Ẹzla

9 Podọ tlolo he onú ehelẹ ko yin wiwà godo, ahọvi lẹ dọnsẹpọ mi bo dọmọ: “Omẹ Islaeli tọn lẹ, yẹwhenọ lẹ po Levinu lẹ po ma klan yede dovo na omẹ aigba lọ tọn lẹ po osùnú yetọn lẹ po,+ yèdọ Kenaninu, Hetinu, Pelizinu, Jẹbusinu, Amọninu, Moabinu, Egiptinu+ po Amolinu+ lẹ po. 2 Yé ko yí delẹ to viyọnnu yetọn lẹ mẹ taidi asi na yede podọ na visunnu yetọn lẹ.+ Podọ todin, yewlẹ he yin kúnkan* wiwe+ ko kọ̀n yede dopọ hẹ omẹ aigba lọ tọn lẹ.+ Ahọvi po ogán nukunpedonugotọ lẹ po wẹ yin tọ́ntlọ́ngbọ́n to walọ nugbonọ-mayin tọn ehe mẹ.”

3 Todin, tlolo he n’sè ehe, n’tlẹ́n awù aga tọn po awù odò tọn ṣie po bo ṣùn oda po ogbì ṣie delẹ po bosọ sin kọmẹ to awubla sinsinyẹn mẹ. 4 To whenẹnu, mẹhe nọ dibusi* ohó Jiwheyẹwhe Islaeli tọn lẹpo pli lẹdo mi na nugbonọ-mayin mẹhe wá sọn kanlinmọgbenu lẹ tọn wutu, dile n’sinai to awubla sinsinyẹn mẹ kakajẹ avọ́nunina jinukun-lili whèjai tọn whenu.+

5 Podọ to avọ́nunina jinukun-lili whèjai tọn+ lọ whenu, n’fọ́n sọn fie n’to awubla te bọ awù aga tọn po odò tọn tintlẹ́n lọ lẹ po to okọ̀ na mi, n’sọ jẹklo bo dlẹnalọ ṣie lẹ hlan Jehovah Jiwheyẹwhe ṣie. 6 N’sọ dọmọ: “Jiwheyẹwhe ṣie E, winyan hù mi bọ n’mọdọ n’ma jẹ nado ze nukunmẹ daga hlan we, Jiwheyẹwhe ṣie E, na nuṣiwa mítọn lẹ ko sudeji dokọna mí podọ whẹhuhu mítọn ko hòpli jẹ olọn.+ 7 Sọn azán tọgbo mítọn lẹ tọn gbè kakajẹ egbé, whẹhuhu mítọn ko sù;+ podọ na nuṣiwa mítọn lẹ wutu wẹ míwlẹ, ahọlu mítọn lẹ po yẹwhenọ mítọn lẹ po ko yin jijo hlan ahọlu he to aigba lọ ji lẹ, ohí+ po kanlinmọgbenu+ po, nutindo mítọn lẹ ko sọ yin bibẹ yì di ogblànnu+ bọ mí ko yin winyando, dile e te do to egbé.+ 8 Ṣigba todin, na ojlẹ kleun de, Jehovah Jiwheyẹwhe mítọn ko do nukundagbe hia mí bo dike pipotọ de ni họ̀ngán bosọ na mí nọtẹn hihọ́ tọn* de to ofi wiwe etọn,+ nado hẹn nukun mítọn lẹ sẹ́, Jiwheyẹwhe mítọn E, podọ nado hẹn mí lodo vude to afanumẹ-yinyin mítọn mẹ. 9 Na mahopọnna dọ mí yin afanumẹ,+ Jiwheyẹwhe mítọn ma jo mí do ninọmẹ afanumẹ-yinyin tọn mítọn mẹ; ṣigba e ko do owanyi nugbo etọn hia mí to ahọlu Pẹlsia tọn lẹ nukọn,+ nado hẹn mí lodo na mí nido vọ́ ohọ̀ Jiwheyẹwhe mítọn tọn+ gbá bo vọ́ gbakija etọn lẹ jlado podọ nado na mí adó zannu tọn* de to Juda po Jelusalẹm po.

10 “Ṣigba todin, etẹwẹ mí sọgan dọ to ehe godo, Jiwheyẹwhe ṣie E? Na mí ko gbẹkọ gbedide towe lẹ go, 11 ehe hiẹ na mí gbọn devizọnwatọ towe yẹwhegán lẹ gblamẹ, dọmọ: ‘Aigba he ji mì jei nado yí lọ yin aigba mawé de, na mawé mẹhe tin to aigba lọ ji lẹ tọn wutu, yèdọ na osùnú yetọn he yé ko yí do gọ́ e ji sọn opodo de jẹ devo, na mawé yetọn wutu.+ 12 Enẹwutu, mì yí viyọnnu mìtọn lẹ na visunnu yetọn lẹ kavi yí viyọnnu yetọn lẹ na visunnu mìtọn lẹ blo;+ podọ mì ma dona dín jijọho po kọdetọn dagbe yetọn po gbede,+ na mì nido yin huhlọnnọ bo dù dagbe aigba lọ tọn bosọ yí i na visunnu mìtọn lẹ kakadoi.’ 13 Podọ to whenuena e yindọ onú ehe lẹpo ko wá mí ji na walọ ylankan mítọn lẹ po whẹhuhu sinsinyẹn mítọn po wutu—hiẹ Jiwheyẹwhe mítọn E, na hiẹ ma ko yinuwa hẹ mí sọgbe hẹ nuṣiwa mítọn+ bo ko sọ dike bọ mí mẹhe tofi lẹ họ̀ngán+— 14 be mí nasọ tùnafọ gbedide towe lẹ ji whladopo dogọ bo biọ kanṣiṣa alọwle tọn lẹ mẹ hẹ mẹhe nọ wà osùnú ehelẹ wẹ ya?+ Be hiẹ ma na gblehomẹ do mí go sọmọ bọ a na và mí sudo mlẹnmlẹn bo ma na jo pipotọ kavi luntọ́ntọ de do ya? 15 Jehovah Jiwheyẹwhe Islaeli tọn E, dodonọ wẹ hiẹ,+ na mí ko luntọ́n taidi pipotọ de kakajẹ egbé. Míwlẹ die to nukọn towe to whẹhuhu mítọn mẹ, na e ma yọnbasi nado ṣite to nukọn towe na ehe wutu.”+