Pe aty guasu ombotuicha Ñandejárape ha Crístope

 1. ¿Mbaʼépa oiko vaʼekue peteĩ mitãrusúre ohendu rire peteĩ diskúrso asambleahápe 1935-pe?

OĨ VAʼEKUE peteĩ família haʼéva Estudiánte de la Biblia, oñehenoiháicha upérõ umi testígo de Jehovápe. Pe matrimónio oreko vaʼekue mbohapy mitãkuimbaʼe ha mokõi mitãkuña. Ha omboʼe chupekuéra oservi hag̃ua Jehovápe, ha osegi hag̃ua Cristo Jesús ehémplo. Peteĩva umi mitãkuimbaʼe ojevautisa vaʼekue 1926-pe, orekórõ guare 18 áño. Oiko haguéicha entéro Estudiánte de la Biblia upe tiémpope guarére, ko mitãrusu ifiélva oimoʼã vaʼekue orekoha la esperánsa ohóvo yvágape. Upévare haʼe hoʼu vaʼekue káda áño pe pan ha pe víno Konmemorasión jave. Péro iñesperánsa okambiaite ojejapo rire peteĩ diskúrso iñimportantetereíva hérava: “Pe aty guasu”. Upe diskúrso ojapo vaʼekue Joseph Rutherford 1935-pe peteĩ asambléa ojejapo vaʼekuépe Washington, Estados Unídospe. ¿Mbaʼépa oñemyesakã vaʼekue upe asambléape?

 2. ¿Mbaʼe iñimportántevapa omyesakã vaʼekue ermáno Rutherford idiskúrsope?

² Upe diskúrsope ermáno Rutherford omyesakã mávapa umi oĩva pe ‘aty guasúpe’ oñeñeʼẽha Apocalipsis 7:9-pe. Upe tiémpo peve oñepensa vaʼekue ko grúpo ohotaha avei yvágape, péro nogovernamoʼãiha Jesús ndive ijerovia kangyve rupi umi unhídogui. Ermáno Rutherford oipuru la Biblia omyesakã hag̃ua pe aty guasúpe ndojeporavói hague oho hag̃ua yvágape, péro haʼekuéra haʼeha umi ótro ovechakuérab orekóva Cristo, ohasataha hikuái pe ‘jehasa asy guasu’ ha oikovetaha pára siémpre ko yvy ape ári (Apoc. 7:14). Jesús ningo opromete vaʼekue: “Areko ótro ovechakuéra, oĩva ótro korápe, umívape avei aguerúta ha haʼekuéra ohendúta che ñeʼẽ. Péicha oikóta chuguikuéra peteĩ ovecha atýnte, ha peteĩ pastór oñangarekóta hesekuéra” (Juan 10:16). Koʼã “ótro ovechakuéra” haʼe umi testígo de Jehová ifiélva, orekóva la esperánsa oikóvo pára siémpre peteĩ paraísope ko yvy ape ári (Mat. 25:31-33, 46). Jahechamína mbaʼéichapa ko entendimiénto pyahu okambia vaʼekue heta Jehová siervokuéra rekove, umíva apytépe pe mitãrusu ñañeʼẽma hague (Sal. 97:11; Prov. 4:18).

3, 4. ¿Mbaʼépa heta ohechakuaa vaʼekue iñesperánsare pe asambléa ojejapo vaʼekuépe 1935-pe, ha mbaʼérepa?

³ Igustoiterei vaʼekue upe asambleahápe pe diskursánte heʼírõ guare umi ohendúvape chupe: “Entéro orekóva esperánsa oikóvo ko yvy ape ári, ikatúpa peñemboʼymi”. Peteĩ ermáno oĩ vaʼekue upe asambleahápe omombeʼu alamita rasa umi oĩva upépe oñemboʼy hague. Upéi ermáno Rutherford heʼi: “¡Pemañamína! Koʼãva hína pe aty guasu”. Upe rire enterove umi oĩ vaʼekue upépe osapukái vyʼágui. Umi oñemboʼýva ontende porã Jehová ndoiporavói hague chupekuéra oho hag̃ua yvágape. Haʼekuéra ohechakuaa Ñandejára ndoipurúi hague ijespíritu oiporavo hag̃ua chupekuéra. Al día sigiénte upe asambleahápe 840 persóna ojevautisa, ha la majoría oĩ vaʼekue umi ótro ovechakuéra apytépe.

⁴ Ojejapo rire upe diskúrso, pe mitãkariaʼy ajeʼi ñañeʼẽ hague ha avei hetaiterei ermáno, ndoʼuvéi pe pan ha pe víno Konmemorasión jave. Heta ermáno oñeñandu vaʼekue peteĩ ermáno iñumíldeva oñeñandu haguéicha. Haʼe heʼi: “Che última ves haʼu vaʼekue pe pan ha pe víno upe Konmemorasión ojejapo vaʼekuépe 1935-pe. Ahechakuaa Ñandejára ndacheporavói hague ijespíritu sánto rupive areko hag̃ua la esperánsa aikóvo yvágape. Upéva rangue, areko la esperánsa aikóvo ko yvy ape ári ha ambaʼapo avei oiko hag̃ua chugui peteĩ paraíso” (Rom. 8:16, 17; 2 Cor. 1:21, 22). Upe tiémpo guive, amás día heta hetave umi oĩva pe aty guasúpe, ha ombaʼapo kyreʼỹ hikuái umi unhído hembývandi ko yvy ape ári.c

 5. ¿Mbaʼépa Jehová opensa umi ndoʼuvéivare pe pan ha pe víno Konmemorasión jave?

⁵ ¿Mbaʼépa opensa Jehová umi ndoʼuvéi vaʼekuére pe pan ha pe víno Konmemorasionhápe 1935 rire? Ha ñamoĩ chupe ko tiémpope peteĩ Testígo vautisádo oguerovia hoʼu vaʼerãha pe pan ha pe víno Konmemorasión jave, péro upéi ontende ndojeporavói hague chupe espíritu sánto rupive. ¿Mbaʼépa Jehová opensáne hese? (1 Cor. 11:28). Oĩ umi ojapo vaʼekue upéva nontendeporãi rupi mbaʼe esperánsapa oreko. Péro haʼekuéra orrekonoséramo ojavy hague, ndoʼuvéi pe pan ha pe víno, ha osegi oservi fiélmente Jehovápe, haʼe katuete oaseptáta chupekuéra oĩ hag̃ua umi ótro ovechakuéra apytépe. Haʼekuéra lomímonte oho Konmemorasionhápe ndoʼuvéiramo jepe pe pan ha pe víno, pórke omombaʼeterei la ojapo vaʼekue hesehapekuéra Jehová ha Jesús.

 6. ¿Mbaʼépa Jesús omanda vaʼekue umi ánhelpe?

⁶ Koʼẽrõitéma ningo oñepyrũta pe jehasa asy guasu. Upévare katuete ñanemokyreʼỹetereíta jahecha jeýramo mbaʼépa heʼi Apocalipsis kapítulo 7 umi unhídore, ha umi ótro ovechakuéra oĩvare pe aty guasúpe. Jesús omanda vaʼekue umi ánhelpe osegi hag̃ua ojoko umi yvytu oporohundíva oúva umi 4 ládo ko yvýgui. Haʼekuéra ndopoimoʼãi umi yvytúgui ojesellapa peve entéro umi unhídope. Upéva heʼise Jehová heʼitamaha hesekuéra ifielha (Apoc. 7:1-4). Haʼekuéra ifiél haguére oikóta chuguikuéra rréi ha saserdóte Crístondi yvágape (Apoc. 20:6). Jehová, Jesús ha umi ánhel ovyʼaitereíta ág̃a umi 144.000 unhído orresivi vove iprémio yvágape.

 7. Ohechaukaháicha Apocalipsis 7:9, 10, ¿mbaʼépa ohecha vaʼekue Juan, ha mbaʼépa ojapo hína raʼe hikuái? (Ehecha pe taʼanga oĩva ko rrevísta apére).

⁷ Oñeʼẽ rire umi 144.000 rréi ha saserdótere, Juan ohecha peteĩ mbaʼe ñanemopirĩmbáva: “Peteĩ aty guasu” ojesalváva Armagedónpe. Koʼã mokõi grúpo ningo idiferénte ojuehegui pórke pe ‘aty guasúpe’ noĩri 144.000 persónante, síno hetaitereive, ha ndajaikuaái voi mboýpa exáktamente oĩta hikuái (elee Apocalipsis 7:9, 10). Haʼekuéra “omonde ao puku morotĩ asýva”, upéva ohechauka haʼekuéra ndohejái hague ‘Satanás múndo omongyʼa chupekuéra’, ha osegi hague ifiél Ñandejárape ha Crístope (Sant. 1:27). Pe aty guasu osapukáita vyʼágui, ha heʼíta: “Pe salvasión ou Ñandejáragui, pe oguapýva pe trónope, ha pe Ovecha Raʼýgui”. Haʼekuéra oreko avei ipópe palméra rakã ha upéva ohechauka haʼekuéra vyʼápe oasepta hague Jesús haʼeha pe Rréi Jehová oiporavo vaʼekue (ekompara Juan 12:12, 13 heʼívare).

 8. ¿Mbaʼépa heʼi Apocalipsis 7:11, 12 Jehová família oĩvare yvágape?

⁸ (Elee Apocalipsis 7:11, 12). ¿Mbaʼépa oiko raʼe umi oĩva yvágape ohechárõ guare pe aty guasúpe? Juan ohecha vaʼekue pe visiónpe enterove oĩva yvágape ovyʼaiterei, ha omombaʼeguasu hague Ñandejárape ohechárõ guare umi oĩvape pe aty guasúpe. Jehová família oĩva yvágape ovyʼaitereíta ág̃a oñekumpli vove ko visión, ha ohecha hikuái pe aty guasu osẽha pe jehasa asy guasúgui.

 9. Heʼiháicha Apocalipsis 7:13-15, ¿mbaʼépa ojapo hína koʼág̃arupi pe aty guasu?

⁹ (Elee Apocalipsis 7:13-15). Juan omombeʼu umi oĩva pe aty guasúpe ‘ojohéi hague ijao pe Ovecha Raʼy ruguýpe, ha ijaokuéra opyta hague morotĩ asy’. Upéva heʼise haʼekuéra ikonsiénsia potĩha, ha Ñandejára oguerohoryha chupekuéra (Is. 1:18). Haʼekuéra ningo oñemeʼẽma Ñandejárape ha ojevautisáma. Avei ojerovia mbarete hikuái Jesús sakrifísiore, ha oreko peteĩ amista iporãva Jehovándi (Juan 3:36; 1 Ped. 3:21). Upévare haʼekuéra ikatu oñemboʼy Ñandejára tróno renondépe “ha oservi chupe ára ha pyhare” ko yvy ape ári. Koʼág̃arupi haʼekuéra ikyreʼỹeterei ha ojapo la majór párte pe traváho ojepredika ha ojejapo hag̃ua disípulo. Chupekuéra g̃uarã Ñandejára Rréino iñimportanteve voi opa mbaʼégui (Mat. 6:33; 24:14; 28:19, 20).

10. ¿Mbaʼe rehepa oĩ segúro pe aty guasu, ha mbaʼe promésapa ohecháta hikuái oñekumpli?

¹⁰ Pe aty guasu ojesalvátava pe jehasa asy guasúpe oĩ segúro Jehová osegitaha oprotehe chupekuéra, pórke la Biblia heʼi: “Pe oguapýva pe trónope, oñangarekóta hesekuéra”. Umi ótro ovechakuérape hiʼãitereíma ohecha oñekumplívo ko promésa: “Ñandejára omokãmbaitéta umi hénte resay, ha ndaiporimoʼãvéima omanóva, oñelamentáva, hasẽva ni hasýva” (Apoc. 21:3, 4).

11, 12. a) Heʼiháicha Apocalipsis 7:16, 17, ¿mbaʼe vendisiónpa ohupytýta umi oĩva pe aty guasúpe? b) ¿Mbaʼépa ikatu ojapo umi ótro ovechakuéra Konmemorasionhápe, ha mbaʼérepa?

¹¹ (Elee Apocalipsis 7:16, 17). Ko ñane tiémpope oĩ Ñandejára siervokuéra ohasáva ñembyahýi ndorekói rupi pláta ojogua hag̃ua hembiʼurã, térã osufríva umi gérra káusare. Oĩ avei umi ojegueraháva kárselpe oservi haguére Ñandejárape. Upéicharõ jepe, umi oĩva pe aty guasúpe ovyʼaiterei oikuaávo oñehundi rire ko múndo aña, siémpre orekotaha hetaiterei hiʼupy ha oaprendetaha hetaiterei mbaʼe Jehovágui. Ág̃a Jehová ohundi vove Satanás múndo, haʼe ojaseguráta oprotehe hag̃ua pe aty guasúpe ani hag̃ua ohapy chupekuéra ipochykue ojoguáva arahakúpe. Ha opa rire pe jehasa asy guasu, Jesús ogiáta umi ojesalvávape oĩháme “y oporomoingovéva”. Upéva heʼise oipytyvõtaha chupekuéra oikove hag̃ua pára siémpre. Ñapensamíntena, pe aty guasu oreko peteĩ esperánsa ijojahaʼỹva: Millones de persóna ningo oĩ ko yvy ape ári, ha umíva apytégui haʼekuéra oreko la posivilida núnka nomanóivo (Juan 11:26).

¹² Umi ótro ovechakuéra ningo oagradeseterei Jehová ha Jesúspe pe esperánsa porãite orekóvare hikuái. Jehová ndoiporavóiramo jepe chupekuéra oiko hag̃ua yvágape, haʼe ohayhueterei chupekuéra ohayhuháicha umi unhídope. Umi unhído ha umi ótro ovechakuéra ningo ikatu ombotuicha Ñandejárape ha Crístope. Por ehémplo ikatu ojapo upéva oĩvo Konmemorasionhápe.

13, 14. ¿Mbaʼérepa umi unhído hembýva ha umi ótro ovechakuéra oho vaʼerã Konmemorasionhápe?

¹³ Umi áño ohasa vaʼekuépe, umi ohóva apytégui Konmemorasiónpe, 1.000 persóna apytégui peteĩnte hoʼu jepi pe pan ha pe víno. Upéicharõ hetaitereive kongregasión oĩvape ko múndope, ndaipóri ni peteĩ hoʼúva pe pan ha pe víno Konmemorasionhápe. Upéva heʼise la majoría umi ohóva upépe orekoha la esperánsa oikóvo pára siémpre ko yvy ape ári. ¿Mbaʼérepa upéicharõ haʼekuéra oho pe Konmemorasiónpe? Ñamoĩmína peteĩ ehémplo: ¿Mbaʼérepa ñande jaha jepi peteĩ ñane amígo kasamientohápe? Jahechaukase rupi jahayhu ha jaapojaha umi nóviope. Upéicha avei umi ótro ovechakuéra oho Konmemorasionhápe ohechaukase rupi ohayhu ha oapojaha Crístope ha umi unhídope. Haʼekuéra oho avei oagradeseterei rupi pe sakrifísio Jesús ojapo vaʼekuére, pórke upéva rupive añoite haʼekuéra oreko la oportunida oikovévo pára siémpre ko yvy ape ári.

¹⁴ ¿Mbaʼérepa avei umi ótro ovechakuérape iñimportanteterei oho pe Konmemorasiónpe? Okumplise rupi hikuái pe mandamiénto Jesús oheja vaʼekue. Jesús omoñepyrũrõ guare pe Konmemorasión, heʼi vaʼekue umi ijapóstol ifiélvape: “Pesegíkena pejapo kóva penemanduʼa hag̃ua cherehe” (1 Cor. 11:23-26). Upéicharõ, umi ótro ovechakuéra osegíta oho Konmemorasionhápe oĩ aja unhído ko yvy ape ári. Avei oinvita hikuái opa ikatúvape oho hag̃ua hendivekuéra ko rreunión iñimportantetévape.

15. ¿Mbaʼépa ikatu jajapo ñambotuicha hag̃ua Ñandejárape ha Crístope pe Konmemorasión aja?

¹⁵ Pe Konmemorasión aja ñande ikatu ñambotuicha Ñandejárape ha Crístope japurahéivo ha ñañemboʼévo oñondivepa. Pe diskúrso ko áñope g̃uarã héra: “Jahechaukákena jaagradeseha Ñandejára ha Jesús ojapo vaʼekue ñanderehehápe”. Ko diskúrso ñanepytyvõta ñamombaʼeve hag̃ua Jehovápe ha Crístope. Upévare ág̃a oñembohasa vove pe pan ha pe víno, jajepyʼamongetákena mbaʼépa orrepresenta hína umíva: Jesús rete ha huguy. Ñapensase avei mbaʼeichaitépa Jehová ñanderayhu ohejávo Itaʼýra omano ñande vése ikatu hag̃uáicha ñande jaikove (Mat. 20:28). Enterove umi ohayhúva ñande Ru yvagapeguápe ha Itaʼýrape ohóta Konmemorasionhápe.

16. ¿Mbaʼe mbaʼépepa ojojogua umi unhído ha umi ótro ovechakuéra?

¹⁶ Ikatu jaʼe umi unhído ha umi ótro ovechakuéra ojojoguaha, pórke Jehová peteĩchaite ohayhu mokõive grúpope. Enterovete iñimportánte chupe g̃uarã. Ñande jaikuaa upéva haʼe opaga haguére el mísmo présio umi unhídore ha umi ótro ovechakuérare: Itaʼýra ohayhuetéva rekove. La diferénsia orekóva koʼã mokõi grúpo haʼe hína pe esperánsa orekóva hikuái. Péro mokõive grúpo osegi vaʼerã ifiél Ñandejárape ha Crístope (Sal. 31:23). Ha ñanemanduʼa vaʼerã Ñandejára espíritu ikatuha ombaʼapo peteĩchaite oipytyvõ hag̃ua enterove Ñandejára siervokuérape. Upéva heʼise Jehová omeʼẽha ijespíritu sánto asegún mbaʼépa káda persóna oikotevẽ, tahaʼe umi unhídope térã umi ótro ovechakuérape.

17. ¿Mbaʼépa hiʼãitereíma oiko umi unhído hembývape?

¹⁷ Umi unhído ningo ndahaʼéi onasére orekómava pe esperánsa ohóvo yvágape, síno Ñandejára omoĩ upéva ikorasõmekuéra. Haʼekuéra opensa upe iñesperánsare, oñemboʼe upévare ha hiʼãitereíma chupekuéra orresivi pe iprémio yvágape. Umi unhído ningo ni ndoikuaái mbaʼéichatapa hete térã ipínta ág̃a oho vove yvágape (Filip. 3:20, 21; 1 Juan 3:2). Péro chupekuéra hiʼãitereíma ojotopa Jehovándi, Jesús, umi ánhel ha umi ótro unhidokuérandi. Avei oĩsetereíma hikuái pe lugár otokávape chupekuéra pe Rréinope yvágape.

18. ¿Mbaʼépa umi ótro ovechakuérape hiʼãitereíma oiko?

¹⁸ Umi ótro ovechakuéra ningo oreko pe esperánsa oikóvo pára siémpre ko yvy ape ári, ha upéva hína peteĩ deséo enterove yvypóra orekóva onasérema voi (Ecl. 3:11). Chupekuéra ekapadetereíma og̃uahẽ pe día ikatutahápe ojapo ko yvýgui peteĩ paraíso. Hiʼãitereíma chupekuéra og̃uahẽ pe tiémpo ikatutahápe omopuʼã hogarã, ojapo peteĩ hardín ha oiko chuguikuéra perfékto. Haʼekuéra voi hesãita ha avei umi ifamiliakuéra (Is. 65:21-23). Haʼekuéra ningo oviahaseterei ko múndo tuichakuére ohecha hag̃ua umi montáña, kaʼaguy, umi mar, ha ostudia entéro mbaʼe Jehová okrea vaʼekue. Péro ovyʼaitereive hikuái oikuaávo oñemoag̃uivetaha Jehováre, ha pe amista orekóva hendive amás día imbaretevetaha ohóvo.

19. ¿Mbaʼe oportunidápa jareko káda uno pe Konmemorasión aja, ha mbaʼe féchapa hoʼáta ko áñope?

¹⁹ Jehová ningo omeʼẽ káda uno isiervokuérape peteĩ esperánsa iporãitereíva (Jer. 29:11). Pe Konmemorasión aja, káda uno jareko peteĩ oportunida espesiál. Upépe ikatu ñambotuicha Ñandejárape ha Crístope upe ojapo vaʼekuére ñanderehehápe ikatu hag̃uáicha jaiko pára siémpre. Pe Konmemorasión haʼe pe rreunión iñimportantevéva ojapóva káda áño umi kristiáno tee. Ko áño 2021-pe, upéva hoʼáta ág̃a sábado 27 de marzo. Ko áñope, heta lugárpe oĩta umi ikatúva oho lívremente ko rreunión iñimportantetévape. Ótro katu ojapóta upéva oĩramo jepe opersegíva chupekuéra. Ha oĩ avei umi ojapótava pe Konmemorasión kárselpe. Tahaʼe haʼéva ñane situasión, ñanemanduʼákena Jehová, Jesús, umi ánhel ha umi unhído orresusitáma vaʼekue omañataha hína ñanderehe. Ha hiʼãite entéro kongregasión, grúpo ha persóna ohasa porãite pe Konmemorasión.