OÑEPORANDÚVA JEPI

Juan el Bautista tiémpope, “umi hénte ohaʼarõjoa og̃uahẽ pe Cristo ha upévare enterovénte oñepyrũ okalkula ipyʼapypekuéra Juan rehe: ‘¿Ndahaʼeichénepa kóva hína pe Cristo?’” (Luc. 3:15). ¿Mbaʼérepa umi hudío okalkula upe fécharupi og̃uahẽtaha pe Mesías? Jahechamína.

Jesús onase rire, Jehová ánhel ojechauka umi ovecharerekuápe Belén ypýrupi. Haʼekuéra oĩ pe ñúre ha oñatende hína hymbakuérare. Pe ánhel heʼi: “Koestedía David vállepe onase upe pendesalvátava, upéva hína Cristo ñande Ruvicha”. Upéi “ou pe ánhel rendápe hetaitereive ánhel ha omombaʼe Ñandejárape heʼívo: ‘Toñembotuicha Ñandejárape yvágape, ha ko yvy ape ári taipyʼaguapy umi hénte Ñandejára oguerohorýva’” (Luc. 2:8-11, 13, 14).a

Ko notísia porãite katuete opokóne raʼe umi ovecharerekua korasõre. Upepete osẽ oho Belénpe ha otopávo José, María ha pe veveʼíre, “oñepyrũ omombeʼu hikuái pe ojeʼe vaʼekue chupekuéra pe mitãʼíre. Entéro ohendúvante umi mbaʼe heʼíva umi ovecharerekua, ijurujaipa opytávo” (Luc. 2:17, 18). Pe téxtope heʼívo “entéro ohendúvante” ohechauka koʼã ovecharerekua omombeʼu hague hetave persónape upe oiko vaʼekue. Upéi ‘umi ovecharerekua oho jeývo hógape, ombotuicha ha omombaʼe Ñandejárape opaite umi mbaʼe ohecha ha ohendu vaʼekuére, ojeʼe hagueichaite chupekuéra’ (Luc. 2:20). Ojekuaa porã umi ovecharerekua ndahaʼéi ku ohóva oñemokirirĩ umi marandu porãre, síno omombeʼu kyreʼỹme.

Upéi og̃uahẽvo pe día oñemopotĩ hag̃ua hikuái, Moisés Léi heʼiháicha, María ogueraha pe mitãme Jerusalénpe ohechauka hag̃ua Jehovápe. Upérõ pe kuñakarai oprofetisáva hérava Ana, “oñepyrũ oagradese Ñandejárape. Avei oñeʼẽ pe mitãre, entéro umi hénte ohaʼarõvape oñemosãso Jerusalén” (Luc. 2:36-38; Éx. 13:12). Péicha iñasãi ohóvo opárupi pe notísia og̃uahẽma hague pe Mesías.

Upéi “kuarahyresẽguio ou Jerusalénpe umi karai oadivináva omañávo estrellakuérare, ha heʼi: ‘¿Moõiko oime pe hudiokuéra rréi onase vaʼekue? Rohecha ningo ijestrélla kuarahyresẽ gotyo ha upévare roju romombaʼe hag̃ua chupe’” (Mat. 2:1, 2). Ohendúvo upéva, “rréi Herodes ipyʼatarovaite ha opa umi hénte oĩva Jerusalénpe avei. Upémarõ ohenoika umi saserdóte ruvichakuéra ha umi mboʼehára leipeguápe ha oporandu chupekuéra moõpa onase vaʼerã pe Cristo” (Mat. 2:3, 4). Péicha heta héntepe og̃uahẽ ko notísia porã: ¡pe Mesías oñepromete vaʼekue og̃uahẽma!b

Pe jatopávare Lucas 3:15-pe ikatu jaʼe oĩ hague umi hudío apytépe opensáva Juan el Bautista haʼe hague pe Cristo. Péro Juan voi ohechauka ndahaʼeiha upéicha heʼívo: “Che rire oútava katu imbareteve hína chehegui ha namereséi ni isandália aipeʼa chupe. Haʼe pendevautisáta espíritu sánto ha tatápe” (Mat. 3:11). Ohendu rire Juánpe, koʼýte oiméne umi hénte ohaʼarõ pe Mesíaspe.

¿Ikatúpa jaʼe umi hudío okalkula hague pe fécha og̃uahẽtaha pe Mesías orekóvo enkuénta pe profesía oñeʼẽva umi 70 semánare? Ndaikatúi jaʼe ndojapói hague hikuái upéva, péro ndajaikuaái avei oimépa oreko raʼe enkuénta upéva. Péro si jaʼekuaa Jesús tiémpope umi hudío ontende hague diferentepa ko profesía, ha ni peteĩva ndojasertái pe ontende lája.c

Peteĩ sékta rrelihiósa hudía hérava esénios, omboʼe vaʼekue og̃uahẽtaha mokõi Mesías opakuévo umi cuatrocientos noventa áño. Péro ndajaikuaái oiporúpa raʼe hikuái proféta Daniel heʼi vaʼekue okalkula hag̃ua umi fécha. Ha ñamoĩ chupe oiporu hague hikuái pe profesía, lomímonte umi ótro hudío ndaikatumoʼãi oikuaa pe informasión, pórke umi esénio oiko vaʼekue apárte, mombyry umi héntegui ha ndojeheʼaguasúi avavére.

Síglo segúndope, umi ótro hudío opensa umi 70 semána oñepyrũ hague oñehundírõ guare pe primer témplo áño 607-pe, ha opa hague áño 70-pe umi rrománo ohundírõ guare pe segundo témplo. Oĩ avei opensáva ko profesía oñekumpli hague umi makavéo tiémpope, upéva oñepyrũ amo áño 170-rupi Jesús ou mboyve. Upéicharõ jahechakuaa umi hudío ontende hague diferentepa mbaʼéichapa oñekumpli upe profesía.

Ojekuaárire arakaʼetépa oñekumpli raʼe upe profesía, umi apóstol ha umi kristiáno oiko vaʼekue síglo primérope katuete oiporúta kuri ohechauka hag̃ua Jesús haʼeha pe Mesías, pórke haʼe ou vaʼekue kavalete pe profesía heʼi haguéicha. Péro ndaipóri ni peteĩ pruéva ohechaukáva umi kristiáno ojapo hague upéva.

Avei jareko vaʼerã enkuénta umi kuimbaʼe oskrivi vaʼekue Jesús rekovekue, katuete imanduʼa jepi ilívrope mbaʼéichapa oñekumpli Jesús rehe umi profesía oĩva Escrituras Hebréaspe (Mat. 1:22, 23; 2:13-15; 4:13-16). Péro ni peteĩva naimanduʼái pe profesía oñeʼẽva umi 70 semánare.

Upéicharõ, ndaikatúi jaʼe umi hudío Jesús tiémpope ontende hague hekoitépe pe profesía oñeʼẽva umi 70 semánare. Péro umi mbaʼe jatopávare umi cuatro lívro omombeʼúvape Jesús rekovekue, ojekuaa porã mbaʼérepa haʼekuéra ohaʼarõ og̃uahẽ pe Mesías.