Gayo oipytyvõ iñermanokuérape

GAYO ha ambue kristiáno síglo primérope guare ohasa vaʼekue heta situasión ijetuʼúva. Kongregasiónpe oĩ kuri umi omosarambíva enseñánsa japu, ikatu hag̃uáicha omoingo vaipa umi ermánope ha omokangy hag̃ua chupekuéra (1 Juan 2:18, 19; 2 Juan 7). Peteĩ kuimbaʼe hérava Diótrefes “okopi meme” apóstol Juan ha ambue kristianokuérare. Haʼe ndorresiviporãi umi ohóvape ovisita kongregasión, ha omboliga ótrope ojapo hag̃ua avei upéva (3 Juan 9, 10). Koʼã mbaʼe oiko vaʼekue Juan oskrivírõ guare Gáyope áño 98-perupi. Ko kárta héra “Tercera kárta de Juan” ha oĩ Escrituras Griegas Cristiánaspe.

Gayo osegi ifiél Jehovápe ombohováirõ jepe umi mbaʼe ijetuʼúva. ¿Mbaʼéichapa ohechauka ifielha? ¿Mbaʼérepa jasegi vaʼerã iñehémplo? ¿Mbaʼéichapa ñanepytyvõta pe kárta de Juan jahupyty hag̃ua upéva?

Pe oskrivi vaʼekue Tercera de Juan heʼi ijehe haʼeha pe “karai ijedáva”. Péicha Gayo opilláma apóstol Juan oskrivi hague chupe. Juánpe g̃uarã ningo Gayo haʼe itaʼýra espirituál, ha avei heʼi hese: “Che ermáno ahayhuetéva”. Juan heʼi Gáyope hiʼãiteha chupe hesãi ha oñeñandu porã, oĩ porãháicha espirituálmente. Katuete ningo Gayo ovyʼaitereíne raʼe Juan opensa porã haguére hese (3 Juan 1, nóta, 2, 4).

Amalisia Gayo haʼe vaʼekue peteĩ ansiáno de kongregasión, pe kárta ndeʼíriramo jepe upéva. Juan oguerohory chupe pórke orresivi porã umi ermánope hógape, sapyʼánte ndoikuaáiramo jepe chupekuéra. Ñandejára siervokuéra ningo siémpre orresivi porã iñermanokuérape, ha Gayo ojapo rupi upéva Juan ohechakuaa hese ifielha (Gén. 18:1-8; 1 Tim. 3:2; 3 Juan 5).

Umi mbaʼe Juan heʼíva Gáyore ohechauka oĩha ermáno ovisita meméva umi kongregasión ha avei pe lugár pe apóstol oikoha. Ikatu jaʼe koʼã ermáno omombeʼu hague Juánpe umi kongregasión situasión. Oime vaʼerã upévare Juan oikuaa kuri la oikóva umi kongregasiónre.

Umi kristiáno oviaha meméva ningo opytaseve vaʼekue iñermanokuéra rógape, pórke umi posáda herakuã vaieterei, ndaiservisioporãi ha umi hénte hekokyʼa. Opa umívare umi oviaháva opytaseve iñamigokuéra rógape, ha umi kristiáno katu iñermanokuérandi.

Juan ojerure Gáyope orresivi porã jey hag̃ua iñermanokuérape. Heʼi chupe oñatende hag̃ua “hesekuéra Ñandejára oguerohoryháicha”. Upearã omeʼẽ vaʼerã umi ermánope opa mbaʼe oikotevẽtava osegi hag̃ua iviáhe, ha avei og̃uahẽ porã hag̃ua hikuái umi lugár ohosehápe. Gayo ningo ojapo jepi voi upéva oporopytyvõ hag̃ua, upévarente koʼã kristiáno oñeʼẽ porã hese Juánpe (3 Juan 3, 6).

Umi persóna Gayo orresivíva hógape oiméne raʼe misionéro, superintendénte viahánte térã umi ermáno Juan ojokuáiva. Tahaʼe haʼeháicha, oviaha hikuái pe marandu porã rehehápe. Juan heʼi: “Haʼekuéra osẽ kuri opredika Ñandejára réra rehehápe” (3 Juan 7). Pe versíkulo 6-pe Juan oñeʼẽ Ñandejárare, upévare haʼe heʼírõ guare pe versíkulo 7-pe “Ñandejára réra rehehápe” oñeʼẽ Jehová rérare. Koʼã kristiáno haʼe vaʼekue iñermáno, ha omerese ojerresivi porã chupekuéra. Juan oskrivi vaʼekue: “Jareko ovligasión jarresivi porãvo chupekuéra, ikatu hag̃uáicha oñondivepa ñambaʼapo pe añetegua rehehápe” (3 Juan 8).

Juan oskrivi vaʼekue Gáyope ndahaʼéi oagradese hag̃uánte chupe, síno oipytyvõ hag̃ua avei chupe peteĩ situasión ijetuʼúvape. Peteĩ kristiáno hérava Diótrefes ningo ndorresiviporãséi iñermanokuérape. Hiʼarive omboliga voi ótrope ojapo hag̃ua avei upéva (3 Juan 9, 10).

Péro umi kristiáno ifiélva ndopytasemoʼãi voi Diótrefes rógape ikatúramo jepe ojapo upéva. Diótrefes ningo oñemombaʼeguasueterei kongregasiónpe, ha ndorrespetái ni ndoikuaaséi mbaʼeve Juan heʼívagui. Upéicha rupi oñeʼẽ vai pe apóstol rehe ha ótro kristiánore. Upéicharõ jepe Juan ndeʼíriva hese haʼeha peteĩ mboʼehára guaʼu, péro lomímonte Diótrefes norrekonoséi pe autorida orekóva Juan kómo apóstol. Haʼe oñembotuichase ha ndoikói kristiáno teéicha, koʼã mbaʼe ohechauka ijerovia kangyha. Ko situasión ñanemboʼe opavave ohupytyséva umi mbaʼe nokorrespondéiva chupe ha oñemombaʼeguasúva, ikatu hína oporomoingo vai kongregasiónpe. Upévare Juan heʼi kuri Gáyope ha avei ñandéve: “Ani rehaʼanga ivaíva” (3 Juan 11).

Juan omoĩ ehémploramo peteĩ kristiáno héravape Demetrio, idiferentetéva voi Diótrefesgui. Haʼe oskrivírõ guare heʼi umi ermáno oñeʼẽ porãha hese. Avei omombeʼu: “Enterove umi ermáno oñeʼẽ porã Demétriore ha upéva ojekuaa haʼe oiko rupi pe añetegua rapére. Añetehápe ore avei romombeʼu haʼe ojapoha upéva, ha nde reikuaa ore roʼéva añeteha” (3 Juan 12). Amalisia Demetrio oikotevẽ kuri Gayo oipytyvõ chupe, ha Juan oskrivíne raʼe avei pe kárta ikatu hag̃uáicha ojekuaa Demétriope ha orrekomenda hag̃ua chupe. Ikatu oime Demetrio voi ontrega raʼe Gáyope pe kárta. Oimérire Juan omondo kuri Demétriope, térã ko ermáno haʼe voi peteĩ superintendénte viahánte, katuete okonfirma raʼe la Juan oskrivi vaʼekue hese.

¿Mbaʼérepa Juan ojerure vaʼekue Gáyope osegi hag̃ua orresivi porã enterovépe ojapómarõ voi upéva? ¿Noiméi piko opensa tekotevẽha oñemokyreʼỹ chupe osegi hag̃ua ipyʼaguasu? ¿Okyhyjépa raʼe peichahágui Gayo oúrõ g̃uarã ndorresivivéi umi ermánope, Diótrefes oñehaʼãgui ojoko ha omosẽse kongregasióngui umi ojapóvape upéva? Tahaʼe haʼéva la omomýi vaʼekue Juánpe, haʼe omokyreʼỹ Gáyope oskrivírõ guare: “Pe ojapóva iporãva ou Ñandejáragui” (3 Juan 11). Añetehápe, upéva ñanemokyreʼỹ jasegi hag̃ua jajapo pe iporãva.

¿Omokyreʼỹpa ko kárta Gáyope osegi hag̃ua orresivi porã iñermanokuérape? Katuete oiméne oipytyvõ raʼe chupe, pórke oñemoĩ la Bíbliape ikatu hag̃uáicha entéro kristiáno osegi iñehémplo ha péicha ojapo meme pe “iporãva”.

Oĩ ningo hetave mbaʼe ndajaikuaáiva Gáyogui, péro umi mbaʼe jaikuaáva chugui ñanemboʼe heta mbaʼe.

Primero, oĩ ermáno ifiélva oviaháva mombyry omboʼe hag̃ua pe añetegua, upévare jaagradese vaʼerã koʼãichagua ermánope. Koʼág̃a rupi naentéroi umi kristiáno oviaha mombyry oikuaauka hag̃ua pe marandu porã. Péro ñande ikatu jaaprovecha umi superintendénte de sirkuíto ha hembireko ovisita jave ñane kongregasión jaapoja ha ñamokyreʼỹ hag̃ua chupekuéra. Péicha jajapóramo jasegíta Gayo ehémplo. Ikatu avei ñaipytyvõ umi ermáno ha ermánape ohóva ótro lugárpe oservi hag̃ua oĩvehápe nesesida, tahaʼe hetãme voi térã ótro tetãme. Jajapóramo koʼã mbaʼe jasegi hína ko konsého: “Akóintekena perresivi porã pende rapichakuérape” (Rom. 12:13; 1 Tim. 5:9, 10).

Segundo, nañanesorprendéi vaʼerã sapyʼánte oĩramo kongregasiónpe umi opuʼãva pe autorida Ñandejára omoĩvare. Upéicha ningo oiko vaʼekue ymave Juan ha Páblore (2 Cor. 10:7-12; 12:11-13). Upévare, ¿mbaʼépa jajapóta oñepresentárõ koʼãichagua situasión ñane kongregasiónpe? Pablo heʼi vaʼekue Timotéope: “Ñande Ruvicha rembiguái natekotevẽi oñorairõ avavéndi, síno imbaʼeporã vaʼerã enterovéndi. Ikatupyry vaʼerã oporomboʼe hag̃ua ha ohechauka vaʼerã ojejokokuaaha ojetrata vai jave chupe. Ohekomboʼe vaʼerã pyʼaguapýpe porãnte umi naiñeʼẽrenduséivape”. Ñañehaʼãramo ñandepyʼaguapy oĩrõ jepe ñandetrata vaíva, ikatu hína kon el tiémpo ou okambia umi persóna. Jehová ikatu “omomýi chupekuéra okambia hag̃ua ikorasõ, ikatu hag̃uáicha oikuaa porã pe añetegua” (2 Tim. 2:24, 25).

Tercero, jafelisita vaʼerã umi ermáno osegívape ifiél oĩrõ jepe oñemoĩ vaʼekue ikóntrape, ha javalora chupekuéra. Juan omokyreʼỹ vaʼekue Gáyope, upévare katuete ipyʼaguapýne raʼe heʼírõ guare chupe oĩ porãha la ojapóva. Umi ansiáno osegíramo Juan ehémplo oipytyvõta avei iñermanokuérape ani hag̃ua ikaneʼõ (Is. 40:31; 1 Tes. 5:11).

Pe kárta Juan oskrivíva Gáyope idióma griégope oreko 219 palávrante. Kóva haʼe hína pe lívro mbykyvéva oĩva la Bíbliape. Upéicharõ jepe, ko lívro ideprovechoiterei enterove kristiáno ñane tiempopeguápe.