Mbaʼépa heʼise Ñandejára opytuʼuha?

“Opyta gueteri ambue sábado [Ñandejára] retãyguakuérape opytuʼu hag̃ua.” (HEB. 4:9, ÑÑB)

1, 2. Mbaʼépa ñanemboʼe Génesis 2:3, ha mbaʼépa tekotevẽ ñambohovái?

GÉNESIS kapítulo únope omombeʼu Jehová ohasa hague seis “ára” ipuku pukúva oprepara hag̃ua ko yvy yvyporakuérape g̃uarã. Oñemohuʼã rire káda ára ko lívro heʼi: ‘Ha ohasa kaʼaru ha pyhareve’ (Gén. 1:5, 8, 13, 19, 23, 31, ÑÑB). Péro pe ára sieteháre ndeʼíri upéicha. Heʼi uvei: ‘Ñandejára ovendesi ha omomarangatu pe ára sieteha; upe guive opytuʼuhína opa mbaʼe ojapovaʼekuégui’ (Gén. 2:3, NM).

² Moisés ohaivaʼekue ko kuatiañeʼẽ áño 1513-pe, Jesús ou mboyve. Heʼívo Ñandejára ‘opytuʼuhína’ ontendeka ñandéve upérõ ndopaiha gueteri pe ára sieteha. Ñaimépa gueteri pe ára Jehová opytuʼuhápe? Ikatúpa jaike Ñandejára opytuʼuhápe? Koʼã porandu iñimportanteterei ha tekotevẽ ñambohovái.

‘Opytuʼupahína’ Jehová koʼág̃a peve?

 3. Mbaʼéichapa Juan 5:16, 17 ohechauka síglo primérope ndopái gueteri hague pe ára sieteha?

³ Oĩ mokõi mbaʼe ohechaukáva síglo primérope ndopái gueteri hague pe ára sieteha. Péro ñepyrũrã jahechavaʼerã mbaʼépa Jesús ombohovaivaʼekue umi heʼívape hese nomombaʼeiha pe sábado. Koʼã tapicha opensa oñembaʼapoha ojejapóramo peteĩ milágro, ha pe Léi heʼi porã sabadokue ndovaleiha ojejapo mbaʼeve. Upémarõ Jesús heʼi chupekuéra: “Che Ru ningo koʼág̃a peve ombaʼapohína, ha che avei” (Juan 5:16, 17, ÑÑB). Heʼívo: “Che Ru ningo koʼág̃a peve ombaʼapohína”, oñedefende chuguikuéra. Haʼete ku heʼíva: “Che ha che Ru rombaʼapo peteĩ mbaʼépe. Haʼe ombaʼapo opytuʼuha árape entéro, ha upéva hetaiterei áñorema ojapo, upéicha rupi ndaivaíri che ambaʼapo avei sabadokue”. Upérõ guare Jesús ohechauka ndopaiha gueteri pe ára Jehová opytuʼuha hembiapokuéragui ko yvýpe.a

 4. Mbaʼéichapa Pablo ohechauka pe ára sieteha ndopái gueteriha síglo primérope?

⁴ Pablo heʼivaʼekue ohechauka avei síglo primérope ndopaiha gueteri pe ára sieteha. Imanduʼa mboyvemi Génesis 2:2 rehe haʼe oñeʼẽvaʼekue pe ára Jehová opytuʼuháre, ha ohai: ‘Ñande jajeroviavaʼekue katu jaike Ñandejára opytuʼuhápe’ (Heb. 4:3, 4, 6, 9, ÑÑB). Péicha ojekuaa upe tiémpope ndopaiha gueteri pe ára sieteha. Upéicharõ, arakaʼe pevépa ipukúta pe ára Ñandejára opytuʼuha?

 5. Maʼerãpa Ñandejára omoĩvaʼekue pe ára sieteha, ha arakaʼépa okumplipáta hembipota?

⁵ Jaikuaa hag̃ua arakaʼépa opáta pe ára sieteha, jaikuaa raẽ vaʼerã maʼerãpa Jehová omoĩvaʼekue. Génesis 2:3 ohechauka ‘Ñandejára ovendesi ha omomarangatuha pe ára sieteha’. Jehová omboyke pe ára ojapo hag̃ua peteĩ mbaʼe iñimportantetereíva: okumplipaite hembipota ko yvýpe g̃uarã. Haʼe oipota ko yvy henyhẽ yvypóra iñeʼẽrendúvagui ha toñangareko porã ko yvýre ha opa oikovévare ipype (Gén. 1:28). Upearã Jehová ha Jesucristo “koʼág̃a peve ombaʼapohína”, ha Jesúspe ojeʼe voi ‘sábado Ruvicha’ (Mat. 12:8, NM). Upéicharõ pe ára sieteha opáta Ñandejára okumplipa vove hembipota ko yvýpe g̃uarã. Arakaʼétapa upéva? Jesucristo omohuʼã rire igoviérno ipukútava Mil Áño.

Aníkena avave ojapo umi ‘naiñeʼẽrendúiva ojapo haguéicha’

 6. Máva mávapepa ndovaléi ñahaʼanga, ha mbaʼépa ohechauka ñandéve koʼã mbaʼe?

⁶ Jehová omombeʼu porã vaʼekue hembipota Adán ha Évape, péro haʼekuéra naiñeʼẽrendúi chupe. Ha upe guive hetaiterei yvypóra naiñeʼẽrendúi avei haʼekuéraicha. Upéicha ojapovaʼekue pe tetã Israel Ñandejára oiporavovaʼekue imbaʼerã. Upéi síglo primérope Pablo heʼi porã umi kristiáno ypykuépe hesekuéra jepe ikatuha oiko upéva: ‘Ñañehaʼã jaike Ñandejára opytuʼuhápe ha ani avave ojapo umi naiñeʼẽrendúiva ojapo haguéicha’ (Heb. 4:11, BNP). Pablo ohechauka umi naiñeʼẽrendúiva ndaikatumoʼãiha oike Ñandejára opytuʼuhápe. Mbaʼépa oikóta ñanderehe jajapóramo peteĩ mbaʼe oñemoĩva Jehová rembipotáre? Jaikénepa Jehová opytuʼuhápe? Tekotevẽterei ñambohovái koʼã porandu. Péro upéva ñahesaʼỹijóta amo gotyomie. Koʼág̃a jahecháta mbaʼépa ojapovaʼekue umi isrraelíta ha mbaʼérepa ndoikéi hikuái Ñandejára opytuʼuhápe.

‘Ndoikemoʼãi hikuái che apytuʼuhápe’

 7. Maʼerãpa Jehová omosãso umi isrraelítape Egíptogui, ha mbaʼépa ojerure chupekuéra?

⁷ Año 1513-pe, Jesús ou mboyve, Jehová omombeʼu Moiséspe mbaʼépa ojapóta omosãso hag̃ua umi isrraelíta oikóvape tembiguáiramo Egíptope: ‘Aguejy aipeʼa hag̃ua Egipto poguýgui umi isrraelíta agueraha hag̃ua chupekuéra peteĩ yvy tuicha ha iporãvape, ýicha osyryhápe kamby ha eíra’ (Éxo. 3:8). Maʼerãpa Ñandejára omosãso chupekuéra? Ojapo hag̃ua chuguikuéra hetã tee, opromete haguéicha Abrahánpe (Gén. 22:17). Hiʼarive omeʼẽ Léi umi isrraelítape ikatu hag̃uáicha oiko pyʼaguapýpe hendive (Isa. 48:17, 18). Péro avei heʼi chupekuéra: ‘Pejapóramo añetehápe che haʼéva, ha ñaĩramo oñoñeʼẽme [che Léipe heʼiháicha], peẽ che retã teéta opa tetã apytépe, che mbaʼéramo jepe ko yvy tuichakue’ (Éxo. 19:5, 6). Jahechaháicha, umi isrraelíta iñeʼẽrendúramo añoite oikóta tapia g̃uarã Jehová retãramo.

 8. Mbaʼépa ohupytyvaʼerãmoʼã umi isrraelíta iñeʼẽrendúrire Jehovápe?

⁸ Ajépa iporãite Jehová oprometéva chupekuéra! Umi isrraelíta iñeʼẽrendu aja, Haʼe ovendesíta hemitỹnguéra, iparralty, ijovecha ha ambue hymbakuéra. Oiko porãta ha oĩta pyʼaguapýpe hikuái, avei oñangarekóta hesekuéra ani hag̃ua hoʼa iñenemígo poguýpe (elee 1 Reyes 10:23-27). Umi tetã imbaretevéva jepe ndaipuʼakamoʼãi hesekuéra, ha ou vove pe Mesías, noĩmoʼãikuri hikuái Roma poguýpe. Ambue tetãnguéra oikose asýta umi isrraelítaicha, ohechávo mbaʼeichaitépa Jehová ovendesi umi iñeʼẽrendúvape ha omeʼẽ chupekuéra opa mbaʼe oikotevẽva.

9, 10. a) Mbaʼérepa tuicha ojavy umi isrraelíta ohose jeývo Egíptope? b) Ojapo porãvétapa hikuái Jehová rembipota oho jeýrire Egíptope?

⁹ Umi isrraelíta okumplírire Jehová rembipota, tuicha oñevendesivaʼerãmoʼã chupekuéra, ha amo gotyove ohupytýta avei opavave yvypórape (Gén. 22:18). Péro ñambyasýramo jepe, umi isrraelíta osẽvaʼekue Egíptogui ohechauka ndoipotaiha Jehová oisãmbyhy chupekuéra ha nopensái ikatuhákuri oiko chuguikuéra ehémplo ambue tetãme g̃uarã. Haʼekuéra ohose jeýnte Egíptope (elee Números 14:2-4). Péro mbaʼépepa ideprovéchota chupekuéra upéva? Ojapo porãvéta mbaʼe piko upépe Jehová rembipota? Nahániri. Oiko jeýta katu chuguikuéra tembiguái, ndaikatumoʼãi okumpli umi Léi oñemeʼẽvaʼekue Moisés rupive ha noñeperdonamoʼãi chupekuéra ipekádo. Umi Isrraelíta ohose jeývo Egíptope ohechauka mbaʼeichaitépa iñembotavy ha opensaha ijehénte. Ndareíri Jehová heʼi hesekuéra: ‘Chepochyvaʼekue hendivekuéra, ha haʼe: “Ipyʼamokõi tapia hikuái, ha ndoikuaaséi che rape”. Upévare chepochyhápe haʼe: “Ndoikemoʼãi hikuái che apytuʼuhápe”’ (Heb. 3:10, 11, ÑÑB; Sal. 95:10, 11).

¹⁰ Haʼekuéra ohose jeývo Egíptope, ohechauka nomombaʼeiha opa mbaʼe Jehová omeʼẽva chupekuéra. Upéva rangue opensánte hikuái umi puérro, sevói ha áho hoʼuvaʼekuére Egíptope (Núm. 11:5). Añetehápe idesagradesído hikuái, ojogua Esaúpe; haʼe ningo peteĩ tesapirĩme omboyke tembiʼu rehehápe Jehová omeʼẽvaʼekue chupe (Gén. 25:30-32; Heb. 12:16).

11. Okambiápa Jehová hembipota umi Isrraelíta naiñeʼẽrendúi haguére?

¹¹ Koʼã isrraelíta ndojeroviáiramo jepe Jehováre, haʼe osegi ‘ombaʼapo’ okumpli hag̃ua hembipota upe tetãme g̃uarã. Haʼe ohechakuaa ifamiliarekuéra iñeʼẽrenduveha. Umíva ojapo Jehová heʼíva ha oike ojagarra pe Yvy Oprometevaʼekue chupekuéra. Upéva ojekuaa Josué 24:31-pe: ‘Israel ojerovia Ñandejárare Josué oikove aja pukukue, ha oikove aja avei umi ansiáno oipytyvõvaʼekue Josuépe oisãmbyhy hag̃ua tetã Israel, umíva oikuaapa avei opaite mbaʼe Ñandejára ojapomavaʼekue Israel rehehápe’ (ÑÑB).

12. Mbaʼéichapa jaikuaa ikatuha gueteri jaike Ñandejára opytuʼuhápe?

¹² Omanomba rire umi isrraelíta iñeʼẽrendúva, ‘opuʼã hendaguépe itaʼyrakuéra oikuaaʼỹva Ñandejárape ha umi mbaʼeta ojapovaʼekue Israel rehehápe’. Mbaʼépa ojapo hikuái? ‘Ojapo ivaíva Ñandejára renondépe ha omombaʼeguasu ñandejára guaʼukuéra’ térã umi Baal (Jue. 2:10, 11). Naiñeʼẽrendúi rupi, haʼekuéra ndoikói pyʼaguapýpe Jehová ndive ha ndojapói pe Yvy Oñeprometevaʼekuégui peteĩ lugár ‘Ñandejára oporomombytuʼuha’. Apóstol Pablo heʼi hesekuéra: ‘Josué omog̃uahẽrire umi isrraelítape pe lugár ojepytuʼuhápe, Jehová noñeʼẽveimavaʼerãmoʼã ambue ára rehe. Upéicharamo opyta gueteri ambue sábado Ñandejára puévlope g̃uarã’ (Heb. 4:8, 9, NM). Mávapepa oñehenói ‘Ñandejára puévlo’? Opavave kristiánope, tahaʼe hudío térã hudioʼỹva. Ikatu piko upéicharõ enterove jaservíva Jehovápe jaike haʼe opytuʼuhápe? Ikatu jaike.

Oĩ kristiáno ndoikeivaʼekue Ñandejára opytuʼuhápe

13, 14. Mbaʼépa tekotevẽ vaʼekue ojejapo ojeike hag̃ua Ñandejára opytuʼuhápe a) Moisés tiémpope? b) síglo primérope?

¹³ Ohaírõ guare umi evréope, Pablo omombeʼu oĩha kristiáno oñemoĩva Jehová rembipotáre naiñeʼẽrendúi rupi chupe (elee Hebreos 4:1). Haʼekuéra osegisénte okumpli pe Léi oñemeʼẽvaʼekue Moisés rupive. Añetehápe ningo 1500 áño pukukue, opavave ojaposéva Jehová rembipota okumplimantevaʼerã upe Léi. Péro upéva ojepeʼáma Jesús omano rire. Amalisia oĩ kristiáno nontendeséiva upéva ha ojapose gueteri heta mbaʼe oĩva upe Léipe.b

¹⁴ Mbaʼépa heʼi Apóstol Pablo umi kristiáno ojaposévape gueteri Moisés léi heʼíva? Omyesakã chupekuéra koʼág̃a orekomaha peteĩ témplo ndojapoivaʼekue yvypóra, peteĩ kompromíso pyahu ha peteĩ saserdóte guasu térã Jesús. Koʼã mbaʼe tuichaiteve umi oĩvaʼekuégui Israélpe (Heb. 7:26-28; 8:7-10; 9:11, 12). Oiméne Pablo oiporu ehémploramo pe Léi oñeʼẽva sábadore ohechauka hag̃ua kristianokuéra ikatuha avei oike pe ára Jehová opytuʼuhápe. Haʼe heʼi: ‘Upéicharamo opyta gueteri ambue sábado Ñandejára puévlope g̃uarã. Upe oikéva Ñandejára opytuʼuhápe, upéva opytuʼu avei hembiapokuéragui, Ñandejára opytuʼu haguéicha hembiapokuéragui’ (Heb. 4:8-10, ÑÑB). Upéva ohechauka peteĩ mbaʼe iñimportantetereíva: ndojapoveimavaʼerã umi mbaʼe oĩva pe Léipe Ñandejára oguerohory hag̃ua chupekuéra. Pentecostés áño 33 guive, jajeroviáramo añoite Jesucristo rehe ikatu ñaime porã Ñandejára ndive.

15. Mbaʼéichapa jahechakuaa umi naiñeʼẽrendúiva ndoikemoʼãiha Ñandejára opytuʼuhápe?

¹⁵ Mbaʼérepa umi isrraelíta Moisés tiémpope guare ndoikéi pe Yvy Oñeprometevaʼekuépe? Naiñeʼẽrendúi rupi. Ha mbaʼérepa oĩ kristiáno Pablo tiémpope guare ndoikéiva Ñandejára opytuʼuhápe? Naiñeʼẽrendúigui avei chupe. Ndohechakuaaséi hikuái pe Léi ohasama hague ha Jehová oisãmbyhymaha ipuévlope ambue hendáicha.

Mbaʼéichapa ikatu jaike Ñandejára opytuʼuhápe

16, 17. a) Mbaʼéichapa ikatu jaike Ñandejára opytuʼuhápe? b) Mbaʼépa jahecháta pe artíkulo oúvape?

¹⁶ Ñane tiémpope ndaiporivéima kristiáno oñemohatãva okumpli hag̃ua pe Léi oñemeʼẽvaʼekue Moiséspe oimoʼãgui péicha ojesalvataha. Pablo omyesakã porã: ‘Peẽ pejesalva Ñandejára mborayhu rupi, pejerovia haguére. Kóva ndahaʼéi peẽ voi pejapovaʼekue rupive, Ñandejára remimeʼẽnte. Avave ndoguerekói mbaʼe rehépa oñembotuicha hag̃ua, pe salvasión ndahaʼéi ojehupytýva tembiapo porã rupi’ (Efe. 2:8, 9, BNP). Mbaʼépa jajapovaʼerã jaike hag̃ua Ñandejára opytuʼuhápe? Jehová ningo omboykevaʼekue pe ára sieteha —pe ára haʼe opytuʼuha— okumpli hag̃ua hembipota ko yvýpe g̃uarã. Upéicharõ, jaike hag̃ua Ñandejára opytuʼuhápe ñaneñeʼẽrenduvaʼerã chupe ha ñañehaʼãmbaite ñakumpli hembipota ojeʼeháicha ñandéve iñorganisasión rupive.

¹⁷ Aníkena ñañemohatã ñande jaʼévapente, jajapóramo péicha ñañemoĩñaína Ñandejára rembipotáre ha japyta vaíta hendive. Akóinte ñamombaʼe ha ñahenduvaʼerã umi konsého omeʼẽva ñandéve pe tembiguái jeroviaha. Péro mbaʼéicha javépa ikatu hasy ñandéve ñaneñeʼẽrendu? Pe artíkulo oúvape jahecháta upéva ha avei mbaʼéichapa umi mbaʼe jadesidívare ojekuaáta jaikémapa Jehová opytuʼuhápe.

[Nóta]

Jajepyʼamongeta hag̃ua

• Maʼerãpa Jehová omoĩ pe ára opytuʼu hag̃ua?

• Mbaʼéichapa jaikuaa ndopaiha gueteri pe ára sieteha?

• Mbaʼérepa umi isrraelíta Moisés tiémpope guare ha heta kristiáno Pablo tiempopegua ndoikéi Ñandejára opytuʼuhápe?

• Mbaʼépa jajapovaʼerã jaike hag̃ua Ñandejára opytuʼuhápe?

[Nóta oĩva taʼanga ndive páhina 26]

Mbaʼépa tekotevẽ jajapo jaike hag̃ua Ñandejára opytuʼuhápe?