‘Chekuaápa’ Jehová?

“Ñandejára oikuaa umi imbaʼévape.” (2 TIM. 2:19, BNP)

1, 2. a) Mbaʼépa iñimportantevevaʼekue Jesúspe g̃uarã? b) Mbaʼépa ñañeporanduvaʼerã?

PETEĨ fariséo oñemboja Jesús rendápe ha oporandu chupe: ‘Mbaʼépa pe mandamiénto tuichavéva oĩva Ñandejára léipe?’. Haʼe ombohovái: ‘Rehayhuvaʼerã Ñandejára Jehovápe nde pyʼaite guive, ne ánga rugua guive, ha opa ne arandukue reheve’ (Mat. 22:35-37, NM). Jaikuaaháicha, Cristo ojapovaʼekue koʼápe heʼihaichaite. Haʼe ohayhueterei Itúvape ha akóinte iñeʼẽrendu oipotágui oguerohory chupe. Upéicha rupi, omano mboyvemi ikatuvaʼekue heʼi Jehová oikuaaha iñeʼẽrendu hague chupe opa mbaʼépe. Péicha ohechauka oikoha Ñandejára mborayhúpe (Juan 15:10).

² Koʼág̃a rupi heta oĩ heʼíva oikuaa ha ohayhuha Ñandejárape, ha oiméne ñande voi jaʼe upéicha. Péro tekotevẽ avei jahecha oimépa Jehová ñandekuaa, upévare iporãiterei ñañeporandu koʼã mbaʼe iñimportantetéva: “Ikatúpa haʼe Jehová ‘chekuaa’ térã cheguerohoryha? Cherechápa imbaʼéramo?” (2 Tim. 2:19). Ajépa tuichaite mbaʼe ñaime porã pe Mburuvicha Tuichavéva ndive!

 3. Mbaʼérepa heta tapicha ndogueroviaséi ikatuha oiko Jehová amígoramo, ha mbaʼépa oipytyvõta chupekuéra okambia hag̃ua?

³ Oĩ tapicha ohayhúva Jehovápe ipyʼaite guive, upéicharõ jepe haʼete ku ndogueroviaséiva ikatuha oiko iñamígoramo. Sapyʼánte heʼi ijehe nomereseiha Ñandejára oreko chupe imbaʼéramo. Péro haʼetépe Jehová nopensái upéicha! (1 Sam. 16:7.) Pablo heʼivaʼekue: ‘Upe ohayhúva Ñandejárape, upévape Ñandejára oikuaa’ (1 Cor. 8:3). Péicha jahecha tekotevẽha jahayhu Ñandejárape ikatu hag̃uáicha haʼe ñandekuaa. Ñañeporandumína: “Mbaʼérepa alee ko rrevísta Ñemañaha? Mbaʼére piko añehaʼãmbaite aservi Jehovápe che pyʼaite guive, che ánga rugua guive, opa che arandukue ha che mbaretekue reheve? Añemeʼẽmapa chupe ha ajevautisa? Mbaʼérepa ajapo upéva?”. Ñanemanduʼavaʼerã ñande Ru yvagapegua ohechaha opaite mbaʼe oĩva yvypóra pyʼapýpe ha omoag̃uiha ijehe umi “mbaʼerepy” térã umi tapicha ovaléva chupe g̃uarã (elee Ageo 2:7 ha Juan 6:44). Upéicharõ, ñande jaservi Jehovápe ha jaiko iñamígoramo, haʼe ñaneinvita rupínte. Ñaneñeʼẽrendu aja entéro Haʼe nañanderejareimoʼãi ha akóinte oñangarekóta ñanderehe mborayhúpe. Ñande ningo javaleterei chupe g̃uarã (Sal. 94:14).

 4. Mbaʼérepa iporã akóinte jahechakuaa iñimportanteha jaiko Jehová amígoramo?

⁴ Oiméramo Jehová ñanemoag̃uíma ijehe, ñañehaʼãmbaitevaʼerã akóinte ñaime imborayhúpe (elee Judas 20, 21). La Biblia heʼi kristianokuérape oñatendevaʼerãha. Mbaʼérepa? Ikatu rupi ‘osẽ pe tape porãgui’ ha ‘oñemomombyry Ñandejára oikovévagui’ (Heb. 2:1; 3:12, 13, BNP). Upéicha oikovaʼekue Himeneo ha Fileto rehe. Pablo imanduʼa hesekuéra heʼi mboyvemi oĩva 2 Timoteo 2:19-pe, pe téysto omopyendáva ko artíkulo. Koʼã mokõi kuimbaʼe oñemeʼẽmavaʼekue Jehovápe, péro upéi ndojapovéi hembipota (2 Tim. 2:16-18). Péicha avei oiko heta kristiáno Galasiayguáre. Ñandejára oikuaáma chupekuéra, péro upéi haʼekuéra osẽ hapégui (Gál. 4:9). Aníkena oiko ñanderehe upéicha! Ñande jareko Jehovápe ñane amígoramo ha ndaipóri iporãvéva upévagui.

 5. a) Mbaʼépa Jehová oipota jahechauka? b) Mbaʼe ehémplopa ñahesaʼỹijóta?

⁵ Ikatu hag̃uáicha Ñandejára ñandekuaa, jahechaukavaʼerã ñande rekovépe umi mbaʼe porã haʼe oguerohorýva (Sal. 15:1-5; 1 Ped. 3:4). Tekotevẽ jahechauka jajeroviaitereiha hese ha ñanderekomirĩha. Ñahesaʼỹijomína mbaʼéichapa mokõi kuimbaʼe yma guare ojapovaʼekue upéicha ha Ñandejára ohayhu chupekuéra upévare. Upéi jahecháta mbaʼéichapa peteĩ kuimbaʼe oservivaʼekue Jehovápe ou oñemombaʼeguasu ha upévare haʼe omboyke chupe. Koʼã ehémplogui ikatu ñaaprende hetaiterei mbaʼe ñanepytyvõtava.

“Umi ojeroviáva ru”

 6. a) Mbaʼéichapa Abrahán ohechauka ojeroviaha Jehová promésare? b) Mbaʼérepa jaʼe Jehová oikuaaha Abrahánpe?

⁶ La Biblia omombeʼu Abrahán ‘ojeroviaiterei hague Ñandejárare’ ha oñehenói voi chupe “umi ojeroviáva ru” (Gén. 15:6; Rom. 4:11, BNP). Haʼe ohejavaʼekue hóga, iñamigokuéra ha opa mbaʼe orekóva ova hag̃ua mombyry ambue tetãme (Gén. 12:1-4; Heb. 11:8-10). Ojekuaa hese ojerovia añete hague, ha oikove aja entéro heta vése ohechauka upéva. Pór ehémplo, peteĩ jey Jehová heʼi chupe osakrifika hag̃ua itaʼýra; haʼe ojapótante avei iñeʼẽrendúgui (Heb. 11:17-19). Jehová ohechakuaa Abrahán ojeroviaitereiha ipromésare, ha upévare oguerohory chupe ha heʼi ‘oikuaaha’ mbaʼeichaguápa haʼe (elee Génesis 18:19). Jahechaháicha Jehová oikuaa Abrahánpe ha hiʼarive oreko chupe iñamígoramo (Sant. 2:22, 23).

 7. Mbaʼérepa Abrahán ojeroviavaʼekue Jehová promésare, ha mbaʼéichapa ohechauka upéva?

⁷ Ñandejára opromete Abrahánpe omeʼẽtaha iñemoñarekuérape pe Yvy Oñeprometevaʼekue ha hetataha hikuái “yvykuʼi oĩva pe yguasu rembeʼypeguáicha” (Gén. 22:17, 18, ÑÑB). Haʼe ningo ndohechajepéi mbaʼéichapa oñekumpli ko promésa, upéicharõ jepe akóinte ojerovia Jehováre. Opa mbaʼe ojapóvape ohechauka oikuaa porãha Ñandejára heʼíramo peteĩ mbaʼe katuete ojapotaha (elee Hebreos 11:13). Mbaʼépa ikatu jaʼe ñandejehe? Ñandekuaápa Jehová jajerovia rupi hese upéicha?

Umi ojeroviáva oikuaa Jehová ndohejamoʼãiha chupekuéra

 8. Mbaʼépa ohupytyse heta tapicha?

⁸ Heta tapichápe hiʼãiterei akóinte hesãi, ojuhu iména térã hembirekorã ha upéi ifamília. Koʼã mbaʼe ningo ndaivaíri, péro sapyʼánte ndaikatúi ojehupyty. Mbaʼépa jajapóta upéicha jave? Umi mbaʼe jadesidíva ohechaukáta mbaʼeichaite pevépa jajerovia Jehováre.

9, 10. a) Mbaʼépa ojapo heta tapicha ohupytységui umi mbaʼe oipotáva? b) Mbaʼépa rehaʼarõ Jehová okumpli?

⁹ Jaipotáramo Jehová ñandeguerohory térã ñandekuaa, ñañatendevaʼerã ani jajapo umi mbaʼe ndogustáiva chupe. Pór ehémplo, mbaʼépa Jehová heʼíta jaiporavóramo umi tratamiénto ndohóiva la Biblia heʼívandi? Ogustátapa chupe jajagarráramo peteĩ traváho oipeʼapaitéva ñandehegui ñane tiémpo ha ndaikatuvéi ñaime ñane famíliandi, térã jaha rreunionhápe? Mbaʼépa opensáta jajegustáramo peteĩ ndahaʼéivare Testígo, ndajajuhúigui ñane irũrã? Jahechaukátapa ñamombaʼeha Jehovápe ha jaikoseha iñamígoramo péicha jajapórõ? Ñapensamíntena mbaʼépa oikovaʼerãmoʼã Abrahán ikaneʼõrire ohaʼarõ hague Jehová promésa. Mbaʼépa opensáneraʼe hese Ñandejára oñepyrũrire ombyaty mbaʼeta oiko porãve hag̃ua ha oñemofamóso? (Embojoja Génesis 11:4 rehe.) Ikatúpa jaʼe Jehová oguerohorýne hague chupe ojapórire upéicha?

¹⁰ Mbaʼépa nde reipotave oñekumpli Jehová promesakuéragui? Rejerovia mbaretépa hese ha rehaʼarõ omeʼẽ ndéve upe reipotáva? Haʼe ningo omoĩta yvypórape opa mbaʼe oipotáva, oĩ porãma guive (Sal. 145:16). Oiko haguéicha Abrahán rehe, sapyʼánte ikatu heta ñahaʼarõ Jehová okumpli hag̃ua ipromésa. Péro jajerovia meméramo haʼe ojapo haguéicha, Ñandejára arakaʼeve ndahesaraimoʼãi ñandehegui ha katuete omeʼẽta ñandéve itiempoitépe heta mbaʼe porã (Heb. 11:6).

Mokõi kuimbaʼe ndojojoguaietéva

11. Mbaʼéichapa Coré oservivaʼekue Jehovápe heta áñore?

¹¹ Moisés ha Coré mbaʼevetépe ndojojoguái. Mbaʼérepa? Peteĩva orrespeta Jehovápe ha ojapo hembipota ha pe ótro katu nahániri. Jahechamína mbaʼeichaguápa rakaʼe Coré. Haʼe levíta oúva Qohat famíliagui ha ohupytyvaʼekue heta priviléhio. Pór ehémplo, ohecha mbaʼéichapa Jehová osalva umi isrraelítape már Rójope, oipytyvõ ojekastigárõ guare umi naiñeʼẽrendúivape mónte Sinaípe, ha avei ojegueraha hag̃ua pe karameg̃ua marangatu (Éxo. 32:26-29; Núm. 3:30, 31). Amalisia heta áñore iñeʼẽrendu Jehovápe, ajeve oĩ heta isrraelíta orrespetáva chupe.

12. Jahechaháicha pe taʼanga oĩva páhina 28-pe, mbaʼépa ojapo Coré oñemombaʼeguasu haguére?

¹² Péro oikokuévo hikuái pe desiértore ha og̃uahẽ mboyve pe Yvy Oñeprometevaʼekuépe, Coré oñepyrũ opensa noñesãmbyhyporãiha Ñandejára puévlo. Haʼe ha 250 kuimbaʼe omanda tuicháva ou okambiase heta mbaʼe. Haʼekuéra oimoʼãneraʼe Jehová oguerohoryha ojapóva, upévare oñemoĩ Moisés rehe, ha heʼi chupe ha Aarónpe: “Mbaʼére piko peẽ peñembotuicha ha peñemoĩ opa Israel aty guasu rehe, opaite Israelgua hekopotĩma [Ñandejára] oikógui ñande apytépe” (Núm. 16:1-3, ÑÑB). Ajépa oñembotuichaite hikuái! Moisés ombohováinte chupekuéra: “Ñandejára ohechaukáta ñandéve mávapa imbaʼe” (elee Números 16:5). Oiko hague koʼẽme upéva, Coré ha umi omoirũva chupe omanombaite (Núm. 16:31-35).

13, 14. Mbaʼéichapa Moisés ohechauka hekomirĩha?

¹³ Moisés katu ndojoguaiete Corépe. Haʼe “hekokirirĩ ha ndaipochykuaái voi. Haʼeichagua ipyʼaporãva ndaipóri yvy ári” (Núm. 12:3). Mbaʼéichapa ohechauka upéva? Ojapóvo opa mbaʼe Jehová heʼihaichaite (Éxo. 7:6; 40:16). La Bíbliape ndajatopái haʼe ojeplagea hague umi mbaʼe Jehová omandávare térã ndogustaiha chupe Ñandejára odesidíva. Pór ehémplo, Jehová heʼipaite Moiséspe mbaʼéichapa ojejapovaʼerã pe tavernákulo, mbaʼeichagua télapa ojeporúta, umi ílo kolór, mbaʼéichapa oñembojoapyvaʼerã ha hetave mbaʼe (Éxo. 26:1-6). Péicha avei, ymaite guive Jehová omoĩ umi ansiánope oisãmbyhy hag̃ua iñorganisasión. Sapyʼánte ikatu nañandegustái umi konsého omeʼẽva hikuái ñaimoʼãgui ipohyietereiha. Péro ñande Ru yvagapegua ningo peteĩ superintendénte ijojahaʼỹva ha omeʼẽ rresponsavilida heta hembiguáipe ojeroviágui hesekuéra. Upévare ojeruréramo ojejapo hag̃ua umi mbaʼe haʼetéva naiñimportanteguasúiva, jajapontevaʼerã, haʼe oikuaahína mbaʼépa iporãve ñandéve g̃uarã. Moisés ndaipochyivaʼekue Jehová heʼírõ guare chupe mbaʼeichaitépa ojejapovaʼerã pe tavernákulo. Haʼe nopensái Ñandejára oapoʼiha chupe térã ndojeroviaiha hese. Upéva rangue iñeʼẽrendu ha ojapouka opa mbaʼe Jehová heʼihaichaite (Éxo. 39:32). Ajépa hekomirĩete Moisés! Haʼe oisãmbyhy porã umi ombaʼapóvape ha ohechauka Jehová oiporunteha chupe ojapo hag̃ua hembipota.

¹⁴ Tiémpo rire Moisés ohechauka jey hekomirĩha. Peteĩ jey umi isrraelíta oñepyrũ jeýma ojeplagea, upépe Moisés ipochyeterei ha oimoʼãʼỹre nomombaʼeguasúi Ñandejárape. Upévare Jehová okastiga chupe ha heʼi haʼe nomoingemoʼãiha ipuévlope pe Yvy Oprometevaʼekuépe (Núm. 20:2-12). Moisés ha iñermáno Aarón hetáma oaguanta umi isrraelítape, ha upérõ ojavy haguére ojeʼe chupe ndohechamoʼãiha mbaʼéichapa oñekumpli Jehová promésa aretéma ohaʼarõvaʼekue. Mbaʼéichapa oñeñandu upe haguére? Oñeñandu vaieterei, péro orrespeta Jehová odesidíva. Haʼe oikuaa porã Ñandejára ojapoha hekoitépe opa mbaʼe ha ‘hekojojaha’ (Deu. 3:25-27; 32:4). Katuete Jehová oikuaa porã Moiséspe ha ohecha oñehaʼãmbaiteha iñeʼẽrendu chupe (elee Éxodo 33:12, 13).

Tekotevẽ ñanderekomirĩ ñaneñeʼẽrendu hag̃ua Jehovápe

15. Mbaʼépa ñaaprende Coré ojapovaʼekuégui?

¹⁵ Koʼág̃a rupi umi ermáno omoakãva Jehová organisasión odesidi avei heta mbaʼe, ha sapyʼánte tekotevẽta ojejapo kámbio. Mbaʼépa ñande jaʼe térã jajapo upéicha jave? Ñanemanduʼavaʼerã iñimportanteveha ñaime porã Jehovándi. Aníkena jajapo Coré ojapo haguéicha. Haʼe ha iñirũnguéra opyta vai Ñandejára renondépe ojeroviaitereígui ijehe ha ojapose rupi heta mbaʼe chupekuéra ogustaháichante. Péicha ohechauka hikuái oñemombaʼeguasu ha ndojeroviaiha Jehováre. Coré ndohechakuaái Jehová oiporunteha Moiséspe omoakã hag̃ua umi isrraelítape, upéicha rupi naiñeʼẽrenduvéi umi tapicha Jehová omoĩvaʼekuépe. Iporãitevevaʼerãmoʼã Coré ojeroviárire Ñandejárare. Haʼe ikatúkuri oipytyvõ chupe ohechakuaa hag̃ua ojavy hague ha okambia hag̃ua tekotevẽhápe. Péro Coré oñemombaʼeguasu ha oity yvýre opa mbaʼe porã ojapovaʼekue Jehová servísiope heta áñore.

16. Mbaʼéichapa ñanepytyvõ Moisés ehémplo?

¹⁶ Enterovéva ñapensavaʼerã ko ehémplore, avei ansianokuéra. Mbaʼérepa? Ohechaukágui tekotevẽtereiha ñanderekomirĩ. Upéicharõmante ñahaʼarõkuaáta Jehová okumpli peve ipromésa ha ñaneñeʼẽrendúta umi ermáno haʼe omoĩvape ñanemoakã hag̃ua. Ñañehaʼãmbaitépa ñaneñeʼẽrendu ha ñanderekokirirĩ Moisés ojapo haguéicha? Jarrespetápa umi ermáno omoakãvape kongregasión ha jajapo haʼekuéra heʼíva? Ñañehaʼãpa ani hag̃ua ñanekangy nosẽiramo ñandéve peteĩ mbaʼe jajaposéva? Ñanderekomirĩ ha ñañemoĩramo umi ñanemoakãva poguýpe, Jehová katuete ñandekuaa ha ñanderayhuetereíta.

“Ñandejára oikuaa umi imbaʼévape”

17, 18. Mbaʼépa jajapovaʼerã ikatu hag̃uáicha Jehová akóinte ñandeguerohory?

¹⁷ Ajépa tuichaite ñanepytyvõ jajepyʼamongetáramo umi iñeʼẽrendúva ehémplore! Koʼã tapichápe Jehová oguerohory ha oguereko iñamígoramo. Jahecha haguéicha, Abrahán ha Moisés ojavy ha iñimperféktoramo jepe, oikovaʼekue Ñandejára mbaʼéramo. Coré katu oñemomombyry chugui ha Haʼe omboyke chupe. Upévare tekotevẽ ñañeporandu: “Chekuaápa Jehová cheñeʼẽrendu haguére chupe? Mbaʼépa chemboʼe koʼã ehémplo?”.

¹⁸ Ajépa ñanemokyreʼỹete jaikuaávo Jehová ñanepytyvõha ñañemoag̃ui hag̃ua hese ha javaletereiha chupe g̃uarã! Koʼýte haʼe ñandeguerohorýta akóinte ñanderekomirĩ, ñaneñeʼẽrendu ha jajeroviáramo hese. Tuichaiterei mbaʼe ningo ñandéve g̃uarã Jehová ñandekuaáramo. Upéva ñanembovyʼaiterei koʼág̃ama voi ha amo gotyove katu jahupytýta hetave mbaʼe porã (Sal. 37:18).

Ñanemanduʼa hag̃ua

• Mbaʼépa ñanemoag̃ui Jehováre?

• Mbaʼéichapa jahechauka jajeroviaha Abrahán ojapo haguéicha?

• Mbaʼépa ñanemboʼe Coré ha Moisés ehémplo?

[Nóta oĩva taʼanga ndive páhina 26]

Jajeroviápa Jehová okumplipaitetaha ipromésa, Abrahán ojerovia haguéicha?

[Nóta oĩva taʼanga ndive páhina 28]

Coré ndorrespetái Jehová oisãmbyhy lája ipuévlo

[Nóta oĩva taʼanga ndive páhina 29]

Ohechápa Jehová ñaneñeʼẽrendu ha ñanderekomirĩha?