Jajeroviákena Jehováre ha jadesidi porã

 1. ¿Mbaʼéicha rupípa Caín odesidi vai, ha mbaʼépa oiko upéicha rupi?

CAÍN odesidi vaʼerã kuri peteĩ mbaʼe iñimportantetereíva: ojejokótapa térãpa ohejáta umi mbaʼe oñandúva iñimperfékto rupi ipuʼaka hese. Haʼe odesidi porãrire, oho porãta kuri chupe, péro odesidi vaírõ katuete osẽ vaíta. La Biblia omombeʼu Caín odesidi vai hague. Upéicha rupi ojuka iñermáno Abélpe ha operde iñamista Jehovándi (Gén. 4:3-16).

 2. ¿Mbaʼérepa iñimportánte jadesidi porã?

² Ñande avei jadesidi vaʼerã heta mbaʼe, sapyʼánte umi mbaʼe iñimportantevéva ha ótro naiñimportanteguasúiva. Upéicharõ jepe, umi mbaʼe jadesidíva, katuete ñandeafekta upéi. Jadesidi porãramo, saʼive ñaneprovlémata ha ñandepyʼaguapýta. Péro jadesidi vaíramo, jaikéta heta akãrasýpe ha jajeperhudikáta (Prov. 14:8).

 3. a) ¿Mbaʼérehepa tekotevẽ jajerovia ikatu hag̃uáicha jadesidi porã? b) ¿Mbaʼe porandúpa ñarrespondéta?

³ ¿Mbaʼépa ñanepytyvõta jadesidi porã hag̃ua? Tekotevẽ jajerovia Ñandejárare, ha ñaime vaʼerã segúro haʼe ñanepytyvõse ha ñanemoaranduseha ikatu hag̃uáicha jadesidi porã. Avei jajerovia vaʼerã la Bíbliare ha umi konsého jatopávare pype (elee Santiago 1:5-8). Amáske ñañemoag̃ui Jehováre ha jahayhu Iñeʼẽ, ñaimevéta segúro haʼe oikuaaha mbaʼépa iporãve ñandéve g̃uarã. Upéva ñanepytyvõta jahecha hag̃ua mbaʼépa heʼi la Biblia jadesidi mboyve peteĩ mbaʼe. Péro, ¿mbaʼépa ñanepytyvõta jadesidi porã meme hag̃ua? Ha oiméramo jadesidíma peteĩ mbaʼe, ¿tekotevẽtapa sapyʼánte ñakambia jey?

 4. ¿Mbaʼépa odesidi vaʼerã kuri Adán, ha mbaʼépa oiko upe rire?

⁴ Ymaite guive, yvyporakuéra tekotevẽ vaʼekue odesidi heta mbaʼe iñimportánteva. Pe primer kuimbaʼe Adán, tekotevẽ vaʼekue odesidi ohendútapa Ijapohare Jehovápe, térãpa hembireko Évape. Adán odesidi ohendu hembirekópe, hiʼarive Eva omboliga chupe odesidi vai hag̃ua. Upéicha rupi, Jehová omosẽ Adánpe pe Hardín de Edéngui, ha tiémpo rire omano. Koʼag̃aite peve ñande jasufri Adán odesidi vai haguére.

 5. ¿Mbaʼéichapa jahecha vaʼerã pe rresponsavilida jarekóva jadesidi hag̃ua?

⁵ Oĩ opensáva opa mbaʼe ifasilvetaha natekotevẽiramo jadesidi. Ikatu oime nde repensa avei upéicha. Péro iporã ñanemanduʼa Jehová ndokreái hague yvyporakuérape umi rrovóicha, ndaikatúiva opensa ni odesidi. Haʼe omeʼẽ ñandéve Iñeʼẽ ikatu hag̃uáicha ñanemboʼe mbaʼéichapa jadesidi porãta. Jehová oipota káda uno odesidi, ha upéva tuicha ikatu ñanepytyvõ. Jahechamína unos kuánto ehémplo yma guare ohechaukáva siertoha upéva.

6, 7. a) ¿Mbaʼépa odesidi vaʼerã kuri umi israelita? b) ¿Mbaʼérepa ijetuʼuete vaʼekue umi israelítape odesidi porã hag̃ua? (Ehecha pe taʼanga oĩva iñepyrũme).

⁶ Umi israelita oikórõ guare pe Tiérra Prometídape, odesidi vaʼerã kuri oadorátapa Jehovápe térãpa oservíta umi ótro dióspe (elee Josué 24:15). Ko desisión ningo ndahaʼéi vyrorei, pórke umi mbaʼe odesidívare hikuái ikatu osegi oikove térã omano. Umi hués tiémpope katu, umi israelita osegi odesidi vai. Haʼekuéra nomombaʼeguasuvéi Jehovápe ha oñepyrũ oadora umi dios fálsope (Juec. 2:3, 11-23). Upéi, proféta Elías tiémpope, Ñandejára puévlo tekotevẽ vaʼekue odesidi oservítapa Jehovápe térãpa Baálpe, haʼéva peteĩ dios fálso (1 Rey. 18:21). Ñapensa porãramo ndaijetuʼúi vaʼekue la odesidi vaʼerã hikuái, pórke siémpre iporãvéta jaservi Jehovápe. Peteĩ persóna iñarandúva ningo ndoservisemoʼãi peteĩ dios guaʼúpe. Péro pe puévlo ipyʼamokõi. La Biblia heʼi umi israelita osegi hague oguata mokõi tapére ha ndoikuaái hague mbaʼépa ojapóta. Elías katu iñarandu ha omokyreʼỹ pe puévlope oadora hag̃ua pe Dios verdadéro, Jehovápe.

⁷ ¿Mbaʼérepa ijetuʼuete vaʼekue umi israelítape odesidi porã hag̃ua? Primero, pórke ndojeroviái Jehováre ha nohenduséi chupe. Avei haʼekuéra nomboykéi tiémpo oikuaa porãve hag̃ua chupe, upéicha rupi nokonfiái hese ha ndodesidiporãi (Sal. 25:12). Segundo, umi israelita opermiti ova hesekuéra umi persóna ótro tetãgua opensa lája, ha oheja umi extranhéro ndoadoráiva Jehovápe odesidi hesekuéra. Upéicha rupi oñepyrũma hikuái oadora avei umi dios fálsope. Hiʼarive Jehová hetaiterei tiémporema heʼi porã umi israelítape ikatuha oiko hesekuéra upéva (Éx. 23:2).

 8. ¿Mbaʼépa ñanemboʼe umi israelítare oiko vaʼekue?

⁸ ¿Mbaʼépa ñaaprende umi israelítare oiko vaʼekue? Jadesidi porãséramo tekotevẽ jaipuru Ñandejára Ñeʼẽ. Gálatas 6:5 ñanemomanduʼa: “Káda uno ogueraháta ikárga”. Jahechaháicha, káda uno jadesidi vaʼerã mbaʼépa jajapóta, ani jaheja avave odesidi ñanderehe. Upéva rangue, tekotevẽ ñaaprende mbaʼépa iporã Ñandejárape g̃uarã, ha jajapo upéva.

 9. ¿Mbaʼérepa ipeligróso jaheja ótro odesidi ñanderehe?

⁹ Jadesidíramo peteĩ mbaʼe ótro ñanemboliga rupínte, ikatu hína jadesidi vai. Avei péicha jaheja hína ótro odesidi ñanderehe (Prov. 1:10, 15). Upéva ipeligrosoiterei. Ñande jajapo vaʼerã ñane konsiénsia heʼíva, péro ñahekomboʼe vaʼerã la Biblia rupive. Jahejáramo ótro odesidi ñanderehe, añetehápe jajapo hína haʼe oipotáva. Upéva ikatu ogueru ñandéve heta akãrasy.

10. ¿Mbaʼépa heʼi vaʼekue Pablo umi ermáno Galasiaguápe?

¹⁰ Apóstol Pablo heʼi vaʼekue umi ermáno Galasiaguápe ani hag̃ua oheja ótro odesidi hesekuéra (elee Gálatas 4:17). Kongregasión de Galásiape oĩ vaʼekue ermáno odesidiséva hapicháre. ¿Mbaʼérepa ojapose upéva? Pórke haʼekuéra opensa ijehénte ha oipota umi ermáno osegi chupekuéra, osegi rangue umi apóstol omboʼéva. Koʼã kuimbaʼe naiñumíldei ni ndorrespetái pe derécho orekóva umi ermáno odesidi hag̃ua.

11. ¿Mbaʼéichapa ikatu ñaipytyvõ ótrope tekotevẽta jave odesidi?

¹¹ Entéronte ikatu ñaaprende apóstol Pablo ehémplogui. Haʼe oikuaa umi ermáno orekoha derécho odesidívo la ojapótava ha orrespeta chupekuéra (elee 2 Corintios 1:24). Koʼág̃a avei umi ansiáno ojapo vaʼerã upéicha omeʼẽ jave konsého umi ermánope. Por ehémplo umi ermáno tekotevẽtarõ odesidi peteĩ mbaʼe, ansianokuéra oipuru Ñandejára Ñeʼẽ ha umi puvlikasión oakonseha hag̃ua chupekuéra. Péro oheja vaʼerã umi ermáno odesidi la ojapótava, pórke amo ipahápe káda uno jajecháta umi mbaʼe jadesidívare. Jahechaháicha, ñande ikatu ñaipytyvõ ótrope ontende hag̃ua umi konsého oĩva la Bíbliape ha ojapo hag̃ua upépe heʼíva. Upéicharõ jepe, káda ermáno odesidi vaʼerã la ojapótava. Ha odesidi porã jave hikuái, tuicha oñevenefisia. Jahechakuaa upéicharõ núnka nañapensái vaʼerãha ikatuha jadesidi ñane ermanokuérare.

12, 13. ¿Mbaʼérepa naiporãi jadesidi peteĩ mbaʼe ñandepochy térã ñañedesanima jave?

¹² Koʼág̃arupi heta oĩ opensáva iporãveha jajapo ñane korasõ heʼíva jadesidíta jave peteĩ mbaʼe. Péro upéva ikatu ipeligróso. La Biblia ñandeavisa ndovaleiha jajesegi ñane korasõre térã ñane sentimiéntore jadesidíta jave (Prov. 28:26). Ñande ndaikatúi ñakonfia ñane korasõ heʼívare pórke “itraisionéro ha ipyʼatarova” (Jer. 17:9, TNM). Ñandejára Ñeʼẽme oĩ heta ehémplo ohechauka porãva katuete osẽ vaiha umi ojeroviáva ikorasõre (1 Rey. 11:9; Jer. 3:17; 13:10). Upéicharõ, ¿mbaʼépa ikatu oiko ñanderehe jajesegíramo ñane korasõre jadesidíta jave?

¹³ Jehová omanda ñandéve jahayhu hag̃ua chupe ñane korasõ mbytete guive ha jahayhu hag̃ua ñande rapichakuérape ñande jajehayhuháicha (Mat. 22:37-39). Péro umi téxto oĩva párrafo 12-pe ohechauka porã ipeligrosoha jaheja umi mbaʼe ñañandúva odomina la ñapensáva ha jajapóva. Por ehémplo, peteĩ persóna ipochýva ijetuʼu odesidi porã hag̃ua (Prov. 14:17; 29:22). Avei peteĩ oñedesanimáva hasy lénto odesidi hag̃ua hekoitépe (Núm. 32:6-12; Prov. 24:10). Jaheja vaʼerã Ñandejára Ñeʼẽ togia umi mbaʼe ñapensáva (Rom. 7:25). Ha jadesidíta jave peteĩ mbaʼe iñimportánteva, ani ñapermiti ñanedomina umi mbaʼe ñañandúva.

14. ¿Mbaʼéichapa jaikuaa sapyʼánte iporãvetaha ñakambia peteĩ mbaʼe jadesidíma vaʼekue?

¹⁴ Jahechaháicha, iñimportánte jadesidi porã. Peteĩ persóna iñarandúva oikuaa oĩha moménto tekotevẽtaha ohecha jey la odesidíma vaʼekue, ha sapyʼánte okambia jey upéva. Jehová omoĩ ñandéve pe ehémplo iporãvéva. Jahechamína mbaʼépa ojapo Jonás tiémpope umi Niniveguáre. La Biblia heʼi: “Ohecha [Ñandejára] umi mbaʼe Ninivegua ojapóva. Ohecha ohejaha hikuái hekovai. Upévare nohundíri chupekuéra heʼi haguéicha ojapotaha” (Jon. 3:10). Jehová okambia la odesidi vaʼekue ohechárõ guare umi Ninivegua oñarrepenti ha ndojapovéi umi mbaʼe vai. Upéva ohechauka haʼe noñemohatãiha la heʼívapente, iñumílde ha oporoporiahuverekoha. Heta persóna odesidi jepi pochýre peteĩ mbaʼe, péro Jehová arakaʼeve ndojapói upéva.

15. ¿Mbaʼérepa sapyʼánte tekotevẽta ñakambia peteĩ mbaʼe jadesidi vaʼekue?

¹⁵ Heta vése iporã ñakambia peteĩ mbaʼe jadesidíma vaʼekue, por ehémplo okambia jave ñane situasión. Ñanemanduʼa vaʼerã Jehová ojapo hague upéva unas kuánta vése (1 Rey. 21:20, 21, 27-29; 2 Rey. 20:1-5). Avei sapyʼánte tekotevẽta ñakambia peteĩ mbaʼe jadesidi vaʼekue jarresivi rupi peteĩ informasión pyahu. Ñapensamíntena rréi David ehémplore. Haʼe odesidi vai vaʼekue peteĩ mbaʼe oafektáva Mefibósetpe, haʼéva Saúl niéto, pórke ojeʼe chupe peteĩ mbaʼe ndasiértoiva. Péro upéi okambia jey la odesidímava pórke oikuaa porãma pe oiko vaʼekue (2 Sam. 16:3, 4; 19:24-29). Ñande avei sapyʼánte tekotevẽta jajapo upéicha.

16. a) ¿Mbaʼépa ñanepytyvõta jadesidi porã hag̃ua? b) ¿Mbaʼérepa sapyʼánte tekotevẽta ñakambia peteĩ mbaʼe jadesidi vaʼekue, ha mbaʼéichapa ikatu jajapo upéva?

¹⁶ La Biblia heʼi ani hag̃ua jajapura jadesidi hag̃ua peteĩ mbaʼe iñimportánteva (Prov. 21:5). Upévare tekotevẽ ñañemotiémpo ñapensa porã hag̃ua ikatu hag̃uáicha jadesidi porã (1 Tes. 5:21). Por ehémplo, umi ména odesidi mboyve peteĩ mbaʼe oñemotiémpo vaʼerã ohecha hag̃ua mbaʼépa heʼi la Biblia ha umi puvlikasión, ha mbaʼépa opensa ifamília. Ani ñanderesarái Jehová heʼi hague Abrahánpe ohendu hag̃ua hembirekópe (Gén. 21:9-12). Umi ansiáno avei omboyke vaʼerã tiémpo oinvestiga porã hag̃ua. Osẽramo peteĩ informasión pyahu ha ohechakuaárõ hikuái tekotevẽha okambia peteĩ mbaʼe odesidíma vaʼekue, nopensái umi ermáno ndorrespetamoʼãveimaha chupekuéra. Umi ansiáno iñumílderamo ha noñemohatãi haʼekuéra heʼívapente, naiprovlemamoʼãi okambia hag̃ua opensa lája térã peteĩ mbaʼe odesidíma vaʼekue. Péicha omoĩta hikuái ehémplo porã entérope, ha oipytyvõta ikatu hag̃uáicha pe kongregasión oiko pyʼaguapýpe ha peteĩ ñeʼẽme (Hech. 6:1-4).

17. ¿Mbaʼépa ñanepytyvõta osẽ porã hag̃ua ñandéve umi mbaʼe jadesidíva?

¹⁷ Heta vése umi mbaʼe jadesidíva iñimportanteterei. Por ehémplo, ñamendátapa, mávarepa ñamendáta, térã jaservítapa de tiémpo kompléto. Jadesidi mboyve koʼã mbaʼe iñimportantetéva, tekotevẽ ñapensa porã raẽ ñane situasiónre ha ñañemboʼe Jehovápe ikatu hag̃uáicha ñanepytyvõ. Jajapo hag̃ua koʼã mbaʼe tekotevẽ ñamboyke tiémpo, ha avei jajerovia vaʼerã Jehováre, ñahendu heʼíva ñandéve ha jasegi igía (Prov. 1:5). Jehová omeʼẽ ñandéve umi konsého iporãvéva Iñeʼẽ rupive. Upévare iñimportánte jaheka koʼãva ha ñañemboʼe chupe ikatu hag̃uáicha ñandegia. Haʼe katuete omeʼẽta ñandéve umi kualida ñaikotevẽva ikatu hag̃uáicha osẽ porã ñandéve la jadesidíva. Jadesidi mboyve peteĩ mbaʼe iñimportánteva, iporã ñañeporandu: “¿Ojekuaápa umi mbaʼe adesidívare ahayhuha Jehovápe? ¿Oipytyvõtapa oĩ hag̃ua vyʼa ha pyʼaguapy che rogapýpe? ¿Ohechaukátapa chepasiénsia ha chepyʼaporãha?”.

18. ¿Mbaʼérepa Jehová oipota ñandete jadesidi la jajapótava?

¹⁸ Jehová nañandeovligái jahayhu ha jaservi hag̃ua chupe, upéva rangue omeʼẽ ñandéve liverta jadesidi hag̃ua mbaʼépa jajapóta. Haʼe orrespeta umi mbaʼe jadesidíva, tahaʼe jadesidírõ jaservi chupe térã nahániri (Jos. 24:15; Ecl. 5:4). Péro oipota jaheka igía ha ñañehaʼã jajapo pe jadesidi vaʼekue. Jahechaukákena jajeroviaha Jehováre ha umi mbaʼe ñanemboʼévare, péicha jadesidi porãta ha akóinte jaguatáta hapére (Sant. 1:5-8; 4:8).