Owalọ lẹ

25 Todin, to whenue Festu+ ko wá ayimatẹn lọ bo jẹ gandu ji godo, e hẹji sọn Sesalea yì Jelusalẹm to azán atọ̀n godo. 2 Yẹwhenọgán lẹ po Ju nukundeji lẹ po sọ jẹwhẹ Paulu tọn na ẹn.+ Enẹwutu, yé jẹ Festu vẹ̀ ji 3 bo to nukundagbe biọ* dọ ewọ ni dowẹn hlan Paulu nado wá Jelusalẹm. Ṣigba, yé to tito basi nado tọ̀pọwu na Paulu bo hù i to aliji.+ 4 Amọ́, Festu gblọn dọ Paulu ni yin hinhẹn do Sesalea bosọ dọ dọ emi lọsu jlo na lẹkọyi dọ́n to madẹnmẹ. 5 Ewọ sọ dọmọ: “Enẹwutu, mì dike mẹhe yin nukọntọ to ṣẹnṣẹn mìtọn lẹ ni jẹte hẹ mi yì bo sawhẹdokọna ẹn, eyin nugbonugbo, dawe ehe ko wà nude jẹagọ.”+

6 Enẹwutu, to whenue e ko nọ ṣẹnṣẹn yetọn na nuhe ma hú azán ṣinatọ̀n kavi ao, e jẹte yì Sesalea, podọ to aihọngbè, e sinai to whẹdaján ji bo degbe dọ Paulu ni yin hinhẹnwa. 7 To whenue e wá, Ju he ko wá sọn Jelusalẹm lẹ ṣite lẹdo e bo to owhẹ̀ sinsinyẹn susu he yé ma sọgan do kunnudenu etọn hia lẹ sadokọna ẹn.+

8 Ṣigba, nado yiavùnlọna ede, Paulu dọmọ: “Yẹn ma waylando depope sọta Osẹ́n Ju lẹ tọn kavi sọta tẹmpli lọ kavi sọta Sesali.”+ 9 Na Festu jlo nado mọ nukundagbe Ju lẹ tọn wutu,+ e gblọnna Paulu dọmọ: “Be hiẹ jlo nado hẹji yì Jelusalẹm nado yin whẹdana to dọ́n to nukọn ṣie gando onú ehelẹ go wẹ?” 10 Ṣigba, Paulu dọmọ: “Yẹn ko to ote to whẹdaján Sesali tọn nukọn, fihe yẹn dona yin whẹdana te. Yẹn ma wà oylan depope do Ju lẹ, dile hiẹ lọsu to mimọ do hezeheze. 11 Eyin yẹn yin ylanwatọ de nugbonugbo bo ko wà nudepope he jẹna okú,+ yẹn ma gbẹ́ nado kú; ṣigba, eyin dodonu depope ma tin na owhẹ̀ he sunnu ehelẹ ko sadokọna mi lẹ, mẹdepope ma tindo jlọjẹ nado ze mi jo na Ju lẹ nado do nukundagbe hia yé. Yẹn vọ́ owhẹ̀ ṣie ylọ to Sesali dè!”+ 12 To whenẹnu, to whenue Festu ko dọho hẹ pipli ayinamẹtọ lẹ tọn godo, e gblọn dọmọ: “Hiẹ ko vọ́ owhẹ̀ ylọ to Sesali dè; Sesali dè wẹ hiẹ nasọ yì.”

13 To whenue azán delẹ ko juwayi, ahọlu Aglipa po Belnike po basi dlapọn wá Sesalea nado wá dọnudo Festu. 14 To whenuena e yindọ yé to finẹ na azán delẹ, Festu ze whẹho Paulu tọn donukọnna ahọlu lọ dọmọ:

“Dawe de tin he Feliksi jodo di gàntọ, 15 podọ to whenue yẹn tin to Jelusalẹm, yẹwhenọgán lẹ po mẹho Ju lẹ tọn lẹ po hẹn ohó etọn wá+ bo to whẹdida whẹgbledomẹ tọn biọ sọta ẹ. 16 Ṣigba, yẹn gblọnna yé dọ e ma yin aliho nuyiwa Lomunu lẹ tọn nado nọ jo mẹdepope namẹ nado do nukundagbe hia adavo mẹhe yin whẹsadokọna lọ mọ whẹsadokọnamẹtọ etọn lẹ nukun sọ nukun whẹ́ bo tindo dotẹnmẹ lọ nado dọho bosọ yiavùnlọna ede gando whẹsadokọnamẹ lọ go.+ 17 Enẹwutu, to whenue yé wáfi, yẹn ma dọngbàn, ṣigba to aihọngbè, yẹn sinai to whẹdaján ji bo degbe dọ dawe lọ ni yin hinhẹnwa. 18 To whenue whẹsadokọnamẹtọ lọ lẹ fọnṣite, yé ma jẹwhẹ nuylankan he yẹn ko donukun gando e go lẹ tọn depope sọta ẹ gba.+ 19 Nudindọn delẹ wẹ yé tindo hẹ ẹ poun gando sinsẹ̀n-bibasi hlan yẹwhe yetọn titi go*+ podọ gando dawe de he nọ yin Jesu, he ko kú ṣigba he Paulu to nùzindeji mapote dọ e to ogbẹ̀ go.+ 20 Na yẹn biọ bẹwlu mẹ gando lehe whẹho ehe sọgan yin dididẹ do go wutu, yẹn kanse e eyin ewọ na jlo nado yì Jelusalẹm bo yin whẹdana to dọ́n gando whẹho ehelẹ go.+ 21 Ṣigba, whenue Paulu biọ dọ emi ni yin jijodo gànmẹ kakajẹ whenue Omẹ Gigonọ* lọ na basi nudide gando emi go,+ yẹn degbe dọ ewọ ni yin jijodo gànmẹ jẹ whenue yẹn na do e hlan Sesali dè.”22 Whenẹnu wẹ Aglipa dọna Festu dọmọ: “Yẹnlọsu na jlo nado sè ohó dawe ehe tọn.”+ E dọmọ: “Hiẹ na sè ohó etọn to osọ he ja.” 23 Enẹwutu to aihọngbè, Aglipa po Belnike po wá po aṣọ́dido daho po bosọ biọ ahọlu-gbasa to pọmẹ po awhàngán daho lẹ po gọna sunnu nukundeji tòdaho lọ tọn lẹ; podọ to whenue Festu degbe, Paulu yin hinhẹnwa. 24 Festu sọ dọmọ: “Ahọlu Aglipa po mì mẹhe tin tofi hẹ mí lẹpo po emi, dawe lọ he agundaho Ju lẹ tọn lẹpo ko biọ to yẹn si to Jelusalẹm podọ tofi, bo to awhádo dọ e ma jẹ dọ ewọ nisọ nọgbẹ̀ ba lọ mọ die mì te.+ 25 Ṣigba, yẹn mọdọ e ma wà oylan depope he hẹn ẹn jẹna okú.+ Enẹwutu, to whenue ewọ lọsu vọ́ owhẹ̀ ylọ to Omẹ Gigonọ lọ dè, yẹn basi dide nado do e hlan. 26 Ṣigba, yẹn ma tindo onú tangan de he yẹn na kàn hlan Oklunọ ṣie gando ewọ go. Enẹwutu wẹ yẹn hẹn ẹn wá nukọn mìmẹpo tọn, podọ na taun tọn, wá nukọn towe, hiẹ Ahọlu Aglipa, bọ to dodinnanu whẹdida tọn lọ godo, yẹn nido sọgan mọ nude he yẹn na kàn. 27 Na to nukun ṣie mẹ, e ma sọgbe hẹ lẹnpọn dagbe nado do gàntọ de hlan bo ma do owhẹ̀ he yin sisadokọna ẹn lọ lẹ lọsu hia gba.”