Ñanepasiénsiakena ñahaʼarõ aja Jehová ñandesalva

 1. ¿Mbaʼérepa ikatu nañanepasiensiavéi?

ÁÑO 1914-pe oñepyrũ oisãmbyhy Ñandejára Rréino oĩva Jesucristo pópe, ha upe guive ko múndo aña oike umi ára pahápe. Upérõ avei oiko peteĩ ñorairõ yvágape ha Jesús oity ko yvy ape ári Satanás ha umi demóniope (elee Revelación 12:7-9). La Biblia heʼi Satanás “mbykypaitemaha itiémpo” (Rev. 12:12, NM). Upéicharõ jepe, ‘pe tiémpo mbykýva’ hiʼaréma haimete 100 áño, ha oĩ kristiáno opensáva umi ára paha ipukuetereimaha. ¿Mbaʼépa ñande ñapensa? ¿Ñanepasiénsiapa ñahaʼarõ aja Jehová ohundi ko múndo aña?

 2. ¿Mbaʼépa jahecháta ko artíkulope?

² Nañanepasiensiavéirõ ikatu jajapo heta mbaʼe ñapensa porãʼỹre ha tuicha jajeperhudika. ¿Mbaʼépa ñanepytyvõta ñanepasiénsia hag̃ua ñahaʼarõ aja Jehová ñandesalva? Ko artíkulope oñembohováita koʼã porandu: 1) ¿Mbaʼéichapa Miqueas ehémplo ñanepytyvõ ñanepasiénsia hag̃ua? 2) ¿Mbaʼe mbaʼépa oiko vaʼerã jaikuaa hag̃ua natekotevẽveimaha ñahaʼarõ? 3) ¿Mbaʼéichapa ikatu jaagradese Jehovápe ipasiénsia haguére?

 3. ¿Mbaʼéichapa oĩ vaʼekue Israel Miqueas tiémpope?

³ (Elee Miqueas 7:2-6.) Miqueas ohecha mbaʼéichapa umi isrraelíta naiñeʼẽrenduvéi Jehovápe, ha koʼýte iñañave hikuái rréi Acaz tiémpope. Pe proféta heʼi umi isrraelíta korrúpto ojoguaha “ñuatĩme” ha “ñuatĩndy guasúpe”. Koʼã ñanáicha avei haʼekuéra operhudika oimeraẽ oñemoag̃uívape hesekuéra. Isituasionkuéra ivaieterei, ni umi oñohénteva ndojoayhuvéi. Miqueas ohechakuaa ndaikatumoʼãiha okambia umi isrraelítape, upémarõ oñemboʼe ipyʼaite guive ha oheja Jehová pópe upe situasión. Oikuaa porã Ñandejára añoite ikatutaha osolusiona umi provléma itiempoitépe.

 4. ¿Mbaʼe mbaʼépa ikatu ñambohovái koʼág̃arupi?

⁴ Oiko haguéicha Miqueas tiémpope, koʼág̃arupi hetaiterei hénte opensa ijehénte. Oĩ heta ‘imalagradesídova, oporombotavýva ha ndohayhúiva ihéntepe’ (2 Tim. 3:2, 3, NM). Opavavépe ñandestorva jahechávo ñane vesinokuéra ha ñane kompañéro de estúdio térã de traváho opensaha ijehénte. Upéicharõ jepe oĩ heta Jehová siérvo ombohováiva umi situasión ijetuʼuvéva koʼã mbaʼégui. Jesús heʼi vaʼekue umi omoirũva chupe ohasa asytaha ihentekuéra opersegi rupi chupekuéra. Umi mbaʼe heʼi vaʼekue ojogua Miqueas 7:6-pe oĩvape. Jesús heʼi: “Aju aporomoingo vai hag̃ua, upévare taʼýra opuʼãta túvare, ha sýre opuʼãta imembykuña, ha nuéra opuʼãta isuégra rehe. Añetehápe, pende rogaygua voi haʼéta pene enemígo” (Mat. 10:35, 36, NM). ¡Ajépa ijetuʼuete oĩramo ñane hénte oñembohorýva ñanderehe ha ñanemaltratáva ndahaʼéi haguére irrelihiongua! Oiméramo jahasa koʼã mbaʼe, ñañehaʼãmbaitéke ani hag̃ua ipuʼaka ñanderehe hikuái. Upéva rangue ñaneñeʼẽrendu meme vaʼerã Jehovápe ha jaheja ipópe upe situasión. Jajeruréramo chupe tañanepytyvõ, haʼe katuete ñanemombaretéta ha ñanemoarandúta ñambohovái hag̃ua umi mbaʼe ijetuʼuetéva.

5, 6. a) ¿Mbaʼéichapa Jehová ovendesi Miquéaspe ipasiénsia haguére? b) ¿Mbaʼe profesíapa Miqueas ndohechái oñekumplívo?

⁵ Jehová ovendesi Miquéaspe ipasiénsia haguére. Miqueas ohecha mbaʼéichapa oñehundi Acaz ha igoviérno ivaietéva. Avei ohecha ojupírõ guare ogoverna hendaguépe Ezequías, Acaz raʼy, ha mbaʼéichapa ko rréi oipytyvõ umi isrraelítape omombaʼeguasu jey hag̃ua Jehovápe. Miqueas oprofetisa vaʼekue Samaria oñehunditaha, ha haʼe ohecha mbaʼéichapa oñekumpli pe profesía umi asírio ojagarrárõ guare pe rréino de 10 trívu Israelgua (Miq. 1:6).

⁶ Péro Miqueas ndohechái oñekumplívo opa mbaʼe Jehová heʼi vaʼekue chupe oprofetisa hag̃ua. Por ehémplo, haʼe oskrivi: “Umi ára pahápe pe sérro oñemopuʼã haguépe ñande Ruete róga guasu, oikóta sérro akãramo ambue serrokuéra apytépe ha tetãnguéra oñembyatýta upépe. Hetaiterei tetãygua og̃uahẽta ha heʼíta: ‘Pejúke ha jajupi yvága Jára sérrope’” (Miq. 4:1, 2, ÑÑB). Miqueas omano vaʼekue heta tiémpo oñekumpli mboyve ko profesía, upéicharõ jepe haʼe ojedesidíma kuri iñeʼẽrendutaha Jehovápe, toiko la oikóva. Upéicha rupi heʼi vaʼekue: “Ambue tetãnguéra omombaʼeguasúramo jepe ijára guaʼúpe, ore roikóta ñande Ruete oipotaháicha tapia g̃uarã” (Miq. 4:5, ÑÑB). Miqueas ojerovia vaʼekue Jehová okumplipaitetaha ipromesakuéra, upévare ipasiénsia ha oaguanta umi tiémpo ijetuʼuetévape. Upeichaite, ko proféta iñeʼẽrenduetéva ojerovia Jehováre ipyʼaite guive.

7, 8. a) ¿Mbaʼérepa koʼýte jajerovia vaʼerã Ñandejárare? b) ¿Mbaʼépa jajapo vaʼerã pe tiémpo pyaʼeve ohasa hag̃ua?

⁷ ¿Jajeroviápa Jehováre Miqueas ojapo haguéicha? Ñande ningo jahecháma oñekumpliha Miqueas profesía, upévare koʼýte jajerovia vaʼerã Ñandejárare. Jaike rire “umi ára pahápe” hetaiterei hénte opa tetãygua, trívu ha idióma ojupi “yvága Jára sérrope”. Heta oĩ oúva umi tetã oñoenemígovagui, upéicharõ jepe haʼekuéra ojapo “ikyse pukúgui [...] hiʼaradorã” ha ni mbaʼevéicharõ noñorairõséi hapichakuérandi (Miq. 4:3, ÑÑB). ¡Ajépa javyʼaite ñaime haguére Jehová puévlope oĩháme pyʼaguapy!

⁸ Oime vaʼerã jaipotaitereíma Jehová ohundi ko múndo aña. Upéicharõ jepe, tekotevẽ ñapensa Jehová opensaháicha ikatu hag̃uáicha ñanepasiénsia ñahaʼarõ aja og̃uahẽ upe ára. Haʼe omoĩma peteĩ ára ohusga hag̃ua yvyporakuérape “peteĩ kuimbaʼe Haʼe oiporavo vaʼekue rupive”, Jesucristo (Hech. 17:31, NM). Péro og̃uahẽ mboyve upe ára, omeʼẽ oportunida opaichagua héntepe ikatu hag̃uáicha “oikuaa porã pe añetegua”, ojapo umi mbaʼe oaprendéva ha ojesalva (elee 1 Timoteo 2:3, 4). Ñañemeʼẽmbaitéramo ñamboʼe hag̃ua ñande rapichakuérape pe añetegua oĩva la Bíbliape, haʼetéta ñandéve pe tiémpo pyaʼeve ohasáva. Koʼẽrõite, ñaimoʼãʼỹve jave og̃uahẽta pe tiémpo ñahaʼarõitéva. Ha oiko vove upéva, javyʼaitereíta ñañemeʼẽmbaite haguére japredika hag̃ua pe marandu porã.

9-11. ¿Oñekumplímapa 1 Tesalonicenses 5:3?

⁹ (Elee 1 Tesalonicenses 5:1-3.) Koʼẽrõitéma ojejapóta ko anúnsio: “¡Jaikóma pyʼaguapýpe ha kyhyjeʼỹme!”. Ikatu hag̃uáicha ñaime preparádo oñemeʼẽ vove ko anúnsio, tekotevẽ jasegi Pablo konsého: “Japyta guei japayhápe ha akóinte ñapensa hekopete” (1 Tes. 5:6, NM). Jahechamína umi mbaʼe oikómava oñekumpli mboyve ko profesía. Upéva ñanepytyvõta ñañatende porã ha jajerovia mbareteve hag̃ua.

¹⁰ Oiko rire umi mokõi gérra mundiál, tetãnguéra heʼijoa oñehaʼãtaha omoĩ hag̃ua pyʼaguapy ko yvy ape ári. Por ehémplo, pe primera gérra mundiál rire oñemoĩ pe Liga de Naciones ikatu hag̃uáicha ogueru pyʼaguapy. Ha pe segunda gérra mundiál rire katu hetaiterei tapicha oñepyrũ ojerovia pe Naciones Unidas rehe. Mburuvichakuéra ha umi omoakãva rrelihión ohechauka ojeroviaha koʼã mokõi organisasión rehe. Oimoʼã hikuái péicha oñemoĩtaha pyʼaguapy ko yvy ape ári. Pe Naciones Unidas oanunsia vaʼekue 1986 haʼeha Año Internacional de la Paz. Upe áñope heta omoakãva polítika ha rrelihionkuéra oñembyaty Asíspe (Italia) pe omoakãva ndive Iglésia Katólika, oñemboʼe hag̃ua pyʼaguapy rehehápe.

¹¹ Péro koʼã mbaʼe ningo nokumplíri gueteri pe profesía oĩva 1 Tesalonicenses 5:3-pe. ¿Mbaʼérepa jaʼe upéva? La Biblia heʼi umi hénte oanunsia rire oĩmaha pyʼaguapy, “upepete oimoʼãʼỹve jave oñehundíta hikuái”, ha jahechakuaa upéva ndoikoiha gueteri.

12. ¿Mbaʼépa jaikuaa pe anúnsio ojejapótavagui?

¹² ¿Mávapa oanunsiáta ‘jaikomaha pyʼaguapýpe ha kyhyjeʼỹme’? ¿Mbaʼéichapa opartisipáta umi omoakãva umi kristiáno guaʼúpe ha avei umi ótro rrelihiónpe? ¿Mbaʼéichapa opartisipáta umi mburuvicha heta tetãygua? La Biblia nomombeʼúi upéva. Ndajaikuaái ningo mbaʼéichapa ojejapóta upe anúnsio, péro katuete oĩta heta hénte ojeroviáva hese. Upéicharõ jepe ñande jaikuaa upe anúnsio peteĩ japuha. Satanás osegíta ogoverna ko múndo itujupaitémava ha naipohãvéimava. Upévare, aníkena jaheja ñanembotavy ni jajeheʼa polítikare.

13. ¿Mbaʼérepa umi ánhel ojoko hína umi yvytu oguerútava pe ñehundi guasu?

¹³ (Elee Revelación 7:1-4.) Ñahaʼarõ aja oñekumpli 1 Tesalonicenses 5:3, umi ánhel ipoderósova ojoko hína umi yvytu oguerútava pe jehasa asy guasu. ¿Mbaʼépa ohaʼarõ hikuái? Apóstol Juan heʼi ojesellapa raẽ vaʼerãha “Ñandejára rembiguaikuérape”, térã umi unhídope.a Ojesellapa rire koʼã unhídope, umi ánhel ndojokomoʼãvéima umi yvytu oguerútava pe ñehundi guasu. ¿Mbaʼépa oikóta upe rire?

14. ¿Mbaʼépa ohechauka Babilonia Guasu oñehundi potaitemaha?

¹⁴ Babilonia guasu, térã entéro rrelihión japu oñehundietéta ha umi “hénte, puévlo, tetãnguéra ha umi oñeʼẽva opaichagua idióma” ndaikatumoʼãi oipytyvõ chupe. Koʼág̃a oikóma heta mbaʼe ohechaukáva oñehundi potaitemaha (Rev. 16:12; 17:15-18, NM; 18:7, 8, 21). Pyʼỹinte umi médio de komunikasión otaky rrelihionkuérare ha umi omoakãvare chupekuéra, ha upéva ohechauka heta hénte ndojeroviaveimaha hesekuéra. Upéicharõ jepe, umi omoakãva Babilonia Guasu oimoʼã natekotevẽiha ojepyʼapy. ¡Tuichaite piko ojavy hikuái! Ojeʼe rire ‘jaikomaha pyʼaguapýpe ha kyhyjeʼỹme’, umi goviérno opuʼãta umi rrelihión japúre ha ohundipaitéta chupekuéra. Babilonia Guasu opytáta tesaráipe. Ajépa iñimportantete ñanepasiénsia ñahaʼarõ aja oiko koʼã mbaʼe (Rev. 18:8, 10).

15. ¿Mbaʼérepa Jehová ndojapurái ogueru hag̃ua hiʼára guasu?

¹⁵ Oĩramo jepe heta hénte omongyʼáva Jehová réra, haʼe ipasiénsia ha ohaʼarõ pe tiémpo ikatutahápe okorrehi pe situasión. ¿Mbaʼérepa? Haʼe ningo ndoipotái oñehundi ni peteĩ ipyʼaporãva (2 Ped. 3:9, 10). ¿Ñapensápa avei Jehová opensaháicha? Og̃uahẽ mboyve Jehová ára guasu, ikatu jahechauka heta hendáicha jaagradeseha chupe ipasiénsia haguére. Jahechamína mbaʼéichapa.

16, 17. a) ¿Mbaʼérepa ñaipytyvõ vaʼerã umi ermáno inaktívope? b) ¿Mbaʼérepa tekotevẽterei oñemoag̃ui jey Jehováre umi inaktívo?

¹⁶ Ñaipytyvõkena umi ermáno inaktívope. Jesús heʼi vaʼekue ojevyʼaitereiha yvágape ojetopa jey jave peteĩ ovecha okañy vaʼekue (Mat. 18:14; Luc. 15:3-7). Jehová oñeinteresa ipyʼaite guive entéro ohechauka vaʼekuére ohayhuha héra, jepe koʼag̃aite ndoservíri hína chupe. Ñaipytyvõramo koʼãichagua ermánope oñemoag̃ui jey hag̃ua kongregasiónre, ñambovyʼa hína Jehová ha hiʼanhelkuérape.

¹⁷ ¿Nde piko reñemomombyry raʼe kongregasióngui? Ikatu peteĩ ermáno nembopochy rakaʼe. Oiméramo aréma oiko upéva, eñeporandumína: “¿Aiko porãvépa koʼág̃a ha avyʼave? ¿Jehová piko pe chembopochy vaʼekue, térãpa peteĩ yvypórante? ¿Chetrata vai mbaʼe piko raʼe Jehová?”. Ñandejára ningo akóinte ipyʼaporã ñanendive. Ha jafalláramo jepe hendive, omeʼẽ ñandéve heta mbaʼe porã javyʼa hag̃ua (Sant. 1:16, 17). Aníkena ñanderesarái Jehová ára hiʼag̃uimbaitemaha. Tekotevẽ koʼág̃a ñañemoag̃ui ñande Ru ñanderayhuetévare ha avei kongregasión rehe. Upéicha añoite ikatúta jagueropuʼaka koʼã ára paha (Deut. 33:27; Heb. 10:24, 25).

18. ¿Mbaʼérepa ñaneñeʼẽrendu vaʼerã umi omotenondévape kongregasión?

¹⁸ Ñaneñeʼẽrendúke umi omotenondévape kongregasión. Jehová ningo pe Ovecharerekua ñanderayhuvéva. Haʼe omoĩ Itaʼýrape ñanesãmbyhy ha oñangareko hag̃ua ñanderehe (1 Ped. 5:4). Ha oĩ avei hetaiterei ovecharerekua oñatendéva káda ermáno oĩvare umi 100 mil ári kongregasiónpe (Hech. 20:28). Ñaneñeʼẽrendúramo umi omotenondévape kongregasión, jahechauka Jehová ha Jesúspe jaagradeseha chupekuéra opa mbaʼe ojapóvare ñanderehehápe.

19. ¿Mbaʼépa ñanepytyvõta ñañemoag̃ui hag̃ua ñane ermanokuérare?

¹⁹ Ñañemoag̃uíkena ojuehe. ¿Mbaʼépa heʼise upéva? Por ehémplo, ymave ojatakáramo peteĩ ehérsitope, umi soldádo oñemoag̃uimbaite ojuehe. Péicha ojoprotehe hikuái ha pe enemígo ndaikatúi oike ijapytepekuéra. Koʼág̃arupi avei Satanás ohaʼã mbareteve oikóvo Jehová puévlope. Upévare naiporãmoʼãi ñañepyrũramo jaiko vaipa ñane ermanokuéra ndive. Upéva rangue, ñañehaʼã vaʼerã ñañemoag̃uive ojuehe ha ani ñamaña umi ermáno deféktorente. Avei jasegi meme vaʼerã umi konsého Jehová omeʼẽva ñandéve ha jajerovia hese.

20. ¿Mbaʼépa jajapo vaʼerã koʼág̃a?

²⁰ Opavavénte tekotevẽ jajerovia mbarete ‘ñahaʼarõ aja Ñandejára ñandesalva’. Koʼẽrõitéma ojeʼéta ‘jaikomaha pyʼaguapýpe ha kyhyjeʼỹme’, ha oñemoĩta pe último séllo umi unhído hembývare ko yvy ape ári. Jahechaukákena ñanepasiensiaha ñahaʼarõ aja koʼã mbaʼe. Upe rire umi cuatro ánhel ndojokomoʼãvéima umi yvytu oguerútava pe ñehundi guasu ha entéro rrelihión japu oñehundíta avei. Ñahaʼarõ aja oiko koʼã mbaʼe iñimportantetéva, ñaneñeʼẽrendu vaʼerã umi omotenondévape Ñandejára organisasión. Ñañemoag̃uíkena ñane ermanokuérare ñañedefende hag̃ua Satanás ha idemoniokuéragui, ha jasegi ko konsého: “Penekyreʼỹ ha penembaretékena, opavave peẽ pejeroviáva Jehováre” (Sal. 31:24, NM).