Atenidaarɛ, October 12
Nɛra han ka tare tuure . . . a nam ge dekɛ a mɛŋa bo Yesu Krista.—Gal. 2:16.
Baabule la pa’alɛ ti Yehowa yamesi dela tontɔɔdoma. Bala pa’alɛ ti Yehowa duuse to be’em la mɛ ti to ka le nara ti to yɔɔra to be’em sanɛ. La boi bim ti Yehowa duuse to be’em la ge a kelum dɔla a tontɔɔ pa’alegɔ la mɛ. Baabule la pa’alɛ ti daɣɛ to tuuma bii to itigɔ n basɛ ti Yehowa geele to ti to dela tontɔɔdoma. Ge bala me ka pa’alɛ ti to ta’an tuna be’em. Ton tari sakerɛ lua bunɔ la poan la zuo, Yehowa kɔ’ɔn maasum mɛ ti a di sugeri bo to. (Arom 3:24) Yehowa n geele to ti to dela tontɔɔdoma la basɛ ti to nyɛta nyuurɔ la wani? Tontɔɔdoma wa basɛba wan naɛ la Yezu bɔna saazuo dɛna nadoma la Naayinɛ kɔma. (Titus 3:7; 1 Yo. 3:1) Naayinɛ basɛ ba be’em bo ba mɛ ti la ana wuu ba ka tabelɛ tum la be’em. Bala n sɔi ti ba nyaŋɛ pa’asɛ Naayinɛ Na’am la poan la. (Arom 8:1, 2, 30) Tontɔɔdoma wa basɛba me wan ta bɔna tingɔŋɔ wa zuo. Yehowa wan di sugeri bo ba ti ba dɛna a zɔdoma.—Yam. 2:21-23. w25.02 5 ¶17-18
Atalatadaarɛ, October 13
Ho ka tɛn’ɛhe Na’ayenɛ potɛ’nɛrɛ n bote se’em ge la de asaala potɛn’ɛrɛ te ho tɛn’ɛha.—Mt. 16:23.
Geele bisɛ saŋa kayima ti tuntuna Peter yuun eŋɛ pa’alɛ ti a ka ti’iseri wuu Yehowa. Yezu yuun puɣum yele a tuntuneba la ti a wan keŋɛ Yerusalem ti pu’usegɔ nɛŋadoma la nyɔkɛ en, mɛlesɛ en ge nyaa ku en. (Mt. 16:21) Peter yuun mi ti Yezu n de Mɛzaaya la n wan faaɛ Naayinɛ nɛreba la. Bala, la yuun ta’an kpe’em bo Peter ti a sakɛ ti Yehowa wan bo yɔ’ɔ ti ba ku Yezu. (Mt. 16:16) Peter yuun tari la Yezu lebe kinkɛleŋa ta yele en yeti: “N Daana, da tɛn’ɛhe [bala,] te wana kan ta’an eŋɛ hɔ.” (Mt. 16:22) Yezu la Peter yuun ka bɔkɛ taaba yele wa poan se’ere n sɔi la Peter yuun ka ti’iseri wuu Yehowa. Yezu yuun mi ti la dela a namesɛ ta ki ta’an tum Yehowa puti’irɛ n boti sɛla. Daanse’ere Peter yuun tari la putɛsonɛ ge Yezu yuun zaɣesɛ a ka’aŋɔ la mɛ. Peter yuun zamesɛ baŋɛ ti la nari ti a ti’isa wuu Naayinɛ la. w25.03 9 ¶5-6
Alarebadaarɛ, October 14
Na’ayenɛ lɛm mɛ la sɛba sunya n sagom, ge faanra sɛba sea n yehe ba mɛŋa la bahera.—Ym. 34:18.
Nɛra n eŋɛ ho sɛla ti la daam hɔ bii nɛra ti ho tɔresɛ n kaɛ ho poore ti ho suure sa’am? La ka pakɛ la nɛra n eŋɛ ho sɛla, tɛ̃ra ti ho saazuo Sɔ la nɔŋɛ ho mɛ paa. Nɛra san kaɛ ho poore ti ho suure sa’am, David n yuun yele sɛla ti la bɔna zina gulesegɔ la poan la wan ta’an buɣelɛ ho suure. Viisegɔ gɔŋɔ ayima pa’alɛ ti “sɛba sea n yehe ba mɛŋa la” ta’an ti’isa ti bamam ka le tara sɛsɛla. Yehowa soŋeri nɛrebana la wani? Wuu bia n ni kaasa ti a ma bii a sɔ ni gurɛ en pã’asa se’em la, nɛra san kaɛ to poore ti to suure sa’am, la ni daam Yehowa mɛ ti a ni eŋɛ kalam soŋɛ tɔ. A kɔ’ɔn bɔta la a buɣelɛ to suure la n sa’am la ti la ana to lama lama. A bo’ori to la beere sa’am puti’irɛ ti to ta’an ŋmibera to yeledaaŋɔ poan.—Isa. 65:17. w24.12 23 ¶13-14