1914​: Peteĩ áño iñimportánteva pe profesíape

HETA áño og̃uahẽ mboyve 1914, oĩvaʼekue peteĩ aty ostudiáva la Biblia heʼivaʼekue upe áñope oikovaʼerãha heta mbaʼeguasu. Mbaʼépa rakaʼe umíva? Mbaʼépa ohechauka pe áño 1914 iñimportantehague?

Jesús heʼivaʼekue Lucas 21:​24-pe: ‘Jerusalén rehe umi tetãnguéra opyrũmbáta, og̃uahẽ meve pe tiémpo oñemeʼẽvaʼekue tetãnguérape’, térã ‘umi Gentil ára’, heʼiháicha pe Biblia Reina-Valera 1865-pe guare. Jerusalén haʼevaʼekue umi hudío retã kapitál, ha upégui oisãmbyhyvaʼekue umi rréi oúva David famíliagui (Salmo 48:​1, 2). Péro, koʼã rréi ndahaʼeivaʼekue umi tetãnguéra oguerekóvaicha. Haʼekuéra oguapyvaʼekue ‘Jehová trónope’, térã oisãmbyhyvaʼekue Ñandejára rerápe (1 Crónicas 29:23). Upéicharõ, Jerusalén orrepresentavaʼekue Jehová sãmbyhy.

Mbaʼéichapa ha arakaʼépa, oñepyrũrakaʼe umi tetãnguéra opyrũmba Ñandejára sãmbyhýre? Ko mbaʼe oikovaʼekue pe áño 607-pe ñande ára mboyve, Jerusalén hoʼárõ guare Babilonia poguýpe. Pe ‘Jehová tróno’ opytavaʼekue nandi, ha opa umi rréi oúva David famíliagui (2 Reyes 25:​1-26). ‘Oñepyrũtapa’ Jerusalén rehe opa árare? Nahániri. Pe profesía oĩva Ezequiélpe omombeʼu ojeʼehague Sedequíaspe, pe último rréi oĩva Jerusalénpe: ‘Tojepeʼa pe akã rehegua, ha tojei pe koróna. Kóva [...] noñemeʼẽmoʼãi avavépe ou peve pe oguerekóva derécho legál ha ameʼẽvaʼerã [kóva] chupe’ (Ezequiel 21:26, 27). Jesucristo haʼe pe oguerekóva ‘derécho legál’ oñemeʼẽ hag̃ua chupe David koróna (Lucas 1:​32, 33). Upéicharõ, umi tetãnguéra ‘opyrũta’ Jerusalén rehe oiko peve Jesúsgui Rréi.

Arakaʼépa oikovaʼerã ko mbaʼeguasu? Jesús ohechaukavaʼekue umi gentil (térã umi ndahaʼéiva hudío) ogovernavaʼerãha peteĩ tiémpore. Daniel kapítulo cuatro ohechauka arakaʼépa opavaʼerã ko tiémpo. Upépe oñemombeʼu peteĩ rréi Babiloniaygua, hérava Nabucodonosor, ohechahague iképe umi mbaʼe oikótava. Haʼe ohecha mbaʼéichapa ojeity peteĩ yvyra máta kakuaa. Ha imatakue ojejokua iérro ha kóvrepe ani hag̃ua hoky jey. Upe rire peteĩ ánhel heʼivaʼekue: ‘Tohasa hiʼári siete tiémpo’ (Daniel 4:​10-16).

La Bíbliape sapyʼánte ojeporu umi yvyra máta oñeñeʼẽ hag̃ua umi goviérnore (Ezequiel 17:​22-24; 31:​2-5). Upéicharõ, ojeity pe yvyra máta heʼise ojepeʼataha Ñandejára sãmbyhy, térã umi rréi oĩva Jerusalénpe ha ogovernáva Ñandejára rérape. Péro ko mbaʼe ohechavaʼekue pe rréi iképe ohechaukavaʼekue avei umi tetãnguéra nopyrũmoʼãiha Jerusalén rehe opa árare, hiʼaretaha uvei ‘siete tiémpo’. Mboýpa ipuku koʼã tiémpo?

Revelación 12:​6, 14 ohechauka tres tiempos y medio haʼeha ‘mil doscientos sesenta día’. Upéicharõ, ‘siete tiémpo’ ipukúta 2.520 día. Péro Jerusalén hoʼa rire, umi tetãnguéra nopyrũi Ñandejára sãmbyhýre 2.520 día ajánte. Upéicha jahecha ko profesía oñeʼẽhague hetave tiémpogui. Jahekáramo Números 14:34 ha Ezequiel 4:​6, jahecháta koʼã mokõi hendápe oñeñeʼẽha ‘peteĩ día peteĩ áñore’. Upéicharõ umi siete tiémpo ipuku 2.520 áño.

Umi 2520 áño oñepyrũvaʼekue octúbrepe, pe áño 607-pe ñande ára mboyve. Upéramo Jerusalén hoʼa Babilonia poguýpe, ha oipeʼa hikuái pe rréi oúva David famíliagui. Ha pe tiémpo opa octubre 1914-pe. Upérõ, opa ‘pe tiémpo oñemeʼẽvaʼekue tetãnguérape’, ha Ñandejára ojapo Jesucrístogui Rréi yvágapea (Salmo 2:​1-6; Daniel 7:​13, 14).

Jesús heʼivaʼekue ogoverna jave yvágape ‘ipresénsia’ aja, oikotaha heta mbaʼeguasu ko múndope, umíva apytépe ñorairõ, ñembyahýi, yvyryrýi ha péste (Mateo 24:​3-8; Lucas 21:11). Ha upeichaite oiko. Koʼã mbaʼe oikóvare jaikuaa porã pe áño 1914-pe Ñandejára Rréino yvagapegua oñepyrũhague oisãmbyhy, ha oñepyrũhague pe ‘ára paha’ ko múndo añáme (2 Timoteo 3:​1-5).