‘Espíritu sánto omomýi chupekuéra’

“Pe profesía ndojeʼeivaʼekue yvyporakuéra oipotágui, síno umi kuimbaʼe oñeʼẽ Ñandejára rérape espíritu sánto omomýigui chupekuéra.” (2 PED. 1:21, NM)

REJEPYʼAMONGETA HAG̃UA

¿Mbaʼéichapa Jehová oiporu pe espíritu sánto omombeʼu hag̃ua imensáhe umi kuimbaʼe ohaívape la Biblia?

¿Mbaʼépa ohechauka la Biblia ouha Ñandejáragui?

¿Mbaʼépa rejapovaʼerã káda día akóinte remombaʼe hag̃ua Ñandejára Ñeʼẽ?

 1. ¿Mbaʼérepa ñaikotevẽ Ñandejára Ñeʼẽ?

¿MOÕGUIPA jaju? ¿Maʼerãpa ñaime koʼápe? ¿Mbaʼépa oikóta ñandehegui? ¿Mbaʼérepa oĩ hetaite provléma ko múndope? ¿Mbaʼépa oiko ñandehegui ñamano rire? Heta hénte oñeporandu koʼã mbaʼe. Péro, ¿mbaʼéicha piko ñambohováita koʼã porandu iñimportantetéva Ñandejára Ñeʼẽʼỹre? Ndajarekóirire la Biblia ñaaprendétakuri ñande kostíllare térã umi mbaʼe jahasáva rupivémante. Ha upéicharire, ndaikatuivaʼerãmoʼã jaʼe pe salmísta heʼivaʼekue ‘Jehová léi’ rehe (elee Salmo 19:7).

 2. ¿Mbaʼépa ñanepytyvõta ñamombaʼeve hag̃ua la Biblia, pe jopói oúva Ñandejáragui?

² Heta tapicha ymave ohayhuvaʼekue la Biblia, péro koʼág̃a ndoguerohoryvéi umi mbaʼe heʼíva (embojoja Revelación 2:4 rehe). Upéicha rupi ndoikovéima hikuái Jehová oipotaháicha (Isa. 30:21). Ñande ndajahejaivaʼerã oiko upéva ñanderehe, síno ñañehaʼãmbaitevaʼerã akóinte ñamombaʼe Ñandejára Ñeʼẽ ha opa mbaʼe ñanemboʼéva. La Biblia peteĩ jopói oúva ñande Apohare ñanderayhuetévagui (Sant. 1:17). ¿Mbaʼépa ñanepytyvõta ñamombaʼeve hag̃ua “Ñandejára Ñeʼẽ”? Jajepyʼamongetavaʼerã jahecha hag̃ua mbaʼéichapa ojeporu umi kuimbaʼépe ohai hag̃ua la Biblia. Upéva heʼise jahechavaʼerãha mbaʼérepa jaʼe la Biblia ouha Jehovágui. Upéva ñanemokyreʼỹta jalee hag̃ua la Biblia káda día ha jasegi ikonsého (Heb. 4:12).

¿MBAʼÉICHAPA PE ‘ESPÍRITU SÁNTO OMOMÝI CHUPEKUÉRA’?

 3. ¿Mbaʼéichapa pe ‘espíritu sánto omomýi’ profetakuérape ha umi kuimbaʼe ohaivaʼekuépe la Biblia?

³ La Biblia ohai 40 kuimbaʼe rupi 1610 áño pukukue, áño 1513 Jesús ou mboyve guive, áño 98 Jesús ou rire peve. Enterove koʼã kuimbaʼépe ‘omomýi espíritu sánto’, ha ijapytepekuéra oĩvaʼekue avei proféta (elee 2 Pedro 1:20, 21). Gríegope pe ñeʼẽ “omomýi” ojeporu avei ojeʼe hag̃ua “ojeguerahaha ágotyo ha amógotyo” peteĩ mbaʼe, ha ikatu ojetradusi “omonguʼe” térã “omyaña”.a Hechos 27:15-pe avei ojeporu ko ñeʼẽ oñemombeʼu hag̃ua pe yvytu omomýi ha oguerahaha peteĩ várko. ¿Mbaʼérepa jaʼekuaa ‘espíritu sánto omomýi’ hague profetakuérape ha umi kuimbaʼe ohaivaʼekuépe la Biblia? Ijespíritu sánto rupive, Ñandejára oñeʼẽ, omomýi ha oisãmbyhy chupekuéra ohai hag̃ua Iñeʼẽ. Upéicha rupi koʼã kuimbaʼe ndohaíri haʼekuéra opensáva, síno Jehová opensáva. Sapyʼánte haʼekuéra ni ndoikuaái mbaʼépa heʼise umi profesía térã umi mbaʼe ohaíva (Dan. 12:8, 9). Upéicharõ, pe ‘Kuatiañeʼẽ Marangatu ou Ñandejáragui’ ha ndaipóri pype yvypóra opensáva (2 Tim. 3:16, BNP).

4-6. ¿Mbaʼéichapa Jehová omombeʼu imensáhe umi ohaívape la Biblia? Emoĩ peteĩ ehémplo.

⁴ Péro, ¿mbaʼéichapa pe espíritu sánto omomýi umi kuimbaʼe ohaívape la Biblia? ¿Heʼípa Ñandejára chupekuéra palávra pór palávra mbaʼépa ohaíta, térãpa omombeʼúnte mbaʼe rehépa oipota oñeñeʼẽ ha oheja haʼekuérantema odesidi mbaʼéichapa heʼíta? Ñamoĩmína peteĩ ehémplo. Ñapensami peteĩ empresário ojapoha peteĩ kárta. Ikatu haʼe voi ohai umi mbaʼe iñimportantevéva térã heʼi isekretáriape ohai hag̃ua, ha upéi ofirma hese. Sapyʼánte ikatu avei heʼínte mbaʼe rehépa oñeñeʼẽvaʼerã ha pe sekretáriantema ohai, upe rire ipatrón ohecha, okorrehi ha ohechauka chupe mbaʼépa okambiavaʼerã. Oĩmba rire, pe empresário ofirma. Upévare jaʼekuaa imbaʼeha pe kárta.

⁵ Upéicha avei, oĩ párte la Bíbliape Ñandejára voi “ohaivaʼekue ikuãme” (Éxo. 31:18, ÑÑB). Avei Jehová sapyʼánte odiktavaʼekue hembiguáipe oipotahaichaite ojehai. Pór ehémplo, Éxodo 34:27-pe heʼi: ‘Ñandejára heʼi Moiséspe: “Ehai koʼã ñeʼẽ; koʼã ñeʼẽ rupi añekomprometéma nendive ha Israelguakuéra ndive”’ (ÑÑB). Proféta Jeremíaspe heʼi avei: “Ehaíke peteĩ kuatiañeʼẽme opaite mbaʼe che haʼevaʼekue guive ndéve” (Jer. 30:2, ÑÑB).

⁶ Péro hetave vése, peteĩ milágro rupive Jehová omoĩ hembiguái akãme ha ipyʼapýpe mbaʼe mensáhepa oskrivivaʼerã, ndahaʼéi katuete umi palávra oipotáva oiporu hikuái. Upéicha oheja chupekuéra oiporavo umi ñeʼẽ omombeʼu hag̃ua Jehová opensáva. Salomón heʼivaʼekue oñehaʼãmbaite hague “ojuhu hag̃ua ñeʼẽ oporombopyʼarorýva, ha ohai hag̃ua hekoitépe koʼã ñeʼẽ añeteguáva” (Ecl. 12:10, ÑÑB) Lucas avei omombeʼu mbaʼéichapa haʼe ohaivaʼekue Ikuatiañeʼẽ: “Ahesaʼỹijo porãmbaite koʼã mbaʼe iñepyrũ guive ha [...] ahai oiko hagueichaite” (Luc. 1:3, NM). Ha jaikuaaháicha, Ñandejára espíritu ndohejái yvypóra imperfékto ombyai umi mensáhe.

 7. ¿Mbaʼérepa jaʼekuaa Jehová iñaranduha ojevalévo yvypórare ohai hag̃ua Iñeʼẽ?

⁷ Jehová ningo ojevale yvypórare ohai hag̃ua Iñeʼẽ, ha upéva ohechauka iñaranduetereiha. Umi ñeʼẽ oĩva ipype ndahaʼéi omombeʼúnteva ñandéve heta informasión, síno avei ohechauka yvypóra remiandu. Jehová oiporúrire umi ánhelpe ohai hag̃ua la Biblia, ¿ikatúnepa haʼekuéra omombeʼu porã yvypóra oñandúva, pór ehémplo ñembyasy, kyhyje ha vyʼaʼỹ? Ñandejára ojevalevaʼekue yvypóra imperféktore ohai hag̃ua la Biblia, ha oiporu ijespíritu sánto ikatu hag̃uáicha omoĩ hikuái Haʼe opensávante. Péicha omombeʼu ñandéve imensáhe mborayhúpe ha heta hendáicha, opoko hag̃ua ñanderehe umi mbaʼe oĩva pype.

¿MBAʼÉPA OHECHAUKA LA BIBLIA OUHA ÑANDEJÁRAGUI?

 8. ¿Mbaʼérepa jaʼekuaa ndaiporiha ambue lívro ombojojáva la Bíbliape?

⁸ Oĩ heta mbaʼe ohechaukáva la Biblia ouha Jehovágui. Primero, ndaipóri ótro lívro rrelihióso oñeʼẽvéva Ñandejárare, la Biblia añoite. Pór ehémplo, rrelihión indúpe oĩ heta lívro orekóva purahéi, avei umi omombeʼúva mbaʼe kostúmbrepa osegivaʼerã hikuái opurahéi jave, umi dokuménto oĩhápe haʼekuéra ogueroviáva (Upanishads) ha heta míto (Ramayana ha Mahabharata). Peteĩ párte oĩva Mahabharátape, hérava Bhagavad Gita, ohechauka avei mbaʼéichapa oikovaʼerã hikuái. Avei umi vudísta oreko heta lívro, umíva apytépe oĩ peteĩ hérava Tipitaka (“Tres Cestas”) ojedividi jeýva mbohapy lívrope. Peteĩva omombeʼu mbaʼéichapa oikovaʼerã umi mónhe ha mónha; pe ótro oñeʼẽ umi mbaʼe Buda omboʼevaʼekuére, ha haʼe ndeʼíriramo jepe haʼeha peteĩ diós, saʼínte avei oñeʼẽ Ñandejárare; ha pe últimope oĩ umi mbaʼe vudistakuéra ogueroviáva. Konfusianokuéra oreko lívro omombeʼúva heta mbaʼe oikovaʼekue yma, oĩ orekóva heta konsého, purahéi ha avei oñeʼẽva máhiare. Umi musulmán katu oiporu peteĩ lívro omboʼéva Ñandejára peteĩnteha ha oikuaaha opa mbaʼe, heʼi avei oikuaaha umi mbaʼe oikótava tenonderã. Upéicharõ jepe, nomombeʼúi Ñandejára heraha Jehová, oĩháicha hetaiterei vése la Bíbliape.

9, 10. ¿Mbaʼépa ñanemboʼe la Biblia Ñandejáragui?

⁹ Heta lívro rrelihióso noñeʼẽguasúi térã noñeʼẽiete voi Ñandejárare, péro la Biblia ñanepytyvõ jaikuaa hag̃ua Jehovápe ha ñañemoag̃ui hag̃ua hese, ha avei omombeʼu mbaʼe mbaʼépa ojapo. Ohechauka ñandéve mbaʼeichaguápa Haʼe. Omombeʼu ipuʼakapaha, iñarandu, hekojoja ha hiʼarive ñanderayhuha (elee Juan 3:16 ha 1 Juan 4:19). Avei heʼi “Ñandejára otrataha enterovépe peteĩchante, ha oguerohoryha entéro umi hembiapo porãva ha okyhyjévape chugui, tahaʼe haʼéva tetãygua” (Hech. 10:34, 35, NM). Ha upéva ojekuaa la Biblia oĩ rupi heta ñeʼẽme ha ikatu haguére olee opaichagua tapicha. Umi linguísta heʼi oĩha 6700 idióma rupi ko yvy tuichakuére, péro umíva apytégui 100 rupi umi oñeñeʼẽvéva. Ñandejára Ñeʼẽ ojetradusíma 2400 ári idiómape, tahaʼe kompléto térã peteĩ párte. Upévare jaʼekuaa opavave lénto oikóva ko yvy ape ári ikatuha olee la Biblia iñeʼẽtépe.

¹⁰ Jesús heʼivaʼekue: “Che Ru ombaʼapo koʼág̃a peve ha che avei ambaʼapo gueteri hína” (Juan 5:17, NM). Ñandejára ningo oikove opa árare, haʼe oĩ “ymaite guive opa árape g̃uarã”. Ñapensamíntena, ¡ajépa hetaite mbaʼéma Haʼe ojapo! (Sal. 90:2.) La Bíbliape añoite oñemombeʼu umi mbaʼe Jehová ojapovaʼekue yma, ojapóva koʼág̃a ha umi mbaʼe ojapótava tenonderãme. Avei omboʼe mbaʼépa haʼe oguerohory térã ndogustái chupe, ha mbaʼépa ikatu jajapo ñañemoag̃ui hag̃ua hese (Sant. 4:8). ¡Aníkena jaheja mbaʼeve jahupytyséva térã jaipotáva ñandejupe g̃uarã ñanemomombyry chugui!

11. ¿Mbaʼeichagua konséhopa jajuhu la Bíbliape?

¹¹ Oĩ avei ambue mbaʼe ohechaukáva la Biblia ndouiha yvypóragui. Pór ehémplo, umi konsého oĩva pype iporãiterei ha ikatu jajerovia hese. Apóstol Pablo ohai: ‘¿Mávapa oikuaa Ñandejára pyʼapy upéi omboʼe hag̃ua chupe?’ (1 Cor. 2:16, JMP). Ko versíkulo oñeguenohẽ Isaías heʼivaʼekuégui umi hénte itiempoyguápe: “¿Máva piko heʼíraʼe Ñandejárape pe ikatúva ojapo, térã ohekomboʼéraʼe chupe?” (Isa. 40:13). Jaikuaaháicha ndaipóri ikatuvaʼerã ojapo upéva. Upévare katuete osẽ porã opavave osegíva umi konsého oñemeʼẽva omendávape, mitãnguérape ha vyʼarãre. Avei heʼi mávarepa jajeheʼavaʼerã, ñanemokyreʼỹ ñaneonrrádo, ñanderekopotĩ ha ñandetravahadór hag̃ua. La Biblia omeʼẽ konsého iporãvante. Yvyporakuéra katu naiñarandúi omeʼẽ hag̃ua konsého akóinte ideprovéchotava entérope (Jer. 10:23). Pyʼỹinte ohechakuaa ojavy hague ha okorrehi jey umi konsého omeʼẽmavaʼekue. Oiko la Biblia heʼihaicha: “[Ñandejára] oikuaa porã yvy ariguakuéra opensáva guive [...] yvytu reinteha” (Sal. 94:11, ÑÑB).

12. ¿Mbaʼépa ojejapo heta tiémpore oñehundiségui la Biblia?

¹² Heta tiémpore oĩvaʼekue ohundiséva la Biblia, péro ndaikatúi ojapo hikuái mbaʼeve. Upéva ohechauka avei la Biblia ouha Ñandejáragui. Áño 168-pe Jesús ou mboyve, pe rréi sírio hérava Antíoco IV ohekauka opárupi Ñandejára Kuatiañeʼẽ ikatu hag̃uáicha ojehapy. Áño 303-pe Jesús ou rire, Diocleciano, pe mburuvicha Romaygua, omanda ojeitypa hag̃ua umi lugár ijatyha kristianokuéra ha ojehapypa hag̃ua Ñandejára Ñeʼẽ. Ko mburuvicha opersegi umi kristiánope 10 áño rupi. Síglo 11 rire katu umi pápa oñehaʼãmbaite avei ani hag̃ua umi hénte oikuaa Ñandejárape. Haʼekuéra ndoipotái ojetradusi la Biblia umi idióma oñeñeʼẽvévape. Satanás ha umi tapicha haʼe oiporuvaʼekue ndaikatúi ohundi la Biblia, heta oñehaʼãramo jepe. Jehová ndohejái avave ohundi pe rregálo haʼe omeʼẽvaʼekue yvyporakuérape.

MBAʼÉREPA HETA HÉNTE OJEROVIA LA BÍBLIARE

13. ¿Mbaʼérepa jaʼekuaa avei la Biblia ouha Ñandejáragui?

¹³ ¿Mbaʼérepa jaʼekuaa avei la Biblia ouha Ñandejáragui? Ndojoavýi rupi mamove, umi profesía oĩva pype oñekumpli katuete, ndojoavýi siénsia ndive, umi ohaivaʼekue omombeʼu opa mbaʼe oiko hagueichaite, tuicha ipuʼaka okambia hag̃ua yvyporakuérape, ndojavýi umi féchape ha ombohovái porã umi porandu iñimportantevéva, pór ehémplo umi oĩva párrafo 1-pe. Jahechamína mbaʼérepa heta tapicha oguerovia la Biblia ouha Ñandejáragui.

14-16. a) ¿Mbaʼéicha rupípa peteĩ musulmán, peteĩ indu ha peteĩ kuñataĩ ndojeroviáiva mbaʼevére ou oguerovia la Biblia haʼeha Ñandejára Ñeʼẽ? b) ¿Mbaʼéichapa nde rehechaukase repredika jave la Biblia ouha Ñandejáragui?

¹⁴ Anwarb ningo okakuaavaʼekue peteĩ tetã hetahápe musulmán. Péro oiko aja peteĩ tiémpore Norteaméricape, umi testígo de Jehová og̃uahẽ hógape. Haʼe omombeʼu: “Upe tiémpope ndaguerohoryiete kristianokuérape. Aikuaa ymave umi heʼíva kristianoha heta oporojuka hague irrelihión rehehápe. Péro che ningo aikuaase voi opa mbaʼe, upémarõ haʼe chupekuéra ikatuha ou chembostudia”. Upe riremínte Anwar oho jey hetãme ha ndotopavéi upépe Testigokuérare. Tiémpo rire ova Európape ha oñepyrũ jey ostudia la Biblia. Haʼe omombeʼu: “Ahechakuaa umi profesía oñekumpliha, la Biblia ndojoavyiha mbaʼevépe ha Jehová siervokuéra ojoayhuetereiha. Koʼã mbaʼe ohechauka la Biblia ouha Ñandejáragui”. Anwar ojevautisa 1998-pe.

¹⁵ Asha, orekóva 16 áño, okakuaavaʼekue peteĩ família indúpe. Haʼe heʼi: “Añemboʼémi aha jave témplope, térã cheprovléma jave. Péro oho porã jave chéve nachemanduʼái voi Ñandejárare. Upéi umi testígo de Jehová og̃uahẽ che rógape ha tuichaiterei akambia upe guive”. Asha ostudia la Biblia ha oñepyrũ oñemoag̃ui Jehováre. ¿Mbaʼéicha rupípa oguerovia la Biblia ouha Ñandejáragui? Haʼe omombeʼu: “La Bíbliape oĩ opa mbaʼe che aikuaaséva. Aaprende natekotevẽiha aha peteĩ témplope ha añesũ taʼanga renondépe ajerovia hag̃ua Ñandejárare”.

¹⁶ Paula katolikavaʼekue, péro okakuaapávo ohóvo ndojeroviavéi Ñandejárare ni mbaʼevére. Haʼe omombeʼu mbaʼérepa ou okambia: “Heta mése rire ajotopa peteĩ che amígo ndive. Haʼe ningo hípi vaʼekue, péro ajuhu hese tuicha idiferenteha: ojevarvea, oñakãkarãi ha ojekuaa hese ovyʼaitereiha. Aporandu chupe: ‘¿Mbaʼe piko oiko nderehe? ¿Moõ piko rehóraʼe?’. Heʼi chéve ostudiaha la Biblia umi testígo de Jehová ndive ha oñepyrũ opredika chéve”. Ko kuñataĩ ohecha mbaʼéichapa la Biblia okambia iñamígope, upéicha rupi oguerovia la Biblia ouha Ñandejáragui ha oñepyrũ avei ostudia.

‘NE ÑEʼẼ OHESAPE CHÉVE CHE RAPERÃ’

17. ¿Mbaʼéichapa ñanepytyvõ jaleéramo la Biblia káda día ha jajepyʼamongeta hese?

¹⁷ Jehová ningo omeʼẽ ñandéve ijespíritu sánto rupive Iñeʼẽ, ha upéva peteĩ jopói neporãva. Releéramo káda día rehayhuvéta la Biblia ha avei Ijapoharépe (Sal. 1:1, 2). Rehesaʼỹijóta jave Ñandejára Ñeʼẽ, ejerurékena Jehovápe ijespíritu ikatu hag̃uáicha nesãmbyhy (Luc. 11:13). La Bíbliape oĩ Jehová opensáva, upévare jajepyʼamongetáramo hese, ñande avei ñapensáta opa mbaʼe haʼe opensaháicha.

18. ¿Mbaʼérepa nde reikuaaseve rehóvo la Biblia omboʼéva?

¹⁸ Rehesaʼỹijóvola Biblia reikuaáta heta mbaʼe, ha reñehaʼãvaʼerã resegi umi konsého oĩva pype (elee Salmo 119:105). Ejepyʼamongeta porã umi mbaʼe reaprendévare ha ehecha mbaʼépepa tekotevẽ rekambia, ku rejehecharõguáicha peteĩ espéhope (Sant. 1:23-25). Eiporúke Ñandejára Ñeʼẽ peteĩ espádaicha redefende hag̃ua umi mbaʼe regueroviáva ha avei reipeʼa hag̃ua umi japu omboʼéva rrelihionkuéra umi ipyʼaporãva pyʼapýgui (Efe. 6:17). Rejapóvo upéva, ehechaukákena reagradeseha Jehovápe ‘ijespíritu sánto omomýi haguére’ umi proféta ha ambue kuimbaʼépe ohai hag̃ua Iñeʼẽ.

[Nóta]

[Nóta oĩva taʼanga ndive páhina 29]

Elee la Biblia káda día ha rehayhuvéta Ijapoharépe

[Nóta oĩva taʼanga ndive páhina 26]

Ikatu jaʼe pe kárta ofirmáva haʼeha pe ijapohare