Ezekiẹli

34 Ohó Jehovah tọn sọ vọ́ wá dè e dọmọ: 2 “Visunnu gbẹtọ tọn, dọ dọdai sọta lẹngbọhọtọ Islaeli tọn lẹ. Dọ dọdai bo dọna lẹngbọhọtọ lọ lẹ dọ, ‘Nuhe Oklunọ Nupojipetọ Jehovah dọ die: “Dindọn na lẹngbọhọtọ Islaeli tọn+ he to núdùdù na yedelẹ! Be e ma yin lẹngbọpa lọ wẹ lẹngbọhọtọ lẹ dona nọ na núdùdù ya?+ 3 Mì nọ dù ojó lọ bo nọ do avọ̀ kanlin-fún tọn lẹ bosọ nọ hù kanlin he dojó hugan lẹ,+ ṣigba mì ma nọ na núdùdù lẹngbọpa lọ.+ 4 Mì ma nọ hẹn dehe yin madogánnọ lẹ lodo kavi hẹnazọ̀ngbọna dehe to azọ̀njẹ lẹ kavi blá apà na dehe gbleawu lẹ kavi gọ̀ dehe danbú lẹ wá apó lọ mẹ kavi dín dehe bu lẹ mọ;+ kakatimọ, mì ko yí kanyinylan po fifiẹ po do dugán do yé ji.+ 5 Enẹwutu, yé vúnvún pé na yé ma tindo lẹngbọhọtọ wutu;+ yé vúnvún pé bosọ lẹzun núdùdù na gbekanlin danji tọn lẹpo. 6 Lẹngbọ ṣie lẹ to dindanbu to osó po okọ́ta he yiaga lẹpo po ji; yè vúnvún lẹngbọ ṣie lẹ pé gbọn nukunmẹ aigba tọn lẹpo ji, mẹdepope masọ dín yé mọ kavi tẹnpọn nado doafọna yé.

7 “‘“Enẹwutu, mì lẹngbọhọtọ lẹ emi, mì sè ohó Jehovah tọn: 8 ‘“Dile yẹn togbẹ̀,” wẹ Oklunọ Nupojipetọ Jehovah dọ, “na lẹngbọ ṣie lẹ ko lẹzun nuhe yè to ogbé etọn yàn, yèdọ núdùdù na gbekanlin danji tọn lẹpo, na lẹngbọhọtọ de ma tin wutu, bọ lẹngbọhọtọ ṣie lẹ masọ dín lẹngbọ ṣie lẹ mọ; kakatimọ, yé to núdùdù na yedelẹ bo ma na núdùdù lẹngbọ ṣie lẹ,”’ 9 enẹwutu, mì lẹngbọhọtọ lẹ emi, mì sè ohó Jehovah tọn. 10 Nuhe Oklunọ Nupojipetọ Jehovah dọ die, ‘Yẹn na diọnukunsọ lẹngbọhọtọ lẹ, yẹn nasọ biọ dọ yé ni dogbè gando lẹngbọ ṣie lẹ go,* podọ yẹn na yí azọngban núdùdù nina* lẹngbọ ṣie lẹ tọn sọn yé si,+ lẹngbọhọtọ lẹ ma nasọ na núdùdù yedelẹ ba. Yẹn na whlẹn lẹngbọ ṣie lẹ sọn onù yetọn mẹ, yé ma nasọ yin núdùdù na lẹngbọhọtọ lẹ ba.’”

11 “‘Na nuhe Oklunọ Nupojipetọ Jehovah dọ die: “Mì pọ́n, yẹnlọsu wẹ na dín lẹngbọ ṣie lẹ mọ bo nasọ penukundo yé go.+ 12 Yẹn na penukundo lẹngbọ ṣie lẹ go taidi lẹngbọhọtọ de he ko mọ lẹngbọ etọn he vúnvún pé lẹ bosọ to núdùdù na yé.+ Yẹn na whlẹn yé sọn fie yè ko vúnvún yé pé gbọn lẹpo to azán aslọ lẹ po avìvì daho po tọn gbè.+ 13 Yẹn na de yé tọ́n sọn akọta lẹ mẹ bo na bẹ yé pli sọn aigba lẹ ji bo nasọ hẹn yé wá aigba yetọn ji bo na na núdùdù yé to osó Islaeli tọn lẹ ji,+ to osinwhín lẹ tó podọ to fininọ aigba lọ tọn lẹpo ji. 14 Fie kanlindugbo dagbedagbe tin te wẹ yẹn na nọ na núdùdù yé te, podọ to osó he yiaga to aigba Islaeli tọn ji lẹ ji wẹ yé na nọ dù amà te.+ Yé na nọ mlọnai to aigba he ji kanlindugbo sù te,+ podọ yé na nọ dù amà to fie kanlindugbo dagbe hugan lẹ te to osó Islaeli tọn lẹ ji.”

15 “‘“Yẹnlọsu wẹ na nọ na núdùdù lẹngbọ ṣie lẹ,+ podọ yẹnlọsu wẹ na nọ hẹn yé mlọnai,”+ wẹ Oklunọ Nupojipetọ Jehovah dọ. 16 “Yẹn na nọ dín dehe bu lẹ mọ+ bo na nọ gọ̀ dehe danbú lẹ wá apó lọ mẹ, yẹn na nọ blá apà na dehe gbleawu lẹ bo na nọ hẹn madogánnọ lẹ lodo; ṣigba dehe dojó po dehe yin huhlọnnọ lẹ po wẹ yẹn na husudo. Whẹdida dodo wẹ yẹn na yí do yìn enẹlẹ.”

17 “‘Na nuhe dù mì lẹngbọ ṣie lẹ, nuhe Oklunọ Nupojipetọ Jehovah dọ die: “Yẹn na dawhẹna lẹngbọ lọ lẹ, yèdọ to agbò po gbọgbọẹ asu po ṣẹnṣẹn.+ 18 Be fie mì dù sọn kanlindugbo dagbe hugan lẹ mẹ jẹ ma ko pé ya? Be mìwlẹ nasọ tùnafọ gbọn kanlindugbo he pò lẹ ji wẹ ya? Podọ to whenue mì ko nù sọn osin he yọ́n hugan lọ mẹ godo, be mì na yí afọ mìtọn lẹ do hẹn osin he pò wlu wẹ ya? 19 Be kanlindugbo he ji mì ko tùnafọ gbọn lẹ mẹ wẹ lẹngbọ ṣie lẹ na dù sọn bo na nù osin he mì ko yí afọ mìtọn lẹ do hẹn wlu ya?”

20 “‘Enẹwutu, nuhe Oklunọ Nupojipetọ Jehovah dọna yé die: “Mì pọ́n, yẹnlọsu wẹ na dawhẹ to lẹngbọ he dojó po lẹngbọ he húgo po ṣẹnṣẹn, 21 na mì nọ yí adàja po abọ́ mìtọn po do tùn yé hlan, podọ azò mìtọn lẹ wẹ mì sọ nọ yí do sisẹ́ dehe to azọ̀njẹ lẹ kakajẹ whenue mì vúnvún yé pé. 22 Yẹn na whlẹn lẹngbọ ṣie lẹ, yè ma nasọ yangbé yetọn ba;+ podọ yẹn na dawhẹna lẹngbọ dopodopo. 23 Yẹn na de lẹngbọhọtọ de do yé ji,+ yèdọ devizọnwatọ ṣie Davidi,+ ewọ nasọ nọ na yé núdùdù. Ewọ lọsu wẹ na nọ na yé núdùdù bo nasọ lẹzun lẹngbọhọtọ yetọn.+ 24 Podọ yẹn Jehovah, na lẹzun Jiwheyẹwhe yetọn,+ bọ devizọnwatọ ṣie Davidi na yin ahọvi to ṣẹnṣẹn yetọn.+ Yẹn Jehovah, lọsu wẹ ko dọ ẹ.

25 “‘“Podọ, yẹn na basi alẹnu jijọho tọn de hẹ yé,+ yẹn nasọ yàn gbekanlin ylankan lẹ sẹ̀ sọn aigba lọ ji,+ na yé nido nọ nọ̀ danfafa ji bo nọ mlọnai to zungbo lẹ mẹ to jijọho mẹ.+ 26 Yẹn na hẹn yewlẹ po lẹdo okọ́ta tọn ṣie po zun dona de,+ yẹn nasọ hẹn jikun nado nọ ja to ojlẹ sisọ etọn mẹ. Dona lẹ na nọ ja di jikun.+ 27 Atin danji tọn lẹ na nọ de sinsẹ́n yetọn lẹ tọ́n, aigba lọ nasọ yọ́n na jinukun,+ podọ yé na nọ nọ̀ e ji to jijọho mẹ. Yé nasọ yọnẹn dọ yẹn wẹ Jehovah to whenue yẹn na wẹ́n opò zẹgẹ yetọn tọn lẹ+ bo na whlẹn yé sọn mẹhe hẹn yé zun afanumẹ lẹ si. 28 Akọta lẹ ma nasọ nọ yangbé yetọn ba, gbekanlin aigba ji tọn lẹ ma nasọ tlẹ́n yé dù ba, podọ yé na nọ nọ̀ jijọho mẹ, bọ mẹde ma na nọ dobuna yé.+

29 “‘“Yẹn na hẹn yé diyin* gbọn jinukun dido dali, yé ma nasọ kú gbọn huvẹ dali to aigba lọ ji ba,+ podọ akọta lẹ ma na nọ duto yé ji ba.+ 30 ‘To whenẹnu wẹ yé na yọnẹn dọ yẹn, Jehovah Jiwheyẹwhe yetọn, tin po yé po, podọ dọ omẹ ṣie lẹ wẹ owhé Islaeli tọn,’+ wẹ Oklunọ Nupojipetọ Jehovah dọ.”’

31 “‘Na nuhe dù mì lẹngbọ ṣie lẹ,+ yèdọ lẹngbọ he go yẹn nọ penukundo lẹ, gbẹtọ wẹ mìwlẹ, podọ yẹn wẹ Jiwheyẹwhe mìtọn,’ wẹ Oklunọ Nupojipetọ Jehovah dọ.”