‘Umi anhelkuéra niko ojejokuái oporopytyvõ hag̃ua’

‘Umi anhelkuéra niko espíritu ojejokuáiva oipytyvõ hag̃ua umi ojesalvátavape.’ (HEB. 1:​14, BNP.)

 1. Mbaʼérepa ñanembovyʼaiterei Mateo 18:10 ha Hebreos 1:​14-pe heʼíva?

PETEĨ árape Jesús heʼivaʼekue avave nomoñepysangaivaʼerãha hemimboʼekuérape. Chupekuéra ningo ohenói “koʼã michĩvéva”, orekógui ‘hiʼanhelkuéra yvágape, akóinte ohecháva Itúva yvagapegua rova’ (Mat. 18:10). Ha apóstol Pablo imanduʼávo umi ánhel iñeʼẽrendúvare, heʼi: ‘Umi anhelkuéra niko espíritu ojejokuáiva oipytyvõ hag̃ua umi ojesalvátavape’ (Heb. 1:​14, BNP). Upéva ningo ñanembovyʼaiterei ohechauka rupi ñandéve Ñandejára oiporuha hiʼanhelkuéra ñanepytyvõ hag̃ua. Mbaʼépa heʼive la Biblia umi ánhel rehe? Mbaʼéichapa ñanepytyvõ? Mbaʼépa ikatu ñaaprende chuguikuéra?

2, 3. Mbaʼe mbaʼépa ojapo umi ánhel?

² Ñandejára ningo oreko yvágape hetaiterei ánhel iñeʼẽrendúva ha ‘ipoderósova, ojapovahína opa mbaʼe haʼe heʼíva’ (Sal. 103:20; jaleemína Revelación 5:11). Umi ánhel ningo espíritu ha ni peteĩ ndojojoguái. Haʼekuéra ikatu odesidi mbaʼépa ojapóta ha ikatu avei ojapo heta mbaʼe porã Jehová ojapoháicha. Ha umi ánhelpe Jehová omohenda kóicha: Primero, pe arcángel Miguel, Jesús réra yvágape (Dan. 10:13; Jud. 9). Haʼe ningo Ñandejára ‘raʼy ypykue’ ha “pe Ñeʼẽ”, térã pe ‘oñeʼẽva Ñandejára rérape’. Jehová ojokuaivaʼekue avei chupe ojapo hag̃ua opa mbaʼe (Col. 1:​15-17; Juan 1:​1-3).

³ Upe rire umi arcángel poguýpe oĩ umi serafín, omoherakuãva Ñandejára imarangatuha ha oñangareko ani hag̃ua oñemongyʼa iñorganisasión. Ha upéi oĩ umi querubín, ojepytasóva Ñandejára goviérno ykére (Gén. 3:24; Isa. 6:​1-3, 6, 7). Umi ótro ánhel térã maranduhára katu Jehová ojokuái ojapo hag̃ua hembipota (Heb. 12:​22, 23).

 4. a) Mbaʼéichapa oñeñandu umi ánhel ojejapórõ guare ko yvy? b) Mbaʼépa oikovaʼerãmoʼã Adán ha Eva odesidi porãrire?

⁴ Umi ánhel ningo ovyʼaiterei ojejapórõ guare ko yvy. Ha oipytyvõ Jehovápe yvyporakuéra oreko hag̃ua opa mbaʼe oikotevẽva oiko hag̃ua pype (Job 38:​4, 7). Jehová ndojapói yvyporakuérape umi ánhelpe ojapo haguéicha, umi ánhel ningo ipoderóso. Péro Jehová ojapo avei yvyporakuérape ijoguaháramo. Upéicha rupi ikatu jajapo heta mbaʼe porã (Heb. 2:7; Gén. 1:26). Upévare Adán ha Eva odesidi porãrire, oikovaʼerãmoʼã ifamiliakuéra ndive peteĩ hardínpe. Ha oĩvaʼerãmoʼã hikuái Jehová famíliape.

5, 6. Mbaʼépa oikovaʼekue yvágape ha mbaʼépa ojapo Jehová?

⁵ Mbaʼeichaitépa oiméne umi ánhel oikuaaséraʼe mbaʼépa oikóta oĩrõ guare ijapytepekuéra opuʼãva Jehováre. Upe ánhel opuʼãvaʼekue hese noñekontentái voi oñemeʼẽvare chupe, nomombaʼeguasuséi Jehovápe ha oipota chupéntema oñemombaʼeguasu. Upe ánhel ningo heʼi Jehová ndorekoiha derécho oisãmbyhy hag̃ua ha omoñepyrũsemoʼã peteĩ goviérno pyahu. Péicha oiko chugui Satanás, pe oñemoĩva Jehováre. Haʼe oñepyrũ ijapu Adán ha Évape, upéicha rupi haʼekuéra opuʼã avei Jehováre (Gén. 3:​4, 5; Juan 8:44).

⁶ Upe riremínte Jehová ohusgáma Satanáspe ha heʼi: ‘Pe kuña ndive romoingovaíta, ha iñemoñare ne ñemoñare ndive. Pe kuña ñemoñare opyrũta ne akãre, nde katu reisuʼúta chupe ipytápe’ (Gén. 3:15). Heʼiháicha ko primera profesía, oikovaivaʼerãha Satanás ha pe “kuña”, térã Jehová organisasión oĩva yvágape. Jehová ningo ohayhueterei iñorganisasión. Ha mbeguekatúpe omyesakãtaramo jepe upe profesía, ohechaukáma ikatuha jajerovia Jehováre. Ñandejára oiporavo peteĩ ánhel opyrũ hag̃ua Satanás ha idemoniokuéra akãre, ha ombyatypa jey hag̃ua ‘opa mbaʼe yvágape ha yvy ape ári’ (Efe. 1:​8-10).

 7. Mbaʼépa ojapo Noé tiémpope heta ánhel? Ha mbaʼépa Jehová ojapo hesekuéra?

⁷ Noé tiémpope, heta ánhel ‘oheja hóga yvagapegua’ ha oñembohete yvypóraicha hekovai hag̃ua umi kuña ohechavaʼekuéndi (Jud. 6; Gén. 6:​1-4). Upévare Jehová okastiga umívape ha oheja chupekuéra pytũnguýpe. Ha péicha omoirũ hikuái Satanáspe ha oiko chuguikuéra ‘umi ánhel aña ipoderósova’ imanduʼa hague apóstol Pablo. Ha ndaijaʼeieterei avei hikuái Ñandejára siervokuérare (Efe. 6:​11-13; 2 Ped. 2:4).

Mbaʼéichapa ñanepytyvõ umi ánhel?

8, 9. Mbaʼéichapa Jehová ojokuái umi ánhelpe oipytyvõ hag̃ua isiervokuérape?

⁸ Umi ánhel oipytyvõvaʼekue heta Ñandejára siervokuérape. Pór ehémplo, Abrahán, Moisés, Josué, Isaías, Daniel, Pedro, Juan, Pablo ha Jesúspe jepe. Jehová ojokuái avei chupekuéra oporohusga hag̃ua ha oikuaauka hag̃ua yvyporakuérape heta profesía ha mbaʼépa ojapovaʼerã, pór ehémplo pe léi mosáika (2 Rey. 19:35; Dan. 10:​5, 11, 14; Hech. 7:53; Rev. 1:1). Péro koʼág̃a jarekóma Ñandejára Ñeʼẽ Génesis guive Revelación peve, ha natekotevẽvéima umi ánhel omombeʼu ñandéve Ñandejára marandu (2 Tim. 3:​16, 17). Upéicharamo jepe, akóinte haʼekuéra ojapo Jehová rembipota ha ñanepytyvõ ndajahecháiramo jepe chupekuéra.

⁹ La Bíbliape heʼi: ‘Ñandejára ánhel oñangareko ha oguenohẽ jejopy vaígui opa umi hese ojeroviávape’ (Sal. 34:7; 91:11). Satanás katu heʼivaʼekue yvyporakuéra naiñeʼẽrendumoʼãiha Ñandejárape. Upévare Jehová oheja Satanás ñanembohasa asy (Luc. 21:​16-19). Péro upéicha avei Jehová oikuaa moõite pevépa jagueropuʼakáta, haʼe ningo ohechakuaa mbaʼéichapa ñaneñeʼẽrendu chupe (jaleemína 1 Corintios 10:13). Ha umi ánhel katu oñatendehína ñanepytyvõ hag̃ua Jehová heʼi vove chupekuéra. Pór ehémplo, umi ánhel osalva Sadrac, Mesac, Abednego, Daniel ha Pédrope. Péro umi ánhel ndojapoivaʼekue mbaʼeve Esteban ha Santiágope ojejukárõ guare (Dan. 3:​17, 18, 28; 6:22; Hech. 7:​59, 60; 12:​1-3, 7, 11). Mbaʼérepa ndosalvái chupekuéra? Pórke idiferénte upe ohasáva hikuái ha pe ojehupytýtava upévare. Upéicha avei oiko umi ermáno oĩvaʼekuére umi campo de concentración nazi-pe, Jehová osalváramo jepe hetápe, oĩ avei umi ojejukavaʼekue upépe.

10. Mbaʼépa ikatu avei ojapo Jehová ñanepytyvõ hag̃ua?

¹⁰ La Biblia ndeʼíri káda uno jarekoha peteĩ ánhel oñangarekóva ñanderehe. Péro heʼi ikatuha ñañemboʼe Ñandejárape ha haʼe ñanerendutaha “jajeruréramo haʼe oipotaháicha” (1 Juan 5:14). Upéicharõ, Jehová ikatueténte avei ombou hiʼánhel ñandesalva hag̃ua, péro ikatu avei ñanepytyvõ ótro hendáicha. Pór ehémplo ikatu ojokuái peteĩ ermánope ñanepytyvõ térã ñanekonsola hag̃ua. Ikatu avei omeʼẽ ñandéve arandu ha puʼaka ñaaguanta hag̃ua umi mbaʼe ñanembohasa asýva, sapyʼánte ningo haʼete voi ñande rovapete mbaʼéva ‘peteĩ Satanás rembiguái’ (2 Cor. 12:​7-10; 1 Tes. 5:14).

Jasegíkena Jesús ehémplo

11. a) Mbaʼéichapa umi ánhel oipytyvõvaʼekue Jesúspe? b) Mbaʼépa Jesús ohechauka iñeʼẽrendúvo Jehovápe?

¹¹ Jahechamína mbaʼéichapa Jehová ojokuái umi ánhelpe Jesús oúrõ guare ko yvy ape ári. Umi ánhel ningo omombeʼu moõpa onaséta Jesús ha oñemoingove jeytaha chupe, ha oipytyvõ avei hikuái Jesúspe. Pór ehémplo, peteĩ ánhel omombarete Jesúspe ojejagarra mboyvemi chupe. Péro ndojapói hikuái mbaʼeve ani hag̃ua ojejagarra ha ojejuka chupe (Mat. 28:​5, 6; Luc. 2:​8-11; 22:43). Mbaʼérepa upéva? Pórke Jesús ojapovaʼerã Jehová rembipota, haʼe omanovaʼerã ñanderehehápe. Upéicha ohechauka peteĩ yvypóra perfékto ikatuha iñeʼẽrendu Jehovápe ijetuʼuvéramo jepe upe ohasáva. Upévare Jehová omoingove jey Jesúspe ha omeʼẽ chupe jeikove opaveʼỹva. Omeʼẽ avei chupe autorida ha omoĩ ipoguýpe umi ánhel (Mat. 28:18; Hech. 2:32; 1 Ped. 3:22). Péicha ojekuaa porã Jesús haʼeha pe “kuña ñemoñare” (Gén. 3:15; Gál. 3:16).

12. Mbaʼéichapa ikatu jasegi Jesús ehémplo?

¹² Jesús oikuaa porã vaʼekue ndovaleiha ojapo oimeraẽ mbaʼe oimoʼãgui umi ánhel osalvataha chupe (jaleemína Mateo 4:​5-7). Upévare ñande ñañehaʼãvaʼerã jasegi Jesús ehémplo ha ñaneakãguapy. Ha jajeroviavéramo jepe Jehováre jahasa asy jave, ndajajapoivaʼerã oimeraẽ mbaʼe rei (Tito 2:12).

Mbaʼépa ñaaprende umi ánhelgui?

13. Mbaʼépa heʼi ñandéve 2 Pedro 2:​9-11 umi ánhel rehe? Ha mbaʼéichapa ikatu jasegi umi ánhel ehémplo?

¹³ Apóstol Pedro oñemoñeʼẽvo umi otakývape ungidokuérare, heʼi iporãha pe ehémplo omoĩva umi ánhel. Haʼekuéra ningo ipoderósoramo jepe, iñumílde ha noñeʼẽvaíri avavére, ha ndoporohusgái orrespeta rupi Jehovápe (jaleemína 2 Pedro 2:​9-11). Upévare jasegíkena umi ánhel ehémplo, ha ani japorohusga, jarrespeta umi omoakãvape kongregasión ha jaheja opa mbaʼe Jehová pópe. Haʼe ningo oreko derécho oporohusgávo (Rom. 12:​18, 19; Heb. 13:17).

14. Mbaʼéichapa umi ánhel ohechauka iñumildeha?

¹⁴ Jahechavemína mbaʼéichapa iñumílde umi ánhel. Pór ehémplo, oĩrõ guare oporandúva umi ánhelpe mbaʼéichapa héra, haʼekuéra nomombeʼuséi (Gén. 32:29; Jue. 13:​17, 18). Hetaiterei ánhel oĩramo jepe yvágape, la Biblia omombeʼu mokõi rérante: Miguel ha Gabriel. Upéicharõmante noñemombaʼeguasumoʼãi chupekuéra (Luc. 1:26; Rev. 12:7). Apóstol Juan ningo ojeityvaʼekue peteĩ ánhel renondépe omombaʼeguasu hag̃ua chupe, péro upe ánhel heʼi: ‘Ani rejapo upéicha, che niko Ñandejára rembiguáinte avei nde ha nde ryvykuéraicha’ (Rev. 22:​8, 9, BNP). Upévare Ñandejárape añoite ñamombaʼeguasu ha ñañemboʼevaʼerã (jaleemína Mateo 4:​8-10).

15. Mbaʼéichapa umi ánhel ohechauka ipasiensiaha?

¹⁵ Umi ánhel ningo ipasiénsia avei. Haʼekuéra oikuaaseterei mbaʼéichapa oñekumplíta umi Ñandejára rembipota. La Bíbliape heʼi voi: ‘Koʼã mbaʼe umi ánhel jepe oikuaa porãse avei’ (1 Ped. 1:​12, ÑÑB). Upéicharõ jepe, heta mbaʼe umi oikótava noñemombeʼúi gueteri chupekuéra. Ha mbaʼépa ojapo hikuái upévare? Ohaʼarõ hikuái Ñandejára odesidi peve arakaʼépa oikuaaukáta kongregasión rupive opa mbaʼe (Efe. 3:​10, 11).

16. Mbaʼéichapa oñeñandu umi ánhel ohechávo ñañemoĩha Ñandejára poguýpe?

¹⁶ La Biblia heʼi umi kristiáno ojejopy vaíva ‘oikoha techapyrãicha’ umi ánhelpe g̃uarã (1 Cor. 4:9). Haʼekuéra ningo ohecha mbaʼépa jajapo ha ovyʼaiterei ohecháramo ñaneñeʼẽrenduha. Ovyʼaiterei avei hikuái oĩramo peteĩ ohejáva hembiapo vaikue (Luc. 15:10). Avei, ermanakuéra ojapóva ndohasareíri umi ánhelgui. La Biblia heʼi voi ‘pe kuña oiporuvaʼerãha anhelkuéra rehehápe iñakã jahoʼiha ohechaukáva oikoha iména poguýpe’ (1 Cor. 11:​3, 10, ÑÑB). Upéicharõ umi ánhel ovyʼa ohecháramo ermanakuéra ha maymáva oñemoĩ Ñandejára poguýpe. Upévare ñaneñeʼẽrendúramo, ñande ehémplo hína chupekuéra g̃uarã.

Umi ánhel ñanepytyvõ predikasiónpe

17, 18. Mbaʼérepa jaʼe umi ánhel ñanepytyvõha predikasiónpe?

¹⁷ Umi ánhel ningo oipytyvõ oiko hag̃ua umi mbaʼe iñimportantevéva ko ára pahápe. Pór ehémplo ‘Miguel ha hiʼanhelkuéra’ oipytyvõ oñemoĩ hag̃ua yvágape Ñandejára Rréino 1914-pe, ha oñemosẽ hag̃ua Satanás ha idemoniokuérape upégui (Rev. 1:10; 11:15; 12:​5-9). Pe apóstol Juan heʼivaʼekue oĩha ‘peteĩ ánhel ovevéva yvága mbytére, oguerekóva pe marandu porã omoherakuã hag̃ua yvyporakuérape’. Upe ánhel heʼi voi: ‘Pekyhyjéke Ñandejáragui ha pemombaʼeguasúke chupe, oguahẽmagui pe oporohusga hag̃ua ára; ha pemombaʼeguasu pe ojapovaʼekue yvága ha yvy, pe már ha umi yvukuéra’ (Rev. 14:​6, 7, BNP). Jaikuaa ningo Satanás oñehaʼãha opaicharei ani hag̃ua oñemombeʼu pe marandu porã. Péro umi Jehová ánhel ñanepytyvõta ñamombeʼu hag̃ua pe marandu (Rev. 12:​13, 17).

¹⁸ Koʼág̃a rupi umi ánhel ndoúi heʼi ñandéve jaha hag̃ua umi ipyʼaporãva rendápe, yma ojapo haguéicha Felipe ha pe etíope kásope (Hech. 8:​26-29). Upéicharõ jepe, heta mbaʼe oikovaʼekue ohechauka umi ánhel ñanepytyvõha predikasiónpe jatopa hag̃ua “umi ohupytyvaʼerã guive pe tekove tapia g̃uarã” (Hech. 13:48).a Upévare ñande ñasẽ meme vaʼerã japredika ha ñañehaʼã jatopa umi omombaʼeguasusévape Ñandejárape, Haʼe oipotaháicha (Juan 4:​23, 24).

19, 20. Mbaʼépa ojapo umi ánhel ko ára pahápe?

¹⁹ Jesús heʼivaʼekue avei ko ára pahápe ‘umi ánhel oipeʼavaʼerãha hekovaíva hekopotĩva apytégui’ (Mat. 13:​37-43, 49). Umi ánhel ningo ombaʼapóta avei oñembyatypa ha ojesella hag̃ua umi ungídope (jaleemína Mateo 24:31; Rev. 7:​1-3). Umi ánhel omoirũta avei Jesúspe ‘oipeʼáta vove umi ovechakuéra kavarakuéra apytégui’ (Mat. 25:​31-33, 46, BNP).

²⁰ ‘Jesucristo ojehechaukaha ára hiʼanhelkuéra ipoderosoitéva ndive’, oñehundíta ‘umi oikuaaseʼỹva Ñandejárape ha iñeʼẽrenduʼỹva Jesucristo marandu porãme’ (2 Tes. 1:​6-10, BNP). Apóstol Juan ohechavaʼekue avei upéva oikotaha. Ohecha Jesús ha ijehérsito yvagapeguápe kavaju morotĩ ári, oĩmbaitéma oñorairõ hag̃uáicha (Rev. 19:​11-14).

21. Mbaʼépa pe arcángel Miguel ojapóta Satanás ha idemoniokuérare?

²¹ Apóstol Juan ohechavaʼekue avei “peteĩ ánhel oguejýva yvágagui, oguerekóva pe yvykua pypuku rehegua lláve ha peteĩ kadéna guasu ipópe”. Upe ánhel ningo arcángel Miguel hína, ha haʼe oiméne ojagarráta ha omombo ‘pe yvykua pypukúpe’ Satanáspe ha idemoniokuérape avei. Upéi, mil áño Jesucristo oisãmbyhy rire ojepoi jeýta chuguikuéra sapyʼami. Upe tiémpope yvyporakuéra perféktotama, péro ohasavaʼerã peteĩ pruéva paha. Upe rire katu Satanás ha iñirũnguérape oñehundíta (Rev. 20:​1-3, 7-10; 1 Juan 3:8). Ha péicha hasýpe japytuʼúta umi otakývagui Ñandejárare!

22. a) Mbaʼéichapa oipytyvõta umi ánhel koʼẽrõitéma? b) Mbaʼéichapa ñañeñandu umi ánhel ñanepytyvõ haguére?

²² Koʼẽrõitéma ningo oñehundíta umi hénte ñaña oĩva Satanás poguýpe ha ñande katu ñanesãsóta. Umi ánhel oipytyvõta oiko hag̃ua koʼã mbaʼe porã. Ha péicha ojehechaukáta Jehová oisãmbyhyvaʼerãha ha oñekumplíta hembipota ko yvy ha yvyporakuérape g̃uarã. Upéicharõ ‘umi ánhel hína umi espíritu ojejokuáiva oipytyvõ hag̃ua umi ojesalvátavape’. Ha jaagradesete ningo Jehovápe ñanepytyvõ haguére umi ánhel rupive jajapo hag̃ua hembipota ha jahupyty pe jeikove opaveʼỹva!

[Nóta]

Ñambohovaimína koʼã porandu

• Mbaʼéichapa Jehová omohenda umi anhelkuérape?

• Mbaʼépa ojapovaʼekue heta ánhel Noé tiémpope?

• Mbaʼéichapa Ñandejára ojokuái umi ánhelpe ñanepytyvõ hag̃ua?

• Mbaʼépa ojapo koʼág̃a rupi umi ánhel?

[Nóta oĩva taʼanga ndive páhina 21]

Umi ánhel ovyʼa ojapóvo Ñandejára rembipota

[Nóta oĩva taʼanga ndive páhina 23]

Daniel ohasavaʼekue ohechauka umi ánhel akóinte oñatendeha ojapo hag̃ua Ñandejára oipotáva

[Nóta oĩva taʼanga ndive páhina 24]

Aníkena jakyhyje, umi ánhel ningo ojepytaso ñande ykére predikasiónpe

[Roagradese]

Ko yvy: NASA fóto