Luku

7 To whenue e ko dotana ohó etọn lẹpo didọ do otó gbẹtọ lẹ tọn mẹ godo, e biọ Kapẹlnaumi. 2 Todin, afanumẹ vivẹ́ mẹkanwekowhàngán de tọn, to azọ̀njẹ bo to kúdonu. 3 To whenue e sè dogbọn Jesu dali, e do sunnu mẹho Ju lẹ tọn lẹ hlan e dè nado biọ to e si nado wá bo hẹn afanumẹ etọn jẹgangan. 4 To whenẹnu, mẹhe wá Jesu dè lẹ jẹ vivẹ ẹ ji vẹkuvẹku, bo to didọmọ: “Ewọ jẹna mẹhe hiẹ na wà ehe na, 5 na e yiwanna akọta mítọn podọ ewọ lọsu wẹ gbá sinagọgu lọ na mí.” 6 Enẹwutu, Jesu hodo yé. Ṣigba, to whenue e sẹpọ owhé lọ gbè, mẹkanwekowhàngán lọ ko do họntọn lẹ hlan nado dọna ẹn dọmọ: “Oklunọ, a jẹtukla blo, na yẹn ma jẹna hiẹ nido biọ họta ṣie glọ. 7 Na enẹwutu wẹ yẹn ma mọ de e taidi mẹhe jẹ nado wá dè we. Ṣigba dọho, bo dike devizọnwatọ ṣie ni yin azọ̀nhẹngbọna. 8 Na yẹnlọsu yin mẹde he tin to aṣẹpipa glọ, bo tindo awhànfuntọ lẹ to oglọ ṣie, bọ yẹn sọ nọ dọna ode dọ, ‘Yì!’ ewọ sọ nọ yì, podọ na devo dọ, ‘Wá!’ ewọ sọ nọ wá, podọ na afanumẹ ṣie dọ, ‘Wà ehe!’ ewọ sọ nọ wà ẹ.” 9 Todin, to whenue Jesu sè ehelẹ, awuji i gando ewọ go, bọ e lẹhlan gbẹtọgun he to hihodo e lọ bo dọmọ: “Yẹn dọna mì dọ, Yẹn ma ko mọ yise he klo sọmọ de, etlẹ yin to Islaeli.” 10 Podọ to whenue mẹhe yin didohlan lẹ lẹkọyi whégbè, yé mọdọ afanumẹ lọ ko jẹgangan.

11 To ehe godo tlolo, e zingbejizọnlin yì tòdaho de mẹ he nọ yin Naini, podọ devi etọn lẹ po gbẹtọgun daho de po to gbejizọnlinzin hẹ ẹ. 12 Dile e sẹpọ họngbo tòdaho lọ tọn, etẹ nkọ, pọ́n! yé to oṣiọ dawe de tọn ze tọ́njẹgbonu, yèdọ visunnu dopo akàn onọ̀ etọn tọn. Gbọnvona enẹ, asuṣiọsi de wẹ ewọ. Gbẹtọgun he yinukunkẹ de sọn tòdaho lọ mẹ sọ tin po yọnnu lọ po. 13 Podọ to whenue Oklunọ mọ ẹn, lẹblanu whàn ẹn, bọ e dọna yọnnu lọ dọmọ: “A viavi ba blo.” 14 To whenẹnu, e dọnsẹpọ bo doalọ apotinjan lọ go, mẹhe hẹn ẹn lẹ sọ ṣite guun, bọ e dọmọ: “Dẹpẹ, yẹn dọna we, Fọ́n!” 15 Oṣiọ lọ sọ fọ́n sinai bo jẹ hodọ ji, bọ e ze e na onọ̀ etọn. 16 Todin, obu jẹ yemẹpo ji, yé sọ jẹ gigopana Jiwheyẹwhe ji, bo to didọmọ: “Yẹwhegán daho de ko yin zizedaga to ṣẹnṣẹn mítọn,” podọ, “Jiwheyẹwhe ko lẹ́ ayidonugo etọn hlan omẹ etọn lẹ.” 17 Linlin he gando ewọ go ehe sọ gbayipe gbọn Jude lẹpo podọ to otò he lẹdo pé lẹpo mẹ.

18 Todin, devi Johanu tọn lẹ na ẹn linlin onú ehe lẹpo tọn. 19 Enẹwutu, Johanu ylọ awe to devi etọn lẹ mẹ bo do yé hlan Oklunọ dè nado dọmọ: “Be hiẹ wẹ Omẹ lọ he ja ya kavi be mí dona donukun omẹ devo wẹ?” 20 To whenue dawe lọ lẹ wá e dè, yé dọmọ: “Johanu Baptizitọ wẹ do mí hlan dè we nado kanse we dọ, ‘Be hiẹ wẹ Omẹ he ja lọ kavi be mí dona donukun mẹdevo wẹ?’” 21 To gànhiho enẹ mẹ, e hẹn azọ̀n po azọ̀n sinsinyẹn lẹ po gbọ na mẹsusu bo yàn gbigbọ ylankan lẹ jẹgbonu, bosọ do nukundagbe hia nukuntọ́nnọ susu bọ yé mọnú. 22 Enẹwutu, e gblọnna omẹ awe lọ lẹ dọmọ: “Mì yì, bo dọ nuhe mì mọ bo sè lẹ na Johanu: nukuntọ́nnọ lẹ to numọ, sẹkunọ lẹ to zọnlinzin, pòtọnọ lẹ to yinyin kiklọwé bọ tókunọ lẹ to núsè, oṣiọ lẹ to yinyin finfọn, wẹndagbe lọ to yinyin lilá hlan wamọnọ lẹ. 23 Podọ ayajẹnọ wẹ ewọ he ma ko dahli na yẹn tọn wutu.”

24 To whenue wẹnsagun Johanu tọn lẹ ko yì, e jẹ didọna gbẹtọgun lọ lẹ ji gando Johanu go dọmọ: “Etẹwẹ mìwlẹ tọ́nyi nado yì pọ́n to danfafa ji? Be ofán he jẹhọn to yigọyigọ-dona de wẹ ya? 25 Etẹwẹ mìwlẹ tọ́nyi nado yì mọ lo? Be dawe de he dó awugbó wọ́dọ́wọ́dọ́ whanpẹnọ lẹ wẹ ya? Yèdọ, owhé ahọlu lẹ tọn gbè wẹ mẹhe nọ dó avọ̀ whanpẹnọ bo nọ nọ̀ fẹẹmẹ lẹ nọ nọ̀. 26 To whelọnu lo, etẹwẹ mìwlẹ tọ́nyi nado yì mọ taun? Be yẹwhegán de wẹ ya? Mọwẹ, yẹn dọna mì dọ, ewọ tlẹ hú yẹwhegán de tlala. 27 Ewọ wẹ mẹhe go yè ko kanwe gando dọmọ, ‘Pọ́n! yẹn to wẹnsagun ṣie dohlan nukọn towe, mẹhe na jẹnukọnna we nado jla aliho towe do.’ 28 Yẹn dọna mì dọ, To mẹhe yin jiji sọn yọnnu dè lẹ mẹ, depope ma klohu Johanu; ṣigba mẹhe whè hú to ahọluduta Jiwheyẹwhe tọn mẹ klohu ewọ.” 29 (Podọ to whenue gbẹtọ lẹpo po tòkuẹ-ṣinyantọ lẹ po sè ehe, yé lá Jiwheyẹwhe di dodonọ, na yé ko yin bibaptizi po baptẹm Johanu tọn po wutu. 30 Ṣigba, Falesi lẹ po mẹhe yọ́n Osẹ́n lọ ganji lẹ po gbẹkọ ayinamẹ he Jiwheyẹwhe na yé lọ go, na yé ma ko yin bibaptizi gbọn ewọ dali wutu.)

31 “Enẹwutu, mẹnu go wẹ yẹn na yí omẹ whẹndo ehe tọn lẹ jlẹdo, podọ mẹnu wẹ yé taidi? 32 Yé taidi yọpọvu lẹ he to aisinsin to ahimẹ bo to awhádo hlan ode awetọ yetọn, bosọ to didọmọ, ‘Míwlẹ kúnván na mì, ṣigba mìwlẹ ma dúwe; míwlẹ doavihàn, ṣigba mì ma viavi.’ 33 Mọdopolọ, Johanu Baptizitọ wá bo ma nọ dù akla kavi nù ovẹn, ṣigba mìwlẹ dọ dọ, ‘Ewọ tindo aovi de.’ 34 Visunnu gbẹtọ tọn wá bo to dùdù bosọ to nùnù, ṣigba mìwlẹ dọ dọ, ‘Mì pọ́n! Dawe adọwhẹ́nnọ de he jo ede na ovẹn nùnù, họntọn tòkuẹ-ṣinyantọ lẹ po ylandonọ lẹ po tọn!’ 35 Etomọṣo, nuyọnẹn nọ yin didohia di dodonọ gbọn ovi etọn lẹpo dali.”

36 Todin, Falesi de to bibiọ to e si mapote nado wá dùnú hẹ ẹ. Enẹwutu, e biọ owhé Falesi lọ tọn gbè bo jagla to tafo kọ̀n. 37 Podọ, pọ́n! nawe de he yin yinyọnẹn to tòdaho lọ mẹ nado yin ylandonọ sè dọ ewọ jagla to núdùdù kọ̀n to owhé Falesi lọ tọn gbè, yọnnu lọ sọ hẹn ogò alabasta tọn de wá he mẹ amisisa owán gblingblinnọ tin te, 38 podọ, dile e ṣite to godo to afọ etọn lẹ kọ̀n, e to avivi bo jẹ dasin etọn lẹ kùn do afọ etọn lẹ go ji bosọ nọ yí oda he to ota etọn lẹ do súnsún in sẹ̀. Humọ, e to nùdo afọ etọn lẹ go magbọjẹ bo to amisisa owán gblingblinnọ lọ sá na afọ etọn lẹ. 39 To whenue Falesi he basi oylọna ẹn mọ ehe, e dọ to ede mẹ dọmọ: “Eyin dawe ehe yin yẹwhegán de, e na ko yọ́n nawe he to alọ do e go lọ podọ mẹhe nkọ ewọ yin, dọ ylandonọ de wẹ.” 40 Ṣigba, Jesu gblọnna ẹn dọmọ: “Simọni, yẹn tindo nude nado dọna we.” E dọna ẹn dọmọ: “Mẹplọntọ, dọ ẹ!”

41 “Dawe awe duahọ do akuẹ-yannamẹtọ de; dopo duahọ denali* fowe-kanweko tọn, ṣigba awetọ dù kandeao. 42 To whenue yé ma tindo nudepope he yé na yí do suahọ, ewọ jona yé sọn ojlo mẹ wá. Enẹwutu, mẹnu to yé mẹ wẹ na yiwanna ẹn hugan?” 43 Simọni gblọn dọmọ: “Yẹn lẹndọ mẹhe ewọ jo susu na sọn ojlo mẹ wá lọ wẹ.” E dọna ẹn dọmọ: “Hiẹ gblọn ganji.” 44 To whenẹnu, e lẹhlan nawe lọ bo dọna Simọni dọmọ: “Hiẹ mọ nawe ehe ya? Yẹn biọ owhé towe gbè; hiẹ ma na mi osin na afọ ṣie lẹ. Ṣigba nawe ehe kùn dasin etọn lẹ do afọ ṣie lẹ go bo yí oda etọn do súnsún in sẹ̀. 45 Hiẹ ma donùnùgo na mi; ṣigba nawe ehe, sọn whenue gbọ́n yẹn biọ họmẹ, e to nùdo afọ ṣie lẹ go magbọjẹ. 46 Hiẹ ma sá amisisa do ota na mi; ṣigba nawe ehe sá amisisa owán gblingblinnọ do afọ ṣie lẹ. 47 Na ehe wutu, yẹn dọna we dọ, ylando etọn lẹ, dile yé tlẹ sù sọ, yé ko yin jijona ẹn, na ewọ do owanyi susu hia; ṣigba ewọ he vude yin jijona, nọ do owanyi vude hia.” 48 To whenẹnu, e dọna yọnnu lọ dọmọ: “Ylando towe lẹ ko yin jijona we.” 49 Enẹwutu, mẹhe jagla to tafo kọ̀n hẹ ẹ lẹ jẹ linlẹn ji to yedelẹ mẹ dọmọ: “Mẹnu wẹ dawe ehe, he tlẹ nọ jo ylando lẹ namẹ?” 50 Ṣigba, e dọna nawe lọ dọmọ: “Yise towe ko whlẹn we gán; yì to jijọho mẹ.”