‘Jaguatákena Jesús pyporére’

1, 2. ¿Mbaʼe ehémplopa ñanepytyvõ ñantende hag̃ua 1 Pedro 2:21 heʼíva?

ÑAPENSAMÍNA jaguataha jahávo éntre heta peteĩ desiérto ipeligrosoitereívare ha yvykuʼi memetehápe. Peteĩ kuimbaʼe ivakeánova opuntea hína ñanderehe ha ñandegia. Ha oguatávo ohóvo, hapykuerépe opyta umi ipypore pe yvykuʼípe. Upeichaháguinte ndajahechavéi sapyʼa pe gíape. Péro ñande ndajajedesesperái, pórke ñande ha umi ñande sosiokuéra jasegi porãnte jahávo pe gía pypore.

² Ko múndo aña ñande jaikohápe koʼág̃a, ojogua hína peteĩ desiérto ipeligrosoitereívape. Ha ñande kristianokuéra tee jajogua umi oguatávape ohóvo éntre heta. Jaagradeseterei ningo Jehovápe omeʼẽ haguére ñandéve peteĩ gía perfékto ha ivaletereíva, Itaʼýra Jesucristo, ha ipypore hína la ñande jasegi porãséva (1 Ped. 2:21). Peteĩ ensiklopédia bíblica heʼi koʼápe Pedro okomparaha Jesúspe peteĩ gíare, pórke ojapoháicha peteĩ gía, Jesús oheja vaʼekue ipypore ikatu hag̃uáicha ñande jasegi chupe. Upévare, ñambohovaimína koʼág̃a mbohapy porandu: ¿Mbaʼépa heʼise jasegi Jesús pypore? ¿Mbaʼérepa jajapo vaʼerã upéva? ¿Ha mbaʼéichapa ikatu jasegi ipypore?

 3. ¿Mbaʼépa heʼise jasegi peteĩ persóna pypore?

³ ¿Mbaʼépa heʼise jasegi peteĩ persóna pypore? La Bíbliape ojepuru jave pe palávra “oguata” heʼise jepi umi mbaʼe ojapóva peteĩ persóna hekovépe (Gén. 6:9, nóta; Prov. 4:26). Upéicharõ jaguata peteĩ persóna pyporére heʼise hína jasegiha iñehémplo.

 4. ¿Mbaʼépa heʼise jaguata Jesús pyporére?

⁴ Upéicharõ, ¿mbaʼépa heʼise jaguata Jesús pyporére? Upéva heʼise jasegiha iñehémplo. Pe téxto omopyendávape ko artíkulo Pedro oñeʼẽ hína pe ehémplo porãite Jesús oheja vaʼekuére, pórke oaguanta vaʼekue heta mbaʼe ijetuʼúva. Péro ñande ikatu avei jasegi Jesús ehémplo hetave hendáicha (1 Ped. 2:18-25). Añetehápe, Jesús rekove kompletoite, entéro mbaʼe haʼe heʼi ha ojapo vaʼekue, haʼe peteĩ ehémplo ñandéve g̃uarã.

 5. ¿Ikatu piko ñande yvypóra imperfékto jasegi porã Jesús ehémplo? Emyesakã.

⁵ ¿Péro ikatu piko jasegi porã Jesús ehémplo ñaneimperféktoramo jepe? Si ikatu. Jaikuaa ningo ndaikatumoʼãiha jasegi Jesús ehémplo perféktamente. Péro jajapóramo opa ikatúva jasegi porã hag̃ua hapykuere, ñakumplíta hína apóstol Juan heʼi vaʼekue: ‘Jasegíta jaiko Jesús oiko haguéicha’ (1 Juan 2:6).

6, 7. ¿Mbaʼérepa ikatu jaʼe jasegíramo Jesús pypore ñañemoag̃uivetaha Jehováre?

⁶ Jasegíramo Jesús pypore ñañemoag̃uivéta Jehováre. ¿Mbaʼérepa jaʼekuaa upéva? Primero, pórke Jesús oheja vaʼekue ñandéve peteĩ ehémplo ijojahaʼỹva oiko rupi Ñandejára oguerohoryháicha (Juan 8:29). Upéicharõ, jasegíramo Jesús pypore Jehová ñandeguerohorýta avei. Ha ikatu ñaime segúro ñande Ru yvagapegua oñemoag̃uitaha umi oñehaʼãmbaitévare oiko iñamígoramo (Sant. 4:8).

⁷ Segundo, Jesús osegi porãiterei vaʼekue Itúa ehémplo. Upévare haʼe ikatu vaʼekue heʼi: “Upe chéve cherecháva ohecháma avei pe Túape” (Juan 14:9). Ñande ikatu jatrata umi héntepe Jesús ojapo haguéicha, ha jahechauka umi kualida haʼe ohechauka vaʼekue. Por ehémplo, haʼe ningo oiporiahuvereko vaʼekue peteĩ leprósope, oñemoĩ peteĩ kuñakarai hasykatuetéva lugárpe, ha ombyasyeterei vaʼekue umi ihénte manóvape. Jasegi jave Jesús ehémplo, jasegi hína avei Jehová ehémplo (Mar. 1:40, 41; 5:25-34; Juan 11:33-35). Amáske jajoguave Jehovápe, ñañemoag̃uivéta hese.

 8. ¿Mbaʼéichapa ñanepytyvõta ‘ñagana hag̃ua ko múndope’ jasegíramo Jesús ehémplo? Emyesakã.

⁸ Jasegíramo Jesús pypore ko múndo aña ndaikatumoʼãi ñandedesvia Jehová servísiogui. Pe pyhare omano mboyve, Jesús ikatu vaʼekue heʼi: “Che aganáma ko múndope” (Juan 16:33). Haʼe heʼise vaʼekue ndohejái hague umi hénte oĩva ko múndope okambia chugui umi mbaʼe opensáva, ojapóva térã ohupytyséva. Jesús núnka ndahesaráiri vaʼekue maʼerãpa oñembou rakaʼe chupe ko yvy ape ári: Ombotuicha hag̃ua Jehová réra. ¿Mbaʼépa ikatu jaʼe ñandejehe? Ko múndope oĩ heta mbaʼe ikatúva ñandedesvia Jehová servísiogui. Péro jasegíramo Jesús ehémplo ha ñamotenonde umi mbaʼe Jehová oipotáva jajapo, ñande avei ‘ñaganáta ko múndope’ (1 Juan 5:5).

 9. ¿Mbaʼépa jajapo vaʼerã jasegi hag̃ua pe tape oporoguerahávare vída etérnape?

⁹ Jasegíramo Jesús pypore jaikovéta pára siémpre. Peteĩ mitãkariaʼy ipláta hetáva oporandúrõ guare Jesúspe mbaʼépa ojapo vaʼerã oikove hag̃ua pára siémpre, haʼe heʼi chupe: “Eju chemoirũ” (Mat. 19:16-21). Oĩ vaʼekue umi judío ndogueroviáiva Jesús haʼeha pe Cristo, umívape Jesús heʼi vaʼekue: ‘Che ovechakuéra ou che rapykuéri. Che ameʼẽta chupekuéra vída etérna’ (Juan 10:24-29). Nicodemo oĩ vaʼekue pe Sanedrínpe ha oikuaaseve vaʼekue Jesús omboʼéva, ha Jesús heʼi vaʼekue chupe ‘umi ohechaukáva ojeroviaha hese ikatutaha oikove pára siémpre’ (Juan 3:16). Ñande jahechauka jajeroviaha Jesúsre jajapóvo umi mbaʼe haʼe omboʼe vaʼekue, ha jasegívo iñehémplo. Jajapóramo upéicha, jasegíta pe tape oporoguerahávare vída etérnape (Mat. 7:14).

10. ¿Mbaʼépa jajapo vaʼerã jaikuaa porãve hag̃ua Jesúspe? (Juan 17:3).

¹⁰ Jasegi porã hag̃ua Jesús pypore tekotevẽta jaikuaa chupe (elee Juan 17:3). Jaikuaa Jesúspe haʼe hína peteĩ mbaʼe tekotevẽva jajapo kontinuadoite. Jasegi vaʼerã jaikuaa porãve chupe, por ehémplo umi kualida orekóva, pe opensa lája, ha umi mbaʼe ogia vaʼekue chupe. Oiméramo jepe jaservíma raʼe Jehovápe heta tiémpore, jasegi vaʼerã ñañehaʼã jaikuaa porã hag̃ua Jehovápe ha Itaʼýrape.

11. ¿Mbaʼépa jatopa umi lívro de Mateo, Marcos, Lucas ha Juánpe?

¹¹ Ikatu hag̃uáicha jaikuaa porãve Itaʼýrape, Jehová mborayhúpe oheja ñandéve la Bíbliape umi lívro de Mateo, Marcos, Lucas ha Juan. Umi lívrope jatopa umi istória oñeʼẽva Jesús rekovekuére ha ipredikasiónre, omombeʼu umi mbaʼe heʼi, ojapo ha mbaʼéichapa oñeñandu vaʼekue. Koʼã 4 lívro ñanepytyvõ ‘siémpre jajepyʼamongeta hag̃ua’ Jesús ehémplore (Heb. 12:3). Jaʼe porãsérõ g̃uarã, koʼã lívrope jatopa Jesús pypore. Upévare jastudiáramo koʼã 4 lívro jaikuaa porãvéta jahávo Jesúspe, ha péicha ikatúta jasegi porã la ipypore.

12. ¿Mbaʼéichapa ikatu ñañevenefisia porã umi lívro de Mateo, Marcos, Lucas ha Juángui?

¹² Ñañevenefisia porã hag̃ua umi lívro de Mateo, Marcos, Lucas ha Juángui, ndahaʼéi jaleénte vaʼerã umíva. Tekotevẽ avei ñañemotiémpo ikatu hag̃uáicha jastudia porã ha jajepyʼamongeta ñande pyʼaite guive pe jaleévare (ekompara Josué 1:8 heʼívare). Jahechamína koʼág̃a mokõi mbaʼe ñanepytyvõtava jajepyʼamongeta hag̃ua umi 4 lívrore, ha ñamoĩ hag̃ua en práktika la jaleéva umívape.

13. ¿Mbaʼépa ikatu jajapo ñañeimahina hag̃ua umi rreláto oñeʼẽva Jesús rekovére?

¹³ Primero, jaipuru ñane imahinasión jaleévo umi rreláto. Ñapensa upe jaleévare ikatu hag̃uáicha jahecha, ñahendu ha ñañandu umi mbaʼe oiko vaʼekue. Upearã ikatu ñainvestiga umi puvlikasión omeʼẽvape ñandéve Jehová organisasión. Ñaanalisa umi mbaʼe oiko vaʼekue pe rreláto mboyve ha upe rire. Jaheka informasión oñeʼẽvéva umi persóna ha lugár oĩvare upe rrelátope. Ñakompara umi mbaʼe jastudiáva hína umi ótro lívro omombeʼúvare avei el mísmo rreláto. Sapyʼánte peteĩ lívrope oñemombeʼu peteĩ mbaʼe iñinteresantetereíva umi ótro lívro nomombeʼúiva.

14, 15. ¿Mbaʼéichapa ikatu ñamoĩ en práktika umi mbaʼe ñaaprendéva umi rreláto oñeʼẽvagui Jesús rekovekuére?

¹⁴ Segundo, ñamoĩ en práktika umi mbaʼe ñaaprendéva umi rrelátogui (Juan 13:17). Jastudia porã rire peteĩ rreláto oñeʼẽva Jesúsre, ñañeporandu: “¿Mbaʼépa aaprende ko rrelátogui ikatúva amoĩ en práktika che rekovépe? ¿Mbaʼéichapa ikatu aipuru ko rreláto aipytyvõ hag̃ua umi che rapichápe?”. Ñañehaʼã vaʼerã ñapensa peteĩ persóna jaikuaávare, ha upéi opyta porã vove, mborayhúpe jaʼe chupe mbaʼépa la ñaaprende vaʼekue.

¹⁵ Jahechamína koʼág̃a peteĩ ehémplo ohechaukáva mbaʼéichapa ikatu jajapo koʼã mokõi mbaʼe. Ñaanalisáta pe rreláto oñeʼẽva pe viúda mboriahumíre Jesús ohecha vaʼekue pe témplope.

16. Emombeʼu mbaʼe mbaʼépa eñeimahina oikoha Marcos 12:41-pe.

¹⁶ Jaipuru ñane imahinasión jaleévo pe rreláto (elee Marcos 12:41). Ñañehaʼã jahecha umi mbaʼe oikóva. Pe 11 de Nisán áño 33-pe, unos kuánto díantema ofalta ojejuka hag̃ua Jesúspe. Haʼe haimete tódo el día omboʼe hína kuri pe témplope. Umi líder rrelihióso oñemoĩ mbarete hese. Upe mboyve, ijapyteguikuéra oĩ kuri umi oporandúva Jesúspe mávapa omeʼẽ chupe autorida ojapo hag̃ua la ojapóva. Ha oĩ avei umi oporandúva chupe umi mbaʼe haʼekuéra oimoʼãva ndaikatumoʼãiha okontesta (Mar. 11:27-33; 12:13-34). Koʼág̃a Jesús oho ótro hendápe pe témplope, oiméne pe lugár héravape kuñanguéra korapy. Upe guive Jesús ikatu ohecha umi káha de kontrivusión. Upépe haʼe oguapy ha oñepyrũ omaña umi héntere omoĩ jave ikontrivusión umi káhape. Haʼe ohecha heta hénte iplátava omoĩha heta monéda umi káhape. Oiméne haʼe oĩ ag̃ui porã, ha ohendupa mbaʼéichapa umi monéda oklinklín hoʼávo umi káhape.

17. ¿Mbaʼépa ojapo pe viúda mboriahumi, heʼiháicha Marcos 12:42?

¹⁷ (Elee Marcos 12:42). Upe rire Jesús ohecha peteĩ kuñakarai, “peteĩ viúda mboriahumi” (Luc. 21:2). Ijetuʼueterei ningo pe viudami situasión. Haʼe oiméne ndorekói voi pláta ni ojogua hag̃ua umi mbaʼe oikotevẽva oñemantene hag̃ua. Upéicharõ jepe, haʼe lomímonte oho omoĩ mokõi monedaʼi peteĩva umi káhape ha oñehaʼãmbaite pono ollama la atensión. Oiméne apenamínte voi oñehendu raʼe koʼã monedaʼi hoʼávo pe káhape. Jesús oikuaa kuri haʼe opoi hague mokõi leptón, haʼéva hína umi monéda saʼive ovaléva upe tiémpope. Ni peteĩ gorrión ningo ndaikatúi vaʼekue ojejogua umi monédare, hiʼarive umi gorrión haʼe vaʼekue umi guyraʼi varatove oñevendéva ojejapo hag̃ua chugui tembiʼu.

18. Ohechaukaháicha Marcos 12:43, 44, ¿mbaʼépa Jesús heʼi vaʼekue pe viudami kontrivusiónre?

¹⁸ (Elee Marcos 12:43, 44). Jesús ningo omombaʼeterei la ojapóva ko viudami. Upévare ohenói idisipulokuérape ha oseñalávo pe viúdare, heʼi: “Ko viúda mboriahumi omeʼẽ hetave enterovete umi ótro omeʼẽ vaʼekuégui”. Upéi heʼive: “Haʼekuéra [koʼýte umi ipláta hetáva] omeʼẽ hembývante chupekuéra, pe viúda katu imboriahúramo jepe, omeʼẽmbaite la oreko vaʼekue, omeʼẽ orekóva guive oñemantene hag̃ua”. Upe díape ko viudami ijerovia mbaretetéva omeʼẽ kuri pe última monedaʼi oreko vaʼekue. Upéicha haʼe omoĩ hekove Jehová pópe, oikuaágui haʼe oporohayhuetereiha ha oñangarekotaha hese (Sal. 26:3).

19. ¿Mbaʼe iñimportántevapa ñanemboʼe umi mbaʼe Jesús heʼi vaʼekue pe viúda mboriahumíre?

¹⁹ Ñamoĩ en práktika umi mbaʼe ñaaprendéva pe rrelátogui. Ñañeporandu: “¿Mbaʼépa ikatu aaprende umi mbaʼe Jesús heʼi vaʼekuégui pe viúda mboriahumíre?”. Ñapensamína pe viúdare. Haʼéngo katuete omeʼẽséne raʼe Jehovápe hetave mbaʼe, péro haʼe ojapo pe ikatumíva ha omeʼẽ Jehovápe pe iporãvéva orekóva. Ha Jesús oikuaa porã vaʼekue Itúa ovaloraiterei hague pe viudami kontrivusión. Upéva ñanemboʼe peteĩ mbaʼe iñimportantetereíva: Jehová oguerohoryha ñameʼẽ jave chupe pe iporãvéva jarekóva, térã jaservi jave chupe ñande pyʼaite guive ha ñande rekove kompletoite reheve (Mat. 22:37; Col. 3:23). ¡Jehová ningo ovyʼaiterei ohecha jave jajapoha opa ikatúva iservísiope! Umívape oike pe tiémpo ha pe mbaretekue jaipurúva jaadora hag̃ua chupe, por ehémplo japredikávo ha jahávo rreunionhápe.

20. ¿Mbaʼéichapa ikatu ñamoĩ en práktika umi mbaʼe ñaaprendéva pe viudamígui ñaipytyvõ hag̃ua ótrope? Emoĩ peteĩ ehémplo.

²⁰ ¿Mbaʼéichapa ikatu ñamoĩ en práktika umi mbaʼe ñaaprendéva pe viudamígui ñaipytyvõ hag̃ua ótrope? Ñapensamína umi ermáno ikatúvape omokyreʼỹ jaʼéramo chupekuéra Jehová oguerohoryetereiha umi mbaʼe ojapóva iservísiope. Por ehémplo, ikatu oime jaikuaa peteĩ ermána ijedáva ha hasykatúmavape. Haʼe naimbaretevéima ha ndaikatuvéima osẽ predikasiónpe ymave guaréicha. Upéicha rupi haʼe oñeñandu kulpávle ha opensa ndovaleveimaha mbaʼeverã. Térã ikatu ñanemanduʼa peteĩ ermáno orekóvare peteĩ mbaʼasy ndaikatúivagui okuera ha ombohasa asyetereíva chupe. Haʼe ningo ndaikatuvéima oho káda rreuniónpe, ha upévare oñedesanima jepi. ¿Mbaʼépa ikatu jajapo hesehapekuéra? Ikatu ñañeʼẽ hendivekuéra, ha ‘jaʼe umi mbaʼe iporãva ha omombaretétava’ chupekuéra (Efes. 4:29). Ñakomparti hendivekuéra umi mbaʼe porãite ñaaprende vaʼekue pe rreláto oñeʼẽvagui pe viúda mboriahumíre. Umi mbaʼe jaʼéva ikatu omomanduʼa chupekuéra Jehová omombaʼetereiha ñameʼẽ jave chupe pe iporãvéva (Prov. 15:23; 1 Tes. 5:11). Ñande jaguerohorýramo ótrope omeʼẽ haguére Jehovápe pe iporãvéva, haʼetéramo jepe michĩva upe ojapóva hikuái, ñande jasegi porã hína Jesús pypore.

21. ¿Mbaʼépa nde rejedesidíma rejapotaha?

²¹ Ajépa jaagradesete umi lívro de Mateo, Marcos, Lucas ha Juan omombeʼu haguére ñandéve heta mbaʼe Jesús rekovégui, pórke koʼãva ñanepytyvõ jasegi hag̃ua iñehémplo, jaguata porã hag̃ua ipyporére. Iporãta ningo ñaanalisáramo koʼã lívro ñande estúdio personálpe térã ñande estúdio de famíliape. Ñanemanduʼa vaʼerã ñañevenefisia porã hag̃ua koʼã estúdiogui tekotevẽha ñañeimahina umi mbaʼe oiko vaʼekue, ha ñamoĩ en práktika la ñaaprendéva. Péro jasegi hag̃ua Jesús ehémplo ndahaʼéi jajapónte vaʼerã umi mbaʼe haʼe ojapo vaʼekue, síno ñahendu vaʼerã avei umi mbaʼe haʼe heʼi vaʼekue. Pe ótro artíkulope jahecháta mbaʼépa ikatu ñaaprende umi mbaʼe Jesús heʼi vaʼekuégui omano mbotaitérõ guare.