Heblu lẹ

9 Alẹnu dai tọn lọ lọsu ko tindo nubiọtomẹsi osẹ́n tọn lẹ gando sinsẹ̀nzọn wiwe lọ go gọna ofi wiwe etọn+ to aigba ji. 2 Na abò tintan gòhọ lọ tọn yin bibasi, ehe mẹ miyọ́ngbán-tin+ de po tafo de po gọna akla didetọn* lẹ+ tin te; e sọ yin yiylọdọ Ofi Wiwe lọ.+ 3 Ṣigba, to họmẹgbòvọ̀ awetọ lọ+ godo wẹ abò gòhọ lọ tọn he nọ yin yiylọdọ Fiwiwe Gbaugbau lọ tin te.+ 4 Finẹ wẹ nuwhẹ́nwan-gbán sika tọn+ de tin te, podọ apotin alẹnu tọn+ lọ he go yè kọ̀n sika do pete+ sọ tin to finẹ ga, bọ ozẹ́n sika tọn he mẹ manna te lọ+ po opò Aalọn tọn he jọ amà+ po gọna wekan-zannu+ alẹnu tọn lẹ tin to e mẹ; 5 kelubimi gigonọ lẹ sọ tin to nùsu oyẹsu tọn lọ ji to aga bo ṣinyọnyẹ e* ji.+ Amọ́, e ma yin ojlẹ lọ die nado dọho gando onú ehelẹ go to gigọ́ mẹ gba.

6 To whenue onú ehelẹ ko yin awuwlena to aliho ehe mẹ godo, yẹwhenọ lẹ nọ biọ abò gòhọ tọn tintan lọ mẹ gbọzangbọzan nado basi sinsẹ̀nzọn wiwe lẹ;+ 7 ṣigba yẹwhenọ daho lọ kẹdẹ wẹ nọ biọ abò awetọ lọ mẹ whladopo to owhe dopo mẹ+ bo nọ hẹn ohùn+ he e nọ yí do sanvọ́ do ota edetiti tọn mẹ+ podọ na ylando he gbẹtọ lẹ wà+ to mayọnẹn mẹ lẹ. 8 Enẹwutu, gbigbọ wiwe hẹn ẹn họnwun dọ aliho he biọ ofi wiwe lọ ma ko yin didehia to whenue gòhọ tintan lọ gbẹ́ pò to ote.+ 9 Gòhọ ehe yin ohia de na ojlẹ dintọn,+ podọ nunina lẹ po avọ́sinsan lẹ po nọ yin bibasi to gbesisọ mẹ hẹ tito ehe.+ Ṣigba, ehelẹ ma penugo nado hẹn ayihadawhẹnamẹnu mẹhe to sinsẹ̀nzọn wiwe wà lọ tọn zun pipé gba.+ 10 Núdùdù lẹ, núnùnù lẹ po nulẹ kiklọ́we to aṣa-liho voovo lẹ po* kẹdẹ go wẹ yé gando.+ Yé yin nubiọtomẹsi osẹ́n tọn lẹ gando agbasa go+ bo yin hinhẹn zun dandan kakajẹ ojlẹ dide lọ mẹ nado hẹn nulẹ sọgbe.

11 Ṣigba, to whenue Klisti wá taidi yẹwhenọ daho nudagbe he ko wá aimẹ lẹ tọn, e jugbọn gòhọ he klohugan bo yin pipé hugan he ma yin bibasi po alọ po lọ mẹ, enẹ wẹ, dehe ma yin nudida ehe tọn. 12 Ewọ ma biọ ofi wiwe lọ mẹ po ohùn gbọgbọẹ lẹ tọn po podọ po oyìnsú winyanwinyan lẹ tọn po gba, lala, ṣigba ewọ biọ e mẹ whladopo podọ kakadoi po ohùn edetiti tọn po+ bo mọ whlẹngán* madopodo yí na mí.+ 13 Na eyin ohùn gbọgbọẹ lẹ tọn po oyìnsú lẹ tọn+ po gọna afín oyìn asiwhe* tọn he yin húnhúnhún do mẹhe ko yin hinhẹnflu lẹ ji nọ klọ́ agbasalan wé,+ 14 nẹmunẹmu wẹ ohùn Klisti tọn,+ mẹhe gbọn gbigbọ madopodo dali yí ede do sanvọ́ hlan Jiwheyẹwhe matin oblọ ma na klọ́ ayihadawhẹnamẹnu mítọn lẹ wé sọn azọ́n kúkú lẹ mẹ+ na mí nido sọgan basi sinsẹ̀nzọn wiwe hlan Jiwheyẹwhe ogbẹ̀nọ lọ?+

15 Enẹ wẹ zọ́n bọ ewọ do yin whẹgbọtọ alẹnu yọyọ de tọn,+ na mẹhe ko yin yiylọ lẹ nido sọgan mọ opagbe ogú madopodo lọ tọn yí, na ewọ ko kú nado tún yé dote sọn sẹ́nhẹngba lẹ mẹ to alẹnu dai tọn lọ glọ gbọn ofligọ+ dali.+ 16 Na eyin alẹnu de tin, okú mẹhe basi alẹnu lọ tọn yin dandan, 17 na okú wẹ nọ hẹn alẹnu de lodo, na e ma nọ yin hinhẹn lodo gbede eyin mẹhe basi alẹnu lọ pò to ogbẹ̀. 18 Mọdopolọ, alẹnu dai tọn lọ ma nọ bẹ azọ́n jẹeji* matin ohùn gba. 19 Na to whenue Mose ko hia gbedide Osẹ́n lọ tọn lẹpo na gbẹtọ lọ lẹpo, e yí ofún vẹẹ ṣẹ́ṣẹ́ po hisọpu po do húnhún ohùn oyìnsú winyanwinyan lẹ tọn po gbọgbọẹ lẹ tọn po gọna osin do owe* lọ po gbẹtọ lọ lẹpo po go, 20 bo dọmọ: “Ehe wẹ ohùn alẹnu lọ tọn he Jiwheyẹwhe ko degbe etọn na mì nado yìn.”+ 21 E sọ yí ohùn lọ bo húnhún in do gòhọ lọ go podọ do núzinzan sinsẹ̀nzọn wiwe tọn* lẹpo go ga.+ 22 Mọwẹ, diblayin nulẹpo wẹ yin kiklọ́we po ohùn po sọgbe hẹ Osẹ́n lọ,+ podọ eyin ohùn ma yin kinkọnjẹgbonu, jona depope ma nọ wá aimẹ.+

23 Enẹwutu, dandan wẹ dọ apajlẹ jọnun+ onú olọn mẹ tọn lẹ tọn ni yin kiklọ́we to aliho ehelẹ mẹ,+ ṣigba avọ́sinsan he yọ́n hugan lẹ yin dandan na onú olọn mẹ tọn lẹ. 24 Na Klisti ma biọ ofi wiwe he yin bibasi po alọ po,+ he yin ohia onú jọnun lẹ tọn mẹ gba,+ ṣigba olọn lẹ lọsu mẹ wẹ ewọ biọ,+ nado sọawuhia todin to Jiwheyẹwhe nukọn do ota mítọn mẹ.+ 25 E ma yin nado nọ yí ede do sanvọ́ gbọzangbọzan, dile yẹwhenọ daho lọ nọ biọ ofi wiwe lọ mẹ to whemẹwhemẹ+ po ohùn he ma yin edetiti tọn po do gba. 26 Eyin e ma yinmọ, ewọ na ko nọ jiya gbọzangbọzan sọn didoai aihọn tọn whenu. Ṣigba todin, ewọ ko hẹn ede sọawuhia whladopo podọ kakadoi to vivọnu titonu* lẹ tọn nado de ylando sẹ̀ gbọn ede yíyí do sanvọ́ gblamẹ.+ 27 Podọ kẹdẹdile gbẹtọ lẹ dona kú whladopo podọ kakadoi, ṣigba bo na yin whẹdana to enẹgodo do, 28 mọdopolọ ga wẹ Klisti yí ede do sanvọ́ whladopo podọ kakadoi do nado hẹn ylando mẹsusu tọn;+ podọ whla awetọ he ewọ na sọawuhia ma na yin na ylando wutu,* ṣigba mẹhe to dindin in vẹkuvẹku na whlẹngán yetọn wutu lẹ na mọ ẹn.+