Ani jaipeʼa ojuehegui Ñandejára ombojoajuvaʼekue

‘Haʼekuéra ndahaʼevéima mokõi yvypóra, peteĩntema. Upévare, yvypóra ndoipeʼaivaʼerã ojuehegui Ñandejára ombojoajuvaʼekue.’ (MATEO 19:6.)

1, 2. La Biblia heʼívare ha umi mbaʼe oikóvare, mbaʼérepa ikatu jaʼe umi omendáva katuete iprovlemataha?

EPENSAMÍNA rehotaha nde kóchepe peteĩ viáhe pukúpe. Ikatúnepa oĩ provléma tapére? Ñandevýrota ñaimoʼãramo ndaiporimoʼãiha. Pór ehémplo, okýramo sapyʼa ndaikatumoʼãi reho hatã ha reñatendevevaʼerã remaneha aja. Ikatu avei oñembyai nde kóche, ha ndaikatúiramo remyatyrõ, rehomantevaʼerã reheka peteĩ nepytyvõtava. Erétapa upévare resẽ rei hague ha iporãvetaha reheja rei nde kóche upérupi? Nahániri. Jaikuaáningo peichagua viáhepe ikatuha oiko koʼã mbaʼe ha ñañehaʼãta ñamyatyrõ jasegi hag̃ua.

² Upéva oiko avei umi omendáva apytépe. Katuete oĩta provléma ha umi omendátava oikuaavaʼerã ndoikomoʼãiha vyʼa pópe. La Biblia heʼi 1 Corintios 7:​28-pe (BNP) umi omendáva ‘ohasavaʼerãha heta jepyʼapy’. Mbaʼérepa upéva? Ñaneimperfékto ha jaiko rupi ‘ára pahápe’ (2 Timoteo 3:1; Romanos 3:23). Upévare, oĩta jepi provléma, ojogueraha porã ha ojaposéramo jepe hikuái Ñandejára heʼíva.

3. a) Mbaʼéichapa ojehecha pe ñemenda koʼág̃a rupi? b) Mbaʼérepa umi kristiáno oñehaʼã opyta oñondive?

³ Koʼág̃a rupi heta omendáva ojopoíntema iprovléma jave. Upévare heta tetã rupi hetave ohóvo umi ojedivorsiáva. Umi kristiáno tee katu oñehaʼã ombohovái porã umi provléma oñemeʼẽrangue umívape. Mbaʼérepa? Chupekuéra g̃uarã ñemenda ndahaʼéi vyrorei, Jehová voi omeʼẽhaguére ko rregálo. Umi omendávare Jesús heʼivaʼekue: ‘Yvypóra ndoipeʼaivaʼerã ojuehegui Ñandejára ombojoajuvaʼekue’ (Mateo 19:6). Hasy jepi jajapo hag̃ua ko mbaʼe. Heta vése ihentekuéra térã ambue tapicha nomombaʼéiva la Biblia heʼíva, omokyreʼỹ umi omendávape ojopoi térã ojedivorsia hag̃ua oimeraẽ mbaʼére.a Umi kristiáno katu oikuaa iporãveha opyta oñondive ojopoirangue. Tekotevẽ ñamenda guive jajapo Jehová oipotáva ñahendurangue ñande rapicha heʼíva (Proverbios 14:12).

Mbaʼéichapa ikatu ñambohovái umi provléma

4, 5. a) Mbaʼeichagua provlémapa ohasa umi omendáva? b) Mbaʼérepa iporã jajapo Ñandejára Ñeʼẽ heʼíva koʼýte ñaneprovléma jave?

⁴ Umi omendáva niko iprovlémante voi sapyʼapyʼa. Péro heta vése oiko vai hikuái vyroreíre. Oĩ katu umi provléma tuichaitereíva ikatúva ombyaiete pe família. Péicha jave ména ha tembireko ojerurekuaa peteĩ ansiáno omendávape toipytyvõ chupekuéra. Koʼã provléma katu ndeʼiséi ndaikatuveimaha oiko porã oñondive. Péro ohechauka enterove jajapovaʼerãha la Biblia heʼíva.

⁵ Jehová ningo ñande Apohare ha omoñepyrũvaʼekue pe ñemenda, upévare oikuaa mbaʼépa ojapovaʼerã umi omendáva oiko porã hag̃ua oñondive. Ñañeporandumína: jajapótapa Iñeʼẽ heʼíva? Jajapóramo ñasẽ porãta katuete. Yma Jehová heʼi ipuévlope: ‘Rehendúramo che ñeʼẽ nde vyʼa okakuaáta ysyry guasúicha, ha oláda yguasupeguáicha reñakãrapuʼãta’ (Isaías 48:18). Ñasẽ porã hag̃ua jajapovaʼerã la Biblia heʼíva. Jahechami raẽ mbaʼépa heʼi menakuérape.

“Pehayhúke pene rembirekópe”

6. Mbaʼépa heʼi la Biblia menakuérape?

⁶ Pe kárta apóstol Pablo ohaivaʼekue umi Efesoyguápe, ohechauka porã menakuérape mbaʼépa ojapovaʼerã. Pablo heʼi: ‘Peẽ menakuéra, pehayhúke pene rembirekópe Cristo ohayhuhaguéicha ikongregasiónpe, ha omeʼẽ hese hekove. Péicha avei, menakuéra ohayhuvaʼerã hembirekópe, haʼekuéra ojehayhuháicha ijupe voi. Upe hembirekópe ohayhúva, ojehayhu ijupe voi. Avave niko ndojahéiri hetére. Ñamongaru guei ha ñañangareko hese. Péicha avei Cristo ojapo ikongregasiónre. Opáichavo, menakuéra tohayhu hembirekópe ojehayhuháicha ijupe voi’ (Efesios 5:​25, 28, 29, 33).

7. a) Mbaʼépa oikotevẽ umi kristiáno omendáva ojogueraha porã hag̃ua? b) Mbaʼéichapa menakuéra ohechaukáta ohayhu memeha hembirekópe?

⁷ Pablo noñeʼẽihína opaichagua provléma oĩvare umi omendáva apytépe. Ohechauka umi kristiáno omendáva ojoayhuvaʼerãha katuete. Mborayhu hína pe iñimportantevéva oĩvaʼerã ogapýpe. Koʼápe Pablo heta vése oñeʼẽ mborayhúre ha ohechauka menakuéra ohayhu meme vaʼerãha hembirekópe. Haʼe ohechakuaa ndahasyiha ñañepyrũ jahayhu peteĩ tapichápe péro hasyve jasegi hag̃ua jahayhu. Ha upeichaitéko, ko ‘ára pahápe’ oĩgui hetaiterei ojehayhúva ijupénte ha noñehaʼãiva oiko porã hapichándi (2 Timoteo 3:​1-3). Upévare heta omendáva ojueja, péro peteĩ ména ohayhúva hembirekópe ndojapói ko múndope ojejapóva (Romanos 12:2).

Mbaʼéicha ikatu remeʼẽ oikotevẽva ne rembirekópe

8, 9. Mbaʼépa omeʼẽvaʼerã peteĩ ména hembirekópe?

⁸ Oiméramo nde peteĩ kristiáno remendáva, mbaʼéichapa rehechaukáta remotenondeha ne rembireko oikotevẽva ha rehayhuha chupe? Pablo ohechaukavaʼekue umi menakuéra Efesoyguápe ojapovaʼerãha mokõi mbaʼe: omongaru hembirekópe térã omeʼẽ chupe oikotevẽva, ha oñangareko hese. Mbaʼéichapa ikatu omeʼẽ chupe oikotevẽva? Omoĩvo chupe hogarã, tembiʼu ha ijaorã. Pablo heʼi Timotéope: ‘Pe oñangarekoʼỹva umi hogayguakuéra rehe, omboyke ijerovia ha ivaive umi ojeroviaʼỹvagui’ (1 Timoteo 5:​8, JMP).

⁹ Péro peteĩ tembireko noikotevẽi koʼã mbaʼe añónte. Mbaʼérepa jaʼe upéva? Iména ikatu omeʼẽmbaite chupe koʼã mbaʼe, péro ndohechakuaái mbaʼéichapa haʼe oñeñandu ha noipytyvõi chupe omombarete hag̃ua ijerovia. Ha upéva iñimportanteterei. Heta kristiáno hembiapoiterei kongregasiónpe. Jepe iñimportánte umi mbaʼe ojapóva, ndahesarairivaʼerã Ñandejára omoĩhague kuimbaʼépe omoakã hag̃ua hogapy (1 Timoteo 3:​5, 12). Ko rrevísta oñeʼẽmavaʼekue ko mbaʼére: “La Biblia ohechauka, ‘ñañangareko hag̃ua kongregasiónre ñañangareko raẽ vaʼerãha ñande rogayguáre’. Peteĩ ansiáno noñangarekoporãiramo hogayguáre ndaikatumoʼãvéima oservi ansiánoramo”.b Upéicharõ, iñimportanteterei pe ména omeʼẽmbaite hembirekópe oikotevẽva. Ha tekotevẽ imanduʼa oipytyvõvaʼerãha chupe omombarete hag̃ua ijerovia.

Mbaʼéichapa reñangarekovaʼerã ne rembirekóre

10. Mbaʼéichapa peteĩ ména oñangarekokuaa hembirekóre?

¹⁰ Peteĩ ména ohayhúva hembirekópe oñehaʼãta ohechauka chupe upéva ha oñangarekóta hese. Omopaʼũvaʼerã hembiapo oĩ meme hag̃ua hendive. Ndojapóiramo upéva ikatu hembireko mbeguekatúpe ndohayhuvéi chupe. Imanduʼavaʼerã avei hembireko ikatuha oĩseve hendive ha oipotaha iména openamie hese. Pe tembireko ndovyʼamoʼãi iména heʼínteramo ohayhuha chupe. Haʼe ningo oipota ohechauka chupe upéva. Pablo heʼivaʼekue: “Jahekavaʼerã pe iporã vaʼerã ñande rapichápe, ha ani ñandejupe g̃uarã añónte” (1 Corintios 10:​24, BNP). Peteĩ ména ohayhúva hembirekópe oñehaʼãvaʼerã oikuaa mbaʼépa haʼe oikotevẽ (Filipenses 2:4).

11. Mbaʼéichapa otratavaʼerã peteĩ ména hembirekópe oĩ porã hag̃ua Ñandejára ha kongregasión renondépe? (Ehecha nóta.)

¹¹ Oñangareko avei hembirekóre otrata porãvo ha omokunuʼũvo chupe (Proverbios 12:18). Pablo ohai umi Colosasguápe: “Pe ména tohayhu hembirekópe ha ani iñeʼẽ pohýi ichupe” (Colosenses 3:​19, BNP). Peteĩ lívro ohechauka Pablo heʼíva ikatuha jaʼe avei “ani pereko pene sirviéntaramo” térã “ani pereko pene rembiguáiramo”. Peteĩ ména ipyʼahatãva hembirekóndi hógape térã hapichakuéra rovake ndohayhúi chupe. Otrata vaíramo hembirekópe opyta vaíta Ñandejárandi. Apóstol Pedro heʼi menakuérape: ‘Pehendukuaavaʼerã pene rembirekópe. Pembojerovia, pembojeroviavaʼerãháicha, pehechakuaávo haʼekuéra ikangyveha, ha oĩha penemoirũ hag̃ua pe jeikove omeʼẽtavape peẽme Ñandejára. Pejapo péicha ani hag̃ua pembyai pene ñemboʼe’ (1 Pedro 3:7).c

12. Mbaʼe ehémplopa omeʼẽ Jesús umi menakuérape?

¹² Ani reimoʼã ne rembireko nderayhuntevaʼerãha voi. Rehechauka meme vaʼerã rehayhuha chupe. Jesús otratahaguéicha kongregasiónpe omoĩ ehémplo menakuérape g̃uarã. Haʼe hory, imbaʼeporã ha oiporiahuverekovaʼekue hemimboʼekuérape, jepe ojavy jey jey hikuái. Upévare heʼivaʼekue: ‘Peju cherendápe, peikuaáta chepyʼaporã ha ndajejapoiha, ha chendive pejuhúta pytuʼu’ (Mateo 11:​28, 29). Peteĩ kristiáno otrata hembirekópe Jesús otratahaguéicha kongregasiónpe. Pe ména ohayhúva hembirekópe ha ohechaukáva upéva umi mbaʼe heʼíva ha ojapóvare, katuete ombovyʼáta hembirekópe.

Tembirekokuéra ojapóva la Biblia heʼíva

13. Mbaʼépa heʼi la Biblia tembirekokuérape?

¹³ La Biblia oñemoñeʼẽ avei tembirekokuérape. Efesios 5:​22-24, 33 heʼi: ‘Peẽ kuña pemendáva, pejapóke pene ména heʼíva peẽme, pejapoháicha Ñandejára heʼíva peẽme. Menakuéra niko tembireko akã hína, Cristo haʼeháicha kongregasión akã. Pe Cristo kongregasión niko Cristo rete ha opa ipypeguápe haʼe onohẽvaʼekue jejopy vaígui. Ha Cristo kongregasión ojapoháicha Cristo heʼíva, tembirekokuéra avei ojapovaʼerã imenakuéra heʼíva chupekuéra. Tembirekokuéra tomombaʼe iménape’.

14. Mbaʼérepa la Biblia ndoapoʼíri tembirekokuérape heʼívo oñemoĩvaʼerãha iména poguýpe?

¹⁴ Pablo heʼi tembirekokuérape iñimportanteha ojapo iména heʼíva ha tomombaʼe chupe. Ojeʼe tembirekokuérape oñemoĩ hag̃ua iména poguýpe, upéva Ñandejára ojerure chuguikuéra. Umi ánhel, yvypóra ha mymbakuéra oĩ máva poguýpe. Jesús jepe oñemoĩ Jehová poguýpe (1 Corintios 11:3). Peteĩ tembireko kyreʼỹme oñemoĩta iména poguýpe haʼe omoakã porãramo chupe.

15. Mbaʼe konsého omeʼẽ la Biblia tembirekokuérape?

¹⁵ Pablo heʼi avei peteĩ kristiána omendáva ‘omombaʼevaʼerãha iménape’. ‘Teko kirirĩ ha pyʼaporãme’ noñemoĩrivaʼerã iménare ha ndojapoivaʼerã ijeheguínte opa mbaʼe (1 Pedro 3:​4, BNP). Oñangareko porã vaʼerã hogayguakuérare ha ohechaukavaʼerã omombaʼeha iménape (Tito 2:​4, 5). Oñehaʼãta oñeʼẽ porã iménare ha nomotĩmoʼãi chupe avave rovake. Avei oñehaʼãta oipytyvõ osẽ porã hag̃ua iména odesidíva (Proverbios 14:1).

16. Mbaʼépa omboʼe tembirekokuérape Sara ha Rebeca ojapovaʼekue?

¹⁶ Pe kristiána heko kirirĩ ha ipyʼaporãva ikatu heʼi mbaʼépa opensa ha upéva oñemombaʼevaʼerã. Yma umi kuña oservíva Jehovápe omombeʼu oipyʼapýva chupekuéra ha la Biblia heʼi Jehová oguerohoryhague upéva. Umíva apytépe jatopa Sara ha Rebeca (Génesis 21:​8-12; 27:46–28:4). Upéicha avei umi kristiána omendáva omombeʼukuaa opensáva. Péro ojapóvo upéva ohechaukavaʼerã omombaʼeha iménape. Upéicha haʼe ikatu ojapo hembireko heʼíva chupe.

Tuicha mbaʼe ningo pe kompromíso

17, 18. Mbaʼépa ikatu ojapo umi omendáva ani hag̃ua Satanás ohundi ifamília?

¹⁷ Umi omendáva oñekompromete opa ára g̃uarã. Upévare oñehaʼãvaʼerã hikuái toho porã chupekuéra. Ména ha tembireko noñemongetáiramo, hetave ha tuichavéta umi provléma. Heta vése umi omendáva okirirĩ ojuehegui ojoavy jave ha péicha oñepyrũ ipyʼaro. Oĩ umi opoiséntemava iména térã hembirekógui ha oñepyrũ omaña ótrore. Jesús heʼi porã: ‘Oimeraẽva omaʼẽva kuña rehe ha oguerekoséva chupe, oikóma hendive ipyʼapýpe’ (Mateo 5:​28, BNP).

¹⁸ Kristianokuérape, umi omendávape avei, apóstol Pablo heʼi: “Pendepochýramo, ani peʼa tembiapo vaípe. Ani peheja kuarahy oike jepe pendepochypoi hag̃ua. Ani pemeʼẽ juruja añáme” (Efesios 4:​26, 27). Satanás ningo ndaijaʼeiete ñanderehe ha oiporuse oimeraẽ joavy oĩva kristiáno apytépe ñañorairõ hag̃ua. Aníkena jaheja ojapo upéva ñanderehe. Oĩ jave provléma rejeporekavaʼerã reikuaa hag̃ua mbaʼépa heʼi Jehová. Rehekakuaa umi puvlikasiónpe ha upéi reñemongeta porã ne ména térã ne rembirekóndi. Ndahaʼéi jaikuaantevaʼerã Jehová heʼíva, ñañehaʼãvaʼerã jajapo (Santiago 1:​22-25). Ñandejára oguerohory hag̃ua umi omendávape ndohejaivaʼerã hikuái avave oipeʼa ojuehegui Haʼe ombojoajuvaʼekue (Miqueas 6:8).

[Nóta]

Nemanduʼápa?

• Mbaʼérepa umi kristiáno omendáva iprovléma avei?

• Mbaʼéichapa pe ména omeʼẽta hembirekópe oikotevẽva ha oñangarekóta hese?

• Mbaʼéichapa peteĩ tembireko ohechauka omombaʼeha iménape?

• Mbaʼépa ojapokuaa umi omendáva ani hag̃ua hesarái pe kompromíso ojapovaʼekuégui?

[Nóta oĩva taʼanga ndive páhina 22]

Peteĩ ména omeʼẽvaʼerã hembirekópe oikotevẽva ha oipytyvõvaʼerã chupe imbarete hag̃ua ijerovia

[Nóta oĩva taʼanga ndive páhina 23]

Peteĩ kristiána omendáva omombeʼu porã iménape mbaʼéichapa oñeñandu

[Nóta oĩva taʼanga ndive páhina 24]

Peteĩ tembireko ovyʼáta iména ohayhúramo chupe