Owalọ lẹ

27 Todin, dile nudide ko yin bibasi dọ mí na dohún yì Itali,+ yé ze Paulu po gàntọ devo delẹ po do alọmẹ na awhàngán* awhànfun-gbẹ́ Augusti tọn he nọ yin Juliu. 2 Mí biọ tọjihun de mẹ he tọ́n sọn Adlamittiu bo jlo na gbọn tọjihun-glintẹn he to huto ayimatẹn Asia tọn lẹ, mí sọ súnhún; Alistaku+ he yin Makedonianu de sọn Tẹsalonika sọ zọnhẹ mí. 3 To aihọngbè, mí gọ̀hún do Sidoni, Juliu sọ do homẹdagbe hia* Paulu taun bo na ẹn dotẹnmẹ nado yì họntọn etọn lẹ dè bosọ duvivi nukunpedomẹgo yetọn tọn.

4 Podọ to whenue mí súnhún sọn finẹ, ohún mítọn gbọn oyẹ̀ Kiplu tọn glọ, na jẹhọn agọ̀ to yìnyìn wutu. 5 Enẹgodo, mí gbọn ohù he siso lọ ji gbọn Silisia po Pamfilia po bo wá glinhún do húnglintẹn Mila tọn to Likia. 6 To finẹ, awhàngán* lọ mọ tọjihun de he tọ́n sọn Alẹkzandli bo jei Itali, e sọ bẹ mí do e mẹ. 7 Enẹgodo, to whenue mí ko zọ̀n dẹẹdẹ na azán sọha delẹ godo, mí wá Kinidu po awusinyẹn po. Na jẹhọn ma dike mí ni zọ̀n tlọlọ wutu, ohún mítọn gbọn oyẹ̀ Klete tọn glọ to Salmọne. 8 Podọ to whenue mí ko whlẹ́ gbọn olá lọ go po awusinyẹn po, mí wá fide he nọ yin Tọjihun-Glintẹn Dagbe, he ma dẹn do tòdaho Lasea tọn.

9 Ojlẹ delẹ ko juwayi podọ todin e yin owùnu nado kùnhún, na ojlẹ nùbibla Azán Ovẹsè tọn*+ tlẹ ko juwayi, enẹwutu Paulu na ayinamẹ 10 yé bo dọmọ: “Mì omẹ ṣie lẹ emi, yẹn mọdọ gbejizọnlin ehe na dekọtọn do nugbajẹmẹji po nuhẹngu susu po mẹ, e ma yin na agbàn lẹ po tọjihun lọ po kẹdẹ gba, ṣigba na ogbẹ̀* mílọsu tọn lẹ ga.” 11 Ṣigba, awhàngán* lọ dotoaina húnkùntọ lọ po ohúnnọ lọ po kakati ni yin nuhe dọ Paulu te. 12 To whenuena e yindọ tọjihun-glintẹn lọ ma yin ofi dagbe nado yí ojlẹ avivọ-whenu tọn zan te, mẹsusu na ayinamẹ nado súnhún sọn finẹ nado pọ́n eyin yé sọgan penugo bo yí ojlẹ avivọ-whenu tọn zan to Fonisi, yèdọ to tọjihun-glintẹn Klete tọn he pannukọn agewaji-whèzẹtẹn tọn podọ hùwaji-whèzẹtẹn tọn.

13 To whenue jẹhọn hùwaji tọn to yìnyìn dẹẹdẹ, yé lẹndọ yé ko jẹ yanwle yetọn kọ̀n, yé sọ de húnsingàn sọn otọ̀ mẹ bo jẹ whiwhlẹ́ gbọn olá Klete tọn go ji. 14 Ṣigba, to ojlẹ vude godo, jẹhọn-ahizi de he nọ yin Eulakilo* yìn sinsinyẹn. 15 Dile jẹhọn to tuklado tọjihun lọ badabada bọ e ma penugo nado pannukọn jẹhọn lọ, mí gbọ bo jo míde na ẹn bọ e dọ̀n mí dedo. 16 Todin, mí jẹ lopo pẹvi de he nọ yin Kauda kọ̀n, bo jẹ yẹbẹ ji gbọn e go, ṣogan, e ma bọawu whẹpo mí do penugo bo hẹn ohún pẹvi* he to húnyonu lọ dote. 17 Ṣigba, to whenue yé dọ̀n ẹn biọ e mẹ godo, yé yí alọgọnu lẹ zan nado blá tọjihun lọ sọn oglọ, podọ na yé to budi ma nado slé do tọkẹ́n Siltis* tọn ji wutu, yé dọ̀n okàn alà lọ tọn lẹ wá odò bọ jẹhọn sọ jẹ yé dọ̀n yì ji. 18 Na yujẹhọn lọ to yigọyigọ-dona mí sinsinyẹn wutu, yé jẹ agbàn depò sọn ohún lọ mẹ ji to aihọngbè. 19 Podọ to azán atọ̀ntọ gbè, yé bẹ nuyizan tọjihun lọ tọn lẹ dlan po alọ yetọn titi po.

20 To whenue owhè kavi sunwhlẹvu lẹ ma sọawuhia na azán susu, bọ yujẹhọn sinsinyẹn* de to tuklado mí, todido mítọn lẹpo nado yin whinwhlẹngán wá jẹ bubusẹ ji. 21 Dile ojlẹ dindẹn ko juwayi bọ yé ma dùnú, Paulu fọnṣite to ṣẹnṣẹn yetọn bo dọmọ: “Mì omẹ ṣie lẹ emi, na taun tọn, mì dona ko yí ayinamẹ ṣie bọ mì ma na ko súnhún sọn Klete bo na ko dapana nugbajẹmẹji po nuhẹngu ehe po.+ 22 Etomọṣo todin, yẹn to tulina mì nado gboadọ, na depope* to mì mẹ ma to na dọ̀n, adavo tọjihun lọ kẹdẹ. 23 To zánmẹ, angẹli+ Jiwheyẹwhe he yẹn nọ sẹ̀n podọ mẹhe yẹn nọ basi sinsẹ̀nzọn wiwe hlan lọ tọn de ṣite to apá na mi 24 bo dọmọ: ‘A dibu blo, Paulu. Hiẹ dona ṣite to Sesali nukọn,+ podọ pọ́n! na towe tọn wutu, Jiwheyẹwhe na whlẹn mẹhe do tọjihun hẹ we lẹpo.’ 25 Enẹwutu, mì gboadọ, mì omẹ ṣie lẹ emi, na yẹn yí Jiwheyẹwhe sè, dọ nuhe yin didọna mi na jọ domọ pẹpẹ. 26 Ṣigba, ohún na siọ mí sẹpọ lopo de kọ̀n.”+

27 Todin, to ozán azán 14tọ tọn mẹ, dile jẹhọn to yigọyigọ-dona mí to ohù Adlia tọn ji, to zánhomẹ, azọ́nwatọ ohún mẹ tọn lẹ jẹ linlẹn ji dọ yé to dindọnsẹpọ agé. 28 Yé sọ jlẹ sisosiso ohù tọn pọ́n bo mọdọ e yì mẹtè 20,* enẹwutu, yé yinukọn vude dogọ bosọ vọ́ jlẹ sisosiso ohù lọ tọn pọ́n bo mọdọ e yì mẹtè 15.* 29 Podọ na obu lọ dọ mí nikaa slé do osé lẹ ji wutu, yé ze húnsingàn ẹnẹ do hùmẹ sọn húnyonu bo jẹ nukundo ji dọ ai ni họ́n. 30 Ṣigba, to whenue azọ́nwatọ ohún mẹ tọn lẹ to dindin nado họnyi sọn tọjihun lọ mẹ bo to ohún pẹvi lọ de jẹte do hùmẹ taidi dọ yé jlo na de húnsingàn lẹ sọn ohúnkọ̀ wẹ nkọ, 31 Paulu dọna awhàngán* lọ po awhànfuntọ lọ lẹ po dọmọ: “Eyin omẹ ehelẹ ma gbọṣi tọjihun lọ mẹ, mì ma sọgan yin whinwhlẹngán.”+ 32 To whenẹnu, awhànfuntọ lọ lẹ sán okàn ohún pẹvi lọ tọn sọn tọjihun lọ go bo jo e do bọ e yì.

33 Todin, to whenue ai ko to hinhọ́n, Paulu na tuli yemẹpo nado dùnú bo dọmọ: “E ko yì azán 14 todin bọ mì ko to alihọ́ po nuhiha po bo masọ dù nudepope. 34 Enẹwutu, yẹn na tuli mì nado dùnú; na dagbemẹninọ mìtọn wutu, na dopo tata to oda he to ota na dopodopo mìtọn lẹ mẹ ma na dọ̀n.” 35 To whenue e ko dọ ehe, e yí akla de bo dopẹna Jiwheyẹwhe to yemẹpo nukọn bosọ wẹ́n ẹn bo jẹ núdù ji. 36 Enẹwutu, awuya yemẹpo bọ yelọsu jẹ núdù ji. 37 To pọmẹ, mí omẹ* 276 wẹ tin to tọjihun lọ mẹ. 38 To whenue yé ko dùnú gọ́ho, yé hẹn tọjihun lọ fua gbọn likun lẹ bibẹ dlan hùmẹ dali.+

39 To whenue ai ko họ́n, yé ma sọgan yọ́n fihe agé te,+ ṣigba yé mọ ogblọ́n de he tindo huto, yé sọ magbe nado glinhún lọ do huto to finẹ eyin e yọnbasi. 40 Enẹwutu, yé sán húnsingàn lọ lẹ bo dike bọ yé flẹ jẹ hùmẹ, to ojlẹ dopolọ mẹ yé tún okàn azẹ̀ lọ lẹ tọn; podọ to whenue yé ko kẹ́ alà he to nukọn lọ, yé pànta huto lọ. 41 To whenue yé hẹ pópló tọkẹ́n tọn he agbówhẹn to hihò to adà awe lẹ mẹ de ji, yé glin tọjihun lọ bọ ohúnkọ̀ lọ whè do kọmẹ gbanun-gbanun bo ma sọgan sẹtẹn, ṣigba agbówhẹn lẹ to hihò jẹ húnyonu lọ go bo gbà ẹ do flinflin.+ 42 Enẹwutu, awhànfuntọ lẹ basi dide nado hù gàntọ lẹ, na depope to yé mẹ nikaa lìnsin bo họnyi. 43 Ṣigba, awhàngán* lọ magbe nado whlẹn Paulu, e sọ glọnalina yé ma nado yinuwa sọgbe hẹ tito yetọn. E degbena mẹhe penugo nado lìnsin lẹ nado lọ́n jẹ hùmẹ bo jẹ agé whẹ́, 44 bọ mẹhe pò lẹ na bọdego, mẹdelẹ gbọn owhlẹ lẹ ji podọ mẹdevo lẹ gbọn gbakija tọjihun lọ tọn delẹ ji. Gbọnmọ dali, mẹlẹpo yin hinhẹn jẹ agé awuyẹyẹ-afọyẹyẹ.+