Peteĩ jahayhúva ohejáramo Jehovápe

 1. ¿Mbaʼéichapa oñeñandu umi orekóva ihénte oñemosẽ vaʼekue kongregasióngui?

¿NDÉPA ereko peteĩ rehayhúva oñemosẽ vaʼekue kongregasióngui? ¡Oiméne ne korasõite guive rembyasy hína upéva! Peteĩ ermána hérava Hildab heʼi: “Che ména omano vaʼekue 41 áño romenda haguépe, ha aimoʼã vaʼekue ndahasamoʼãiha ótra kósa ivaivéva upévagui. Péro che memby oñemosẽrõ guare kongregasióngui ha oheja hembireko ha ifamiliakuérape, upéva hasyetereive vaʼekue chéve”.

2, 3. Heʼiháicha Salmo 78:40, 41, ¿mbaʼéichapa Jehová oñeñandu peteĩ isiérvo oheja jave chupe?

² Epensamíntena mbaʼeichaitépa oiméne Jehová oñeñandu vai rakaʼe umi ánhel oĩva ifamíliape ohejárõ guare chupe (Jud. 6). Ha epensamíntena avei mbaʼeichaitépa hasy asýne raʼe chupe umi israelita, pe ipuévlo haʼe ohayhuetéva, opuʼã jey jeýrõ guare hese (elee Salmo 78:40, 41). Upévare ikatu reime segúro ñande Ru ñanderayhuetéva ombyasyetereiha avei peteĩ rehayhúva oheja jave chupe. Haʼe ontende porãiterei mbaʼeichaitépa hasy hína ndéve upe rehasáva. Haʼe ningo mborayhúpe nemokyreʼỹta ha ndeapojáta reikotevẽ jave.

³ Ko artíkulope jahecháta mbaʼépa ikatu jajapo Jehová ñanepytyvõ hag̃ua oĩ jave peteĩ jahayhúva oñemosẽva kongregasióngui. Ñaanalisáta avei mbaʼéichapa umi oĩva kongregasiónpe ikatu oipytyvõ umi ohasávape ko situasión ijetuʼuetéva. Péro jahechami raẽna mbaʼépa ndovaléi ñapensa.

 4. ¿Mbaʼéichapa umi tuakuéra oñeñandu jepi peteĩ ifamília oheja jave Jehovápe?

⁴ Pyʼỹinte umi tuakuéra ojekulpa jepi oĩ jave peteĩ ifamília ohejáva Jehovápe. Ha oñeporandu mbaʼépa ikatu vaʼerãmoʼã ojapo hikuái oipytyvõ hag̃ua ifamíliape osegi hag̃ua oservi Jehovápe. Peteĩ ermáno hérava Luke, orekóva peteĩ itaʼýra oñemosẽ vaʼekue kongregasióngui, heʼi: “Che apensa vaʼekue upéva oiko hague che káusare, ha upéva chembopesadillapa. Ha sapyʼánte cherasẽ ha hasy asy chéve che korasõme”. Elizabeth ningo peteĩ ermána ohasa vaʼekue avei peichagua situasión, ha haʼe pyʼỹinte ojetortura opensávo: “¿Mbaʼe mbaʼéiko la ajapo vai vaʼekue? ¿Oime piko namboʼeporãi raʼe che membýpe ohayhu hag̃ua Jehovápe?”.

 5. ¿Máva kúlparepa peteĩ persóna oheja Jehovápe?

⁵ Ñanemanduʼa vaʼerã Jehová omeʼẽ hague káda únope pe liverta odesidi hag̃ua. Upéva heʼise ñande ikatuha jadesidi ñaneñeʼẽrendútapa chupe térãpa nahániri. Oĩ umi imitãva ituakuéra ndahaʼéi vaʼekue ehémplo porã chupekuéra g̃uarã. Péro haʼekuéra lomímonte odesidi oservitaha Jehovápe, ha koʼag̃aite peve oservi porã hína chupe. Oĩ avei umi tuakuéra ojapo vaʼekue opa ikatúva omboʼe hag̃ua ifamíliape ohayhu hag̃ua Jehovápe, péro lomímonte oheja chupe hikuái okakuaapa rire. Upéva ohechauka ñandéve káda uno jadesidi vaʼerãha jaservítapa Jehovápe térãpa nahániri (Jos. 24:15). Upévare, oiméramo nde peteĩ sy térã túa oñeñandu vaíva hína ifamília oheja haguére Jehovápe, nemanduʼákena upéva ndahaʼeiha nde kúlpa. Epensáramo upéicha eñehaʼãmbaitékena eipeʼa upéva ne akãgui.

 6. ¿Mbaʼéichapa oñeñandu peteĩ imitãva itúa térã isy oheja jave Jehovápe?

⁶ Sapyʼánte oĩ avei umi sy térã túa ohejáva Jehovápe ha ifamíliape jepe (Sal. 27:10). Upéva ningo ikatu oheja yvýre umi mitãme, pórke haʼekuéra orrespeta ha ohecharamoiterei ituakuérape. Por ehémplo, Esther omombeʼu mbaʼéichapa oñeñandu vaʼekue itúa oñemosẽrõ guare kongregasióngui. Haʼe heʼi: “Heta vése cherasẽ, pórke papa ndahaʼéi vaʼekue mbeguekatúpe ohejáva Jehovápe, síno haʼe derrepentete odesidi ohejaitetaha voi chupe. Che ningo ahayhu che túape, upévare oñemosẽrõ guare siémpre ajepyʼapy vaʼekue hese, ha aikuaase oĩ porãpa. Sapyʼánte areko voi umi atáke de pániko ha ajedesespera vaipa”.

 7. ¿Mbaʼépa Jehová oñandu umi imitãva orekóvare isy térã itúa oñemosẽ vaʼekue?

⁷ Oiméramo nde nemitã, ha nde sy térã nde túa oñemosẽ raʼe kongregasióngui, ore korasõite guive ningo rombyasy nendive upéva. Eimékena segúro Jehová oikuaa porãha mbaʼeichaitépa hasy asy hína ndéve upéva. Haʼe ningo nderayhueterei ha nemombaʼe resegi haguére ndefiél chupe, ha ore ne ermáno ha ne ermanakuéra upéichante avei. Nemanduʼákena avei ndahaʼeiha ne rresponsavilida umi mbaʼe odesidíva nde tuakuéra. Jaʼéma haguéicha, Jehová omeʼẽ vaʼekue káda únope pe liverta odesidi hag̃ua mbaʼépa ojapóta. Ha káda persóna oñemeʼẽma vaʼekue Jehovápe ha ojevautisa, ‘oñerresponsavilisa vaʼerã ikárgare’ (Gál. 6:5, nóta).

 8. ¿Mbaʼépa ikatu ojapo peteĩ oñemosẽ vaʼekue família ohaʼarõ aja haʼe oñemoag̃ui jey Jehováre? (Ehecha avei pe rrekuádro “Eñemoag̃ui jeýna Jehováre”).

⁸ Peteĩ rehayhúva ohejáramo Jehovápe, katuete nde erekóta la esperánsa algún día haʼe oñemoag̃ui jeývo Jehováre. Péro, ¿mbaʼépa nde ikatu rejapo ehaʼarõ aja? Ejapókena opa ikatúva resegi hag̃ua ndejerovia mbarete. Upéicha emoĩta hína ehémplo porã umi ótro ne hentekuérape, ha ikatu voi pe oñemosẽ vaʼekuépe jepe. Upéva avei nemombaretéta egueropuʼaka hag̃ua pe mbaʼembyasy reñandúva. Jahechamína koʼág̃a mbaʼe mbaʼépa ikatu rejapo resegi hag̃ua ndejerovia mbarete.

 9. ¿Mbaʼépa ikatu rejapo resegi hag̃ua ndejerovia mbarete? (Ehecha avei pe rrekuádro “Umi téxto bíblico nekonsolátava peteĩ rehayhúva ohejáramo Jehovápe”).

⁹ Eñehaʼãmbaitékena esegi hag̃ua rejapo umi mbaʼe omombaretétava nde jerovia. Iñimportanteterei ningo nde ha avei umi ótro oĩva ne famíliape pesegi pemombarete pene amista Jehovándi. ¿Mbaʼéichapa ikatu rejapo upéva? Upearã rejepokuaa vaʼerã relee la Biblia, ejepyʼamongeta hese ha eime rreunionhápe, péicha Jehová nemombaretéta hína. Epensamína Joanna ehémplore, haʼe ningo itúa ha iñermána oheja vaʼekue Jehovápe, haʼe heʼi: “Tuichaiterei ningo chepyʼaguapy alee jave umi rreláto oĩva la Bíbliape oñeʼẽva Abigaíl, Ester, Job, José ha Jesúsre. Iñehemplokuéra ningo chemokyreʼỹ ha chepytyvõ chepositivave hag̃ua, ha péicha menovéma hasy chéve la oiko vaʼekue. Chemokyreʼỹeterei avei umi puraheikuéra osẽva jepi JW Broadcástingpe”.

10. ¿Mbaʼéichapa Salmo 32:6-8 ikatu nepytyvõ reñeñandu vai jave?

¹⁰ Emombeʼupáitekena Jehovápe umi mbaʼe nekevrantáva. Eñeñandu vai jave, esegíkena eñemboʼe chupe. Ejerure asýkena ñande Ru yvagapeguápe tanepytyvõ ehecha hag̃ua pe situasión haʼe ohechaháicha. Ha ejerure avei chupe ‘tanemoarandu ha tohechauka ndéve moõrupipa reho vaʼerã’ (elee Salmo 32:6-8). Jaikuaa ningo ikatuha ijetuʼu ndéve emombeʼu hag̃ua Jehovápe mbaʼéichapa añetehápe reñeñandu. Péro Jehová ontende porãiterei mbaʼeichaitépa hasy hína ndéve la oiko vaʼekue. Haʼe nderayhueterei ha oipota voi emombeʼupaite chupe umi mbaʼe oĩva nde pyʼapýpe (Éx. 34:6; Sal. 62:7, 8).

11. Heʼiháicha Hebreos 12:11, ¿mbaʼérepa ñakonfia vaʼerã Jehová oporokorrehiha mborayhúpe? (Ehecha avei pe rrekuádro “Oĩ jave oñemosẽva kongregasióngui, Jehová ohechauka hína oporohayhuha”).

¹¹ Eapojákena la odesidíva umi ansiáno. Oĩ jave oñemosẽva kongregasióngui, Jehová mborayhúpe okorrehi hína upe persónape. Haʼe ojapo upéva oipytyvõ hag̃ua pe ofalla vaʼekuépe, ha avei pe kongregasión kompletoitépe (elee Hebreos 12:11). Kongregasiónpe ikatu oĩ hína umi oñeʼẽ vaíva la odesidi vaʼekuére umi ansiáno, péro nemanduʼákena umichagua persóna ojapoha jepi upéva odefende ha ndohejavaiséiguinte pe mbaʼe vai apohápe. Péro añetehápe ñande ndajaikuaái hína entéro mbaʼe oiko vaʼekue. Upévare iporãve ñakonfia pe odesidi vaʼekuére pe komite hudisiál. Haʼekuéra ningo oñatende porã ojapo hag̃ua la Biblia heʼíva, ha ohusga hag̃ua “Jehovápe g̃uarã” (2 Crón. 19:6).

12. ¿Mbaʼe iporãvapa ikatu ojehupyty ojeapojáramo Jehová disiplína?

¹² Nde reapojáramo umi ansiáno odesidi vaʼekue, añetehápe ikatu hína reipytyvõ pe oñemosẽ vaʼekuépe oñemoag̃ui jey hag̃ua Jehováre. Elizabeth, pe ermána ajeʼi ñañeʼẽ hague, heʼi: “Ijetuʼuetereíngo kuri chéve ani hag̃ua añekomunika che membykariaʼy oñemosẽ vaʼekuéndi. Péro haʼe ou jey rire Jehovápe, orrekonose omerese hague voi oñemosẽ. Tiémpo rire, haʼe heʼi omombaʼetereiha umi mbaʼe oaprende vaʼekue. Ha che katu aaprende Jehová disiplína siémpre oĩ porãha”. Iména hérava Mark heʼi avei: “Heta tiémpo haguépe che raʼy heʼi chéve mbaʼépa oipytyvõ raʼe chupe ou jey hag̃ua, ha peteĩva hína la ore ndorojeheʼaiete hague hese. Aagradeseterei ningo Jehovápe orepytyvõ haguére oreñeʼẽrendu hag̃ua”.

13. ¿Mbaʼépa ikatu nepytyvõ reñeñandu vai jave?

¹³ Eñemongeta umi ne amígo de konfiánsa ontendétavandi mbaʼéichapa reñeñandu. Ehasa tiémpo umi ermáno ha ermanakuéra ijerovia mbaretévandi nepytyvõtava ani hag̃ua reperde la esperánsa (Prov. 12:25; 17:17). Joanna, pe ermána ajeʼi ñañeʼẽ hague, heʼi: “Che ningo añeñandu kuri cheañoiterei, péro tuicha chepytyvõ añeʼẽ umi che amígo de konfiánsandi”. Péro, ¿mbaʼépa ikatu ejapo oĩramo kongregasiónpe peteĩ heʼíva ndéve peteĩ mbaʼe nemoñeñandu vaivéva?

14. ¿Mbaʼérepa tekotevẽ ‘jasegi ñañoaguanta ha ñañoperdona ñande pyʼaite guive’?

¹⁴ Nepasiénsiakena umi ermáno ha ermanakuérare. Enterove ningo ñaneimperfékto ha jajavýtante voi jepi (Sant. 3:2). Upévare nanesorprendéi vaʼerã oĩramo peteĩ ndoikuaáiva mbaʼépa heʼíta, térã oñemeʼẽʼỹre enkuénta heʼíramo peteĩ mbaʼe nemoñeñandu vaíva. Nemanduʼákena pe konsého omeʼẽ vaʼekuére apóstol Pablo: “Pesegíkena peñoaguanta ha peñoperdona pende pyʼaite guive, oĩramo jepe penembopochýva peteĩ mbaʼére” (Col. 3:13). Peteĩ ermána orekóva ihénte oñemosẽ vaʼekue kongregasióngui heʼi: “Oĩ ningo umi ermáno iñimperfékto rupi chemokyreʼỹsehápe chelastima vaʼekue. Péro Jehová chepytyvõ aperdona hag̃ua chupekuéra”. ¿Mbaʼépa ikatu ojapo pe kongregasión oipytyvõ hag̃ua pe oñemosẽ vaʼekue famíliape?

15. ¿Mbaʼépa ikatu jajapo ñaipytyvõ hag̃ua pe oñemosẽ vaʼekue famíliape?

¹⁵ Jatratákena mborayhúpe pe oñemosẽ vaʼekue famíliape. Peteĩ ermána hérava Miriam heʼi okyhyjeʼimi hague oho hag̃ua rreunionhápe oñemosẽ rire iñermánope. Haʼe heʼi: “Akyhyje kuri apensávo mbaʼépa heʼíta la hénte. Péro heta ermáno ha ermána ombyasy chendive la oiko vaʼekue, ha ndeʼíri hikuái mbaʼeve ivaíva che ermánore. Haʼekuéra chepytyvõ rupi nañeñandúi kuri cheaño pe aime vaietérõ guare”. Ótra ermána heʼi avei: “Oñemosẽrõ guare che membykuimbaʼe, umi ore amigokuéra orerayhuetéva ou orekonsola chéve ha che ménape. Oĩ umi heʼíva oréve ndoikuaaiha mbaʼépa heʼíta. Haʼekuéra hasẽ chendive térã ogueruka chéve peteĩ notíta chemokyreʼỹ hag̃ua. Upe ojapo vaʼekue hikuái tuichaiterei chepytyvõ”.

16. ¿Mbaʼépa ojapo vaʼerã pe kongregasión osegi hag̃ua oipytyvõ pe oñemosẽ vaʼekue famíliape?

¹⁶ Jasegíkena ñaipytyvõ pe oñemosẽ vaʼekue famíliape. Haʼekuéra ningo mas ke núnka oikotevẽ ñamokyreʼỹ ha jahechauka jahayhuha chupekuéra (Heb. 10:24, 25). Sapyʼánte umi oñemosẽ vaʼekue família oñandu oĩha umi ermáno omboykéva chupekuéra ku oñemosẽrõguáicha avei chupekuéra. ¡Aníkena jaheja upéva oiko! Ha koʼýte tekotevẽ jafelisita, ha ñamokyreʼỹ umi imitãva orekóvape isy térã itúa oñemosẽ vaʼekue kongregasióngui. Peteĩ ermána hérava María omombeʼu la oiko vaʼekue iména oñemosẽrõ guare ha oheja ifamíliape. Haʼe heʼi: “Oĩ kuri umi che amigokuéra oúva che rógape oprepara oréve roʼumi vaʼerã, ha chepytyvõ ajapo hag̃ua pe estúdio de família che membykuérandi. Haʼekuéra ningo oñandu la che mbaʼembyasy ha hasẽ chendive. Koʼã ermáno chedefende vaʼekue avei oĩrõ guare oñeʼẽ reíva cherehe. Añetehápe ningo tuichaiterei chemokyreʼỹ hikuái” (Rom. 12:13, 15).

17. ¿Mbaʼépa umi ansianokuéra ikatu ojapo okonsola hag̃ua pe oñemosẽ vaʼekue famíliape?

¹⁷ Ansianokuéra, peaprovechákena káda oportunida perekóva pemombarete hag̃ua pe oñemosẽ vaʼekue famíliape. Koʼýte peẽ pereko la rresponsavilida pekonsolávo umi ermáno orekóvape ihénte oheja vaʼekue Jehovápe (1 Tes. 5:14). Peẽ voi peñemotenonde vaʼerã pemokyreʼỹ hag̃ua chupekuéra oñepyrũ mboyve ha opa rire umi rreunión. Pevisitákena chupekuéra ha peñemboʼe hendivekuéra. Pepredikákena avei hendivekuéra, térã peinvita mimi chupekuéra penemoirũ hag̃ua pende estúdio de famíliape. Umi ansiáno ningo oñangareko vaʼerã Jehová ovechakuéra mimi oñekevrantávare. Avei ombyasy ha ohechauka vaʼerã ohayhuha chupekuéra (1 Tes. 2:7, 8).

18. Heʼiháicha 2 Pedro 3:9, ¿mbaʼépa Ñandejára oipota ojapo umi oheja vaʼekue chupe?

¹⁸ Jehová ningo “ndoipotái avave oñehundi, síno oipota enterove oñarrepenti” (elee 2 Pedro 3:9). Peteĩ persóna opeka vaietereíramo jepe, pe hekove ivaliosoiterei gueteri Ñandejárape g̃uarã. Ñanemanduʼákena Jehová hepyeterei opaga hague enterove pekadór rehehápe: Omeʼẽ voi Itaʼýra ohayhuetéva rekove sakrifísioramo. Jehová ningo mborayhúpe oñehaʼã oipytyvõ umi oheja vaʼekuépe chupe, ikatu hag̃uáicha oñemoag̃ui jey hese. Haʼe oreko la esperánsa haʼekuéra odesiditaha ojapo upéva, ohechaukaháicha pe ehémplo Jesús omoĩ vaʼekue oñeʼẽhápe pe taʼýra ofalla vaʼekuére (Luc. 15:11-32). Heta oĩ umi oñemosẽ vaʼekue, péro upéi oñemoag̃ui jeýva Itúa ohayhuetévare chupekuéra. Ha pe kongregasión ovyʼaiterei orresivi jeývo chupekuéra. Elizabeth, pe ermána ajeʼi ñañeʼẽ hague, ovyʼaiterei kuri imembykariaʼy oĩ jeýma haguére kongregasiónpe. Haʼe imanduʼávo upévare, heʼi: “Aagradeseterei ningo oĩ haguére heta ermáno oremokyreʼỹ vaʼekue ani hag̃ua roperde la esperánsa”.

19. ¿Mbaʼérepa ikatu jasegi jajerovia Jehováre?

¹⁹ Ñande ningo siémpre ikatu jajerovia Jehováre. Kompletoite umi konsého haʼe omeʼẽva ñandéve ñane vienrãnte. Haʼe ningo ñande Túa ñanderayhuetereíva ha ipojera enterove ohayhu ha oadorávandi chupe. Ñaimekuaa segúro Jehová núnka nañanderejamoʼãiha ñaneaño jahasa asy jave (Heb. 13:5, 6). Mark, pe ermáno ajeʼi ñañeʼẽ hague, heʼi: “Jehová núnka ndaorerejái vaʼekue oreaño. Haʼe siémpre orepytyvõ rohasa jave umi situasión ijetuʼúva”. Jehová katuete osegíta omeʼẽ ñandéve “pe podér umi ótra hénte ndorekóiva” (2 Cor. 4:7). Upéicharõ ñande ikatu jasegi ñandefiél Jehovápe, ha jareko esperánsa peteĩ jahayhúva ohejáramo jepe Jehovápe.