“Peteĩ superintendénte imbaʼeporã ha ojehayhuetéva”

JOHN BARR omohuʼã iservísio ko yvy ape ári sábado 4 de diciembre de 2010 orekópe 97 áño. Ermáno Barr-pe iñamigokuéra ohero Jack. Haʼe oĩvaʼekue Cuerpo Gobenántepe. Umi oikuaavaʼekue chupe heʼi hese haʼe hague “peteĩ superintendénte imbaʼeporã ha ojehayhuetéva”.

Jack Barr onasevaʼekue Aberdeen-pe (Escocia). Itúva ha isy ningo unhidovaʼekue, oĩ hikuái tres ermáno ha haʼe pe imitãvéva. Imanduʼámi umi mbaʼe ohasávare hógape imitãrõ guare ha oagradeseterei itúva ha isy omoĩ haguére chupe ehémplo neporãva.

John ningo imitãme hiʼotĩetereivaʼekue, upéicharamo jepe oñehaʼãmbaite oñeʼẽ hag̃ua kyhyjeʼỹme hapichakuérape. Peteĩ domingo kaʼaru áño 1927-pe orekórõ guare 14 áño, heʼi itúvape oĩmaha osẽ hag̃uáicha opredika hendive ogahárupi. Upe ára guive omano meve, kyreʼỹme opredika pe marandu porã.

Peteĩ árape, John sy haimete omano peteĩ aksidénte vaípe. Upéva omomýi chupe ojepyʼamongeta hag̃ua hekovére ha odesidi oñemeʼẽ Jehovápe áño 1929-pe, péro áño 1934-pe ae ikatuvaʼekue ojevautisa. Cinco áño haguépe oho ombaʼapo Betélpe oĩva Londres-pe (Inglaterra), ha upe guive 71 áño pukukuére oiporupaite itiémpo Jehová servísiope.

Ermáno Barr heʼi omoñepyrũ hague “peteĩ mbaʼe iporãitereíva”. Omenda Mildred Willett rehe 29 de octubre de 1960. Haʼe ningo peteĩ ermána heta áñorema oservíva de prekursóra ha misionéraramo. John ha Mildred omoĩ ehémplo porã oikógui peteĩ ñeʼẽme ha ojapo rupi oñondive opa mbaʼe omombarete hag̃ua ijerovia. Mildred omohuʼã iservísio ko yvy ape ári octubre 2004-pe. Haʼekuéra omenda guive ndohejái ohasa ni peteĩ ára oleeʼỹre oñondive la Biblia.

John Barr-pe ojekuaavaʼekue oñemoñeʼẽkuaa, iñakãguapy, imbaʼeporã ha oñehaʼã haguére ojapo Ñandejára Ñeʼẽme heʼihaichaite. Haʼe ningo kaneʼõʼỹre ombaʼapóva Jehovápe g̃uarã, haʼevaʼekue avei peteĩ superintendénte imbaʼeporãva ha amígo oporohayhúva. Umi komentário, diskúrso ha ñemboʼe ojapóvare ojehecha mbaʼeichaitépa ijerovia mbarete ha oĩ porã Jehová ndive.

Añetehápe rohekaitereíta ermáno Barr-pe. Péro rovyʼaiterei roikuaágui oĩmaha yvágape, haʼe ningo ohaʼarõitereivaʼekue upéva ha pyʼỹinte oñeʼẽ upe esperánsare. Chupe g̃uarã ndaipóri ambue mbaʼe iñimportantevéva (1 Cor. 15:53, 54).a

[Nóta]