2 Otànnugbo lẹ

28 Owhe 20 wẹ Ahazi+ tindo to whenue e duahọlu, e sọ dugán to Jelusalẹm na owhe 16. E ma wà nuhe sọgbe to nukun Jehovah tọn mẹ dile Davidi tọgbo etọn ko wà do gba.+ 2 Kakatimọ, e zinzọnlin gbọn aliho ahọlu Islaeli tọn lẹ tọn ji,+ e tlẹ sọ basi boṣiọ kinkọ̀n+ lẹ na Baali lẹ. 3 Humọ, e basi avọ́sinsan mimẹ̀ to Agbàdo Visunnu Hinọmi tọn* mẹ bo mẹ̀ visunnu etọn lẹ to miyọ́n mẹ,+ bosọ wà osùnú he nkọ akọta+ he Jehovah ko yàn sẹ̀ sọn Islaelivi lẹ nukọn lẹ nọ wà. 4 E sọ nọ to avọ́sinsan po avọ́sinsan mimẹ̀ lẹ po basi mapote to ofi yiaga lẹ,+ to okọ́ta lẹ ji, podọ to atin he vùn ganji lẹpo sá.+

5 Enẹwutu, Jehovah Jiwheyẹwhe etọn jo e do alọ ahọlu Silia tọn mẹ+ bọ yé gbawhàn etọn bo bẹ omẹ susugege yì kanlinmọgbenu bosọ bẹ yé do Damasku.+ E sọ yin jijodo alọ ahọlu Islaeli tọn mẹ, mẹhe hù mẹsusu sọn omẹ etọn lẹ mẹ. 6 Na Peka+ visunnu Lemalia tọn hù omẹ Juda tọn 120 000 to azán dopo gblamẹ, yèdọ sunnu adọgbotọ lẹ kẹdẹ, na yé ko gbẹ́ Jehovah Jiwheyẹwhe tọgbo yetọn lẹ tọn dai wutu.+ 7 Zikli he yin awhànfuntọ Eflaiminu de sọ hù Maaseia he yin visunnu ahọlu tọn po Azlikami he nọ penukundo họ̀nmẹ* go po, gọna Ẹlkana he bọdo ahọlu go. 8 Humọ, Islaelivi lẹ bẹ omẹ 200 000 sọn nọvisunnu yetọn lẹ mẹ yì kanlinmọgbenu—yọnnu lẹ, visunnu lẹ po viyọnnu lẹ po; yé sọ bẹ ogblànnu susugege yì bo bẹ ogblànnu lọ lẹ yì Samalia.+

9 Ṣigba, yẹwhegán Jehovah tọn de he nọ yin Odẹdi tin to finẹ. E tọ́nyi awhànpa he ja Samalia lọ nukọn bo dọna yé dọmọ: “Pọ́n! Na Jehovah Jiwheyẹwhe tọgbo mìtọn lẹ tọn gblehomẹ do Juda go wutu wẹ e do jo yé do alọ mìtọn mẹ,+ bọ mìwlẹ hù yé po kanyinylan po sọmọ bọ linlin etọn yì kaka olọn. 10 Podọ todin, mì to linlẹn nado hẹn omẹ Juda po Jelusalẹm po tọn lẹ zun devisunnu po deviyọnnu mìtọn lẹ po.+ Etomọṣo, be mìlọsu ma hùwhẹ do Jehovah Jiwheyẹwhe mìtọn wẹ ya? 11 Todin, mì dotó mi bo lẹkọna kanlinmọ he mì bẹ sọn nọvisunnu mìtọn lẹ mẹ lọ lẹ, na Jehovah ko gblehomẹ sinsinyẹn do mì go.”

12 Whenẹnu, delẹ to ogán Eflaiminu lẹ tọn lẹ mẹ, yèdọ Azalia visunnu Jehohanani tọn, Belekia visunnu Meṣilemọti tọn, Jehizkia visunnu Ṣalumi tọn po Amasa visunnu Hadlai tọn po tọ́n pé mẹhe ja sọn awhàngbenu lọ lẹ, 13 yé sọ dọna yé dọmọ: “Mì bẹ kanlinmọ lọ lẹ wáfi blo, na e na hẹn mí zun whẹhutọ to Jehovah nukọn. Nuhe mì to linlẹn nado wà lọ na yidogọna ylando mítọn lẹ po whẹhuhu mítọn po, na whẹhuhu mítọn ko sù dai bọ homẹgble sinsinyẹn ko wá Islaeli ji.” 14 Enẹwutu, awhànfuntọ he sọawhànnu lọ lẹ bẹ kanlinmọ lọ lẹ po ogblànnu lọ lẹ+ po jo na ahọvi lẹ po agun lọ pete po. 15 Enẹgodo, sunnu he ko yin dide sọgbe hẹ yinkọ yetọn lẹ fọ́n bo bẹ kanlinmọ lọ lẹ bosọ na awù mẹhe to omẹ́ to yé mẹ lẹpo sọn ogblànnu lọ mẹ. Yé sọ do awù na yé bo na yé afọpa, dùdù po nùnù po gọna amì na agbasa yetọn. Humọ, yé bẹ madogánnọ lẹ do kẹtẹkẹtẹ lẹ ji bo hẹn yé wá mẹmẹsunnu yetọn lẹ dè to Jẹliko, yèdọ tòdaho odétin lẹ tọn. Enẹgodo, yé lẹkọyi Samalia.

16 Whenẹnu, Ahọlu Ahazi biọ alọgọ ahọlu Asilia tọn lẹ tọn.+ 17 Whladopo dogọ, Edominu lẹ doawhàn wá bo tọ́navùn Juda bosọ bẹ mẹdelẹ yì kanlinmọgbenu. 18 Filistinu+ lẹ lọsu sọ tọ́navùn tòdaho Ṣefela+ po Negẹb Juda tọn po tọn lẹ bo yí Bẹti-ṣemẹṣi,+ Aijalọni,+ Gedeloti, Soko po tòpẹvi he to oglọ na ẹn lẹ po, Timna+ po tòpẹvi he to oglọ na ẹn lẹ po gọna Gimzo po tòpẹvi he to oglọ na ẹn* lẹ po; yé sọ sawhé do finẹ. 19 Jehovah whiwhẹ Juda, na Ahọlu Ahazi Islaeli tọn wutu, na ewọ ko hẹn omẹ Juda tọn lẹ jẹgló, bọ nuyiwa nugbonọ-mayin na Jehovah tọn lẹ sudeji.

20 To godo mẹ, Ahọlu Tilgati-pilnesẹli+ Asilia tọn tọ́navùn in bo hẹn ayimajai wá na ẹn+ kakati nado hẹn ẹn lodo. 21 Na Ahazi ko bẹ nuhe to ohọ̀ Jehovah tọn mẹ lẹ gọna nuhe to owhé* ahọlu tọn gbè+ podọ to owhé ahọvi lẹ tọn lẹ gbè lẹ bo yí yé do basi nunina na ahọlu Asilia tọn wutu; ṣigba enẹ ma gọalọ depope na ẹn. 22 Podọ to ayimajai etọn whenu, Ahọlu Ahazi sọ yinuwa hẹ Jehovah po nugbonọ-mayin po hugan. 23 E jẹ avọ́san hlan yẹwhe Damasku tọn+ he ko gbawhàn etọn dai+ lẹ ji bo nọ dọmọ: “Na yẹwhe he ahọlu Silia tọn lẹ nọ sẹ̀n lẹ nọ gọalọna yé wutu, yẹnlọsu na sanvọ́ hlan yé, na yé nido gọalọna mi.”+ Ṣigba, yé hẹn ewọ po Islaeli po nado dahli. 24 Humọ, Ahazi bẹ nuyizan he to ohọ̀ Jiwheyẹwhe nugbo lọ tọn mẹ lẹ pli; enẹgodo, e sán nuyizan he to ohọ̀ Jiwheyẹwhe nugbo lọ tọn mẹ lẹ+ do flinflin bo sú ohọ̀n ohọ̀ Jehovah tọn lọ tọn lẹ+ bosọ do agbà lẹ na ede do agosu Jelusalẹm tọn lẹpo mẹ. 25 E do ofi yiaga lẹ ai do tòdaho Juda tọn lẹpo mẹ nado basi avọ́sinsan mimẹ̀ na yẹwhe devo lẹ,+ e sọ hẹn homẹgble Jehovah Jiwheyẹwhe tọgbo etọn lẹ tọn.

26 Na nuhe dù otàn Ahazi tọn he pò, yèdọ nuhe e wà lẹpo sọn bẹjẹeji kakajẹ vivọnu, e yin kinkan do Owe Ahọlu Juda po Islaeli po tọn lẹ tọn mẹ.+ 27 Ahazi sọ yin hinhẹn nado mlọnai hẹ tọgbo etọn lẹ, yé sọ dì i do tòdaho lọ mẹ, yèdọ Jelusalẹm, na yé ma dì i do yọdò ahọlu Islaeli tọn lẹ tọn mẹ.+ Visunnu etọn Hẹzekia sọ lẹzun ahọlu do otẹn etọn mẹ.