Ezekiẹli

48 “Yinkọ hẹnnu lọ lẹ tọn bẹsọn agewaji pete die: Mimá Dani tọn+ gbọn Hẹtlọni kaka yì jẹ Lẹbo-hamati*+ podọ jẹ Hazali-enani, podọ gbọn dogbó Damasku tọn ji pànta agewaji, to Hamati+ pá; e sọ dlẹnkan sọn dogbó whèzẹtẹn-waji tọn lọ kọ̀n yì dogbó whèyihọ-waji tọn kọ̀n. 2 Mimá Aṣeli tọn+ tin to dogbó Dani tọn ji, yèdọ bẹsọn dogbó whèzẹtẹn tọn jẹ dogbó whèyihọ tọn ji. 3 Mimá Naftali tọn+ tin to dogbó Aṣeli tọn ji, yèdọ bẹsọn dogbó whèzẹtẹn tọn jẹ dogbó whèyihọ tọn ji. 4 Mimá Manasse tọn+ tin to dogbó Naftali tọn ji, yèdọ bẹsọn dogbó whèzẹtẹn tọn jẹ dogbó whèyihọ tọn ji. 5 Mimá Eflaimi tọn tin to dogbó Manasse tọn ji,+ yèdọ bẹsọn dogbó whèzẹtẹn tọn jẹ dogbó whèyihọ tọn ji. 6 Mimá Leubẹni tọn tin to dogbó Eflaimi tọn ji,+ yèdọ bẹsọn dogbó whèzẹtẹn tọn jẹ dogbó whèyihọ tọn ji. 7 Mimá Juda tọn tin to dogbó Leubẹni tọn ji,+ yèdọ bẹsọn dogbó whèzẹtẹn tọn jẹ dogbó whèyihọ tọn ji. 8 To dogbó Juda tọn ji, yèdọ bẹsọn dogbó whèzẹtẹn tọn jẹ dogbó whèyihọ tọn ji, nunina he mì na dedovo dona gblo na awagbà* 25 000+ bo na sọzẹn hẹ mimá hẹnnu he pò lẹ tọn bẹsọn dogbó whèzẹtẹn tọn jẹ dogbó whèyihọ tọn ji. Fiwiwe lọ nasọ tin to ṣẹnṣẹn etọn.

9 “Nunina he mì dona dedovo na Jehovah na dite na awagbà 25 000 bo gblo na awagbà 10 000. 10 Ehe wẹ na yin nunina wiwe de na yẹwhenọ lẹ.+ E na yin awagbà 25 000 to agewaji, 10 000 to whèyihọ-waji, 10 000 to whèzẹtẹn-waji podọ 25 000 to hùwaji. Fiwiwe Jehovah tọn nasọ tin to ṣẹnṣẹn etọn. 11 E na yin yẹwhenọ he yin kinklandowiwe sọn visunnu Zadọki+ tọn mẹ lẹ tọn, yèdọ mẹhe penukundo azọngban he yẹn dena yé lẹ go bo ma danbú to whenue Islaelivi lẹ po Levinu lẹ po danbú.+ 12 Yé na tindo mimá de sọn aigba he yin didedovo taidi onú wiwe gbaugbau lọ mẹ, to dogbó Levinu lẹ tọn ji.

13 “Bọdo lẹdo yẹwhenọ lẹ tọn go tlolo, Levinu lẹ na tindo mimá de he na dite na awagbà 25 000 bo na gblo na awagbà 10 000. (Aigba lọ blebu na dite na awagbà 25 000 bo na gblo na awagbà 10 000.) 14 Yé ma dona sà adà dagbe hugan ehe depope kavi yí i do diọ devo kavi jo e na mẹdevo, na onú wiwe de wẹ aigba ehe yin na Jehovah.

15 “Lẹdo he pò bo gblo na awagbà 5 000 he to apá na dogbó he dite na awagbà 25 000 lọ na nọ yin yiyizan gbọn mẹhe nọ nọ̀ tòdaho lọ mẹ lẹ dali,+ yèdọ na owhé podọ na kanlindugbo. Tòdaho lọ nasọ tin to ṣẹnṣẹn etọn.+ 16 Ojlẹ tòdaho lọ tọn lẹ die: Dogbó agewaji tọn lọ yin awagbà 4 500, dogbó hùwaji tọn yin awagbà 4 500, dogbó whèzẹtẹn-waji tọn yin awagbà 4 500 podọ dogbó whèyihọ-waji tọn yin awagbà 4 500. 17 Kanlindugbo tòdaho lọ tọn na yin awagbà 250 to agewaji, 250 to hùwaji, 250 to whèzẹtẹn podọ 250 to whèyihọ.

18 “Tedidi mimá he pò lọ tọn na sọzẹn hẹ nunina wiwe lọ,+ yèdọ awagbà 10 000 to whèzẹtẹn podọ 10 000 to whèyihọ. E na sọzẹn hẹ nunina wiwe lọ, sinsẹ́n he e detọ́n lẹ nasọ yin núdùdù na mẹhe nọ wazọ́n to tòdaho lọ mẹ lẹ. 19 Mẹhe nọ wazọ́n to tòdaho lọ mẹ lẹ sọn hẹnnu Islaeli tọn lẹpo mẹ wẹ nasọ nọ pọ̀ aigba lọ.+

20 “Nunina lọ blebu dite na awagbà 25 000 bo sọzẹn to adà ẹnẹ lẹ mẹ. Mì dona de e dovo taidi nunina wiwe to pọmẹ hẹ nutindo tòdaho lọ tọn.

21 “Nuhe pò to awà awe nunina wiwe lọ po nutindo tòdaho lọ tọn lẹ po ji na yin ahọvi lọ tọn.+ E nasọ tin to apá na dogbó he dite na awagbà 25 000 lọ lẹ to whèzẹtẹn podọ to whèyihọ nunina lọ tọn. E na sọzẹn hẹ adà he bọdego lọ lẹ, podọ e na yin ahọvi lọ tọn. Nunina wiwe lọ po fiwiwe tẹmpli lọ tọn po nasọ tin to ṣẹnṣẹn etọn.

22 “Nutindo Levinu lẹ tọn po nutindo tòdaho lọ tọn po na tin to ṣẹnṣẹn na nuhe yin ahọvi lọ tọn. Lẹdo ahọvi lọ tọn na tin to dogbó Juda tọn+ po dogbó Bẹnjamini tọn po ṣẹnṣẹn.

23 “Na nuhe dù hẹnnu he pò lẹ, mimá Bẹnjamini tọn na dlẹnkan sọn dogbó whèzẹtẹn tọn kọ̀n jẹ dogbó whèyihọ tọn kọ̀n.+ 24 Mimá Simeoni tọn na tin to apá na dogbó Bẹnjamini tọn,+ yèdọ bẹsọn dogbó whèzẹtẹn tọn jẹ dogbó whèyihọ tọn ji. 25 Mimá Isakali tọn+ na tin to apá na dogbó Simeoni tọn, yèdọ bẹsọn dogbó whèzẹtẹn tọn jẹ dogbó whèyihọ tọn ji. 26 Mimá Zebuluni tọn na tin to apá na dogbó Isakali tọn,+ yèdọ bẹsọn dogbó whèzẹtẹn tọn jẹ dogbó whèyihọ tọn ji.+ 27 Mimá Gad tọn na tin to apá na dogbó Zebuluni tọn,+ yèdọ bẹsọn dogbó whèzẹtẹn tọn jẹ dogbó whèyihọ tọn ji. 28 Dogbó hùwaji tọn he to dogbó Gad tọn pá na bẹsọn Tamali+ yì jẹ otọ̀ Mẹlibati-kadẹṣi tọn kọ̀n,+ kakajẹ Agbàdo Tọ̀sisa tọn* lọ+ kọ̀n podọ yì Ohù Daho* lọ kọ̀n.

29 “Aigba he mì na má na hẹnnu Islaeli tọn lẹ taidi ogú de lọ niyẹn,+ podọ enẹlẹ wẹ na yin mimá yetọn,”+ wẹ Oklunọ Nupojipetọ Jehovah dọ.

30 “Ehelẹ wẹ na yin họntonu tòdaho lọ tọn lẹ: Agewaji na yin awagbà 4 500.+

31 “Oyín hẹnnu Islaeli tọn lẹ tọn wẹ na yin nina họngbo tòdaho lọ tọn lẹ. To họngbo atọ̀n he to agewaji lẹ mẹ, dopo na yin Leubẹni tọn, dopo na Juda podọ dopo na Levi.

32 “Adà he to whèzẹtẹn-waji lọ na dite na awagbà 4 500, podọ họngbo atọ̀n wẹ na tin to finẹ: dopo na Josẹfu, dopo na Bẹnjamini podọ dopo na Dani.

33 “Adà he to hùwaji lọ na yin awagbà 4 500 bo na tindo họngbo atọ̀n: dopo na Simeoni, dopo na Isakali podọ dopo na Zebuluni.

34 “Adà he to whèyihọ-waji lọ na dite na awagbà 4 500 bo na tindo họngbo atọ̀n: dopo na Gad, dopo na Aṣeli podọ dopo na Naftali.

35 “Ojlẹ etọn lẹdo pé yin awagbà 18 000. Podọ yinkọ tòdaho lọ tọn sọn azán enẹ gbè na nọ yin Jehovah Tin to Finẹ.”+