Visión ohechaukáva umi oikóvape yvágape

“Peteĩ tróno [oĩ] yvágape ha oĩ peteĩ oguapýva pe trónope. Pe oguapýva pe trónope omimbipa, haʼete peteĩ ita vera hérava háspe, haʼete avei peteĩ ita iporãitereíva ha pytãva; ha pe tróno jerére oĩ peteĩ árko íris, haʼetéva peteĩ ita vera hérava esmerálda” (Apocalipsis 4:2, 3).

“Ijerekuévo katu omimbipa, haʼete [árko íris] osẽva okýrõ. Péicha ojechauka Ñandejára rekomimbipa” (Ezequiel 1:27, 28).

Koʼã visión ohecha vaʼekue apóstol Juan ha proféta Ezequiel, ohechauka porã mbaʼeichaitépa Jehová ipoderóso ha ndaijojahái. Upearã oipuru umi mbaʼe ndahasyietéva ñandéve ñañeimahina hag̃ua, por ehémplo, peteĩ árko íris, umi ita vera iporãmba jepéva ha peteĩ tróno omimbipáva. Koʼã mbaʼe ontendeka ñandéve pe lugár Jehová oĩha iporã ha itrankiloitereiha, ha igustoitereiha oñeime upépe.

Koʼã mbaʼe oho porãiterei umi mbaʼe oskrivi vaʼekuére pe salmísta: “Jehová ningo ipoderosoiterei, haʼe omerese jaadora chupe. Jakyhyje vaʼerã Ñandejáragui, jakyhyje rangue umi ótro diósgui. Jehová hína pe yvága apohare. Entéro umi ótro dios orekóva umi puévlo ndovaléi mbaʼeverã. Ñandejára oĩ peteĩ lugár iporãiterei ha omimbipávape, upe lugár ningo sagrádo. Upépe ojehecha tuichaha ijautorida ha mbaʼeichaitépa ipoderóso” (Salmo 96:4-6, TNM).

Jehová ipoderosoitereíramo jepe, oipota ñañemboʼe chupe ñañemoag̃ui hag̃ua hese, ha oasegura voi ñanerendutaha (Salmo 65:2). Ñandejára ningo ñanderayhueterei ha oñeinteresa ñanderehe. Upévare apóstol Juan ndodudaiete kuri oskrivi hag̃ua: “Ñandejára haʼe [...] mborayhu” (1 Juan 4:8).

“[Pe disípulo Esteban] henyhẽ espíritu sántogui, omaña porã pe yvágare, ha ohecha Ñandejára rekomimbipa ha Jesúspe oñemboʼyha Ñandejára deréchape. Upévo heʼi: ‘¡Péina! Ahecha pe yvága ojavri ha pe Yvypóra Raʼy oñemboʼyha Ñandejára deréchape’” (Hechos 7:55, 56).

Esteban ohechárõ guare ko visión oñeʼẽ hína kuri umi omoakãvandi umi hudío rrelihión, haʼekuéra ramoite ojukauka kuri Jesúspe. Upe visión ohechauka porã Jesús oikove jey hague ha oñemeʼẽha chupe tuicha autorida. Apóstol Pablo oñeʼẽ hína kuri upévare heʼírõ guare: “[Jehová omopuʼã] Crístope omanóva apytégui ha omboguapy chupe ideréchape yvágape. Omoĩ chupe yvateve opaichagua goviérno, autorida, mburuvicha ha opa téragui, ha ndahaʼéi ko tiémpopente, síno avei amo gotyove” (Efesios 1:20, 21).

La Biblia omombeʼu Jesús orekoha tuicha autorida, péro ndahaʼéi upévante, omombeʼu avei haʼe ojepyʼapyetereiha yvyporakuérare, ojapoháicha avei Jehová. Oĩ aja ko yvy ape ári, Jesús omonguera vaʼekue opaichagua mbaʼasy, ha omopuʼã jey umi omanóvape. Haʼe ohechauka ohayhuetereiha Ñandejárape ha yvyporakuérape omanóvo ñanderehehápe (Efesios 2:4, 5). Jesús oguapy hína Ñandejára deréchape, ha koʼẽrõitéma oipurúta pe autorida oñemeʼẽ vaʼekue chupe ovendesi hag̃ua umi iñeʼẽrendúvape.

“[Che, proféta Daniel,] ahecha oñemoĩ guapyha guasúpe peteĩ Itujaitéva oguapy hag̃ua [...]. Heta millones oservi ichupe; ha heta 100 millones oñemboʼy henondépe” (Daniel 7:9, 10, Ñande Ruete Ñeʼẽ Bíblia [ÑÑB]).

Ko visiónpe, Daniel ohecha oĩha yvágape hetaiterei ánhel, ndahaʼéi peteĩmínte mbaʼéva. ¡Oiméne omopirĩmba raʼe chupe ohechávo ko visión! Umi ánhel ningo espíritu iñintelihénteva, ipoderósova ha hekomimbipáva. Káda uno oreko irrángo, por ehémplo oĩ umi serafín ha keruvín. La Bíbliape oñemensiona umi ánhelpe mas de 250 vése.

Umi ánhel ndahaʼéi yvypóra oiko vaʼekue yma ko yvy ape ári. Heta tiémpo Ñandejára ojapo mboyve yvyporakuérape, ojapóma vaʼekue umi ánhelpe. Haʼekuéra omaña hína kuri ojejapórõ guare ko yvy ha vyʼapópe ombotuicha Ñandejárape (Job 38:4-7).

¿Mbaʼéichapa Ñandejára ojokuái koʼág̃a umi ánhel ifiélvape? Haʼekuéra oipytyvõ hína ojepredika hag̃ua opárupi pe marandu porã oñeʼẽva Ñandejára Rréinore. Upéva hína pe traváho iñimportantevéva ojejapóva hína ko yvy ape ári (Mateo 24:14). Apóstol Juan ohecha vaʼekue peteĩ visión ohechaukáva umi ánhel oipytyvõha hína ko tembiapópe. Haʼe oskrivi: “Ahecha ótro ánhel ovevéva yvága mbytére, orekóva marandu porã opytátava opa ára g̃uarã. Haʼe oikuaauka ko marandu umi oikóvape ko yvy ári, entéro tetã, trívu, puévlo ha umi oñeʼẽvape opaichagua idiómape” (Apocalipsis 14:6). Ñane tiémpope umi ánhel noñeʼẽvéima yvyporakuérandi ojapo haguéicha yma. Péro lomímonte ogia hína umi opredikávape ikatu hag̃uáicha omog̃uahẽ pe notísia porã umi hénte ipyʼaporãvape.

“Oiko peteĩ gérra yvágape: Miguel [Jesucristo] ha hiʼanhelkuéra oñorairõ pe dragón kóntrape, ha pe dragón ha hiʼanhelkuéra oñorairõ ikontrapekuéra. Péro haʼekuéra noganái, ha ndaiporivéima hendag̃uakuéra yvágape. Upévare, oñemombo yvy gotyo pe dragón guasúpe, haʼéva pe mbói ypykue oñehenóiva Diablo ha Satanás, ombotavýva hína ko múndo kompletoitépe. Chupe oñemombo yvy gotyo ha hiʼanhelkuérape oñemombo hendive” (Apocalipsis 12:7-9).

Yvyporakuéra oñepyrũ ramoitépe voi, peteĩ ánhel opuʼã vaʼekue Jehová kóntrape, ha péicha oiko chugui Satanás, heʼiséva “oñemoĩva ótrore”. Haʼe ojapo upéva oipotaiterei rupi ojeadora chupe. Upéi oĩ vaʼekue avei hetave ánhel omoirũva chupe ha oiko chuguikuéra demónio. Satanás ha idemoniokuéra káusare ndojeikói vaʼekue pyʼaguapýpe yvágape peteĩ tiémpore. Haʼekuéra iñañaiterei, oñemoĩ Jehováre ha ogueraháma hetaiterei yvypórape tape vaíre.

Satanás ha idemoniokuéra ipyʼahatãiterei ha ivaívante voi oreko iñakãme. Haʼekuéra ndohayhuiete yvyporakuérape ha hetáma ombohasa asy umi héntepe. Por ehémplo, Satanás ojukapa vaʼekue Jóbgui hymbakuéra ha isiervokuéra. Job oreko vaʼekue 10 ifamília, ha Satanás ojevale peteĩ yvytu atãre oity hag̃ua pe óga oĩ haguépe hikuái, ha péicha omanombaite Job familiakuéra. Upéi Satanás “omyenyhẽ Jóbpe kuru vaígui ipy guive iñakã meve” (Job 1:7-19; 2:7).

Péro koʼẽrõitéma Satanás ndojapomoʼãvéima koʼã mbaʼe vai. Ojepoi guive chupe ko yvy ape ári, haʼe oikuaáma “mbykypaitemaha itiémpo” (Apocalipsis 12:12). Ñandejára okondenáma Satanáspe. ¡Ajépa iporãite ko notísia!

“[Nde, Jesús,] rejogua Ñandejárape g̃uarã umi hénte oúva opaichagua trívu, puévlo, ha tetãgui, ha oñeʼẽva opaichagua idióma. Ha rejapo chuguikuéra rréi ha saserdóte Ñandejárape g̃uarã, ha ogovernáta hikuái pe yvy” (Apocalipsis 5:9, 10).

Jesús oho vaʼekue yvágape oikove jey rire, ha oĩ avei hetave hénte ohótava upépe. Haʼe heʼi vaʼekue ijapostolkuéra ifiélvape: “Aháta aprepara pene rendag̃ua. Ha [...] aju jeýta ha porresivíta che rógape, ikatu hag̃uáicha peẽ peime che aĩháme avei” (Juan 14:2, 3).

¿Mbaʼépa ojapóta yvágape umi ohóva upépe? Haʼekuéra ogovernáta Jesús ndive. Ha pe Rréino oĩtahápe hikuái koʼẽrõitéma ogovernáta ko yvy kompletoite ha ovendesíta yvyporakuérape. Jesús oñeʼẽ vaʼekue ko Rréinore omboʼérõ guare idisipulokuérape mbaʼéichapa oñemboʼe vaʼerã. Haʼe heʼi: “Ore Ru reiméva yvágape, toñemomarangatu nde réra. Tou ne Rréino, tojejapo ne rembipota yvy ape ári yvagapeguáicha” (Mateo 6:9, 10).

“[Che, apóstol Juan,] ahendu peteĩ ñeʼẽ oúva pe trónogui ha heʼi hatãva: ‘¡Péina! Ñandejára róga oĩta yvyporakuérandi [...]. Haʼe omokãmbaitéta hesaykuéra, ndaiporimoʼãvéima omanóva, oñembyasýva, hasẽva ni hasýva. Umi mbaʼe yma guare ohasapáma’” (Apocalipsis 21:3, 4).

Ko visión ohechauka mbaʼéichapa jaikóta ág̃a Ñandejára Rréino ohundi vove Satanás goviérno ha ojapo ko yvýgui peteĩ paraíso. Ko Rréinope ogoverna Jesús ha umi ohóva yvágape ko yvy ape árigui. Haʼekuéra oipeʼaitéta umi mbaʼe ombohasa asyetéva yvyporakuérape. Pe ñemano jepe ndaiporimoʼãvéima.

Péro oĩ hetaiterei hénte omano vaʼekue ndohomoʼãiva yvágape. ¿Mbaʼépa oikóta chuguikuéra? Haʼekuéra oikove jeýta ko yvy ape ári, ha ikatúta oiko pára siémpre pe paraísope (Lucas 23:43).