2 Ahọlu lẹ

14 To owhe awetọ Jehoaṣi+ visunnu Jehoahazi ahọlu Islaeli tọn mẹ, Amazia visunnu Ahọlu Jehoaṣi Juda tọn lẹzun ahọlu. 2 Owhe 25 wẹ e tindo to whenue e duahọlu, e sọ dugán to Jelusalẹm na owhe 29. Oyín onọ̀ etọn tọn wẹ Jehoadini Jelusalẹm tọn.+ 3 E zindonukọn nado to nuhe sọgbe to nukun Jehovah tọn mẹ lẹ wà, amọ́ e ma yin taidi tọgbo etọn Davidi.+ Nuhe otọ́ etọn Jehoaṣi wà lẹpo wẹ e wà.+ 4 Ṣigba, ofi yiaga lẹ ma yin didesẹ,+ podọ gbẹtọ lẹ gbẹsọ to avọ́sinsan po avọ́sinsan mimẹ̀ lẹ po basi to ofi yiaga lẹ.+ 5 Tlolo he e ko hẹn ahọluduta lọ lodo to alọ ede tọn mẹ, e hù devizọnwatọ etọn lọ lẹ he ko hù otọ́ etọn he yin ahọlu dai.+ 6 Ṣigba, e ma hù visunnu hlọnhutọ lọ lẹ tọn lẹ, to kọndopọ mẹ hẹ gbedide Jehovah tọn he yin kinkandai to owe Osẹ́n Mose tọn mẹ dọ: “Otọ́ lẹ ma dona yin hùhù na ylando visunnu yetọn lẹ tọn, podọ visunnu lẹ ma dona yin hùhù na ylando otọ́ yetọn lẹ tọn; ṣigba mẹdopodopo wẹ dona yin hùhù na ylando etọn titi.”+ 7 E hù Edominu+ he nọ nọ̀ Agbàdo Ojẹ̀ tọn mẹ lẹ,+ yèdọ sunnu 10 000 bosọ duto Sela ji to awhàn lọ whenu+ bọ yinkọ tòdaho enẹ tọn yin didiọ zun Jọkteẹli kakajẹ egbé.

8 Amazia sọ do wẹnsagun lẹ hlan Jehoaṣi visunnu Jehoahazi he yin visunnu Jehu ahọlu Islaeli tọn dọmọ: “Wá na mí ni pehẹ míde to awhàn mẹ.”*+ 9 Ahọlu Jehoaṣi Islaeli tọn sọ dowẹn hlan Ahọlu Amazia Juda tọn dọmọ: “Wùnkan he to Lẹbanọni wẹ dowẹn hlan kedali Lẹbanọni tọn dọ, ‘Yí viyọnnu towe na visunnu ṣie di asi.’ Gbekanlin Lẹbanọni tọn de sọ juwajei bo tùnafọ wùnkan lọ ji. 10 Nugbo wẹ dọ hiẹ ko gbawhàn Edomi tọn,+ enẹ wẹ zọ́n bọ ahun towe do to kikla. Gigo towe ni hẹn we jaya, amọ́ nọ owhé* towe titi gbè. Naegbọn hiẹ nado fọ́n nugbajẹmẹji dote bo jai bosọ hẹn Juda nado jai hẹ we?” 11 Ṣigba, Amazia ma dotoai.+

Enẹwutu, Ahọlu Jehoaṣi Islaeli tọn hẹji yì, bọ ewọ po Ahọlu Amazia Juda tọn po pehẹ yede to awhàn mẹ to Bẹti-ṣemẹṣi+ he yin Juda tọn.+ 12 Islaeli sọ gbawhàn Juda tọn bọ dopodopo yetọn họnyi whé.* 13 Ahọlu Jehoaṣi Islaeli tọn wle Ahọlu Amazia Juda tọn, yèdọ visunnu Jehoaṣi he yin visunnu Ahazia tọn to Bẹti-ṣemẹṣi. Yé sọ wá Jelusalẹm, bọ e de nùvo de do adó Jelusalẹm tọn mẹ sọn Họngbo Eflaimi tọn+ kọ̀n jẹ Họngbo Lọnglọnẹnmẹ tọn kọ̀n,+ ehe dite na awagbà 400.* 14 E bẹ sika, fataka gọna núzinzan he yin mimọ to ohọ̀ Jehovah tọn mẹ podọ to adọkunnu sẹdotẹn owhé* ahọlu tọn mẹ lẹpo, gọna kanlinmọ lẹ. Enẹgodo, e lẹkọyi Samalia.

15 Na nuhe dù otàn Jehoaṣi tọn he pò, yèdọ nuhe e wà, huhlọn he e dohia gọna lehe e hoavùn hẹ Ahọlu Amazia Juda tọn do, be e ma yin kinkan do owe whenuho ahọlu Islaeli tọn lẹ tọn mẹ ya? 16 Jehoaṣi sọ yin hinhẹn nado mlọnai hẹ tọgbo etọn lẹ bo yin dìdì dopọ hẹ ahọlu Islaeli tọn lẹ to Samalia;+ visunnu etọn Jeloboami*+ sọ lẹzun ahọlu do otẹn etọn mẹ.

17 Amazia+ visunnu Jehoaṣi ahọlu Juda tọn nọgbẹ̀ na owhe 15 to okú Jehoaṣi+ visunnu Jehoahazi ahọlu Islaeli tọn godo.+ 18 Na nuhe dù otàn Amazia tọn he pò, be e ma yin kinkan do owe whenuho ahọlu Juda tọn lẹ tọn mẹ ya? 19 To godo mẹ, yè blasé do e go+ to Jelusalẹm bọ e họnyi Lakiṣi, ṣigba yé do sunnu lẹ hlan he dómọna ẹn yì Lakiṣi bo hù i to finẹ. 20 Yé sọ ze e do osọ́ lẹ ji lẹkọ bọ e yin dìdì dopọ hẹ tọgbo etọn lẹ to Jelusalẹm do Tòdaho Davidi tọn mẹ.+ 21 Enẹgodo, omẹ Juda tọn lẹpo de Azalia*+ he tindo owhe 16+ bo yí i do doahọlu do otọ́ etọn Amazia tẹnmẹ.+ 22 Ewọ vọ́ Elati+ gbá bo gọ̀ ẹ jo na Juda to whenue ahọlu lọ* ko yin hinhẹn nado mlọnai hẹ tọgbo etọn lẹ godo.+

23 To owhe 15tọ Amazia visunnu Jehoaṣi ahọlu Juda tọn mẹ, Jeloboami+ visunnu Ahọlu Jehoaṣi Islaeli tọn duahọlu to Samalia, e sọ dugán na owhe 41. 24 E zindonukọn nado to nuhe ylan to nukun Jehovah tọn mẹ lẹ wà. E ma lẹkọ sọn ylando he Jeloboami visunnu Nebati tọn ko hẹn Islaeli nado wà lẹpo mẹ.+ 25 E vọ́ dogbó Islaeli tọn de sọn Lebo-Hamati*+ kaka yì Ohù Alaba tọn*+ kọ̀n, sọgbe hẹ ohó he Jehovah Jiwheyẹwhe Islaeli tọn dọ gbọn devizọnwatọ etọn Jona+ visunnu Amitai tọn, yèdọ yẹwhegán he wá sọn Gati-hẹfeli+ lọ gblamẹ. 26 Na Jehovah ko mọ oyà sinsinyẹn he ji Islaeli te.+ Mẹhe na gọalọna Islaeli depope ma tin, etlẹ yin agbátọnọ kavi madogánnọ. 27 Ṣigba, Jehovah ko dopagbe ma nado súnsún oyín Islaeli tọn sẹ̀ sọn olọn glọ.+ Enẹwutu, e whlẹn yé gbọn alọ Jeloboami visunnu Jehoaṣi tọn gblamẹ.+

28 Na nuhe dù otàn Jeloboami tọn he pò, yèdọ nuhe e wà lẹpo, huhlọn he e dohia, lehe e hoavùn do gọna lehe e gọ̀ Damasku+ po Hamati+ po jo na Juda to Islaeli do, be e ma yin kinkan do owe whenuho ahọlu Islaeli tọn lẹ tọn mẹ ya? 29 Jeloboami sọ yin hinhẹn nado mlọnai hẹ tọgbo etọn lẹ, yèdọ hẹ ahọlu Islaeli tọn lẹ; visunnu etọn Zekalia+ sọ lẹzun ahọlu do otẹn etọn mẹ.