¿Mávapa umi oñemoĩva Jehová ykére?

1, 2. a) ¿Mbaʼérepa ñañemoĩramo Jehová ykére jahechauka hína ñanearanduha? b) ¿Mbaʼépa jahecháta ko artíkulope?

NDAIPÓRI ótro ipoderósova, iñarandúva, ha ñanderayhúva Jehováicha. Upévare jahechaukáta ñanearanduha ñañemoag̃uíramo hese. Añetehápe, enterovéva ñaneñeʼẽrenduse Ñandejárape ha ñaĩse ijykére (Sal. 96:4-6). Upéicharõ jepe, oĩ umi oservi vaʼekue Jehovápe péro upéi ou naiñeʼẽrenduvéi chupe.

² Ñañeʼẽmína koʼág̃a unas kuánta persóna heʼi vaʼekuére oĩha Jehová favórpe, péro upéicharõ jepe ojapo avei umi mbaʼe ndogustáiva chupe. Umi mbaʼe ñaaprendétava chuguikuéra ñanepytyvõta jasegi hag̃ua ñandefiél Jehovápe.

 3. ¿Mbaʼérepa Jehová oñehaʼã vaʼekue oipytyvõ Caínpe, ha mbaʼépa heʼi chupe?

³ Ñapensamína Caín situasiónre. Haʼe ndoadoráiramo jepe umi ñandejára guaʼúpe, Jehová ndoaseptái pe adorasión omeʼẽva chupe. ¿Mbaʼérepa? Pórke Ñandejárape ndogustái la ohecháva Caín pyʼapýpe (1 Juan 3:12). Upévare Jehová heʼi chupe: “¿Che piko ndoroguerohorymoʼãi mbaʼe reñehaʼãrõ rejapo pe iporãva? Péro rejaposéramo ivaíva, pe pekádo neraʼarõma hína nde raperãme peteĩ animál ñarõicha, ¿ha ikatúta piko ndepuʼaka hese?” (Gén. 4:6, 7). Jehová ohechauka porã Caínpe oñarrepenti ha oñemoĩramo ijykére, haʼe avei opytataha ijykére.

 4. ¿Mbaʼépa ojapo Caín orekórõ guare oportunida oñemoĩ hag̃ua Jehová favórpe?

⁴ Upéicharõ, Caín okambiárire la opensa lája, Jehová oasepta vaʼerãmoʼã pe adorasión omeʼẽva chupe. Péro Caín nohendúi Ñandejárape, upévare umi deséo vai ndoguerahaporãiete chupe (Sant. 1:14, 15). Oime vaʼerã Caín imitãvépe ni ndojehasáiva iñakãre outaha opuʼã Jehováre. Péro amo ipahápe nopenái Ñandejára konséhore, opuʼã hese ha ojuka iñermáno teetépe.

 5. ¿Mbaʼépa ndajajapói vaʼerã ikatu hag̃uáicha Jehová siémpre ñandeguerohory?

⁵ Oiko haguéicha Caínre, koʼág̃arupi avei ikatu oĩ kristiáno opensáva oadoraha Jehovápe péro osegíva ojapo umi mbaʼe chupe ombojeguarúva (Jud. 11). Peichagua kristiáno ikatu oime osẽ meme predikasiónpe ha ndofaltái rreunionhápe. Upéicharõ jepe, opensa mbaʼe kyʼáre, itaryrýi térã ndaijaʼéi peteĩ ermánore (1 Juan 2:15-17; 3:15). Jarekóramo koʼã mbaʼe ñande pyʼapýpe ikatu voi hína jajapo la ivaíva. Ikatu ótro ndoikuaái la ñapensa ni la jajapóva, péro Jehová oikuaapaite. Haʼe ohechakuaa añetehápepa ñaime hína ijykére (elee Jeremías 17:9, 10).

 6. ¿Mbaʼéichapa Jehová ikatu ñanepytyvõ ñamboyke hag̃ua umi deséo vai?

⁶ Jafalláramo jepe, Jehová ndahaʼéi ku upepete opensátava nañanepohãveimaha. Oimérõ ñañepyrũ hína jaha vai, haʼe heʼi: “Peñemoag̃ui jeýna cherehe, ha che añemoag̃ui jeýta penderehe” (Mal. 3:7). Jehová ningo oikuaa ñanekangyha ha ñañehaʼãha pono jajapo la ivaíva. Haʼe oipota ñamboykete umi mbaʼe vai (Is. 55:7). Péicha jajapóramo, Ñandejára opromete ñanepytyvõtaha ha ñanemombaretetaha ñamboyke hag̃ua umi deséo ikatúva ñanderaha vai (Gén. 4:7).

 7. ¿Mbaʼéichapa Salomón oñemomombyry vaʼekue Jehovágui?

⁷ Salomón imitãvépe, oiko vaʼekue Jehová amígoramo. Ñandejára omoarandueterei Salomónpe ha omeʼẽ chupe pe priviléhio porãite omopuʼã hag̃ua Jerusalén témplo. Péro upéi haʼe ou oñemomombyry Jehovágui (1 Rey. 3:12; 11:1, 2). Ñandejára Léi heʼi Israel rréi nomendái vaʼerãha “heta kuñáre ani hag̃ua ikorasõ oñemomombyry Ñandejáragui” (Deut. 17:17). Salomón nopenái upe mandátore. Upévare ou kuri oreko 700 tembireko ha avei 300 konkuvína. Umíva apytépe, oĩ heta haʼéva ótro tetãygua ha oadoráva umi ñandejára guaʼúpe. Jahechaháicha, haʼe nokumplíri avei pe Léi heʼíva ndovaleiha omenda umi kuña ótro tetãyguáre (Deut. 7:3, 4).

 8. ¿Mbaʼeichaite pevépa Salomón oofende vaʼekue Jehovápe?

⁸ Mbeguekatúpe, Salomón ou nomombaʼevéi Jehová Léi. Upéicha rupi oñepyrũ ojapo umi mbaʼe ivaietereíva. Por ehémplo, omopuʼã peteĩ altár ojeadora hag̃ua pe diósa fálsa héravape Astoret ha avei peteĩ altár pe dios fálso Kemóspe g̃uarã. Upépe haʼe oadora umi ñandejára guaʼúpe hembirekokuérandi. Salomón ningo omopuʼã vaʼekue umi altár peteĩ montáña oĩvape Jerusalén renondetépe, oĩháme Jehová témplo haʼe voi omopuʼã vaʼekue (1 Rey. 11:5-8; 2 Rey. 23:13). Ikatu oime Salomón oñembotavy ijupe opensávo Jehová ombohasa reitanteha entéro mbaʼe vai ojapóva, osegíramo omeʼẽ ofrénda chupe itémplope.

 9. ¿Mbaʼépa oiko Salomón nohendúi haguére Ñandejára konsého?

⁹ Péro Jehová arakaʼeve nombohasareíri umi pekádo. La Biblia heʼi: “Jehová ipochyeterei Salomón ndive, pórke ikorasõ oñemomombyry” chugui. Ñandejára oñehaʼã oipytyvõ Salomónpe. “Haʼe ojechauka vaʼekue chupe 2 vése. Ha heʼi porã chupe ani hag̃ua oadora umi ótro dióspe. Péro Salomón ndojapói Jehová omanda vaʼekue chupe”. Upévare Ñandejára ndoguerohoryvéi ni noipytyvõvéi Salomónpe. Upe rire, Salomón família nogovernavéi Israel kompletoite, ha heta ou iprovléma hikuái hetaiterei tiémpore (1 Rey. 11:9-13).

10. ¿Mbaʼéichapa ikatu oñembyai pe amista jarekóva Jehovándi?

¹⁰ Jaiporavóramo ñane amigorã umi nontendéiva ni ndorrespetáiva Jehová mandamientokuéra, ikatu hína ñañepyrũ ñapensa haʼekuéraicha ha jaju ñañemomombyry Jehovágui. Peichagua tapicha ikatu voi oĩ kongregasiónpe, upéicharõ jepe ijerovia kangy hikuái. Térã ikatu haʼe ñane hénte, ñane vesíno, ñane kompañéro de traváho térã de eskuéla o koléhio ndoadoráiva Jehovápe. Tahaʼe haʼeháicha, umi hénte ndorekói enkuénta la Ñandejára omandáva. Upévare jajeheʼáramo hesekuéra ikatu hína ñambyai ñane amista Jehovándi.

11. ¿Mbaʼépa ikatu ñanepytyvõ jaiporavo porã hag̃ua ñane amigorã?

¹¹ (Elee 1 Corintios 15:33). La majoría umi hénte oreko mimi umi kualida porã. Umi ndoadoráiva jepe Jehovápe ndahaʼéi la ojapo meméva la ivaíva. Ikatu voi nde reikuaa peichagua tapicha. ¿Heʼisépa upéva iporãha jajeheʼa hesekuéra? ¿Ñanepytyvõpa hikuái ñañemoag̃uive hag̃ua Ñandejárare? ¿Mbaʼépa la iñimportantevéva chupekuéra g̃uarã? ¿Mbaʼérehepa oñeʼẽve hikuái? ¿Oñemongetavépa módare, plátare, vyʼarãre, chísmere ha umícha? ¿Oikópa otaky hikuái hapicháre? ¿Ojepokuaápa ochistea tieʼỹ? Jesús heʼi vaʼekue: “Umi mbaʼe omyenyhẽva ñane korasõ ningo osẽ ñande jurúrupi” (Mat. 12:34). Rehechakuaáramo umi persóna rehasávandi tiémpo ombyaiha hína ne amista Jehovándi, pyaʼe porã ejapo vaʼerã álgo. Menove rehasa vaʼerã tiémpo hendivekuéra, ha oimérõ tekotevẽ, ekortaite vaʼerã peichagua amista (Prov. 13:20).

12. a) ¿Mbaʼépa heʼi Jehová umi israelítape osẽ riremi hikuái Egíptogui? b) ¿Mbaʼéichapa orresponde umi israelita ohendu rire la Jehová heʼíva?

¹² Umi mbaʼe oiko vaʼekue Jehová onohẽ rire umi israelítape Egíptogui ñanemboʼe heta mbaʼe. Pe puévlo oñembyatýrõ guare Mónte Sinaí rovái, Jehová ojapo peteĩ mbaʼe tuichaitereíva. Pe arai oñepyrũ hũmba, avei overa, osunu, pe lugár henyhẽ tatatĩgui ha oñehendu peteĩ tyapu hatãitereíva ojoguáva turu púpe (Éx. 19:16-19). Upéi umi israelita ohendu Jehovápe heʼírõ guare: “Che, Jehová, nde Jára, aipota chéve añoiténte cheadora”. Haʼe opromete núnka ndohejamoʼãiha umi ohayhúvape chupe ha okumplíva imandamientokuéra (elee Éxodo 20:1-6). Jehová ontendeka umi israelítape oñemoĩramo hikuái ijykére, haʼe avei oĩtaha hendivekuéra. Epensamína nde reimeha umi hénte apytépe, ¿mbaʼéichapa reñeñandúta rehendu rire la Jehová heʼíva? Katuete rembohováita umi israelita ojapo haguéicha. Haʼekuéra heʼi kuri: “Ore rojapóta opa mbaʼe Jehová heʼíva guive” (Éx. 24:3). Péro upe riremínte oñepresenta peteĩ situasión tekotevẽtahápe ohechauka hikuái ojapótapa añete entéro mbaʼe Jehová heʼíva. Jahechamína upéva.

13. ¿Mbaʼe oportunidápa oñepresenta umi israelita ohechauka hag̃ua ifielha Jehovápe?

¹³ Umi israelita tuichaiterei oñemondýi ohecha rire pe milágro guasuete ohechaukáva Ñandejára podér. Upémarõ ojerure hikuái Moiséspe haʼénte oho hag̃ua oñeʼẽ Jehovándi (Éx. 20:18-21). Moisés ojupi Mónte Sinaípe ha opyta upépe heta díare. Posívlemente umi israelita opensa la ilíder oheja reiha chupekuéra pe desiértope. ¿Mbaʼépa ojapo hikuái? Ikatu oime ojeroviaiterei peteĩ líder umánore. Upémarõ ojedesespera hikuái ha heʼi Aarónpe: “Ejapo ñandéve peteĩ dios ñandegia hag̃ua, pórke ndajaikuaái mbaʼépa oiméne oiko raʼe Moisésgui, upe kuimbaʼe ñaneguenohẽ vaʼekue Egíptogui” (Éx. 32:1, 2).

14. ¿Mbaʼéichapa umi israelita oñembotavy ijupe voi, ha mbaʼépa ojapo Jehová?

¹⁴ Umi israelita oikuaa ndovaleiha oadora umi dios raʼanga (Éx. 20:3-5). Upéicharõ jepe, ensegidamínte oadoráma hikuái peteĩ vaka raʼy raʼangápe. Haʼekuéra oikuaa porã kuri nokumpliriha peteĩ mandáto Jehová omeʼẽva, péro oñembotavy hikuái ijupe voi ha opensa oĩha gueteri Jehová favórpe. Aarón katu heʼi voi haʼeha “peteĩ fiésta Jehovápe g̃uarã”. ¿Mbaʼépa ojapo Jehová? Heʼi Moiséspe pe puévlo ojapoha “peteĩ mbaʼe ivaietereíva”, ha ndosegiriha umi mbaʼe haʼe heʼi vaʼekue chupekuéra “okumpli hag̃ua”. Jehová ipochyeterei ha opensa voi ohundietévo pe tetã kompletoite (Éx. 32:5-10).

15, 16. ¿Mbaʼéichapa Moisés ha Aarón ohechauka oñemoĩha Jehová ykére? (Ehecha pe taʼanga oĩva iñepyrũme).

¹⁵ Péro Jehová oiporiahuvereko rupi chupekuéra, odesidi nohundíri upe tetã. Upéva rangue omeʼẽ oportunida oñemoĩ hag̃ua ijykére umi israelita añetehápe ohayhúva chupe (Éx. 32:14). Péro Moisés ohecha rire mbaʼéichapa pe puévlo osapukái vaipa, opurahéi ha ojeroky pe vaka raʼy raʼanga renondépe, ojagarra pe vaka raʼy raʼanga ojokapa ha omonguʼi ojapo peve chugui yvytimbo. Upéi osapukái pe puévlope ha heʼi: “‘¡Ohayhúva guive Jehovápe, toñemoĩ che ykére!’. Ha enterovete umi levita oho oñemoĩ ijykére” (Éx. 32:17-20, 26).

¹⁶ Aarón ojapo kuri pe vaka raʼy raʼanga, péro upe rire oñarrepenti ha oñemoĩ Jehová ykére, ojapo haguéicha avei umi levita. Péicha ohechauka porã hikuái noñemoĩriha umi pekadór ládope. Añetehápe odesidi porã hikuái, pórke tardemie upe díape omano hetaiterei israelita oadora haguére pe dios guaʼúpe. Péro entéro oñemoĩva Jehová ykére ojesalva, ha haʼe opromete ovendesitaha chupekuéra (Éx. 32:27-29).

17. ¿Mbaʼépa ikatu ñaaprende Pablo ohai vaʼekuégui oñeʼẽrõ guare pe vaka raʼy raʼanga oñemombaʼeguasu vaʼekuére?

¹⁷ ¿Mbaʼépa ikatu ñaaprende la oiko vaʼekuégui? Apóstol Pablo heʼi: “Koʼã mbaʼe ningo ehémplo ñandéve g̃uarã [...]. Ani avei ñamombaʼeguasu ñandejára guaʼu, oĩ haguéicha ijapytepekuéra umi ojapóva”. Upéi heʼi koʼã rreláto oserviha “ñandéve ehémploramo, ha ojehai ñanerekomboʼe hag̃ua ñandéve, jaikóva hína ko múndo ára pahápe”. Heʼi avei: “Pe opensáva ojepytaso mbareteha, toñatendéke ani hoʼa” (1 Cor. 10:6, 7, 11, 12). Ohechaukaháicha Pablo, umi oadoráva Ñandejárape jepe ikatu ojapo ivaíva. Ha ikatu voi opensa hikuái Jehová oguerohoryitiha chupekuéra. Péro peteĩ persóna oikose haguére Jehová amígoramo térã heʼi rupi haʼeha iñamígo, ndeʼiséi katuete Jehová oguerohoryha chupe (1 Cor. 10:1-5).

18. ¿Mbaʼéichapa ikatu ñañemomombyry jahávo Jehovágui, ha mbaʼépepa ikatu opa upéva?

¹⁸ Ñañeʼẽma haguéicha, umi israelita opensa vaʼekue Moisés otardaitereimaha pe Mónte Sinaípe, upévare nohaʼarõsevéima hikuái. Ñande avei ikatu nañanepasiensiavéi pórke pe fin nog̃uahẽi gueteri, ñahaʼarõ haguéicha kuri ñepyrũrã. Ikatu voi ñapensa umi mbaʼe porã Jehová oprometéva otardavetaitiha oñekumpli hag̃ua, térã iporãitereimaha la jaguerovia hag̃ua. Ñapensáramo péicha, ikatu voi jaju ñamotenonde umi mbaʼe ñandévente ñandegustáva ha ñamboyke jahávo Jehová rembipota. Ñañemeʼẽ mboyve enkuénta, koʼã mbaʼe ikatu ñanemomombyry Jehovágui ha jajapo umi mbaʼe ni ndojehasáiva kuri ñane akãre jajapotaha.

19. ¿Mbaʼéguipa núnka nañanderesaráiri vaʼerã, ha mbaʼérepa?

¹⁹ Jehová oipota ñaneñeʼẽrendu ñande pyʼaite guive ha jaadora chupe añoite (Éx. 20:5). ¿Mbaʼérepa haʼe ojerure upéva ñandehegui? Pórke ñanderayhu. Ñande ndajajapóiramo Jehová rembipota jajapóta hína Satanás oipotáva, ha upéva tuicha ñandeperhudikáta. Pablo heʼi vaʼekue: “Peẽ ndaikatúi peyʼu Jehová kópagui ha umi demónio kópagui; ndaikatúi pekaru ‘Jehová meságui’ ha demoniokuéra meságui” (1 Cor. 10:21).

20. ¿Mbaʼéichapa Jehová ñanepytyvõ jajavýramo jepe?

²⁰ Caín, Salomón ha umi israelita oreko kuri oportunida oñarrepenti ha okambia hag̃ua (Hech. 3:19). Jehová ndahaʼéi omboykéva ensegída isiervokuérape ojavy haguérente. Katuete ñanemanduʼa mbaʼéichapa haʼe operdona kuri Aarónpe. Koʼág̃a avei, Jehová ñanderayhu rupi omeʼẽ ñandéve konsého ani hag̃ua jajapo ivaíva. Upearã oipuru la Biblia, ñane puvlikasionkuéra ha avei ñane ermanokuérape. Ñapenáramo Jehová konséhore, haʼe katuete ñandeporiahuverekóta.

21. ¿Mbaʼépa jajapóta tekotevẽramo jahechauka ñandefielha Jehovápe?

²¹ Jehová imbaʼeporã ñanendive nañamereséiramo jepe. ¿Mbaʼérepa ojapo upéva? (2 Cor. 6:1). Péicha omeʼẽ ñandéve oportunida “ñamboyke hag̃ua opa mbaʼe oñemoĩva Ñandejára rembipotáre ha ani hag̃ua jaipota umi mbaʼe ko mundopegua” (elee Tito 2:11-14). Ko múndo añáme katuete jahasáta umi situasión tekotevẽtahápe jahechauka ñandefielha Jehovápe. Jajedesidi vaʼerã siémpre ñañemoĩtaha ijykére, ha ani ñanderesarái Deuteronomio 10:20 heʼívagui: “Pekyhyje ha perrespeta vaʼerã Jehová pende Járape, siémpre peservi ha peneñeʼẽrendu vaʼerã chupe”.