Ezekiẹli

44 E plan mi lẹkọ gbọn aliho họngbo gbonu tọn fiwiwe lọ tọn nù pannukọn whèzẹtẹn+ bọ e to súsú.+ 2 Whenẹnu wẹ Jehovah dọna mi dọmọ: “Họngbo ehe na gbọṣi súsú. E ma dona nọ yin hùnhùn, podọ mẹdepope ma dona nọ gbọn finẹ biọ e mẹ; na Jehovah Jiwheyẹwhe Islaeli tọn ko gbọn finẹ biọ e mẹ wutu,+ enẹwutu wẹ e dona gbọṣi súsú. 3 Ṣigba, ahọvi lọ na sinai to e mẹ nado dù akla to Jehovah nukọn,+ na ahọvi de wẹ ewọ. E na biọ e mẹ gbọn họngbo atọ̀họ̀ lọ tọn nù, e nasọ tọ́nyi gbọn finẹ.”+

4 E sọ plan mi gbọn họngbo agewaji tọn lọ nù yì tẹmpli lọ nukọn. To whenue n’pọ́n, n’mọdọ gigo Jehovah tọn ko gọ́ tẹmpli Jehovah tọn mẹ.+ N’sọ ṣinyọ́n nukunmẹ ai.+ 5 Todin, Jehovah dọna mi dọmọ: “Visunnu gbẹtọ tọn, na ayidonugo, pọ́n, bo dotoai po sọwhiwhe po na nuhe* yẹn to didọna we lẹpo gando osẹ́ndoai lẹ po osẹ́n tẹmpli Jehovah tọn tọn lẹ po go. Yí sọwhiwhe do doayi ohọ̀n tẹmpli lọ tọn lẹ po nùvo fiwiwe lọ tọn lẹ po go.+ 6 Hiẹ na dọna owhé atẹṣitọ Islaeli tọn dọ, ‘Nuhe Oklunọ Nupojipetọ Jehovah dọ die: “Owhé Islaeli tọn E, osùnú he mì wà lẹ ko pé. 7 To whenue mì plan jonọ he ma gboadà to ahun mẹ podọ to agbasa go lẹ biọ fiwiwe ṣie mẹ, yé hẹn tẹmpli ṣie flu. Mì hẹn akla ṣie, ojó po ohùn po wá dile mì gbẹ́ pò to osùnú mìtọn lẹ yí do to alẹnu ṣie gbà mapote. 8 Mì ma penukundo onú wiwe ṣie lẹ go.+ Kakatimọ, mì de mẹdevo lẹ nado penukundo azọngban lẹ go to fiwiwe ṣie mẹ.”’

9 “‘Nuhe Oklunọ Nupojipetọ Jehovah dọ die: “Jonọ he nọ nọ̀ Islaeli bo ma gboadà to ahun mẹ podọ to agbasa go depope ma sọgan biọ fiwiwe ṣie mẹ.”’

10 “‘Ṣigba, Levinu he danbú pete sọn dè e+ to whenue Islaelivi lẹ danbú sọn dè e bo hodo boṣiọ hiọawu* yetọn lẹ na jiya kọdetọn nuṣiwa yetọn lẹ tọn. 11 Yé nasọ lẹzun lizọnyitọ lẹ to fiwiwe ṣie mẹ nado nọ penukundo họngbo tẹmpli lọ tọn lẹ go+ podọ nado nọ yilizọn to tẹmpli mẹ. Yé na nọ hù avọ́nunina mimẹ̀ blebu lọ po avọ́sannu lọ po na gbẹtọ lẹ, yé nasọ nọ ṣite to gbẹtọ lẹ nukọn nado yilizọn na yé. 12 Na yé yilizọn na yé to boṣiọ hiọawu yetọn lẹ nukọn bo lẹzun zannu ahlida tọn he hẹn owhé Islaeli tọn nado waylando wutu,+ enẹ wẹ zọ́n bọ yẹn ze alọ ṣie daga sọta yé bo whlé,’ wẹ Oklunọ Nupojipetọ Jehovah dọ, ‘podọ yé nasọ jiya kọdetọn nuṣiwa yetọn lẹ tọn. 13 Yé ma na dọnsẹpọ mi nado sẹ̀n taidi yẹwhenọ ṣie lẹ kavi dọnsẹpọ depope to onú wiwe kavi onú wiwe gbaugbau ṣie lẹ mẹ podọ yé nasọ duwinyan na osùnú he yé ko wà lẹ wutu. 14 Ṣigba, yẹn na hẹn yé zun mẹhe nọ penukundo azọngban tẹmpli lọ tọn lẹ go, nado nọ penukundo sinsẹ̀nzọn etọn po nuhe dona yin wiwà to e mẹ lẹpo po go.’+

15 “‘Na nuhe dù yẹwhenọ Levinu lẹ, yèdọ visunnu Zadọki tọn+ he penukundo azọngban fiwiwe ṣie tọn lẹ go to whenue Islaelivi lẹ danbú sọn dè e lẹ,+ yewlẹ wẹ na dọnsẹpọ mi nado yilizọn na mi, yé nasọ ṣite to nukọn ṣie nado na ojó+ lọ po ohùn+ lọ po hlan mi,’ wẹ Oklunọ Nupojipetọ Jehovah dọ. 16 ‘Yewlẹ wẹ na nọ biọ fiwiwe ṣie mẹ bo na nọ dọnsẹpọ tafo ṣie nado yilizọn na mi+ bo nasọ nọ penukundo azọngban he yẹn dena yé lẹ go.+

17 “‘Eyin yé biọ họngbo awánu homẹ tọn lọ tọn mẹ, awù alavọ tọn lẹ wẹ yé dona nọ do.+ Yé ma dona nọ do awù kanlin-fún tọn depope to whenue yé to lizọnyi to họngbo awánu homẹ tọn lọ tọn lẹ mẹ kavi to ohò etọn mẹ. 18 Yé dona nọ blá tabla alavọ tọn lẹ, podọ ṣokoto-gli alavọ tọn lẹ wẹ yé na nọ do nado ṣinyọnnudo alinkàn yetọn.+ Yé ma dona nọ do nudepope he na hẹn yé nado jẹdẹ́n. 19 Whẹpo yé nado tọ́nyi awánu gbonu tọn lọ mẹ—yèdọ awánu gbonu tọn he mẹ gbẹtọ lẹ tin te lọ—yé dona de awù he yé yí do yilizọn lẹ+ bo bẹ yé do abò núdùdù tọn wiwe* lọ lẹ mẹ.+ Enẹgodo, yé na do awù devo lẹ na yé nikaa yí awù yetọn lẹ do hẹn gbẹtọ lẹ zun wiwe.* 20 Yé ma dona nọ whlẹ́ ota+ kavi dike oda yetọn ni dite. Yé dona nọ pà oda yetọn. 21 Yẹwhenọ lẹ ma dona nọ nù ovẹn to whenue yé biọ awánu homẹ tọn lọ mẹ.+ 22 Yé ma dona yí asuṣiọsi kavi yọnnu he basi gbẹdai depope taidi asi;+ ṣigba, yé sọgan dà yọnnu he to alọji de sọn kúnkan Islaeli tọn mẹ kavi asuṣiọsi yẹwhenọ de tọn.’+

23 “‘Yé dona nọ do vogbingbọn he tin to nuhe yin wiwe po onú paa lẹ po ṣẹnṣẹn hia omẹ ṣie lẹ; yé nasọ nọ plọn yé vogbingbọn to onú mawé po nuhe wé po ṣẹnṣẹn.+ 24 Yé dona wleawu nado nọ dawhẹ to whẹho he biọ whẹdida de mẹ;+ yé dona nọ dawhẹ sọgbe hẹ nudide whẹdida tọn ṣie lẹ.+ Yé dona nọ yìn osẹ́n po osẹ́ndoai ṣie lẹ po gando hùnwhẹ ṣie lẹpo+ go bo nasọ nọ klan gbọjẹzan ṣie lẹ do wiwe. 25 Yé ma dona nọ sẹpọ oṣiọ gbẹtọvi depope tọn na yé nikaa yin hinhẹn zun mawé. Amọ́, yé sọgan hẹn yede zun mawé na otọ́, onọ̀, visunnu, viyọnnu, nọvisunnu kavi na nọviyọnnu he ma ko wlealọ de tọn wutu.+ 26 Podọ to lẹ̀wé yẹwhenọ de tọn godo, e dona nọtena azán ṣinawe. 27 To azán he gbè e na biọ ofi wiwe lọ mẹ, yèdọ biọ awánu homẹ tọn lọ mẹ, nado yilizọn to ofi wiwe lọ mẹ, e dona na avọ́nunina ylando tọn etọn,’+ wẹ Oklunọ Nupojipetọ Jehovah dọ.

28 “‘Nuhe na yin ogú yetọn die: Yẹn wẹ ogú yetọn.+ Mì ma dona na yé nutindo depope to Islaeli, na yẹn wẹ nutindo yetọn. 29 Yewlẹ wẹ na nọ dù avọ́nunina jinukun-lili tọn+ lọ, avọ́nunina ylando tọn lọ po avọ́nunina whẹhuhu tọn+ lọ po, podọ nuhe yin didedovo to Islaeli lẹpo nasọ lẹzun yetọn.+ 30 Dagbe hugan sinsẹ́n bibia tintan lẹpo tọn po nunina wunmẹ lẹpo he mì na basi lẹ po na yin yẹwhenọ lẹ tọn.+ Podọ mì dona yí jinukun-lili sinsẹ́n tintan mìtọn lẹ tọn na yẹwhenọ lọ.+ Ehe na zọ́n bọ dona na gbọṣi whédo mìtọn lẹ ji.+ 31 Yẹwhenọ lẹ ma dona nọ dù ohẹ̀ kavi kanlin depope he kú difà kavi yin tintlẹ́n.’+