Zekalia

8 Ohó Jehovah awhànpa lẹ tọn sọ vọ́ wá dè e dọmọ: 2 “Nuhe Jehovah awhànpa lẹ tọn dọ die, ‘Zohunhun daho de wẹ n’na tindo gando Ziọni go+ podọ yẹn na yí zohunhun do gblehomẹ sinsinyẹn gando e go.’”

3 “Nuhe Jehovah dọ die, ‘Yẹn na lẹkọyi Ziọni+ bo na nọ nọ̀ Jelusalẹm;+ Jelusalẹm nasọ nọ yin yiylọdọ tòdaho nugbo* tọn+ podọ osó Jehovah awhànpa lẹ tọn, yèdọ osó wiwe lọ.’”+

4 “Nuhe Jehovah awhànpa lẹ tọn dọ die, ‘Whladopo dogọ, sunnu po yọnnu po he yin yọnhonọ lẹ na nọ sinai to tòplitẹn Jelusalẹm tọn lẹ, yèdọ mẹdopodopo po pogẹ̀ etọn po to alọmẹ, na yé ko poyọnho pete* wutu.+ 5 Podọ tòplitẹn tòdaho lọ tọn lẹ na gọ́ na yọpọ sunnu po yọpọ yọnnu lẹ po he to aihunda to finẹ.’”+

6 “Nuhe Jehovah awhànpa lẹ tọn dọ die, ‘Dile etlẹ sọgan taidi nuhe vẹawu gbau na pipotọ omẹ ehelẹ tọn to azán enẹlẹ gbè, be e na taidi nuhe vẹawu gbau na yẹnlọsu wẹ ya?’ wẹ Jehovah awhànpa lẹ tọn dọ.”

7 “Nuhe Jehovah awhànpa lẹ tọn dọ die, ‘Yẹn na whlẹn omẹ ṣie lẹ sọn aigba whèzẹtẹn tọn po whèyihọ tọn po ji.+ 8 Yẹn nasọ hẹn yé lẹkọwa bọ yé na nọ nọ̀ Jelusalẹm;+ podọ yé na lẹzun omẹ ṣie lẹ bọ yẹn nasọ lẹzun Jiwheyẹwhe yetọn+ to nugbo* po dodowiwa po mẹ.’”

9 “Nuhe Jehovah awhànpa lẹ tọn dọ die, ‘Mì gbọ alọ mìtọn lẹ ni yin huhlọnnọ,*+ mì mẹhe sè ohó ehelẹ sọn onù yẹwhegán lẹ tọn mẹ todin lẹ emi,+ yèdọ ohó dopolọ lẹ he yin didọ to azán he gbè dodonu ohọ̀ Jehovah awhànpa lẹ tọn tọn yin didoai na tẹmpli lọ nido yin gbigbá. 10 Na jẹnukọnna ojlẹ enẹ, azọ́nkuẹ depope ma nọ yin súsú vlavo na gbẹtọ kavi na kanlin;+ podọ na kẹntọ tọn wutu, owùnu de wẹ e yin nado wá bo lẹkọyi, na n’ko lẹ́ gbẹtọ lẹpo sọta ode awetọ yetọn.’

11 “‘Ṣigba todin, yẹn ma nasọ nọ yinuwa hẹ pipotọ omẹ ehelẹ tọn dile n’ko nọ wà do dai ba,’+ wẹ Jehovah awhànpa lẹ tọn dọ. 12 ‘Na okún jijọho tọn na yin dido; vẹntin na nọ de sinsẹ́n etọn tọ́n bọ aigba na nọ de sinsẹ́n etọn tọ́n,+ podọ ahun na nọ ja sọn olọn; yẹn nasọ hẹn pipotọ omẹ ehelẹ tọn nado dugu onú ehe lẹpo tọn.+ 13 Podọ mì owhé Juda tọn po owhé Islaeli tọn po emi, kẹdẹdile mì lẹzun mẹhodẹ̀do to akọta lẹ ṣẹnṣẹn do,+ mọ wẹ yẹn na whlẹn mì do, bọ mìwlẹ na lẹzun dona de.+ Mì dibu blo!+ Mì dike alọ mìtọn lẹ ni yin huhlọnnọ.’*+

14 “Na nuhe Jehovah awhànpa lẹ tọn dọ die, ‘“Kẹdẹdile n’ko magbe nado hẹn nugbajẹmẹji wá mì ji na tọgbo mìtọn lẹ hẹn homẹgble mi wutu,” wẹ Jehovah awhànpa lẹ tọn dọ, “bọ yẹn masọ diọlinlẹn do,+ 15 mọ wẹ n’ko sọ magbe to ojlẹ ehe mẹ nado wà dagbe na Jelusalẹm podọ na owhé Juda tọn do niyẹn.+ Mì dibu blo!”’+

16 “‘Nuhe mì dona wà lẹ die: Mì nọ dọ nugbo na ode awetọ mìtọn,+ podọ owhẹ̀ he nọ yin didá to họngbo mìtọn ji lẹ dona nọ hẹn nugbo po jijọho po gbayipe.+ 17 Mì ma nọ kàn ayiha ylankan do ode awetọ go to ahun mìtọn mẹ blo,+ podọ mì yiwanna whiwhle lalo tọn depope blo;+ na onú ehe lẹpo wẹ n’gbẹwanna,’+ wẹ Jehovah dọ.”

18 Ohó Jehovah awhànpa lẹ tọn sọ wá dè e whladopo dogọ dọmọ: 19 “Nuhe Jehovah awhànpa lẹ tọn dọ die, ‘Nùbibla osun ẹnẹtọ mẹ tọn,+ nùbibla osun atọ́ntọ mẹ tọn,+ nùbibla osun ṣinawetọ mẹ tọn+ podọ nùbibla osun aotọ mẹ tọn+ na yin dotẹnmẹ hundote lẹ na owhé Juda tọn nado nọ jẹaglin bo jaya—yèdọ hùnwhẹ ayajijẹ tọn lẹ.+ Enẹwutu, mì yiwanna nugbo po jijọho po.’

20 “Nuhe Jehovah awhànpa lẹ tọn dọ die, ‘E na gbẹ́ wá jọ bọ gbẹtọ lẹ po mẹhe nọ nọ̀ tòdaho susu mẹ lẹ po na wá; 21 bọ mẹhe nọ nọ̀ tòdaho ehe mẹ lẹ na yì mẹhe nọ nọ̀ diẹ mẹ lẹ dè bo dọmọ: “Mì gbọ mí ni yì biọ nukundagbe Jehovah tọn* bosọ dín Jehovah awhànpa lẹ tọn vẹkuvẹku. Yẹnlọsu na yì ga.”+ 22 Mẹsusu po akọta huhlọnnọ lẹ po nasọ wá Jelusalẹm nado dín Jehovah awhànpa lẹ tọn+ podọ nado biọ nukundagbe Jehovah tọn.’*

23 “Nuhe Jehovah awhànpa lẹ tọn dọ die, ‘To azán enẹlẹ gbè, sunnu ao sọn ogbè akọta lẹ tọn lẹpo+ mẹ na tẹdo, mọwẹ, yé na tẹdo tewu* Ju* de tọn go gligli dọmọ: “Mí jlo na yì hẹ mì,+ na mí ko sè dọ Jiwheyẹwhe tin po mì po.”’”+