: 1) Jehová ombyasyeterei ohecha jave isiervokuéra ohasaha algúna inhustísia. 2) Haʼe katuete ojapóta hustísia hesehapekuéra, ha okastigáta umi mbaʼe vai apohápe. Pe primer artíkulo osẽ vaʼekuépeb jahecha kuri pe mborayhu omopyendaha pe léi Jehová omeʼẽ vaʼekue Israélpe Moisés rupive. Upe léi omokyreʼỹ vaʼekue umi héntepe ihústo hag̃ua, ha koʼýte umi ndaikatúivandi oñedefende haʼeño (Deut. 10:18). Upe léi ohechauka vaʼekue Jehová oñeinteresaha ipyʼaite guive isiervokuérare.

 2. ¿Mbaʼe porandúpa ñambohováita ko artíkulope?

² Pe kongregasión kristiána oñepyrũrõ guare áño 33-pe d.C., natekotevẽvéima kuri oñekumpli pe Léi Mosáika. ¿Heʼise piko upéva umi kristiáno ndorekomoʼãveitamaha peteĩ léi oñemopyendáva mborayhúpe ha omokyreʼỹva chupekuéra ihústo hag̃ua? ¡Ni mbaʼevéicharõ! Umi kristianokuéra oreko kuri peteĩ léi pyahu. Ko artíkulope jahecháta mbaʼépa hína pe léi pyahu, ha ñambohováita koʼã porandu: ¿Mbaʼérepa ikatu jaʼe pe mborayhu omopyendaha ko léi? ¿Mbaʼérepa ikatu jaʼe oipytyvõha oĩ hag̃ua hustísia? ¿Mbaʼéichapa umi oporomoakãva oĩva ko léi poguýpe otrata vaʼerã ótrope?

 3. ¿Mbaʼépa hína “Cristo Léi” oñeñeʼẽha Gálatas 6:2-pe?

³ (Elee Gálatas 6:2). Umi kristiáno ningo okumpli vaʼerã “Cristo Léi”. Péro Jesús ndoskrivíri vaʼekue umi léi okumpli vaʼerã idisipulokuéra, upéva rangue omeʼẽ chupekuéra heta instruksión, mandamiénto ha konsého ogia hag̃ua chupekuéra. “Cristo Léi” hína entéro mbaʼe Jesús omboʼe vaʼekue. Umi párrafo oúvape ñaaprendevéta heta mbaʼe ko léigui.

4, 5. a) ¿Mbaʼéichapa Jesús oporomboʼe vaʼekue? b) ¿Arakaʼépa oporomboʼe vaʼekue?

⁴ ¿Mbaʼéichapa Jesús oporomboʼe vaʼekue? Primero, umi mbaʼe heʼíva rupive. Umi mbaʼe heʼi vaʼekue ningo oreko podér pórke oikuaauka chupekuéra mbaʼeichagua persónapa Ñandejára, omyesakã maʼerãpa jaikove ha ohechauka Ñandejára Rréino añoite osolusionataha entéro provléma orekóva yvyporakuéra (Luc. 24:19). Jesús oporomboʼe vaʼekue avei iñehémplo rupive. Hekovére haʼe ohechauka vaʼekue idisipulokuérape mbaʼéichapa oiko vaʼerã (Juan 13:15).

⁵ ¿Arakaʼépa Jesús oporomboʼe vaʼekue? Haʼe ojapo vaʼekue upéva oĩ aja ko yvy ape ári (Mat. 4:23). Orresusita riremi, Jesús omboʼe vaʼekue avei heta mbaʼe idisipulokuérape. Por ehémplo, ojaparese unos kuánto idisípulope, oiméne oĩ hikuái mas de 500, ha omanda chupekuéra omboʼe hag̃ua umi héntepe oiko hag̃ua chuguikuéra idisípulo (Mat. 28:19, 20; 1 Cor. 15:6). Jesús ningo omoakã pe kongregasión, ha upévare oho rire yvágape osegi omboʼe idisipulokuérape. Por ehémplo, áño 96 rupi d.C., Jesús ojevale apóstol Juan rehe omokyreʼỹ ha oakonseha hag̃ua umi kristiáno unhídope (Col. 1:18; Apoc. 1:1).

6, 7. a) ¿Moõpa ikatu jatopa umi mbaʼe Jesús omboʼe vaʼekue? b) ¿Mbaʼépa jajapo vaʼerã ñakumpli hag̃ua Cristo Léi?

⁶ ¿Moõpa ikatu jatopa umi mbaʼe Jesús omboʼe vaʼekue? Umi lívro de Mateo, Marcos, Lucas ha Juánpe oñemombeʼu heta mbaʼe haʼe heʼi ha ojapo vaʼekue ko yvy ape ári. Umi ótro lívro oĩva umi Escrituras Griégaspe ñanepytyvõ avei jaikuaa hag̃ua mbaʼéichapa Jesús opensa. ¿Mbaʼérepa jaʼe upéva? Pórke koʼã lívro ojeskrivi vaʼekue espíritu sánto rupive ha umi eskritór opensa vaʼekue “Cristo opensaháicha” (1 Cor. 2:16).

⁷ Mbaʼépa ñanemboʼe: Umi mbaʼe Jesús omboʼe vaʼekue ñanepytyvõ opaite mbaʼépe ñande rekovépe. Por ehémplo ñanepytyvõ ñande rogapýpe, ñande travahohápe, eskuéla térã koléhiope ha kongregasiónpe. Jaikuaa porã hag̃ua ko léi jalee vaʼerã umi Escrituras Griegas ha jajepyʼamongeta umívare. Ha ñakumpli hag̃ua ko léi jasegi vaʼerã umi instruksión, mandamiénto ha konsého jatopáva umi Escrituras Griégaspe. Ñakumpli jave Cristo Léi añetehápe ñaneñeʼẽrendu hína Ñandejára Jehová ñanderayhuetévape, pórke chugui ou hína entéro mbaʼe Jesús omboʼe vaʼekue (Juan 8:28).

 8. ¿Mbaʼépepa oñemopyenda Cristo Léi?

⁸ Umi oikóva peteĩ óga isimiénto porãvape ha ojejapo porã vaʼekuépe, katuete oñeñandúta segúro. Upéicha avei oñeñandu segúro umi okumplíva peteĩ léi oñemopyenda porãva. Cristo Léi ningo oreko pe simiénto iporãvéva, pórke oñemopyenda mborayhúpe. ¿Mbaʼérepa ikatu jaʼe upéva?

9, 10. a) ¿Mbaʼérepa ikatu jaʼe Jesús ojapo hague entéro mbaʼe oporohayhúgui? b) ¿Mbaʼéichapa ikatu jasegi Jesús ehémplo?

⁹ Primero, Jesús ojapo vaʼekue entéro mbaʼe oporohayhúgui. Jesús oporohayhu rupi oiporiahuvereko vaʼekue umi héntepe, upévare oporomboʼe, omonguera umi hasývape, omongaru umi iñembyahýivape ha omopuʼã jey umi omano vaʼekuépe (Mat. 14:14; 15:32-38; Mar. 6:34; Luc. 7:11-15). Jesús oipuru vaʼekue heta tiémpo ojapo hag̃ua koʼã mbaʼe, ha upévare katuete ikaneʼõne raʼe. Upéicharõ jepe, haʼe vyʼápe omotenonde hapichakuéra oikotevẽva, haʼe oñemotenonde rangue. Ha opa mbaʼe ári, haʼe omeʼẽ vaʼekue hekove ñanderehehápe, ha upéicha ohechauka ñanderayhuetereiha (Juan 15:13).

¹⁰ Mbaʼépa ñanemboʼe: ¿Mbaʼéichapa ikatu jasegi Jesús ehémplo? Ikatu jajapo upéva siémpre ñamotenondévo umi mbaʼe ñande rapichakuéra oikotevẽva, ñande ñañemotenonde rangue, avei jahechaukávo jaiporiahuverekoha umi hénte oĩvape ñande territóriope. Japredika ha ñamboʼe jave umi notísia porã jaiporiahuverekógui umi héntepe, ñakumpli hína Cristo Léi.

11, 12. a) ¿Mbaʼépa ohechauka Jehová oñeinteresaha ipyʼaite guive ñanderehe? b) ¿Mbaʼéichapa ikatu jahechauka japorohayhuha Jehová ojapoháicha?

¹¹ Segundo, Jesús ohechauka vaʼekue mbaʼéichapa Jehová oporohayhu. Oĩ aja ko yvy ape ári, Jesús ohechauka vaʼekue mbaʼeichaitépa Jehová oñeinteresa umi oadorávare chupe. Por ehémplo, omboʼe vaʼekue javaletereiha ñande Túa Jehovápe g̃uarã (Mat. 10:31). Omboʼe avei Jehová oipotaitereiha umi ijovecha mimi okañy vaʼekue oñarrepenti ha ou jey kongregasiónpe (Luc. 15:7, 10). Ha heʼi avei Jehová ohechauka hague ñanderayhuetereiha omeʼẽvo Itaʼýrape omano hag̃ua ñanderehehápe (Juan 3:16).

¹² Mbaʼépa ñanemboʼe: ¿Mbaʼéichapa ikatu jahechauka japorohayhuha Jehová ojapoháicha? (Efes. 5:1, 2). Ñande jajapo upéva ñamombaʼe ha javalorávo ñane ermáno ha ermanakuérape. Avei vyʼápe jarresivi jave peteĩ ‘ovecha okañy vaʼekuépe’ ha ou jeýva Jehová rendápe (Sal. 119:176). Jahechauka avei jahayhuha ñane ermanokuérape ñañemotiémpo ha ñañehaʼãmbaite jave ñaipytyvõ hag̃ua chupekuéra, ha koʼýte oikotevẽ jave hikuái (1 Juan 3:17). Jatrata jave ótrope mborayhúpe, ñakumpli hína Cristo Léi.

13, 14. a) ¿Mbaʼe mandamiéntopa Jesús omeʼẽ vaʼekue Juan 13:34, 35-pe, ha mbaʼérepa ikatu jaʼe ko mandamiénto ipyahuha? b) ¿Mbaʼéichapa ñakumpli ko mandamiénto pyahu?

¹³ Tercero, Jesús omanda vaʼekue idisipulokuérape ojoayhu hag̃ua haʼe oporohayhu haguéicha (elee Juan 13:34, 35). ¿Mbaʼérepa ipyahu rakaʼe ko mandamiénto? Pe Léi Mosáika ningo heʼíma vaʼekue jahayhu vaʼerãha ñande rapichápe, péro Jesús mandamiénto ojerure kuri álgo mas: jahayhu hag̃ua ñane ermanokuérape Jesús ñanderayhu haguéicha.c Ñande ningo ndahaʼéi jahayhúnteva ñane ermanokuérape ñande jajehayhuháicha, síno jahayhuve voi chupekuéra, ha upéicha rupi tekotevẽramo ñameʼẽta ñande rekove jepe hesehapekuéra, Jesús ojapo haguéicha.

¹⁴ Mbaʼépa ñanemboʼe: ¿Mbaʼéichapa ikatu ñakumpli ko mandamiénto pyahu? Jajapóvo sakrifísio ñane ermanokuéra rehehápe. Ñande ningo ñaime jajapo hag̃uáicha umi sakrifísio tuicháva, por ehémplo ñameʼẽ ñande rekove hesehapekuéra. Péro avei jajapo umi sakrifísio michĩva, por ehémplo ikatu jajesakrifikaʼimi ha jaha peteĩ ermáno térã ermána ijedáva piári jaraha hag̃ua chupe rreunionhápe. Avei vyʼápe ñamboyke umi mbaʼe ñandéve ñandegustáva ñambovyʼa hag̃ua ñane ermanokuérape, térã jaipuru ñane vakasión jaha hag̃ua ñaipytyvõ oiko jave peteĩ desástre naturál. Péicha jave ñakumpli hína Cristo Léi, ha ñaipytyvõ umi oĩvape ñane kongregasiónpe oñeñandu hag̃ua segúro porã ha oñandu hag̃ua ojekuidaha hesekuéra.

15-17. a) ¿Mbaʼéichapa umi mbaʼe Jesús ojapóva ohechauka ihustoha? b) ¿Mbaʼéichapa ikatu jasegi Jesús ehémplo?

¹⁵ La Bíbliape ojepuru jave pe palávra “hustísia” heʼise jepi ojejapoha umi mbaʼe Ñandejára heʼíva oĩ porãha, ha ndajafavoreseiha avavépe jajapo jave upéva. ¿Mbaʼérepa ikatu jaʼe Cristo Léi ñanemokyreʼỹha ñandehústo hag̃ua?

¹⁶ Primero, epensamína mbaʼéichapa umi mbaʼe Jesús ojapóva ohechauka vaʼekue haʼe ihustoha. Jesús tiémpope, umi omoakãva rrelihión judía ndochaʼéi vaʼekue umi ndahaʼéivare judío, oapoʼi umi ótro judío noñehekomboʼéi vaʼekuépe umi eskuéla judíape, ha ndorrespetaiete voi umi kuñáme. Péro Jesús idiferénte vaʼekue, haʼe ihústo ha nomboykéi avavépe. Haʼe oheja umi ndahaʼéivape judío oiko chugui isegidór (Mat. 8:5-10, 13). Haʼe opredika jave nomboykéi ni peteĩ persónape, tahaʼe imboriahúva térã iplátavape (Mat. 11:5; Luc. 19:2, 9). Jesús núnka ndotratavaíri umi kuñanguérape ni naiñeʼẽpohýiri chupekuéra. Upéva rangue imbaʼeporã ha orrespeta chupekuéra, umi ojeapoʼívape jepe (Luc. 7:37-39, 44-50).

¹⁷ Mbaʼépa ñanemboʼe: Ñande jasegi Jesús ehémplo nañamboykéi jave avavépe ha japredika entéro ohendusévape, tahaʼe haʼéva irrelihión, iplátava térã imboriahúvape. Umi ermáno osegi avei Jesús ehémplo otrata porã ha orrespetávo kuñanguérape. Jajapo jave koʼã mbaʼe, ñakumpli hína Cristo Léi.

18, 19. ¿Mbaʼépa Jesús omboʼe vaʼekue pe hustísiare, ha mbaʼépa ñaaprende upévagui?

¹⁸ Segundo, epensamína mbaʼépa Jesús omboʼe vaʼekue pe hustísiare. Haʼe omeʼẽ vaʼekue heta konsého oipytyvõtava idisipulokuérape otrata porã hag̃ua ótrope ha ihústo hag̃ua. Por ehémplo, haʼe omboʼe vaʼekue pe Rrégla de Óro (Mat. 7:12). Ñande ningo jaipota enterove ñandetrata porã ha ihústo ñanendive, upévare ñande jatrata vaʼerã avei chupekuéra upéicha. Ha upéva ikatu hína omomýi chupekuéra ihústo hag̃ua ñanendive. ¿Péro mbaʼépa oikóta ojejapóramo ñanderehe algúna inhustísia? Jesús omboʼe vaʼekue avei idisipulokuérape ojerovia hag̃ua Jehová katuete oipytyvõtaha isiervokuéra ‘ojerure asývape chupe ára ha pyhare ojapo hag̃ua hustísia’ (Luc. 18:6, 7). Upéva ohechauka Ñandejára oikuaa porãha umi mbaʼe ijetuʼúva jahasáva koʼã ára pahápe, ha opromete itiempoitépe ojapotaha hustísia ñanderehehápe (2 Tes. 1:6).

¹⁹ Mbaʼépa ñanemboʼe: Jasegíramo umi konsého Jesús omeʼẽ vaʼekue, jatrata porãta ñande rapichakuérape ha ñandehústota hendivekuéra. Ha oimérire jahasa raʼe algúna inhustísia ko múndo añáme, tuicha ñanembopyʼaguapy jaikuaávo Jehová katuete ojapotaha hustísia ñanderehehápe.

20, 21. a) ¿Mbaʼéichapa otrata vaʼerã ótrope umi oporomoakãva oĩva Cristo Léi poguýpe? b) ¿Mbaʼéichapa pe ména ohechauka ohayhuha hembirekópe Cristo oporohayhu haguéicha? c) ¿Mbaʼéichapa pe túa otrata vaʼerã ifamíliape?

²⁰ ¿Mbaʼéichapa otrata vaʼerã ótrope umi oporomoakãva oĩva Cristo Léi poguýpe? Ko léi ningo oñemopyenda mborayhúpe, upéicha rupi umi oporomoakãva ohayhu ha orrespeta vaʼerã hapichakuérape. Haʼekuéra imanduʼa vaʼerã Cristo oipotaha jahechauka entéro mbaʼe jajapóvape jahayhuha ñande rapichakuérape.

²¹ Ogapýpe: Menakuéra ohayhu vaʼerã hembirekópe “Cristo ohayhu haguéicha pe kongregasión” (Efes. 5:25, 28, 29). Osegi hag̃ua Jesús ehémplo, menakuéra omotenonde vaʼerã umi mbaʼe hembireko oikotevẽva térã ovenefisiátava chupe, haʼe oñemotenonde rangue. Algúnope g̃uarã ikatu ijetuʼu hína otrata péicha hembirekópe, pórke okakuaa vaʼekue peteĩ família ndojotrataporãihápe hikuái ha ndohechaukái ojupe ojoayhuha. Ha ijetuʼúramo jepe chupekuéra okambia hag̃ua, ohejámante vaʼerã upe kostúmbre vai ikatu hag̃uáicha okumpli Cristo Léi. Peteĩ ména ohayhúramo hembirekópe Cristo oporohayhu haguéicha, katuete ifásilta hembirekópe orrespeta chupe. Peteĩ túa ohayhúva ifamiliakuérape núnka nomaltratamoʼãi chupekuéra, tahaʼe heʼíva térã ojapóva rupive (Efes. 4:31). Upéva rangue, haʼe heʼi ha ohechauka omombaʼeha ha ohayhuha chupekuéra, péicha ifamiliakuéra oñandu ojeprotehe ha oñeñangarekoha hesekuéra. Upéicha ojapóramo, ifamiliakuéra katuete ohayhúta chupe ha ojeroviáta hese.

22. Heʼiháicha 1 Pedro 5:1-3, ¿máva mbaʼépa hína umi ovecha, ha mbaʼéichapa ojetrata vaʼerã chupekuéra?

²² Kongregasiónpe: Ansianokuéra imanduʼa vaʼerã umi ovechakuéra ndahaʼeiha imbaʼe (Juan 10:16; elee 1 Pedro 5:1-3). Umi fráse “Ñandejára ovechakuéra” ha “haʼekuéra Ñandejára mbaʼe hína” omomanduʼa umi ansiánope umi ovecha Jehová mbaʼeha. Haʼe ningo oipota ojetrata ijovechakuérape mborayhúpe (1 Tes. 2:7, 8). Jehová omombaʼeterei umi ansiáno okumplívape umi rresponsavilida orekóva ha mborayhúpe oñangarekóva umi ovechakuérare. Ha katuete ningo umi ermáno ha ermána ohayhu ha orrespetáta chupekuéra.

23, 24. a) ¿Mbaʼépa ojapo vaʼerã ansianokuéra oĩ jave peteĩ opeka vaietereíva? b) ¿Mbaʼépa oñeporandu vaʼerã umi ansiáno oanalisa jave koʼã káso?

²³ ¿Mbaʼépa ojapo vaʼerã ansianokuéra oĩ jave peteĩ opeka vaietereíva? Umi mbaʼe haʼekuéra ojapóva ningo idiferénte umi ansiáno ha hués ojapo vaʼekuégui ymave Israélpe. Pe Léi Mosáika poguýpe, umi omoakãva oñenkarga vaʼekue oĩ jave ojapóva peteĩ mbaʼe oafektáva pe adorasión omeʼẽva Jehovápe. Avei oñatende vaʼerã oĩ jave iprovlémava hapichándi ha oĩramo oporovioláva ha oporojukáva. Péro Cristo Léi poguýpe, umi ansiáno sólamente oñenkarga oĩ jave peteĩ opekáva ha upe ojapóva oafektáramo pe adorasión omeʼẽva Jehovápe. Ha ohechakuaa avei Ñandejára omeʼẽ hague umi autoridápe pe rresponsavilida oñenkarga hag̃ua oĩ jave iprovlémava hapichándi térã oporojukáva. Upévare umi autorida oreko derécho oporokastigávo, tahaʼe omulta térã omondóvo kárselpe umi mbaʼe vai apohápe (Rom. 13:1-4).

²⁴ ¿Mbaʼépa ojapo vaʼerã ansianokuéra oĩ jave peteĩ opeka vaietereíva kongregasiónpe? Haʼekuéra oipuru la Biblia oanalisa hag̃ua pe káso ha ohecha hag̃ua mbaʼépa odesidíta. Haʼekuéra siémpre imanduʼa Cristo Léi oñemopyendaha mborayhúpe. Upévare oporohayhúgui, umi ansianokuéra ohecháta ko mbaʼe: “Oimérire pe mbaʼe vai apoha operhudika raʼe algúnope kongregasiónpe, ¿mbaʼépa ikatu ojejapo oñepytyvõ hag̃ua chupekuéra?”. Umi ansiáno oñeporandúta avei: “¿Oñarrepentípa pe mbaʼe vai apoha? ¿Ikatúpa roipytyvõ chupe oĩ porã jey hag̃ua Jehová renondépe?”.

25. ¿Mbaʼépa jahecháta pe ótro artíkulope?

²⁵ ¡Ajépa ñamombaʼete ñaime haguére Cristo Léi poguýpe! Enterove ñañehaʼãmbaitéramo ñakumpli ko léi, ñaipytyvõ hína enterovéva ñane kongregasiónpe oñandu hag̃ua ojehayhu, ojevalora ha oñeñangarekoha hese. Péro jaiko peteĩ múndo oĩháme “umi kuimbaʼe aña”, ha koʼãva amás día “oho vai vaive” hína (2 Tim. 3:13). Upéicha rupi jasegi vaʼerã ñañatende porã. ¿Mbaʼéichapa kongregasiónpe ojehechauka Ñandejára hustísia oĩ jave oavusáva térã ovioláva peteĩ mitãme? Pe ótro artíkulope ñambohováita ko porandu.