Jehová oñangareko ñanderehe

‘Jehová oipytyvõ ha oguenohẽ isiervokuérape jejopy vaígui.’ (SAL. 37:​40, ÑÑB.)

1, 2. Mbaʼépa heʼi la Biblia Jehováre?

KO YVY ojerévo kuarahýre, umi yvyra máta ha ógare jahecha mbaʼéichapa okambia pe kuarahyʼã. Upéichapa avei Jehová? Nahániri, Jehová nokambiái (Mal. 3:6). La Biblia heʼi hese: ‘Heko peteĩnte opa ára, haʼe nokambiái’ térã ndahaʼéi pe kuarahyʼãicha (Sant. 1:17). Koʼápe heʼíva Jehováre ñanemombarete, ha koʼýte jahasa asy jave. Mbaʼérepa?

² Jahecháma haguéicha pe ótro artíkulope, Jehová oñangareko isiervokuéra ymaguare rehe (Sal. 70:5). Haʼe ningo nokambiái ha katuete ojapo heʼíva, upévare ñande jajerovia ñanepytyvõ ha oñangarekotaha avei ñanderehe (Sal. 37:40). Péro mbaʼéichapa Jehová oñangareko opavave isiervokuérare koʼág̃a rupi? Ha mbaʼéichapa oñangareko peteĩteĩre?

Ñaneguenohẽ jejopy vaígui

 3. Mbaʼérepa umi opuʼãva Ñandejára siervokuérare ndojokomoʼãi chupekuéra opredika hag̃ua?

³ Satanás opersegivéramo jepe Jehová siervokuérape, ndojokomoʼãi chupekuéra omombaʼeguasu hag̃ua Ñandejárape. Ñandejára Ñeʼẽ ningo heʼi voi: ‘Tahaʼe haʼéva pe opuʼãva nderehe, nosẽporãmoʼãi, ha rejuru mbotýta oñeʼẽ vaíva nderehe’ (Isa. 54:​17, NM). Umi opuʼãva Ñandejára siervokuérare oñehaʼãmbaite ojoko chupekuéra anive hag̃ua opredika, péro ndaipuʼakái hesekuéra. Jahechami koʼág̃a mokõi ehémplo.

4, 5. Mbaʼépa ojejapo Jehová siervokuérare 1918-pe? Ha mbaʼépa ohupyty hikuái?

⁴ Áño 1918-pe, umi rrelihión omoakãva oñepyrũ opersegi Jehová siervokuérape anive hag̃ua opredika. Ha pe 7 de mayo pe goviérno Estados Unidospegua heʼi ojejagarra hag̃ua J. F. Rutherford ha iñirũnguéra omoakãva hendive predikasión. Haʼekuéra heʼi koʼã ermánore opuʼãha upe goviérnore. Upévare oñedemanda chupekuéra. Upéi, dos mése mboyve, ojehusga reiete chupekuéra. Umi mburuvicha heʼi ermáno Rutherford ha iñirũnguéra ohovaʼerãha kárselpe ha hiʼarevaʼerãha upépe. Upéicharõ, ojokótapa hikuái predikasión? Nahániri.

⁵ Ñanemanduʼami Jehová oprometévare: ‘Tahaʼe haʼéva pe opuʼãva nderehe, nosẽporãmoʼãi’. Nueve mése haguépe, 26  de marzo de 1919 oiko peteĩ mbaʼe oñeimoʼãʼỹva: ermáno Rutherford ha iñirũnguéra osẽ kárselgui. Ha 5 de mayo de 1920 ojerretira pe demánda ojejapovaʼekue ikontrapekuéra. Upe rire, koʼã ermanokuéra kyreʼỹme osegi omoakã predikasión. Ha mbaʼépa ohupyty hikuái? Upe guive hetaitereive oĩ oservíva Jehovápe. Ha mbaʼeichakuépa upéva? Jehová oipytyvõ rupi chupekuéra (1 Cor. 3:7).

6, 7. a) Mbaʼépa Hitler ojaporakaʼe testigos de Jehová rehe? Ha mbaʼépa ojehupyty Hitler okúi rire? b) Mbaʼépa ohechauka umi mbaʼe koʼág̃a ohasáva testigos de Jehová?

⁶ Jahechamína koʼág̃a ótro ehémplo. Adolf Hitler heʼivaʼekue 1934-pe ojukapaitetaha testigos de Jehová oĩva guive Alemániape. Ha oñehaʼãmbaite ojapo upéva, ojagarra ha ogueraha kárselpe hetaiterei ermánope. Hetaitereípe ningo ojetrata vai ha doscientos cincuenta áripe ojejuka umi campo de concentraciónpe. Ojukapaite piko rakaʼe Hitler testigos de Jehovápe? Ojokoparakaʼe predikasión Alemániape? Ni mbaʼevéicharõ! Ermanokuérape ojepersegírõ guare, haʼekuéra ñemihápe jepe osegi opredika. Ha Hitler okúi rire katu, kyreʼỹme osegi opredika hikuái. Mbaʼépa ojehupyty upévare? Koʼág̃a g̃uarã Alemániape umi opredikáva ohasáma ciento sesenta y cinco mil. Péicha Jehová ojapo opromete haguéicha: ‘Tahaʼe haʼéva pe opuʼãva nderehe, nosẽporãmoʼãi’.

⁷ Umi mbaʼe koʼág̃a ohasáva testigos de Jehová, ohechauka Ñandejára ndohejamoʼãiha ojejukapa isiervokuérape (Sal. 116:15). Péro, oñangarekópa avei peteĩteĩre? Mbaʼéichapa Jehová ñaneguenohẽ jejopy vaígui?

Ñandepeʼátapa opa mbaʼe vaígui?

8, 9. a) Mbaʼépa ohechauka Jehová nañandepeʼamoʼãiha opa mbaʼe vaígui? b) Mbaʼérepa ñanemanduʼavaʼerã avei?

⁸ Jehová ningo ndeʼíri ñandepeʼataha opa mbaʼe vaígui. Upéicharõ jepe, jajapovaʼerã umi tres evréo ojapo haguéicha. Haʼekuéra nomombaʼeguasúi pe taʼanga rréi Nabucodonosor ojapovaʼekue, ndoikuaáiramo jepe osalvátapa chupekuéra Jehová (jaleemína Daniel 3:​17, 18). Péro, Jehová oñangareko hesekuéra ani hag̃ua okaipa pe tatakua akúpe (Dan. 3:​21-27). Ha ñanemanduʼavaʼerã avei, yma umichagua milágro sapyʼapyʼánte oiko hague. Jaikuaa ningo heta Jehová siervokuéra omano hague iñenemigokuéra poguýpe (Heb. 11:​35-37). 

⁹ Koʼág̃a rupi avei Jehová ikatu osalva haʼe osalvasévape. Péro ikatúpa jaʼe koʼág̃a rupi Jehová ojapo hague peteĩ milágro ñanepytyvõ hag̃ua? Nahániri. Péro, oĩramo peteĩ ermáno heʼíva Jehová ojapo hague peteĩ milágro oñangareko hag̃ua hese, ndovaléi jaʼe ndaupeichaiha. Ñanemanduʼavaʼerã avei heta ermáno omano vai hague ohasa rupi umi mbaʼe ijetuʼúva térã ojepersegi haguére, oiko haguéicha Hitler tiémpope (Ecl. 9:11). Jaʼétapa Jehová noñangarekói hague umi ermánore? Ni mbaʼevéicharõ.

10, 11. Mbaʼépa yvypóra ndaikatúi ojapo? Péro mbaʼépa Jehová ikatu ojapo?

¹⁰ La Bíbliape ningo heʼi ‘yvypóra ndaikatuiha ojei ñemano poguýgui’ (Sal. 89:​48, ÑÑB). Ha Jehová piko ikatu ñandepeʼa ñemano poguýgui? Peteĩ ermánagui heta ihénte omano umi campo de concentraciónpe. Haʼe oĩvaʼekue avei upépe ha imanduʼa mbaʼéichapa isy okonsola chupe: “Ñamoĩ chupe umi omanovaʼekue ndoikovejeymoʼãiha. Upéicharõ piko ni Ñandejára ndaipuʼakamoʼãi pe ñemanóre!”. Ha jaikuaa porã ndaiporiha Ñandejáragui ipoderosovéva, ni pe ñemano. Haʼe voi ojapo opa mbaʼe oikovéva (Sal. 36:9). Ñandejára ningo imanduʼa umi omanovaʼekuére, oĩva Seol térã Hádespe, ha omoingove jeýta chupekuéra (Luc. 20:​37, 38; Rev. 20:​11-14).

¹¹ Koʼág̃a rupi Jehová oipytyvõ avei isiervokuéra iñeʼẽrendúvape. Jahechami mbohapy mbaʼe Jehová ojapóva oñangareko hag̃ua ñanderehe.

Jehová omeʼẽ ñandéve ñaikotevẽva ñaime porã hag̃ua hendive

12, 13. Mbaʼérepa iñimportanteterei ñaime porã Jehovándi? Mbaʼe mbaʼépa Jehová omeʼẽ ñandéve ani hag̃ua ñañemomombyry chugui?

¹² Jehová ningo omeʼẽ ñandéve ñaikotevẽva ñaime porã hag̃ua hendive, ha upéva iñimportanteterei ñandéve g̃uarã. Ñande ningo jareko Jehovápe ñane amígoramo, ha upéva ñamombaʼeve ñande rekovégui jepe (Sal. 25:14; 63:3). Ha ñañemomombyrýramo chugui katu, jaikomi reítantema ha ndaikatumoʼãvéima jaiko opa ára g̃uarã.

¹³ Jehová omeʼẽ ñandéve opa mbaʼe ñaikotevẽva ani hag̃ua ñañemomombyry chugui. Omeʼẽ ñandéve la Biblia, ijespíritu sánto ha iñorganisasión. Mbaʼépa ikatu jajapo ñanepytyvõ hag̃ua koʼã mbaʼe? Pyʼỹinte ñahesaʼỹijovaʼerã la Biblia jajeroviave hag̃ua Ñandejárare ha umi mbaʼe oprometévare (Rom. 15:4). Jajeruréramo chupe ijespíritu, ñanemombaretéta ani hag̃ua jaʼa mbaʼe vaípe (Luc. 11:13). Jajapovaʼerã pe ‘tembiguái jeroviaha’ heʼíva ñandéve umi lívro, rrevísta, rreunión ha asambléa rupive. Koʼã mbaʼe ningo oñemeʼẽ ñandéve ‘ñaikotevẽve jave’ ha ñanepytyvõ ñamombareteve hag̃ua ñande jerovia (Mat. 24:45). Péicha Jehová oñangareko ñanderehe ha ñanepytyvõ ñañemoag̃ui hag̃ua hese (Sant. 4:8).

14. Mbaʼe oikovaʼekuépa ohechauka iñimportanteha ñaime porã Ñandejára ndive?

¹⁴ Jahechamína peteĩ mbaʼe oikovaʼekue ohechaukáva iñimportanteha ñaime porã Ñandejára ndive. Pe ótro artíkulo oñepyrũvo jahechákuri Theresa rehe ojepyʼapyeterei hague isy ha itúva ojesekuestrárõ guare chupe. Upe riremínte ojeʼe chupekuéra Therésape ojejuka hague.a Itúva omombeʼu: “Che ningo ajerurékuri Jehovápe oñangareko hag̃ua Theresa rehe [...]. Ha ojejukárõ guare chupe añeporandu, mbaʼérepa Jehová nohendúiraʼe che ñemboʼe. Chéngo aikuaa Jehová ndojapomoʼãiha katuete peteĩ milágro oñangareko hag̃ua ñanderehe. Péro asegi ajerure chupe chepytyvõmi hag̃ua. Ha chepyʼaguapy aikuaávo Jehová oñangarekoha isiervokuérare omeʼẽvo chupekuéra opa mbaʼe oikotevẽva oĩ porã hag̃ua hendive. Upévagui iñimportantevéva ningo ndaipóri, upévare odependehína jaikove hag̃ua opa ára g̃uarã. Upéicha rupi haʼe Jehová oñangareko hague Theresa rehe, haʼe ningo oservi chupe omano meve. Tuicha chepyʼaguapy aikuaágui Jehová pópe opytaha omoingove jey hag̃ua chupe”.

Oñangareko ñanderehe ñanderasyete jave

15. Mbaʼéichapa Jehová ñanepytyvõ ñanderasyete jave?

¹⁵ Jehová ‘oñangarekóta ñanderehe ñanderasyete jave’, David rehe oñangareko haguéicha (Sal. 41:3). Nañanemongueráiramo jepe ñanderasykatu jave, ñanepytyvõ heta hendáicha. La Bíbliape heʼíva ñanepytyvõ jadesidi porã hag̃ua mbaʼe tratamiéntopa jasegíta (Pro. 2:6). Ikatu avei ñanepytyvõ ¡Despertad! ha Ñemañaha oñeʼẽva heta mbaʼasýre. Ha Jehová ijespíritu sánto rupive ikatu ñanemombarete jagueropuʼaka hag̃ua mbaʼasy ha akóinte ñaneñeʼẽrendu hag̃ua chupe (2 Cor. 4:7). Upéicha ndajajepyʼapyetereimoʼãi ñane mbaʼasýre ha jaservi porãta Jehovápe.

16. Mbaʼéichapa peteĩ ermáno ogueropuʼaka imbaʼasy?

¹⁶ Pe ótro artíkulo oñepyrũvo jahechákuri peteĩ ermáno hasyete hague. Ha 1998-pe umi doktór heʼi chupe orekoha esclerosis lateral amiotrófica, ha upévare opyta paralítiko.b Mbaʼéichapa ogueropuʼaka imbaʼasy? Haʼe omombeʼu: “Cherasyete jave ndaikuaavéima mbaʼépa ajapóta, ha amanoséntema voi. Ha ndagueropuʼakavéi jave, ajerure Jehovápe chepytyvõmínte hag̃ua, chepyʼaguapy, chepasiénsia ha aaguanta hag̃ua. Ha Jehová katu ombohovái che ñemboʼe. Pórke chepyʼaguapy jave, apensa Ñandejára múndo pyahúre, ikatutahápe aguata jey, akaru porã ha añemongeta jey che família ndive. Ha chepasiensiavaʼerã agueropuʼaka hag̃ua heta mbaʼe ahasáva ndaikatuvéigui aguata. Aaguantavaʼerã avei heta mbaʼe, akóinte cheñeʼẽrendu ha aservi porã hag̃ua Jehovápe. Añeñandu David oñeñandu haguéicha, Jehová oñangarekógui cherehe cherasyete jave” (Isa. 35:​5, 6).

Omeʼẽ ñandéve ñane remikotevẽ

17. Mbaʼépa Jehová opromete ñandéve, ha mbaʼépa heʼise upéva?

¹⁷ Jehová opromete omeʼẽtaha ñandéve ñane remikotevẽ (jaleemína Mateo 6:​33, 34 ha Hebreos 13:​5, 6). Upéva ndeʼiséi ojapotaha peteĩ milágro omoĩmba hag̃ua ñandéve ñane remikotevẽ térã natekotevẽmoʼãveimaha ñambaʼapo (2 Tes. 3:10). Heʼise guei ñamotenondéramo Ñandejára Rréino ha ñambaʼaposéramo, Jehová opromete ñanepytyvõtaha jahupyty hag̃ua ñaneremikotevẽ (1 Tes. 4:​11, 12; 1 Tim. 5:8). Haʼe ningo ikatu ñanepytyvõ ñaimoʼaʼỹháicha. Pór ehémplo, ikatu oiporu peteĩ ermánope omeʼẽ hag̃ua ñandéve ñande travahorã térã ñanepytyvõ hag̃ua.

18. Emombeʼu mbaʼéichapa Jehová omeʼẽ peteĩ ermánape hemikotevẽ.

¹⁸ Pe ótro artíkulope ñañeʼẽkuri peteĩ sy omongakuaávare imemby kuñaʼi haʼeño. Haʼekuéra ovárõ guare, pe ermána ndojuhúi anga itravahorã. Haʼe omombeʼu: “Pyharevekue asẽ apredika ha kaʼarukue entéro aheka che travahorã. Chemanduʼa peteĩ díape ahárõ guare almasénpe ajogua hag̃ua kamby, ha apyta amaña asy umi verduraita oĩvare upépe, péro ndarekovéima ajogua hag̃ua. Ambyasyeterei ningo. Péro ag̃uahẽrõ guare che rógape, ni che naimoʼãi la ahecháva: che róga okárape atopa vosa renyhẽnyhẽ opaichagua verdúra. Atyraite, roiporu are hag̃uáicha voi. Osyry ningo che resay aagradesévo Jehovápe”. Upe rire ko ermána oikuaa peteĩ ermáno orekóva uérta oheja hague chupe umi verduraita. Upévare oskrivi chupe: “Agradesetereíngo ndéve rejapovaʼekuére upe díape, péro aagradese avei Jehovápe nembaʼeporã haguére chendive pórke péicha ohechauka chéve cherayhuetereiha” (Pro. 19:17).

19. Mbaʼépa ikatúta jajapo oñepyrũ vove pe jehasa asy guasu? Ha mbaʼépa koʼág̃ama jadesidivaʼerã?

¹⁹ Jehová ningo yma oñangarekovaʼekue isiervokuérare ha koʼág̃a avei. Upévare jajerovia hese nañanderejamoʼãiha. Koʼẽrõitéma oñepyrũta pe jehasa asy guasu ha upépe ñaikotevẽtereíta Ñandejára ñanepytyvõ. Upe vove, ñande ikatúta ñañemboʼe chupe ha javyʼáta ñanesãsopotaitéma haguére (Luc. 21:28). Upévare, koʼág̃ama jadesidivaʼerã jajerovia Jehováre jahasa asýtaramo jepe. Ñanemanduʼákena avei Jehová nokambiaiha ha oñangarekotaha ñanderehe.

[Nóta]

Ñanemanduʼami koʼã mbaʼére

• Mbaʼépa Jehová ojapóta umi omanovaʼekuére?

• Mbaʼérepa iñimportanteterei ñañemoag̃ui Jehováre?

• Mbaʼépa heʼise Jehová omeʼẽtaha ñandéve ñane remikotevẽ?

[Nóta oĩva taʼanga ndive páhina 17]

Ermáno Rutherford ha iñirũnguérape ojegueraha kárselpe 1918-pe. Upe rire osẽ jey hikuái, ha ojerretira pe demánda ojejapovaʼekue ikontrapekuéra

[Nóta oĩva taʼanga ndive páhina 18]

Jehová oñangareko ñanderehe ñanderasyete jave