LEKSIÓN 41
¿Mbaʼépa heʼi la Biblia umi rrelasión sexuál rehe?
Heta hénte otĩeterei oñeʼẽ hag̃ua umi rrelasión sexuál rehe. Péro la Bíbliape oñemombeʼu porã ñandéve mbaʼépa opensa hese Ñandejára. Ha ndojapói upéva ñanemoñeñandu vai térã ñanemotĩ hag̃uáicha, síno ohechauka ñanderrespetaitereiha. Upéva ningo nañanesorprendéi, pórke la Biblia ou Jehovágui ha haʼe hína ñande Kreadór. Upéicha rupi oikuaa mbaʼépa la iporãvéva ñandéve g̃uarã. Haʼe ohechauka ñandéve mbaʼépa jajapo vaʼerã ikatu hag̃uáicha ñandeguerohory, ha jaiko hag̃ua vyʼápe pára siémpre.
1. ¿Mbaʼépa opensa Jehová umi rrelasión sexuál rehe?
Umi rrelasión sexuál ningo haʼe peteĩ rregálo oúva Jehovágui. Ha haʼe oipota odisfruta oñondive ko rregálogui umi kuña ha kuimbaʼe omendáva añoite. Ko rregálo rupive, umi omendáva ikatu ifamília, ha avei ikatu oñomokunuʼũ ha ohechauka ojupe ojoayhuha. Upéicha rupi Ñandejára Ñeʼẽ heʼi voi: “Evyʼákena ne rembireko ndive, haʼe hína ne irũ nemitã guive” (Proverbios 5:18, 19). Jehová oipota isiervokuéra omendáva ifiél ojupe, ha ni mbaʼevéicharõ noñomoakãratĩri vaʼerã (elee Hebreos 13:4).
2. ¿Mbaʼépa hína pe tekovai?
La Biblia heʼi ñandéve umi hekovaíva “ndoikemoʼãiha Ñandejára Rréinope” (1 Corintios 6:9, 10). Umi oskrivi vaʼekue la Biblia oipuru pe palávra griega pornéia oñeʼẽ hag̃ua pe tekovaíre. Ha upévape oike: 1) umi rrelasión sexuál orekóva oñondive umi nomendáiva,a 2) umi kuimbaʼe oikóva kuimbaʼéndi térã kuña kuñándi, ha 3) peteĩ persóna orekóva rrelasión sexuál animál ndive. Jehová ñandeguerohory hag̃ua ñande jarrechasaite vaʼerã pe tekovai, ha upéva katuete ou porãta ñandéve (1 Tesalonicenses 4:3).
EJEPYʼAMONGETAMÍNA
Jahechamína mbaʼéichapa ikatu jarrechasaite pe tekovai, ha mbaʼéichapa ou porã ñandéve ñanderekopotĩramo.
3. Errechasaitékena pe tekovai
Peteĩ Ñandejára siérvo ifiélva hérava José oñehaʼãmbaite vaʼekue hekopotĩ hag̃ua. Elee Génesis 39:1-12, ha upéi erresponde koʼã porandu:
¿Mbaʼérepa José osẽ raʼe odipara pe kuñágui? (Ehecha jey versíkulo 9).
¿Ndépa ere José odesidi porã hague? ¿Mbaʼérepa repensa upéicha?
¿Mbaʼéichapa umi imitãva ikatu osegi José ehémplo ha orrechasaite pe tekovai? Ehecha pe VIDÉO.
Jehová oipota enterovéva jarrechasaite pe tekovai. Elee 1 Corintios 6:18, ha upéi erresponde koʼã porandu:
¿Mbaʼeichagua situasiónpa omboyke vaʼerã peteĩ persóna ndoʼaséiramo tekovaípe?
¿Mbaʼéichapa ikatu errechasaite pe tekovai?
4. Nde ikatu ndepuʼaka umi tentasiónre
¿Mbaʼérepa ikatu ijetuʼu peteĩ persónape ipuʼaka hag̃ua umi tentasiónre? Ehecha pe VIDÉO, ha upéi erresponde ko porandu:
Pe ermáno ohechakuaa la opensáva ha ojapóva ikatuha kuri ogueraha vai chupe, upémarõ ¿mbaʼépa ojapo ani hag̃ua ou omoakãratĩ hembirekópe?
Umi kristiáno ifiélva jepe oñehaʼãmante vaʼerã opensa meme hag̃ua umi kósa ipotĩvare. Péro, ¿mbaʼépa ikatu nepytyvõ ani hag̃ua nde repensa mbaʼe kyʼáre? Elee Filipenses 4:8, ha upéi erresponde koʼã porandu:
¿Mbaʼe mbaʼe rehepa ñapensa meme vaʼerã?
¿Ndépa ere jalee meméramo la Biblia ha ñanerembiapo hetáramo Jehová servísiope ñanepytyvõtaha ani hag̃ua jaʼa umi tentasiónpe? ¿Mbaʼérepa repensa upéicha?
5. Jehová heʼíva ideprovécho ñandéve
Jehová oikuaa mbaʼépa la iporãvéva ñandéve g̃uarã. Haʼe omombeʼu ñandéve mbaʼéichapa ikatu ñanderekopotĩ, ha avei mbaʼéichapa ou porã ñandéve upéva. Elee Proverbios 7:7-27 térã ehecha pe VIDÉO, ha upéi erresponde koʼã porandu:
¿Mbaʼépa ojapo pe mitãkariaʼy oipotágui oñepresenta chupe peteĩ tentasión? (Ehecha jey Proverbios 7:8, 9).
Ohechaukaháicha Proverbios 7:23, 26, umi hekovaíva ikatu oike heta akã rasýpe. Péro, ¿mbaʼeichagua provlémaguipa ikatu jajehekýi ñanderekopotĩramo?
¿Mbaʼérepa ikatu jaʼe ñanderekopotĩmante vaʼerãha jaiko hag̃ua vyʼápe pára siémpre?
Oĩ opensáva iñinhustoha la Biblia omboʼéva pe omosexualidáre. Péro Ñandejára Jehová ningo ñanderayhueterei ha oipota enterovéva jaiko vyʼápe pára siémpre. Ha ikatu hag̃uáicha jahupyty upéva tekotevẽ jajapo haʼe heʼíva. Elee 1 Corintios 6:9-11, ha upéi erresponde ko porandu:
Ñandejára oipota ñamboykete umi deséo omosexuál. Péro ndahaʼéi upévante, ¿mbaʼe mbaʼépa oipota avei ñamboyke?
Ñandejára ñandeguerohory hag̃ua, ñamboykémante vaʼerã heta mbaʼe ha jajapo heta kámbio. Péro, ¿ovalépa la péna jajapo upéva? Elee Salmo 19:8, 11, ha upéi erresponde koʼã porandu:
Jahecháma haguéicha, Jehová oipota ñamboykete pe tekovai. ¿Ndépa ere isentidoha la ojeruréva ñandéve? ¿Mbaʼérepa repensa upéicha?
Jehová oipytyvõma hetápe oiko hag̃ua haʼe oipotaháicha ha ikatu avei nepytyvõ ndéve
OĨRAMO HEʼÍVA: “Chéverõ g̃uarã ndaivaíri mokõi persóna orekóramo rrelasión sexuál omendaʼỹre. Ojoayhúma guive hikuái, oĩ porã upéva”.
¿Mbaʼépa nde repensa upévare?
RRESÚMEN
Umi rrelasión sexuál ningo haʼe peteĩ rregálo oúva Jehovágui ha haʼe oipota odisfruta oñondive ko rregálogui umi kuña ha kuimbaʼe omendáva añoite.
Rrepáso
¿Mbaʼe mbaʼépa oike pe tekovaípe?
¿Mbaʼérepa ñamboykete vaʼerã pe tekovai?
¿Mbaʼe iporãvapa jahupytýta jasegíramo ñanderekopotĩ?
EINVESTIGA HAG̃UA
Ehecha mbaʼérepa Ñandejára oipota umi kuimbaʼe ha kuña omenda oiko hag̃ua oñondive.
“¿Mbaʼépa heʼi la Biblia umi oikóvare oñondive omendaʼỹre?” (Artíkulo oĩva jw-pe)
La Biblia heʼi ñamboyke vaʼerãha umi deséo omosexuál, péro upéva ndeʼiséi ndajachaʼéi vaʼerãha umi omosexuál rehe. Ehecha mbaʼérepa jaʼekuaa upéva.
“¿Mbaʼépa heʼi la Biblia pe omosexualidáre?” (Artíkulo oĩva jw-pe)
Ehecha mbaʼéichapa ñandeprotehe umi léi Ñandejára omeʼẽva umi rrelasión sexuál rehe.
“¿Oñeʼẽpa la Biblia pe séxo orál rehe?” (Artíkulo oĩva jw-pe)
Pe experiénsia héravape “Umi Testígo ohechauka cherrespetaha”, ehecha mbaʼépa omomýi peteĩ karai haʼe vaʼekuépe omosexuál okambia hag̃ua oiko lája, oipotágui
“La Biblia okambia chupekuéra” (La Atalaya 1 de abril de 2011)
a Pe palávra pornéia térã “tekovai” ojepuru oñeñeʼẽ hag̃ua entéro rrelasión sexuál noĩporãivare, ha umívape oike avei pe séxo orál, séxo anál, térã opokopáva hapicha órgano sexuál rehe.