24 To whenue Falesi lẹ sè ehe, yé dọmọ: “Dawe ehe to aovi lẹ yàn jẹgbonu kiki gbọn Beẹlzebuli* ogán aovi lẹ tọn gblamẹ.”+ 25 Na e yọ́n linlẹn yetọn lẹ wutu, e dọna yé dọmọ: “Ahọluduta depope he klan sọta ede nọ jẹvọ́, podọ tòdaho kavi owhé depope he klan sọta ede ma na nọte. 26 To aliho dopolọ mẹ, eyin Satani nọ yàn Satani jẹgbonu, be ewọ ko klan sọta ede; to whenẹnu, nawẹ ahọluduta etọn na nọte do? 27 Humọ, eyin gbọn Beẹlzebuli gblamẹ wẹ yẹn nọ yàn aovi lẹ jẹgbonu, gbọn mẹnu gblamẹ wẹ visunnu* mìtọn lẹ nọ yàn yé jẹgbonu lo? Na ehe wutu, yewlẹ wẹ na dawhẹna mì. 28 Ṣigba, eyin gbọn gbigbọ Jiwheyẹwhe tọn gblamẹ wẹ yẹn to aovi lẹ yàn jẹgbonu, be Ahọluduta Jiwheyẹwhe tọn ko gbọ mì go.+ 29 Kavi, nawẹ mẹde sọgan biọ owhé dawe huhlọnnọ de tọn gbè gánnugánnu bo bẹ nutindo etọn lẹ gbọn, eyin ewọ ma blá dawe huhlọnnọ lọ whẹ́? Enẹgodo wẹ e sọgan bẹ nuhe to owhé etọn gbè lẹ yì. 30 Mẹdepope he ma tin to adà ṣie mẹ jẹagọdo mi, podọ mẹdepope he ma to gbẹtọ lẹ bẹpli hẹ mi to yé vúnvún pé.+

22 Humọ, wekantọ lẹ he wá sọn Jelusalẹm to didọmọ: “E tindo Beẹlzebuli,* podọ ogán aovi lẹ tọn wẹ e nọ yí do yàn aovi lẹ jẹgbonu.”+ 23 Enẹwutu, to whenue e ko ylọ yé wá ede dè godo, e yí apajlẹ lẹ do dọhona yé dọmọ: “Nawẹ Satani sọgan yàn Satani jẹgbonu gbọn? 24 Eyin ahọluduta de klan sọta ede, ahọluduta enẹ ma sọgan nọte;+ 25 podọ eyin owhé de klan sọta ede, owhé enẹ ma na penugo nado nọte. 26 Humọ, eyin Satani fọ́n sọta ede bo klan, e ma sọgan nọte, ṣigba e na wá opodo. 27 Na nugbo tọn, mẹdepope he biọ owhé dawe huhlọnnọ de tọn gbè ma sọgan fìn nutindo etọn lẹ, eyin ewọ ma blá dawe huhlọnnọ lọ whẹ́. Enẹgodo wẹ e sọgan bẹ nuhe to owhé etọn gbè lẹ yì.