Oñeporandúva Jepi

Umi mbaʼe David oskrivi vaʼekue upe sálmope ndeʼiséi kuri haʼe opensa hague núnka nomanomoʼãiha.

Upearã ikatu ñapensa umi mbaʼe oskrivi vaʼekuére ko versíkulope ha umi ótro téxto ojoguávape avei chupe: “Che ningo káda día akumpli umi promésa ajapo vaʼekue ndéve. Péicha avei siémpre apurahéita amombaʼeguasu hag̃ua nde réra”. “Jehová, nde ningo che Jára, che pyʼaite guive romombaʼeguasu ha siémpre ambotuicháta nde réra”. “Siémpre ambotuicháta nde réra, ajapóta upéva opa árare voi” (Sal. 61:8; 86:12; 145:1, 2).

David oskrivírõ guare upéva, nopensái kuri núnka nomanomoʼãiha. Haʼe oikuaa porã kuri Jehová heʼi hague pe pekádo káusare enterovéva ñamanotaha, ha haʼe oikuaa vaʼekue haʼeha peteĩ pekadór (Gén. 3:3, 17-19; Sal. 51:4, 5). David oikuaa porã vaʼekue umi kuimbaʼe Ñandejára oguerohorýva jepe omano hague, por ehémplo Abrahán, Isaac ha Jacob. Upévare David ohechakuaa vaʼekue haʼe omanotaha avei (Sal. 37:25; 39:4). Péro umi mbaʼe haʼe heʼi vaʼekue Salmo 61:8-pe ohechauka pe deséo haʼe oguerekóva omombaʼeguasu hag̃ua Jehovápe pára siémpre, térã oikove aja entéro (2 Sam. 7:12).

David ningo heta vése oskrivi vaʼekue umi mbaʼe haʼete voi ohasa vaʼekue hekovépe, jahechaháicha oñepyrũvo umi Salmo 18, 51 ha 52. Por ehémplo pe Salmo 23-pe David heʼi Jehováre haʼeha peteĩ pastór oporogiáva, oporombopiroʼýva ha omeʼẽva proteksión. David ningo haʼe vaʼekue peteĩ pastór, ha haʼe oservise kuri Jehovápe ‘oikove aja pukukue’ (Sal. 23:6).

Ñanemanduʼa vaʼerã avei Jehová ogia hague Davídpe oskrivi hag̃ua umi mbaʼe haʼe heʼi vaʼekue. Umíva apytépe oĩ vaʼekue umi profesía oñekumplítava hetaiterei tiémpo haʼe omano rire. Por ehémplo, pe Salmo 110-pe David heʼi vaʼekue Jesúsre ‘oguapytaha Ñandejára deréchape’ yvágape ha oguerekotaha tuicha autorida. ¿Maʼerãpa? Oguereko hag̃ua ipoguýpe Ñandejára enemigokuérape, ha ‘ohusga hag̃ua umi tetãme’. David familiarégui oúta kuri pe Mesías ogovernátava yvága guive ha oservítava “de saserdóte opa ára g̃uarã” (Sal. 110:1-6). Jesús heʼi kuri umi mbaʼe ojeskrivíva Salmo 110-pe oñekumpliha hese ha oguerekotaha peteĩ kumplimiénto amo gotyove (Mat. 22:41-45).

Upéicharõ ñande jahechakuaa Jehová odirihi hague Davídpe oskrivi hag̃ua umi mbaʼe oiko vaʼekue itiémpope ha umi mbaʼe oikótava avei amo gotyove. Por ehémplo pe tiémpo haʼe ikatutahápe orresusita jey ha oguereko la oportunida omombaʼeguasu hag̃ua Jehovápe pára siémpre. Upéicharõ ikatu jaʼe umi mbaʼe heʼíva Salmo 37:10, 11 ha 29-pe oñekumpli hague yma Israélpe, ha avei oñekumplíta amo gotyove Jehová okumpli vove ipromesakuéra. (Ehecha pe artíkulo hérava “Reiméta chendive pe paraísope” párrafo 8, oĩva ko rrevístape).

Umi mbaʼe heʼíva Salmo 61:8 ha umi versíkulo ojoguáva avei chupe ohechauka porã David omano meve omombaʼeguasuse hague Jehovápe. Ha avei ko téxto ohechauka porã umi mbaʼe David ikatútava ojapo ág̃a Jehová omopuʼã jey vove chupe pe múndo pyahúpe.