Ezekiẹli

23 Ohó Jehovah tọn sọ vọ́ wá dè e dọmọ: 2 “Visunnu gbẹtọ tọn, yọnnu awe delẹ tin he yin viyọnnu onọ̀ dopolọ tọn lẹ.+ 3 Yé lẹzun galọtọ to Egipti;+ yé jẹ galọ ji sọn jọja whenu yetọn. Yè hẹn anọ́ na yé to finẹ, yè sọ sá alọ gbọn akọ́nnu na yé to whenue yé gbẹ́ pò to alọji. 4 Yinkọ mẹdaho lọ tọn wẹ Ohola,* nọviyọnnu etọn sọ nọ yin Oholiba.* Yé lẹzun ṣie bo ji visunnu po viyọnnu lẹ po. Podọ na nuhe dù yinkọ yetọn lẹ, Ohola nọtena Samalia+ bọ Oholiba dlẹnalọdo Jelusalẹm.

5 “Ohola jẹ galọ ji to whenue e gbẹ́ pò to ṣie yin.+ E yí wantuntun do doafọna mẹhe tindo owanyi zogbe na ẹn lẹ,+ yèdọ kọmẹnu etọn Asilianu lẹ.+ 6 Yé yin ayimatẹn-gán lẹ he do awù juju podọ ogán nukunpedonugotọ lẹ—yèdọ dẹpẹ whanpẹnọ lẹ he to osọ́ yetọn lẹ ji. 7 E zindonukọn to galilọ etọn mẹ hẹ visunnu whanpẹnọ hugan Asilia tọn lẹ, e sọ yí boṣiọ hiọawu* mẹhe e túnwán hẹ lẹ tọn do flu ede.+ 8 Ewọ ma jo galilọ he mẹ e ko doalọ te to Egipti do, na to jọja whenu etọn, yé dọ́ e dè, yé sọ sá alọ gbọn akọ́nnu na ẹn to whenue e gbẹ́ pò to alọji, podọ yé sọ zan gbẹzan wantuntun tọn* hẹ ẹ.+ 9 Enẹwutu, yẹn jo e do alọmẹ na mẹhe tindo owanyi zogbe na ẹn lẹ, yèdọ visunnu Asilia+ tọn he e ko túnwán hẹ lẹ. 10 Yé de e jẹmẹ́+ bo wle visunnu po viyọnnu etọn lẹ po,+ yé sọ yí ohí do hù i. Ewọ sọ lẹzun mẹhe diyin to aliho ylankan mẹ to yọnnu lẹ ṣẹnṣẹn, yé sọ hẹn whẹdida ṣẹ do e ji.

11 “To whenue nọviyọnnu etọn Oholiba mọ nuhe jọ, wantuntun ewọ lọsu tọn sọ gblezọn dogọ, galilọ etọn sọ ylanhu mẹdaho etọn tọn.+ 12 E túnwán hẹ kọmẹnu etọn lẹ, yèdọ visunnu Asilia+ tọn lẹ, ayimatẹn-gán lẹ po ogán nukunpedonugotọ lẹ po he yí avọ̀ whanpẹnọ do doaṣọ́na yede bo hẹ osọ́ lẹ ji—yèdọ dẹpẹ whanpẹnọ lẹ. 13 To whenue e hẹn ede flu, yẹn mọdọ yé omẹ awe lẹ wẹ ko yinuwa to aliho dopolọ mẹ.+ 14 Ṣigba, e zindonukọn to galilọ etọn mẹ. E sọ mọ sunnu he yè de boṣiọ yetọn do adó go lẹ, yèdọ boṣiọ Kaldeanu lẹ tọn he yè sá osẹ̀n vẹẹ ṣẹṣẹ do, 15 yé sìn gbànnú lẹ do alinkàn bọ tabla gaa lẹ tin to ota yetọn, awusọhia yetọn sọ taidi awhànfuntọ lẹ tọn, podọ yemẹpo sọ sọnú taidi Babilọninu lẹ, yèdọ mẹhe yin jiji to aigba Kaldeanu lẹ tọn ji. 16 Tlolo he e mọ yé, e jẹ wántún hẹ yé ji, e sọ do wẹnsagun lẹ hlan yé to Kaldea.+ 17 Visunnu Babilọni tọn lẹ sọ zindonukọn bo to adọzan etọn he ji e nọ do owanyi hia yé te ji hẹ, yé sọ yí wantuntun* yetọn do hẹn ẹn flu. To whenue yé ko hẹn ẹn flu godo, e* sọ yí wangbẹna do jo yé do.

18 “To whenuena e zindonukọn to galilọ etọn mẹ po tasinsinyẹn po bo to omẹ́ etọn dohia,+ yẹn yí wangbẹna do jo e do, kẹdẹdile yẹn* ko yí wangbẹna do jo nọviyọnnu etọn do dó.+ 19 Ewọ sọ zindonukọn to galilọ etọn mẹ+ bo to azán jọja whenu tọn etọn hẹnwa oflin mẹ, to whenue e to galọ to aigba Egipti tọn ji.+ 20 E túnwán hẹ yé taidi asimọwhlá sunnu he vijinu yetọn lẹ taidi kẹtẹkẹtẹ lẹ po osọ́ lẹ po tọn nkọ. 21 Hiẹ tindo ojlo zogbe na walọ gblezọn jọja whenu towe tọn to Egipti,+ whenue yè sá alọ gbọn akọ́nnu towe, yèdọ gbọn anọ́ awhli mẹ tọn towe lẹ go.+

22 “Enẹwutu, Oholiba, nuhe Oklunọ Nupojipetọ Jehovah dọ die: ‘Yẹn na fọ́n mẹyiwanna towe+ he hiẹ* ko yí wangbẹna do jodo lẹ sọta we, yẹn nasọ hẹn yé wá sọn awà lẹpo ji nado diọnukunsọ we,+ 23 visunnu Babilọni tọn lẹ+ po Kaldeanu lẹpo+ po, gọna sunnu Pekodi,+ Ṣoa po Koa po tọn lẹ to pọmẹ hẹ visunnu Asilia tọn lẹpo. Yemẹpo wẹ sọ yin dẹpẹ whanpẹnọ lẹ, ayimatẹn-gán lẹ, ogán nukunpedonugotọ lẹ, awhànfuntọ lẹ po omẹ ṣinṣinyan* lẹ po, yemẹpo sọ to osọ́ lẹ ji. 24 Yé na yí osọ́-kẹkẹ awhàn tọn po kẹkẹfọ he to núdọ lẹ po do tọ́nawhàn we, gọna awhànpa daho lẹ, awọ̀yinu gbigblo, gaglo* po ogangbakun po. Yé na lẹdo we pé, yẹn nasọ degbena yé nado dawhẹ, yé nasọ dawhẹna we dile e jlo yé do.+ 25 Yẹn na gblehomẹ do gowe, yé nasọ yinuwa hẹ we to adi yetọn mẹ. Yé na sán awọntin towe po otó towe lẹ po sẹ̀, mẹhe nasọ pò to hiẹ mẹ lẹ na jai gbọn ohí dali. Yé na bẹ visunnu po viyọnnu towe lẹ po yì, mẹhe nasọ pò to hiẹ mẹ lẹ na yin fifiọ to miyọ́n mẹ.+ 26 Yé na de awù towe lẹ sọn gowe+ bo nasọ hò aṣọ́donu dagbedagbe towe lẹ yí.+ 27 Yẹn na hẹn walọ gblezọn towe po galilọ he a bẹjẹeji to aigba Egipti tọn ji+ po wá opodo.+ Hiẹ ma nasọ mọ yé podọ hiẹ ma nasọ flin Egipti gbede ba.’

28 “Na nuhe Oklunọ Nupojipetọ Jehovah dọ die: ‘Yẹn ko jlo na ze we do alọmẹ na mẹhe hiẹ gbẹwanna lẹ, mẹhe a* ko yí wangbẹna do jodo lẹ.+ 29 Yé nasọ yí wangbẹna do yinuwa hẹ we bo na bẹ nuhe hiẹ ko jẹtukla na lẹpo yì+ bo nasọ jo we do omẹ́ jọgbe. Omẹ́ winyandomẹ fẹnnuwiwa tọn towe, walọ gblezọn towe po galilọ towe po nasọ yin didegbà.+ 30 Onú ehelẹ na jọ do gowe na hiẹ doafọna akọta lẹ taidi galọtọ de wutu,+ podọ na hiẹ yí boṣiọ hiọawu yetọn lẹ do hẹn dewe flu wutu.+ 31 Hiẹ ko yinuwa to aliho dopolọ mẹ taidi nọviyọnnu towe,+ yẹn nasọ yí kọfo etọn do alọ towe mẹ.’+

32 “Nuhe Oklunọ Nupojipetọ Jehovah dọ die:

‘Hiẹ na nù sọn kọfo nọviyọnnu towe tọn he gblo bo siso lọ mẹ,+

Hiẹ nasọ lẹzun aṣagbọ́nu de po vlẹko de po, yèdọ nude he sù to kọfo lọ mẹ.+

“Na yẹnlọsu wẹ ko dọ ẹ,” wẹ Oklunọ Nupojipetọ Jehovah dọ.’

35 “Enẹwutu, nuhe Oklunọ Nupojipetọ Jehovah dọ die: ‘Na hiẹ ko wọn mi bo ma do sisi hia mi to aliho depope mẹ wutu,*+ a na jiya walọ gblezọn po galilọ towe po tọn.’”

36 Jehovah sọ dọna mi dọmọ: “Visunnu gbẹtọ tọn, be hiẹ na lá whẹdida do Ohola po Oholiba po+ ji bo nasọ hẹn osùnú yetọn lẹ zun yinyọnẹn na yé ya? 37 Na yé ko deayọ,*+ ohùn sọ tin to alọ yetọn lẹ go. E ma yindọ yé ko yí boṣiọ hiọawu yetọn lẹ do deayọ kẹdẹ wẹ gba, ṣigba yé ko sọ hẹn visunnu he yé ji hlan mi lẹ jugbọn miyọ́n mẹ taidi núdùdù de na boṣiọ yetọn lẹ.+ 38 Humọ, nuhe yé ko sọ wà do mi die: Yé hẹn fiwiwe ṣie flu to azán enẹ gbè, yé sọ hẹn gbọjẹzan ṣie lẹ zun mawé. 39 To whenue yé ko hù visunnu yetọn lẹ bo ko yí yé do sanvọ́ hlan boṣiọ hiọawu yetọn lẹ godo,+ yé wá fiwiwe ṣie mẹ nado hẹn ẹn flu+ to azán enẹ dopolọ gbè. Nuhe yé wà to ohọ̀ ṣie titi mẹ niyẹn. 40 Yé tlẹ sọ do wẹnsagun de hlan nado ylọ sunnu lẹ wá sọn fidindẹn lẹ.+ To whenue yé ja, hiẹ lawu bo sánu do nukunmẹ bosọ yí aṣọ́donu lẹ do doaṣọ́na dewe.+ 41 Hiẹ sọ sinai to oján vẹnpẹn ji+ bọ tafo de tin to nukọnna ẹn+ fie a ze nuyọnwan+ ṣie po amì+ ṣie po do. 42 Nudidọ gbẹtọgun he bẹ sunnu he to jlòkoko lẹ hẹn de tọn yin sisè to finẹ, ehe mẹ ahànnumunọ he yin hinhẹnwa sọn danfafa ji lẹ tin te. Yé do alọgàn lẹ na yọnnu lẹ bosọ ṣinyọ́n jẹgbakun dagbedagbe lẹ do ota na yé.

43 “Yẹn sọ dọna ewọ he yè yí ayọdide do hẹnflu lọ dọ: ‘Todin, ewọ na zindonukọn to galilọ etọn mẹ.’ 44 Enẹwutu, yé zindonukọn bo to họmẹ biọ yì e dè, kẹdẹdile yè nọ biọ họmẹ yì yọnnu galọtọ de dè do. Mọ wẹ yé nọ biọ họmẹ yì Ohola po Oholiba po dè do niyẹn, yèdọ yọnnu he nọ zan walọ gblezọn lẹ. 45 Ṣigba, sunnu dodonọ lẹ na dawhẹna ẹn sọgbe hẹ whẹdida he ayọdetọ+ de po hùnhọ́dutọ+ de po jẹna; na yọnnu ayọdetọ lẹ wẹ yé yin, yé sọ tindo ohùn to alọ yetọn lẹ go.+

46 “Na nuhe Oklunọ Nupojipetọ Jehovah dọ die: ‘Awhànpa de na yin hinhẹnwa nado diọnukunsọ yé bo na hẹn yé zun awublanọ podọ ogblànnu de.+ 47 Awhànpa lọ na dlan zannu do yé+ bo nasọ yí ohí yetọn lẹ do sán yé liai. Yé na hù visunnu yetọn lẹ po viyọnnu yetọn lẹ po+ bo nasọ yí miyọ́n do fiọ owhé yetọn lẹ.+ 48 Yẹn na hẹn walọ gblezọn he to aigba lọ ji wá opodo, yọnnu lẹpo nasọ plọnnu sọn e mẹ bo ma na hodo apajlẹ walọ gblezọn towe tọn ba.+ 49 Yé nasọ hẹn kọdetọn ylankan walọ gblezọn towe lẹ tọn po ylando he a yí boṣiọ hiọawu towe lẹ do wà lẹ po tọn wá ji we; hiẹ nasọ yọnẹn dọ yẹn wẹ Oklunọ Nupojipetọ Jehovah.’”+