1 Samuẹli

15 Enẹgodo, Samuẹli dọna Sauli dọmọ: “Jehovah ko do mi hlan nado yiamisisadode we taidi ahọlu do Islaeli omẹ etọn lẹ ji;+ todin dotoaina nuhe Jehovah jlo na dọ.+ 2 Nuhe Jehovah awhànpa lẹ tọn dọ die: ‘Yẹn na hẹn Amalẹkinu lẹ nado dogbè nuhe yé wà na Islaeli tọn, yèdọ to whenue yé diọnukunsọ omẹ Islaeli tọn lẹ dile yé hẹji ja sọn Egipti.+ 3 Todin, yì bo hù Amalẹkinu+ lẹ bosọ và yewlẹ po nutindo yetọn lẹpo po sudo mlẹnmlẹn.+ A ma dona pò yé dogbẹ̀;* a dona hù yé,+ yèdọ sunnu po yọnnu po, ovi po ovivu lẹ po, oyìnsú po lẹngbọ po, podọ kanklosọ́ po kẹtẹkẹtẹ po.’”+ 4 Sauli ylọ gbẹtọ lọ lẹ pli bo hia yé to Telaimi: Awhànfuntọ he nọ zọ̀n afọ lẹ yin 200000 bọ sunnu Juda tọn lẹ yin 10 000.+

5 Sauli yì kakajẹ tòdaho Amalẹki tọn kọ̀n bo tọ̀pọwu sẹpọ agbàdo* lọ. 6 Sauli sọ dọna Keninu+ lẹ dọmọ: “Mì yì, mì tọ́n sọn Amalẹkinu lẹ ṣẹnṣẹn, na yẹn nikaa zà mìwlẹ sẹ̀ po yé po.+ Na mìwlẹ do owanyi nugbo hia omẹ Islaeli tọn lẹpo+ to whenue yé hẹji ja sọn Egipti.” Enẹwutu, Keninu lẹ tọ́n sọn Amalẹkinu lẹ ṣẹnṣẹn. 7 Enẹgodo, Sauli hù Amalẹkinu+ lẹ sọn Havila+ kakajẹ Ṣuli,+ to Egipti pá. 8 E sọ wle Agagi+ ahọlu Amalẹki tọn gbẹ̀te, ṣigba e yí ohí do hù mẹhe pò lẹpo sudo.+ 9 Amọ́, Sauli po gbẹtọ lọ lẹ po pò Agagi dogbẹ̀,* gọna dagbe hugan lẹngbọpa lọ tọn, kanlinpa lọ tọn, kanlin he dojó lẹ tọn po agbò lẹ tọn po, podọ nudagbe lẹpo.+ Yé ma jlo na và yé sudo mlẹnmlẹn. Ṣigba, nutindo he yin numadinu bọ yé ma tindo ojlo na lẹpo, ehelẹ wẹ yé vasudo mlẹnmlẹn.

10 To whenẹnu, ohó Jehovah tọn wá Samuẹli dè dọmọ: 11 “E vẹna* mi dọ n’yí Sauli do basi ahọlu, na e ko lẹkọ sọn hihodo mi mẹ bo ma hẹn ohó ṣie lẹ di.”+ Samuẹli sọ jẹflumẹ taun bo to awhádo mapote hlan Jehovah to ozán lọ blebu mẹ.+ 12 Whenue Samuẹli fọ́n to afọnnu fuu nado yì pé Sauli, e yin didọna Samuẹli dọmọ: “Sauli ko yì Kalmẹli+ bo ze zannu oflin tọn de tùnte na ede do finẹ.+ Enẹgodo, e lẹkọ bo jẹte yì Gilgali.” 13 To godo mẹ, whenue Samuẹli wá e dè, Sauli dọna ẹn dọmọ: “Na Jehovah ni dona we. Yẹn ko hẹn ohó Jehovah tọn di.” 14 Ṣigba, Samuẹli dọmọ: “To whelọnu lo, ogbè lẹngbọ lẹ po oyìn lẹ po tọn tẹ sè n’te niyẹn?”+ 15 To whenẹnu, Sauli dọmọ: “Amalẹkinu lẹ dè wẹ yé yin hinhẹnwa sọn, na gbẹtọ lọ lẹ pò dagbe hugan lẹngbọpa lọ po kanlinpa lọ po tọn dogbẹ̀* nado yí yé do basi avọ́sinsan hlan Jehovah Jiwheyẹwhe towe; ṣigba mí và nuhe pò lẹ sudo mlẹnmlẹn.” 16 Enẹwutu, Samuẹli dọna Sauli dọmọ: “Danido! Gbọ ma dọ nuhe Jehovah dọna mi to osọ zánmẹ na we.”+ Sauli sọ dọna ẹn dọmọ: “Dọho!”

17 Samuẹli zindonukọn dọmọ: “Be hiẹ ma ko pọ́n dewe hlan dai di mẹhe whè hugan,+ yèdọ to whenue a yin dide di nukọntọ hẹnnu Islaeli tọn lẹ tọn podọ to whenue Jehovah yiamisisadode we taidi ahọlu do Islaeli ji ya?+ 18 To godo mẹ, Jehovah do we hlan bo deazọ́nna we dọ, ‘Yì bo và Amalẹkinu ylandonọ lọ lẹ sudo mlẹnmlẹn.+ Hoavùn hẹ yé kaka a nado sukúndona yé.’+ 19 Enẹwutu, naegbọn hiẹ ma do setonuna ogbè Jehovah tọn? Kakatimọ, hiẹ yí nukunkẹn do zlọn jẹ ogblànnu lọ lẹ ji+ bo wà nuhe ylan to nukun Jehovah tọn mẹ!”

20 Ṣigba, Sauli dọna Samuẹli dọmọ: “Amọ́, n’ka setonuna ogbè Jehovah tọn be! N’hẹn azọ́n he Jehovah dena mi lọ di, bọ n’sọ hẹn Agagi ahọlu Amalẹki tọn wá bo và Amalẹkinu lẹ sudo mlẹnmlẹn.+ 21 Ṣigba, gbẹtọ lọ lẹ wẹ bẹ lẹngbọ lẹ po oyìn lẹ po sọn ogblànnu lọ lẹ mẹ, yèdọ dagbe hugan sọn nuhe dona yin vivasudo mlẹnmlẹn lọ lẹ mẹ nado basi avọ́sinsan hlan Jehovah Jiwheyẹwhe towe to Gilgali.”+

22 To whenẹnu, Samuẹli dọmọ: “Be Jehovah nọ tindo homẹhunhun sọmọ to avọ́nunina mimẹ̀+ lẹ po avọ́sinsan lẹ po mẹ taidi to tonusisena ogbè Jehovah tọn mẹ wẹ ya? Pọ́n! Tonusise pọnte hú avọ́sinsan,+ podọ todidoai pọnte hú ojó+ agbò lẹ tọn; 23 na nudopolọ wẹ atẹṣiṣi+ po ylando dọṣẹdidọ tọn+ po yin, podọ nudopolọ wẹ nuyiwa po sakla po yin hẹ nujijlẹ po boṣiọ-sinsẹ̀n* po. Na hiẹ ko gbẹ́ ohó Jehovah tọn+ dai wutu, ewọ lọsu ko gbẹ́ we dai di ahọlu.”+

24 Sauli sọ dọna Samuẹli dọmọ: “N’ko waylando, na n’ko tùnafọ gbedide Jehovah tọn po ohó towe lẹ po ji, na n’dibuna gbẹtọ lọ lẹ bo dotoaina nuhe yé dọ wutu. 25 Todin, jaale bo jo ylando ṣie na mi bosọ hodo mi lẹkọ, na yẹn nido dẹ́ do odò na Jehovah.”+ 26 Ṣigba, Samuẹli dọna Sauli dọmọ: “Yẹn ma na hodo we lẹkọ, na hiẹ ko gbẹ́ ohó Jehovah tọn dai, podọ Jehovah ko gbẹ́ we dai ma nado to ahọlu yin do Islaeli ji zọnmii.”+ 27 Dile Samuẹli lẹkọ jei, Sauli hẹn tónu odò tọn go na awù Samuẹli tọn he ma tindo awà, bọ e tlẹ́n. 28 Enẹwutu, Samuẹli dọna ẹn dọmọ: “Jehovah ko tlẹ́n gandudu Islaeli tọn sọn asi we to egbé, bo na yí i na dopo to hatọ towe lẹ mẹ he pọnte hú we.+ 29 Humọ, Gigonọ Daho Islaeli tọn+ lọ ma na dolalo+ kavi diọlinlẹn,* na Ewọ ma yin gbẹtọ tata de bo nado diọlinlẹn.”*+

30 To whenẹnu, Sauli dọmọ: “N’ko waylando. Ṣigba, jaale bo gbògbéna mi to mẹho omẹ ṣie lẹ tọn lẹ nukọn podọ to Islaeli nukọn. Hodo mi lẹkọ, na yẹn nido dẹ́ do odò na Jehovah Jiwheyẹwhe towe.”+ 31 Enẹwutu, Samuẹli lẹkọ hodo Sauli, bọ Sauli dẹ́ do odò na Jehovah. 32  Samuẹli sọ dọmọ: “Mì plan Agagi ahọlu Amalẹki tọn lọ wá dè e.” Agagi sọ wá e dè po awuwhiwhle po,* na Agagi ko lẹn to ede mẹ dọ: ‘Matin ayihaawe, obu* okú tọn ko juwayi.’ 33 Ṣigba, Samuẹli dọmọ: “Kẹdẹdile ohí towe ko hẹn yọnnu lẹ nado nọ aluẹmẹ na ovi yetọn lẹ do, mọdopolọ onọ̀ towe wẹ na nọ aluẹmẹ hugan to yọnnu lẹ mẹ.” To whenẹnu, Samuẹli já Agagi do flinflin to Jehovah nukọn to Gilgali.+

34 Todin, Samuẹli yì Lama, bọ Sauli hẹji yì owhé etọn titi gbè to Gibea Sauli tọn. 35 Kaka Samuẹli do kú, ewọ masọ mọ Sauli ba, na Samuẹli biọ aluẹmẹ na Sauli wutu.+ E sọ vẹna Jehovah dọ emi ko yí Sauli do basi ahọlu do Islaeli ji.+